Olketa Israelite Faet lo War, So Why Nao Iumi No Faet?

LO WORLD War II wanfala Nazi officer shout lo samfala Jehovah’s Witness wea prisoner. Hem sei: “Sapos iufala disaed strong for no faet againstim France and England, iufala evriwan mas dae!” Nomata olketa Nazi soldia standap witim gun, no eniwan lo olketa brata hia laek joinim faet. Olketa no fraet for duim datwan! Evri Jehovah’s Witness garem sem tingting olsem olketa hia: Mifala disaed strong for no faet lo olketa war blo disfala world. Nomata pipol sei olketa bae killim mifala dae, mifala no teksaed lo olketa war.

1. PIPOL BLO GOD BIFOR WANFALA NATION NOMOA

Lo bifor, Jehovah chusim wanfala nation for kamap pipol blo hem, wea hem nao olketa Israelite. Hem sei olketa “barava pipol blong mi, winim evri narafala pipol long wol.” (Eksodas 19:5) And tu, God givim land for olketa stap lo hem. So from olketa wanfala nation nomoa, taem God komandim olketa for faetem nara nation, olketa bae no faet againstim or killim dae eni nara Israelite.a

Distaem, olketa wea worshipim Jehovah kam “from evri kantri and tribe and pipol and languis.” (Rev. 7:9) Sapos olketa faet lo war, maet olketa faetem or killim dae olketa nara Witness.

2. JEHOVAH KOMANDIM OLKETA ISRAELITE FOR FAET LO WAR

Lo bifor, Jehovah nao disaedem sapos olketa Israelite bae go lo war and why olketa shud duim datwan. For example, God judgem olketa Canaanite from olketa duim olketa nogud samting lo Promis Land, olsem for worshipim demon, durong, and sakrifaesim olketa pikinini blo olketa. So God talem olketa Israelite for go finisim olketa Canaanite, mekem olketa Israelite no duim olketa nogud samting hia. (Levitikas 18:24, 25) Then taem olketa Israelite stap lo Promis Land, God letem olketa for faet for defendim Israel lo taem wea enemy againstim olketa. (2 Sam. 5:17-25, NWT) Bat no enitaem Jehovah letem olketa for disaed seleva for go faet lo war. Taem olketa duim datwan, staka taem olketa kasem barava nogud samting.​—Nambas 14:41-45; Mektu Kronikols 35:20-24.

Distaem, Jehovah no letem olketa wea worshipim hem for faet lo war. Olketa kantri no faet for wanem God laekem, bat olketa faet nomoa for wanem olketa seleva laekem, olsem for kasem land, selen, or saed lo politik. Samfala sei olketa faet for protectim worship blo olketa or killim dae olketa enemy blo God, and God laekem olketa for duim datwan. Bat Jehovah sei hem nao bae protectim pipol blo hem, and bae finisim olketa enemy blo hem lo future lo war blo Armageddon. (Rev. 16:14, 16) Lo datfala war, God bae no iusim olketa man for faet, bat hem bae iusim Jesus and olketa angel lo heven.​—Rev. 19:11-15.

3. OLKETA ISRAELITE NO KILLIM DAE OLKETA WEA GAREM FAITH LO JEHOVAH

Lo bifor, army blo Israel savve killim dae nomoa olketa wea Jehovah judgem for dae, bat sevem olketa wea garem faith lo God. Tingim tufala example. Taem Jehovah sei for olketa Israelite distroem Jericho, olketa sevem Rahab and famili blo hem bikos lo faith blo hem. (Joshua 2:9-16; 6:16, 17) Then taem olketa Gibeonite showimaot faith lo God, olketa Israelite no attakim taon blo olketa.​—Joshua 9:3-9, 17-19.

Distaem, olketa army no sevem pipol wea garem faith lo God. And samfala taem olketa army killim dae pipol, nomata olketa no join lo faet.

4. OLKETA ISRAELITE MAS FOLLOWIM OLKETA RUL BLO GOD LO WAR

Lo bifor, olketa Israelite mas followim olketa instruction blo Jehovah taem olketa go lo war. For example, samfala taem God talem olketa Israelite for askem pipol lo taon wea olketa bae attakim sapos olketa laek for “mekem peace agreement” witim olketa. (Deut. 20:10, NWT) Jehovah expectim olketa soldia blo Israel tu for mas klin lo body, and for camp blo olketa mas klin. (Diutronomi 23:9-14) And hem expectim olketa for followim olketa hae standard blo hem. For example, taem nara army tekovarem wanfala taon olketa savve reipim olketa woman lo there, bat Jehovah stopem olketa Israelite for no duim olsem. And bihaen olketa tekovarem eni taon olketa mas weit wan month bifor olketa savve maritim eni woman from there.​—Diutronomi 21:10-13.

Distaem, staka kantri saenem agreement for followim olketa rul saed lo war for protectim olketa innocent pipol, bat staka taem olketa no followim olketa rul hia.

5. GOD HELPEM OLKETA ISRAELITE TAEM OLKETA FAET

Lo bifor, staka taem Jehovah helpem olketa Israelite for win lo olketa war. For example, Jehovah helpem olketa Israelite for tekovarem Jericho. Olketa Israelite followim instruction blo Jehovah for “singaot bikfala” then bae ‘bikfala wolston long taon hemi brek and foldaon’ mekem hem isi for olketa tekovarem datfala taon. (Joshua 6:20) And tu, Jehovah helpem olketa Israelite for win againstim olketa Amorite. “Hemi mekem olketa ston blong aes hemi gohed fo foldaon long olketa . . . Hemi kilim dae plande man moa winim namba long olketa man wea Josua wetem ami blong hem i kilim dae.”—Josh. 10:6-11.

OLKETA TRU CHRISTIAN TRAE FOR STAP GUD WITIM NARAWAN

Olsem iumi storyim, situation blo iumi hem difren from olketa Israelite bifor. Iumi storyim faevfala reason why iumi no faet lo war, bat olketa nara reason tu stap. For example, God sei hao lo olketa last day olketa wea hem teachim bae no “lanem moa hao for faet.” So hard for olketa faet lo war. (Isa. 2:2-4, NWT) And tu, Christ sei olketa disaepol blo hem bae “no olsem pipol long world.” So olketa bae no teksaed lo olketa war.​—John 15:19.

Christ sei tu for olketa follower blo hem for no feel nogud and kros lo narawan, bikos datwan savve mekem olketa for laek faet. (Matt. 5:21, 22) Hem sei olketa follower blo hem shud “stap gud witim narawan” and lovem olketa enemy blo olketa.​—Matt. 5:9, 44.

Hao nao iumi savve duim datwan? Nomata iumi no laek faet lo war, waswe, iumi no hapi lo samwan lo kongregeson wea datwan savve kosim raoa or kongregeson for no wan mind? Hem gud for iumi waka hard for aotem eni feeling olsem wea iumi garem.​—Jas. 4:1, 11.

Iumi no joinim olketa war wea gohed lo world, bat iumi laek for garem peace and love for each other. (John 13:34, 35) Iumi disaed strong for gohed neutral saed lo war from iumi luk forward for taem wea Jehovah bae finisim war for olowe.​—Sams 46:9.