Jehovah Bae Helpem Iu for Deal Witim Challenge wea Iu No Expectim

1. Wat nao iumi sure lo hem?

IUMI pipol blo Jehovah, so iumi savve hem lovem iumi and laekem iumi for enjoyim laef. (Rome 8:35-39) Iumi sure tu hao iumi savve evritaem kasem gud samting taem iumi followim Bible principle. (Isa. 48:17, 18) Bat, hao if iumi feisim olketa challenge wea iumi no expectim?

2. Olketa wanem challenge nao maet iumi feisim, and olketa wanem kwestin nao maet iumi savve tingim?

² Iumi evriwan wea worshipim Jehovah deal witim olketa problem. For example, maet samwan lo famili duim samting wea mekem iumi feel nogud. Maet iumi garem health problem wea mekem iumi hard for duim staka samting lo service blo Jehovah. Maet iumi safa from wanfala natural disaster. Or maet iumi kasem persecution bikos lo wanem iumi bilivim. Taem iumi feisim olketa challenge olsem, maet iumi ting: ‘Why nao diswan happen lo mi? Waswe, mi duim eni rong samting? Hao, Jehovah no hapi lo mi?’ Waswe, enitaem iu feel olsem? If olsem, no discourage. Staka faithful servant blo Jehovah bifor tu stragol for deal witim olketa feeling olsem.—Ps. 22:1, 2; Hab. 1:2, 3.

3. Wat nao iumi lanem from Sams 34:19 (SIPB)?

³ Readim Sams 34:19 (SIPB). Tingim tufala important point lo disfala scripture: (1) Man wea stret savve kasem staka trabol. (2) Jehovah sevem iumi from olketa trabol. Hao nao Jehovah sevem iumi? Hem helpem iumi for garem balance tingting abaotem olketa situation wea iumi feisim lo disfala world. Nomata Jehovah promisim hao bae iumi hapi taem iumi worshipim hem, datwan no minim bae iumi free from olketa problem. (Isa. 66:14) Hem laekem iumi for tingim future blo iumi, wea hem nao taem wea iumi bae enjoyim laef for olowe. (2 Cor. 4:16-18) Bat go kasem datfala taem, Jehovah bae helpem iumi each day for gohed faithful lo hem.—Lam. 3:22-24.

4. Wat nao bae iumi storyim lo disfala article?

⁴ Distaem bae iumi storyim wanem iumi savve lanem from example blo olketa wea faithful lo Jehovah lo bifor and distaem tu. Bae iumi storyim hao maet iumi feisim samfala challenge wea iumi no expectim. Nomata olsem, taem iumi depend lo Jehovah, hem bae evritaem helpem iumi. (Ps. 55:22) Taem iumi ting raonem olketa example olsem, tingim olketa kwestin hia: ‘Wat nao bae mi duim sapos mi nao feisim situation olsem? Hao nao olketa example hia strongim trust blo mi lo Jehovah? Hao nao mi savve followim olketa example hia?’

OLKETA EXAMPLE LO BIBLE

5. Olketa wanem problem nao Jacob garem witim Laban? (Lukim piksa lo front page.)

⁵ Olketa servant blo Jehovah wea Bible storyim feisim olketa challenge wea olketa no expectim. Tingim Jacob. Dadi blo hem talem hem for maritim wanfala lo olketa dota blo Laban wea hem relative blo olketa wea worshipim Jehovah, and dadi blo Jacob sei Jehovah bae barava blessim hem. (Gen. 28:1-4) So Jacob duim stret samting taem hem followim datwan. Hem lusim Canaan and go lo Laban, wea garem tufala dota, Leah and Rachel. Jacob barava lovem Rachel wea hem second dota blo Laban and hem agree for waka for Laban for sevenfala year bifor hem maritim Rachel. (Gen. 29:18) Bat situation no happen olsem wanem Jacob tingim. Laban trikim hem and givim hem first dota blo hem, Leah. Laban agree for Jacob maritim Rachel wan week bihaen, bat hem bae letem only if Jacob waka for sevenfala year moa. (Gen. 29:25-27) And tu, hao Laban deal witim Jacob saed lo bisnis hem barava unfair. For 20-fala year, Laban ravem Jacob!​—Gen. 31:41, 42.

6. Olketa wanem problem nao Jacob mas deal witim?

⁶ Jacob mas deal witim olketa nara problem tu. Jacob garem big famili, bat olketa son blo hem no stap gud tugeta. Olketa salem own brata blo olketa Joseph for kamap slave. Tufala son blo Jacob, Simeon and Levi, duim samting wea mek shame lo famili and lo nem blo Jehovah. And tu, waef wea Jacob lovem tumas, Rachel, hem dae taem hem bornem mek-tu pikinini blo hem. And bikos wanfala big hangere kamap, Jacob mas muv go lo Egypt nomata hem olo finis.​—Gen. 34:30; 35:16-19; 37:28; 45:9-11, 28.

7. Wat nao Jehovah duim for Jacob wea showim dat Hem lovem Jacob?

⁷ Nomata wanem happen, Jacob gohed garem faith lo Jehovah and olketa promis blo Hem. From datwan, Jehovah showim lo Jacob dat hem lovem hem. For example, nomata Laban ravem Jacob, Jehovah barava blessim Jacob witim staka material samting. And tingim tu hao Jacob mas hapi tumas lo Jehovah taem hem meetim moa son blo hem Joseph wea hem tingse hem dae finis. Wei wea Jacob fren gud witim Jehovah helpem hem for deal witim olketa challenge hia. (Gen. 30:43; 32:9, 10; 46:28-30) Taem iumi fren gud witim Jehovah, iumi tu savve deal witim eni challenge wea iumi no expectim.

8. Wat nao King David hope for duim?

⁸ King David hope for duim staka samting lo waka blo Jehovah, bat samfala taem hem no fit for duim. For example, hem barava laek for buildim temple for God blo hem. Hem storyim tingting blo hem lo profet Nathan, and Nathan sei: “Duim eni samting wea heart blo iu laekem, from tru God hem stap witim iu.” (1 Chron. 17:1, 2) Masbi David hapi tumas taem hem herem wanem Nathan talem. Maet kwiktaem nomoa hem start for planim datfala big project.

9. Wat nao David duim taem hem herem datfala nius wea hem no expectim?

⁹ Bat stretawe bihaen, profet blo Jehovah, Nathan, kam bak witim nius wea David no expectim. “Lo datfala sem naet,” Jehovah talem Nathan hao David bae no buildim datfala temple, bat wanfala son blo hem nao bae duim. (1 Chron. 17:3, 4, 11, 12) Wat nao David duim taem hem herem datfala nius? Hem changem goal blo hem. Hem start for hipimap selen and building material wea son blo Solomon bae needim for datfala project.—1 Chron. 29:1-5.

10. Wat nao Jehovah duim for blessim David?

¹⁰ Stretawe bihaen David herem dat bae hem no buildim temple, Jehovah mekem wanfala covenant witim hem. Jehovah promis hao wanfala lo laen blo David bae rul for olowe. (2 Sam. 7:16) Lo niu world, insaed datfala Thousand Year Rul blo Jesus, David bae hapi for savve hao King Jesus hem kam from laen blo hem! Disfala story helpem iumi for luksavve hao nomata iumi no fit for duim evri samting wea iumi hope for duim for Jehovah, God maet givim iumi olketa nara blessing wea iumi no expectim.

11. Wanem blessing nao olketa Christian lo first century kasem nomata Kingdom no rul lo taem wea olketa expectim? (Acts 6:7)

¹¹ Olketa Christian lo first century deal olketa situation wea olketa no expectim. For example, olketa laekem Kingdom blo God for kam, bat olketa no savve wat taem nao datwan bae happen. (Acts 1:6, 7) So wat nao olketa duim? Olketa busy for preach. Olketa lukim hao Jehovah blessim hard waka blo olketa taem olketa talemaot gud nius lo olketa nara ples.​—Readim Acts 6:7.

12. Wat nao olketa Christian lo first century duim taem wanfala big hangere kamap?

¹² Wantaem wanfala big hangere “kasem evri ples.” (Acts 11:28) Datwan affectim olketa Christian lo first century tu. Tingim hao olketa mas safa lo datfala hangere. Masbi olketa famili hed wari abaotem hao for provaed for famili. Bat waswe lo olketa young wan wea plan for duim moa samting lo ministry? Waswe, olketa ting for weit firstaem bifor olketa duim datwan? Olketa Christian hia change for fitim datfala situation. Olketa gohed duim best blo olketa lo ministry and hapi for sharem material samting wea olketa garem witim olketa nara Christian lo Judea.​—Acts 11:29, 30.

13. Olketa wanem blessing nao olketa Christian kasem lo datfala taem blo hangere?

¹³ Olketa wanem blessing nao olketa Christian kasem lo datfala taem blo hangere? Olketa wea kasem relief supply luksavve Jehovah gohed helpem olketa. (Matt. 6:31-33) Olketa mas barava feel klos lo olketa wea kam for helpem olketa. And olketa wea givim donation and olketa wea help lo olketa narafala wei lo datfala relief waka kasem hapi from wei for give. (Acts 20:35) Jehovah blessim evriwan from olketa change for fitim datfala situation.

14. Wat nao happen lo Barnabas and aposol Paul, and wat nao kamaot from datwan? (Acts 14:21, 22)

¹⁴ Staka taem olketa Christian lo first century kasem persecution, and samfala taem olketa no expectim datwan. Tingim samting wea happen lo Barnabas and aposol Paul taem tufala preach lo Lystra. Firstaem pipol welkamim olketa. Bat bihaen, samfala wea againstim Paul mekem pipol for againstim hem and sutim hem lo ston and leavim hem for dae. (Acts 14:19) Nomata olsem, Barnabas and Paul gohed preach lo olketa nara ples. Wat nao kamaot from datwan? Staka pipol nao “kamap disaepol,” and toktok and example blo tufala strongim olketa brata and sista. (Readim Acts 14:21, 22.) From Barnabas and Paul no givap for preach nomata tufala kasem persecution, staka nao kasem gud samting. Taem iumi no givap lo waka wea Jehovah askem iumi for duim, bae iumi kasem blessing.

OLKETA EXAMPLE DISTAEM

15. Wat nao iu lanem from example blo Brata Macmillan?

¹⁵ Bifor 1914, pipol blo Jehovah expectim samfala samting for happen. For example, tingim Brata Macmillan. Olsem staka lo datfala taem, Brata Macmillan tingse klosap nao bae hem kasem reward blo hem for go lo heven. Lo wanfala tok wea hem givim lo September 1914, hem sei: “Maet diswan hem last tok blo mi.” Bat datwan hem no last tok blo hem. Brata Macmillan sei: “Maet mifala samfala kwiktaem tumas for sei mifala bae go lo heven nao.” Hem sei tu: “Samting wea iumi shud duim hem for gohed busy lo waka blo Lord.” And datwan nao wanem Brata Macmillan duim. Hem gohed strong lo ministry. Hem garem privilege for encouragem staka brata wea olketa putim olketa lo prison bikos olketa no joinim army. And nomata hem olo, hem gohed faithful for attendim olketa meeting. Taem Brata Macmillan weit for kasem reward blo hem, wanem gud samting nao hem kasem from hem iusim gud taem blo hem? No longtaem bifor hem dae lo 1966, hem sei: “Faith blo mi hem strong kam kasem distaem.” Datwan hem nambawan example for iumi, especially if iumi deal witim samfala test wea gohed for longtaem winim wanem iumi expectim.​—Heb. 13:7.

16. Wanem challenge nao Herbert Jennings and waef blo hem feisim wea tufala no expectim? (James 4:14)

¹⁶ Staka pipol blo Jehovah stragol witim health problem wea olketa no expectim. For example, lo laef story blo Brata Herbert Jennings,b hem storyim hao hem and waef enjoyim missionary waka lo Ghana. Bat gogo, hem kasem wanfala sik wea barava affectim mind and feeling blo hem. Brata Jennings quotem toktok from James 4:14 and sei niu situation blo hem, hem olsem “wanfala ‘tumoro’ wea mifala no expectim.” (Readim.) Hem sei: ‘From mifala mas acceptim wat hem happen, mifala mas lusim Ghana and olketa klos fren blo mifala and go bak lo Canada for medical treatment.’ Jehovah helpem Brata Jennings and waef blo hem for gohed faithful for servem Hem nomata tufala feisim datfala challenge.

17. Hao nao example blo Brata Jennings helpem olketa nara brata and sista?

¹⁷ Olketa honest toktok wea Brata Jennings talem lo laef story blo hem barava encouragem olketa narawan. Wanfala sista sei: “Taem mi readim disfala article hem barava encouragem mi. . . . Taem mi read abaotem hao Brata Jennings mas lusim assignment for deal witim sik blo hem, datwan helpem mi for garem balance tingting abaotem situation blo mi.” Wanfala brata sei tu: “Bihaen mi elder for tenfala year, mi mas lusim privilege blo mi bikos lo wanfala sik wea affectim mind blo mi. From mi feel iusles, staka taem mi savve depress tumas taem mi readim olketa laef story. . . . Bat story blo Brata Jennings wea no givap, hem barava helpem mi.” Datwan helpem iumi for luksavve taem iumi no givap lo eni problem wea iumi no expectim, datwan savve encouragem olketa narawan. Nomata situation lo laef hem no olsem wat iumi hope for hem, example blo iumi for gohed faithful and no givap savve strongim narawan.​—1 Pet. 5:9.

18. Olsem iumi lukim lo piksa, wat nao iumi lanem from example blo datfala widow lo Nigeria?

¹⁸ Olketa hard taem olsem datfala COVID-19 pandemic hem affectim staka pipol blo Jehovah. For example, wanfala widow lo Nigeria hem barava short lo kaikai. Wanfala morning, dota blo hem askem hem wat moa bae tufala kaikaim bihaen tufala kukim last kap rice blo tufala. Datfala sista talem dota blo hem hao tufala no garem eni selen or kaikai nao, bat tufala shud followim example blo datfala widow blo Zarephath. Tufala kukim last kaikai blo tufala and barava trustim Jehovah. (1 Ki. 17:8-16) Lo sem day, hem no even kasem lunch taem yet, bat tufala kasem nao relief supply from olketa brata and sista. Insaed datfala supply hem inaf kaikai wea fitim tufala for winim tufala week. Sista hia sei hem no expectim dat Jehovah hem barava lisin lo wanem hem talem lo dota blo hem. Tru nao, taem iumi depend lo Jehovah, olketa samting wea iumi no expectim savve mekem iumi klos lo Jehovah.​—1 Pet. 5:6, 7.

19. Wat kaen persecution nao kasem Aleksey Yershov?

¹⁹ Lo olketa year wea just go pas, staka brata and sista kasem persecution wea maet olketa no expectim. Tingim Brata Aleksey Yershov wea stap lo Russia. Taem hem baptaes lo 1994, pipol blo Jehovah lo datfala ples garem lelebet freedom. Bat bihaen, situation blo olketa lo Russia hem change. Lo 2020, olketa raidim haos blo Brata Yershov and tekem staka samting blo hem. Samfala month bihaen, gavman openem olketa criminal case againstim hem. And samting wea mekem hem worse moa, reason why olketa tekem hem lo kot, hem bikos lo olketa video wea wanfala man recordim. Man hia hem pretend for studyim Bible for winim wan year. Datwan hem barava nogud samting.

20. Wat nao Brata Yershov duim for strongim frenship blo hem witim Jehovah?

²⁰ Waswe, eni gud samting kamaot from persecution wea kasem Brata Yershov? Yes. Frenship blo hem witim Jehovah hem barava strong. Hem sei: “Mi and waef prea tugeta staka taem. Mi luksavve mi hard for deal witim disfala situation if Jehovah no helpem mi.” Hem sei tu: “Personal study helpem mi for deal witim wei for discourage. Mi ting raonem olketa example blo olketa faithful servant blo Jehovah bifor. Staka story lo Bible showimaot hem barava important for no wari and for trustim Jehovah.”

21. Wat nao iumi lanem lo disfala article?

²¹ Wat nao iumi lanem lo disfala article? Lo world distaem, iumi savve feisim samfala challenge wea iumi no expectim. Nomata olsem, Jehovah evritaem helpem olketa servant blo hem wea trustim hem. Theme scripture blo iumi sei: “Man wea hemi stret maet hemi safa long plande trabol, bat [Jehovah] hemi sevem hem from olketa trabol ya.” (Sams 34:19, SIPB) Iumi no laek for gohed tingim hard taem wea kasem iumi, bat iumi laek tingim paoa wea Jehovah garem for helpem iumi. Then olsem aposol Paul talem, iumi tu savve sei: “Nomata wanem samting hem kasem mi, paoa wea mi kasem from God nao hem strongim mi for gohed.”​—Phil. 4:13.