Hao Nao for Strongim Faith blo Iumi lo Promis blo Jehovah for Wanfala Niu World?

1-2. Wat nao iumi need for duim taem iumi gohed for weitim niu world?

IUMI tinghae tumas lo promis blo Jehovah for changem disfala nogud world witim wanfala raeteous niu world. (2 Pet. 3:13) Nomata iumi no savve wat taem datfala niu world bae kam, olketa samting wea happen lo world distaem showimaot hem klosap.​—Matt. 24:32-34, 36; Acts 1:7.

² Nomata hao long nao iumi stap lo truth, iumi evriwan need for gohed strongim faith blo iumi taem iumi weitim datfala promis for kamap tru. Why nao olsem? Bikos faith blo iumi savve kamap wik. Aposol Paul kolem datwan, “datfala sin wea savve isi for spoelem” iumi. (Heb. 12:1) For faith blo iumi no kamap wik, iumi need for evritaem ting raonem olketa pruv wea showimaot hao niu world hem klosap for kam.​—Heb. 11:1.

3. Wat nao bae iumi storyim lo disfala article?

³ Lo disfala article, bae iumi storyim thrifala samting iumi savve duim wea savve strongim faith blo iumi lo promis blo Jehovah abaotem niu world: (1) ting raonem ransom, (2) ting abaotem paoa blo Jehovah, and (3) spendem taem for duim olketa spiritual samting. Then bae iumi storyim hao message wea Jehovah talem lo Habakkuk hem savve strongim faith blo iumi distaem. Bat firstaem, bae iumi storyim samfala situation wea maet kamap wea bae iumi need for garem strong faith lo promis blo God for wanfala niu world, for deal witim.

OLKETA SITUATION WEA IUMI NEEDIM STRONG FAITH FOR DEAL WITIM

4. Iumi needim strong faith for helpem iumi disaedem olketa wanem disison?

⁴ Evriday, iumi needim strong faith for helpem iumi mekem olketa gud disison. For example, iumi need for disaedem hu for associate witim, entertainment, education, marit, pikinini, and waka for selen. Hem gud for tingim diswan: ‘Waswe, samting mi chusim showimaot dat mi luksavve disfala world klosap for finis and God bae changem witim wanfala niu world? Or waswe, samting mi chusim showimaot mi followim tingting blo pipol wea no garem eni hope?’ (Matt. 6:19, 20; Luke 12:16-21) Iumi bae mekem olketa gud disison if iumi garem strong faith dat niu world hem klosap for kam.

5-6. Taem iumi insaed hard taem, why nao iumi need for garem strong faith? Storyim example.

⁵ Iumi need for garem strong faith tu for helpem iumi deal witim olketa hard taem. Iumi maet feisim persecution, kasem serious sik, or olketa nara samting wea mekem iumi discourage. Firstaem, maet iumi strong for deal witim datfala hard taem. Bat if datfala hard taem gohed for longtaem, iumi bae needim strong faith for deal witim mekem iumi no givap and gohed hapi for servem Jehovah.​—Rome 12:12; 1 Pet. 1:6, 7.

⁶ Taem iumi insaed lo hard taem, maet iumi feel olsem niu world blo Jehovah hem hard for kam. If iu feel olsem, waswe, datwan minim faith blo iu hem wik? Nomoa. Tingim disfala example. If hem rain for longfala taem maet iumi feel olsem hem hard for sun nao, bat iumi savve hem bae sun. Hem olsem tu, taem iumi barava discourage iumi maet feel olsem niu world bae hard for kam. Bat if iumi garem strong faith iumi savve promis blo God bae kamap tru. (Ps. 94:3, 14, 15; Heb. 6:17-19) From iumi barava sure lo datwan, iumi bae gohed strong for worshipim Jehovah.

7. Wanem kaen tingting nao iumi mas careful lo hem?

⁷ Iumi needim strong faith tu mekem iumi gohed duim preaching waka. Staka pipol wea iumi preachim “gud nius” lo olketa, olketa tingse niu world blo God bae hem hard tumas for kam. (Matt. 24:14; Ezek. 33:32) Iumi mas careful for no letem kaen tingting olsem for affectim iumi. For duim datwan, iumi mas gohed strongim faith blo iumi. Bae iumi storyim thrifala samting wea iumi savve duim.

TING RAONEM RANSOM

8-9. Hao nao wei for ting raonem ransom savve strongim faith blo iumi?

⁸ Wanfala samting iumi savve duim for strongim faith blo iumi hem for ting raonem ransom. Wei wea God givim datfala ransom sakrifaes hem pruvim hao olketa promis blo hem bae kamap tru. Taem iumi barava ting raonem why God givim datfala ransom and samting wea involve insaed, datwan savve strongim faith blo iumi hao promis blo God for laef olowe lo niu world bae kamap tru. Why nao iumi sei olsem?

⁹ Tingim olketa samting wea involve insaed datfala ransom. Jehovah sendem kam first born son wea hem lovem tumas, and wea hem best fren blo hem for born olsem perfect man lo earth. Taem Jesus lo earth, hem kasem staka hard taem. Then hem barava safa and dae. Jehovah peim price wea hae tumas! Loving God blo iumi bae no letem son blo hem for safa and dae olsem, just for givim iumi gudfala laef wea hem for lelebet taem nomoa. (John 3:16; 1 Pet. 1:18, 19) From hem peim iumi lo price wea hae tumas, Jehovah bae mek sure promis blo hem for laef olowe lo niu world bae kamap tru.

TING ABAOTEM PAOA BLO JEHOVAH

10. Olsem Ephesus 3:20 storyim, wat nao Jehovah savve duim?

¹⁰ Mek-tu samting iumi savve duim for strongim faith blo iumi, hem for ting abaotem paoa blo Jehovah. Hem garem paoa for fulfillim evri promis blo hem. Hem tru, hem lelebet hard for pipol bilivim promis for laef olowe lo niu world bae kamap tru. Bat staka taem nao Jehovah promis for duim samting wea hard for olketa human being duim. Datwan hem fitim bikos hem Olmaeti God. (Job 42:2; Mark 10:27) So iumi no sapraes taem hem promis for duim olketa big samting olsem.​—Readim Ephesus 3:20.

11. Storyim wanfala example lo olketa promis blo God wea pipol ting hem hard for happen. (Lukim box “Samfala Promis wea Fulfill wea Pipol Ting Hem Hard for Happen.”)

¹¹ Tingim samfala promis wea luk olsem hem hard for kamap tru wea Jehovah talem lo pipol blo hem lo bifor. Hem promisim Abraham and Sarah hao tufala bae garem pikinini taem tufala olo. (Gen. 17:15-17) Hem talem tu lo Abraham hao hem bae givim land blo Canaan lo olketa pikinini blo hem. Taem olketa Israelite wea olketa nao pikinini blo Abraham, slave lo Egypt for staka year, luk olsem datfala promis hem hard for happen. Bat gogo hem kamap tru. Jehovah promisim tu Elizabeth hao nomata hem olo bae hem garem pikinini. Hem talem tu Mary, wea hem virgin, dat bae hem bornem Son blo Hem, wea datwan fulfillim promis blo Jehovah wea hem talem staka thousand year finis lo garden blo Eden!​—Gen. 3:15.

12. Wat nao Joshua 23:14 and Isaiah 55:10, 11 teachim abaotem paoa blo Jehovah?

¹² Taem iumi ting raonem wei wea Jehovah talem samting and hem fulfill, datwan strongim faith blo iumi dat Jehovah garem paoa for mekem wanfala niu world. (Readim Joshua 23:14; Isaiah 55:10, 11.) Taem iumi duim datwan, bae iumi savve helpem olketa narawan for luksavve promis blo God for niu world bae kamap tru. Jehovah seleva sei olsem abaotem niu heven and niu earth: “Man savve trustim olketa toktok hia [bikos] hem barava tru.”​—Rev. 21:1, 5.

SPENDEM TAEM FOR DUIM OLKETA SPIRITUAL SAMTING

13. Hao nao olketa kongregeson meeting savve strongim faith blo iumi? Explainim.

¹³ Mek-thri samting wea savve strongim faith blo iumi hem for spendem taem for duim olketa spiritual samting. For example, tingim hao olketa kongregeson meeting savve helpem iumi. Anna, wanfala sista wea spendem staka year insaed full-taem service, sei: “Olketa meeting barava strongim faith blo mi. Nomata speaker no really savve gud hao for teach or hem no storyim eni niu point, staka taem bae mi herem samting wea helpem mi for minim gud olketa Bible truth, and datwan strongim faith blo mi.”b Koment blo olketa brata and sista tu savve strongim faith blo iumi.​—Rome 1:11, 12; 10:17.

14. Hao nao ministry strongim faith blo iumi?

¹⁴ Faith blo iumi savve kamap strong tu taem iumi duim ministry. (Heb. 10:23) Barbara, wea servem Jehovah for winim 70 year finis, sei: “Preaching waka hem evritaem strongim faith blo mi. Taem mi story abaotem olketa nambawan promis blo Jehovah, datwan strong go moa faith blo mi.”

15. Hao nao personal study strongim faith blo iumi? (Lukim tu piksa.)

¹⁵ Nara spiritual samting wea iumi savve duim for strongim faith blo iumi hem personal study. Susan storyim hao samting wea helpem hem for duim personal study hem for followim wanfala schedule. Hem sei: “Lo Sunday, mi preparem Wastaoa Study for next week. Lo Monday and Tuesday, mi preparem midol week meeting. Lo olketa nara day, mi duim samfala study project.” Taem Susan followim gud schedule blo hem, datwan strongim faith blo hem. Irene, wea waka lo world hedquarter for staka year, storyim hao faith blo hem kamap strong taem hem studyim olketa Bible profesi. Hem sei: “Mi sapraes tumas for lukim hao nomata olketa smol part lo olketa profesi blo Jehovah hem fulfill tu.”c

“BAE HEM KAM TRU”

16. Why nao toktok blo Jehovah for Habakkuk hem fitim iumi distaem? (Hebrew 10:36, 37)

¹⁶ For long taem finis samfala pipol blo Jehovah weitim end for kam. Lo tingting blo iumi, maet iumi tingse God delay for fulfillim olketa promis blo hem. Jehovah savve lo datwan dastawe hem story olsem lo profet Habakkuk: “Vision hia hem for taem wea God hem markem, And hem hariap go for kasem end, and bae hem no laea. Nomata sapos hem shud delay, gohed for weitim! Bikos bae hem kam tru. Bae hem no leit!” (Hab. 2:3) Waswe, datfala toktok hem for Habakkuk nomoa? Or hem for iumi distaem tu? Holy spirit muvim aposol Paul for talem toktok wea Habakkuk raetem for olketa Christian wea weitim datfala niu world. (Readim Hebrew 10:36, 37.) Tru nao, iumi sure nomata datfala promis maet luk olsem hem delay, “bae hem kam tru. Bae hem no leit!”

17. Hao nao wanfala sista followim kaonsel wea Jehovah givim lo Habakkuk?

¹⁷ Staka servant blo Jehovah followim kaonsel blo Hem for ‘gohed for weit’ nomata olketa mas weit for staka year. For example, tingim Louise wea start for servem Jehovah lo 1939. Hem sei: “Lo datfala taem, mi tingse Armageddon bae kam bifor mi finisim hae skul. Bat hem no happen. Samting wea helpem mi lo olketa year bihaen, hem for readim olketa story lo Bible wea mi kolem, ‘story abaotem olketa wea weit,’ olsem story blo Noah, Abraham, Joseph, and olketa narawan wea mas weit longtaem bifor olketa kasem reward wea Jehovah promisim lo olketa. Disfala tingting for gohed weit hem helpem mi and olketa narawan for barava trustim hao niu world hem klosap for kam.” Staka narawan wea worshipim Jehovah tu ting olsem!

18. Hao nao wei for lukluk lo creation savve strongim faith blo iumi lo niu world?

¹⁸ Hem tru, niu world hem no kam yet. Bat, tingim samfala samting wea iumi savve lukim distaem, olsem olketa star, tree, animal, and iumi olketa human being. Olketa samting hia no stap bifor, nomata olsem iumi lukim dat evri samting hia really stap raonem iumi. Olketa stap bikos Jehovah nao creatim. (Gen. 1:1, 26, 27) God promis for wakem wanfala niu world. Hem bae fulfillim datfala promis. Lo niu world, pipol bae healthy and enjoyim laef olowe. Lo taem wea God markem, bae iumi lukim datfala niu world kamap real olsem evri samting wea iumi lukim raonem iumi distaem.​—Isa. 65:17; Rev. 21:3, 4.

19. Hao nao iu savve strongim faith blo iu?

¹⁹ Go kasem datfala taem, iusim evri chance wea iu garem for strongim faith blo iu. Gohed strongim wei wea iu tinghae lo ransom. Ting abaotem paoa blo Jehovah. Spendem staka taem for duim olketa spiritual samting. Taem iu duim datwan, iu bae wanfala lo ‘olketa wea kasem samting wea God promisim bikos iufala garem faith and iufala patient.’​—Heb. 6:11, 12; Rome 5:5.