Lane From Example blo Daniel

1. Why nao olketa blo Babylon admirem profet Daniel?

PROFET Daniel hem young man nomoa taem olketa blo Babylon tekem hem farawe from hom blo hem olsem prisoner blo war. Bat nomata hem young, olketa pipol hia admirem hem. Olketa lukim appearance blo Daniel hao hem ‘no garem problem lo body, hem luk naes,’ and hem kam from wanfala important famili. (1 Sam. 16:7) From datwan, olketa blo Babylon trainim hem for kasem spesol privilege lo palace blo king.​—Dan. 1:3, 4, 6.

2. Hao nao Jehovah feel abaotem Daniel? (Ezekiel 14:14)

² Bat Jehovah lovem Daniel bikos Daniel chus for loyal lo Hem, and no bikos lo appearance and position blo hem. Luk olsem Daniel hem samting olsem 20 years old nomoa taem Jehovah sei hem raeteous olsem Noah and Job wea faithful for servem Jehovah for staka year. (Gen. 5:32; 6:9, 10; Job 42:16, 17; readim Ezekiel 14:14.) Daniel garem barava interesting laef and Jehovah gohed for lovem hem lo full laef blo hem.​—Dan. 10:11, 19.

3. Wat nao bae iumi storyim lo disfala article?

³ Lo disfala article, bae iumi storyim tufala fasin blo Daniel wea mekem hem spesol lo Jehovah. Firstaem, bae iumi storyim olketa situation wea hem showimaot tufala fasin hia. Then bae iumi storyim wat nao helpem Daniel for garem olketa wei hia. Then last samting, bae iumi storyim hao iumi savve followim example blo hem. Nomata disfala article hem for olketa young wan, iumi evriwan savve lanem gud samting from example blo Daniel.

FOLLOWIM EXAMPLE BLO DANIEL FOR NO FRAET

4. Hao nao Daniel showimaot hem brave? Storyim example.

⁴ Pipol wea brave savve fraet, bat datwan no stopem olketa for duim stret samting. Daniel hem young man wea barava brave. Tingim tufala situation wea Daniel showimaot hem no fraet. First wan, hem lo samting olsem tufala year bihaen olketa blo Babylon distroem Jerusalem. King Nebuchadnezzar blo Babylon dreamim wanfala maeti image wea mekem hem fraet fogud. King sei hem bae killim dae evri wise man blo hem and Daniel tu, sapos olketa no talem hem datfala dream and mining blo hem. (Dan. 2:3-5) Daniel mas kwiktaem duim samting, incase, staka laef hem lus. Hem “go lo king and askem king for givim hem taem mekem hem savve talem mining blo datfala dream.” (Dan. 2:16) Datwan showimaot hem brave and garem faith. Why nao olsem? Bikos no eni record showim dat Daniel explainim eni dream bifor. Hem askem olketa frens blo hem, Shadrach, Meshach, and Abednego “for prea lo God wea rul lo heven for sorre lo olketa and showim datfala dream.” (Dan. 2:18) Jehovah ansarem prea blo olketa. Hem helpem Daniel explainim dream blo Nebuchadnezzar. From datwan, Daniel and olketa frens blo hem no lusim laef blo olketa.

5. Wat nao nara situation wea Daniel feisim wea hem mas brave?

⁵ Lelebet longtaem afta Daniel talem mining blo dream abaotem datfala maeti image, hem feisim nara situation wea hem mas barava brave moa. Nebuchadnezzar garem nara dream wea mekem hem fraet. Disfala dream hem abaotem wanfala barava big tree. Daniel mas no fraet for explainim mining blo datfala dream lo king, bikos hem mas talem dat king bae kamap mentol and bae no savve rul for lelebet taem. (Dan. 4:25) Datfala message savve mekem king for tingse Daniel againstim hem and king savve disaed for killim hem dae. Bat Daniel brave and talem datfala message.

6. Wat nao maet helpem Daniel for brave?

⁶ Wat nao maet helpem Daniel for brave for full laef blo hem? Taem Daniel young, for sure hem lane from example blo mami and dadi. Masbi tufala obeyim instruction wea Jehovah givim for olketa parents lo Israel, and tufala teachim Law blo hem lo pikinini blo tufala. (Deut. 6:6-9) Daniel no just savve lo Ten Komandment, bat hem savve lo detail information abaotem datwan. For example, hem savve wat olketa Israelite savve kaikaim and shud no kaikaim.b (Lev. 11:4-8; Dan. 1:8, 11-13) Daniel lanem tu history blo pipol blo God and hem savve wat hem happen lo olketa taem olketa no obeyim standard blo Jehovah. (Dan. 9:10, 11) Olketa samting wea Daniel feisim lo laef mekem hem for barava trustim dat Jehovah and olketa paoaful angel blo Hem gohed for sapotim hem.​—Dan. 2:19-24; 10:12, 18, 19.

7. Wat nao nara samting wea helpem Daniel for brave? (Lukim tu piksa.)

⁷ Daniel studyim gud wat olketa profet blo God raetem and olketa profesi blo Jeremiah. From datwan, hem luksavve olketa Jew wea prisoner lo Babylon for longtaem finis, olketa klosap for kamap free. (Dan. 9:2) From Daniel lukim toktok blo Jehovah hem kamap tru, datwan mas barava strongim trust blo hem lo Jehovah, and olketa wea garem strongfala trust lo God olketa no fraet. (Comparem Rome 8:31, 32, 37-39.) Barava important samting nao, Daniel prea evritaem lo Dadi blo hem lo heven. (Dan. 6:10) Hem talemaot olketa sin blo hem and storyim feeling blo hem lo Jehovah. And Daniel savve askem hem for help. (Dan. 9:4, 5, 19) Daniel hem olsem iumi nomoa. Hem no born witim datfala wei for brave. Bat, hem lane for garem datfala wei from hem study, prea, and trustim Jehovah.

8. Hao nao iumi savve lane for brave?

⁸ Hao nao iumi savve lane for brave and no fraet? Parents blo iumi savve encouragem iumi for no fraet from olketa garem disfala wei, bat hard for iumi inheritim datwan from olketa. For brave hem olsem wei for lanem wanfala niu skill. Wanfala wei for garem datfala skill hem for watchim hao instructor duim samting, then iu followim hao hem duim datwan. Lo sem wei, iumi savve lane for no fraet taem iumi lukluk gud lo hao olketa narawan brave for duim samting, and then followim example blo olketa. So, wat nao iumi lanem from example blo Daniel? Olsem Daniel, iumi need for savve gud lo Bible. Iumi savve fren gud witim Jehovah taem iumi feel free for story lo hem evritaem and talem feeling blo iumi lo hem. And iumi need for trustim Jehovah and sure hem bae helpem iumi. Then taem iumi kasem test, iumi bae no fraet.

9. Wat nao olketa gud samting iumi kasem taem iumi brave and no fraet?

⁹ Iumi savve kasem staka gud samting taem iumi brave and no fraet. Tingim experience blo Ben. Hem go lo wanfala skul lo Germany wea evriwan biliv lo evolution and olketa ting story lo Bible abaotem creation hem no tru. Wanday, olketa givim chance lo Ben for standap front lo class and explainim why hem bilivim God creatim evri samting wea laef. Hem brave for talem wanem hem bilivim. Wat nao happen? Ben sei: “Teacher blo mi barava lisin gud and hem mekem olketa copy lo article wea mi iusim for sapotim biliv blo mi, and hem sharem lo evri student lo class.” Wat nao reaction blo olketa classmate blo Ben? Ben sei: “Staka lo olketa interest lo story blo mi and olketa sei olketa admirem wat mi duim.” Olsem experience blo Ben showimaot, staka taem pipol respectim olketa wea brave. And tu, datwan savve mekem pipol wea garem gud heart for laek lane abaotem Jehovah. So iumi garem olketa gud reason for lane for brave.

FOLLOWIM EXAMPLE BLO DANIEL FOR LOYAL

10. Wat nao word loyal hem minim?

¹⁰ Lo Bible, datfala Hebrew word “loyal,” or “loyal love,” hem minim for barava lovem samwan and no laek for lusim hem. Staka taem Bible iusim disfala toktok for describem love wea God garem for pipol blo hem. Bible iusim datfala sem word for describem love wea pipol blo God showim for each other. (2 Sam. 9:6, 7) Hem savve tek taem for loyal fasin blo iumi hem strong go moa. Bae iumi lukim hao diswan hem tru for Daniel.

11. Wanem situation nao Daniel feisim taem hem olo wea testim loyal fasin blo hem? (Lukim piksa lo front page.)

¹¹ Lo full laef blo Daniel, loyal fasin blo hem lo Jehovah hem kasem test. Bat, taem hem 90 years hem kasem wanfala big test winim eni narataem. Lo datfala taem, olketa blo Media and Persia tekovarem Babylon and King Darius nao rul. Olketa hae official lo palace blo king les lo Daniel and nating respectim God blo hem. So olketa mekem plan for killim dae Daniel. Olketa mekem king for saenem wanfala law wea bae testim Daniel, if hem bae loyal lo God or lo king. Only samting Daniel need for duim for pruvim hem loyal lo king and for semsem witim olketa narawan, hem for stop for prea lo Jehovah for 30 days. Bat Daniel disaed for loyal lo Jehovah. From datwan, olketa torowem hem lo hol blo olketa lion. Bat Jehovah rewardim Daniel taem hem rescuem hem from olketa lion. (Dan. 6:12-15, 20-22) Hao nao iumi savve lane for gohed loyal lo Jehovah olsem Daniel?

12. Wat nao helpem Daniel for lane for gohed loyal lo Jehovah?

¹² Olsem iumi storyim finis, for iumi loyal lo Jehovah, iumi need for garem strongfala love for hem. Daniel gohed loyal bikos hem lovem Jehovah tumas. Masbi Daniel garem strongfala love olsem for Jehovah, bikos hem gohed tingting abaotem olketa wei blo Jehovah and hao Jehovah showimaot olketa wei hia. (Dan. 9:4) And Daniel ting raonem tu evri gud samting wea Jehovah duim for hem and pipol blo Hem.​—Dan. 2:20-23; 9:15, 16.

13. (a) Wat nao samfala situation wea savve testim olketa young wan? Storyim example. (Lukim tu piksa.) (b) Olsem iumi lukim lo video, wat nao bae iu talem taem olketa narawan askem iu if olketa Jehovah’s Witness sapotim pipol wea gay?

¹³ Olsem Daniel, olketa young wan blo iumi tu savve kam in contact evriday witim pipol wea no respectim Jehovah and olketa standard blo hem. Olketa pipol olsem maet les lo eniwan wea sei hem lovem God. Samfala even trae for bullyim olketa young wan mekem olketa no loyal lo Jehovah. Tingim wat happen lo wanfala boy wea nem blo hem Graeme, wea stap lo Australia. Hem feisim wanfala challenging situation lo hae skul. Teacher askem class hao nao bae olketa react if wanfala fren talem olketa hem gay. Teacher sei olketa wea sapotim wat datfala fren duim mas standap lo wansaed lo rum, and olketa wea bae no sapotim, standap lo narasaed. Graeme sei: “Full class standap lo saed wea sapotim pipol wea gay, only mi and nara Witness pikinini nomoa standap seleva lo wansaed.” Then next samting wea happen, hem barava testim loyal fasin blo Graeme lo Jehovah. Hem sei: “For klosap wan hour, olketa student and teacher gohed tok spoelem mitufala. Mi duim best for defendim faith blo mi lo kaenfala wei, bat olketa no lisin lo eni samting wea mi talem.” Hao nao Graeme feel abaotem datwan? Hem sei: “Mi barava feel nogud taem olketa classmate tok spoelem mi, bat mi hapi tumas bikos mi gohed loyal lo Jehovah and defendim biliv blo mi.”c

14. Wat nao wanfala samting wea iumi savve duim for gohed loyal lo Jehovah?

¹⁴ Olsem Daniel, taem iumi garem strongfala love for Jehovah bae iumi gohed loyal lo Hem. Iumi bae garem datfala love, taem iumi gohed lane abaotem olketa wei blo Jehovah. For example, iumi savve studyim creation blo hem. (Rome 1:20) If iu laek strongim love and respect blo iu for Jehovah, iu savve readim olketa short article or watchim olketa video lo datfala series “Waswe, Samwan Designim?” Iu savve studyim tu information lo tufala brochure hia, Was Life Created? and The Origin of Life​—Five Questions Worth Asking. Tingim wat Esther, wanfala young sista from Denmark talem abaotem olketa pablikeson hia. Hem sei: “Information hem barava set. Tufala brochure hia no talem iu wat for bilivim bat hem presentim olketa tru information, and letem iu nao for disaed.” Ben wea iumi storyim finis sei: “Information hia barava strongim faith blo mi. Hem pruvim lo mi hao God wakem evri samting wea laef.” Bihaen iu studyim olketa information hia, for sure iu bae agree witim disfala toktok lo Bible: “Jehovah, wea iu nao God bilong mifala and wea iu garem bigfala paoa, iu nao fit for kasem glory and for evriwan mekhae long iu bikos iu wakem evri samting.”​—Rev. 4:11.d

15. Wat nao nara samting wea iumi savve duim for strongim frenship blo iumi witim Jehovah?

¹⁵ Nara samting iumi savve duim for strongim love blo iumi for Jehovah, hem for studyim gud laef blo Son blo hem, Jesus. Samira, wanfala young sista from Germany duim datwan. Hem sei: “Taem mi studyim laef blo Jesus, datwan helpem mi for savve gud lo Jehovah.” Taem Samira pikinini yet, hem stragol for minim if Jehovah lovem iumi. Bat hem minim feeling blo Jesus. Hem sei: “Mi laekem wei blo Jesus bikos hem kaen and lovem olketa pikinini.” Taem Samira gohed lane abaotem Jesus, datwan strongim go moa love blo hem for Jehovah. Why nao olsem? Hem sei: “Mi start for minim hao Jesus barava followim wei blo Dadi blo hem. Wei blo tufala barava semsem. Mi luksavve diswan hem wanfala reason why Jehovah sendem hem kam lo earth, mekem hem possible for pipol savve gud lo Jehovah.” (John 14:9) If iu laek for strongim frenship blo iu witim Jehovah, hem gud for spendem taem for lane abaotem Jesus. Datwan bae strongim love blo iu for Jehovah and bae iu gohed loyal lo hem.

16. Why nao iumi shud gohed loyal lo Jehovah? (Sams 18:25; Maeka 6:8)

¹⁶ Staka taem olketa wea loyal lo each other, olketa klos and frenship blo olketa stap for olowe. (Ruth 1:14-17) Pipol wea loyal lo Jehovah tu savve garem peace lo mind. Why nao olsem? Bikos Jehovah promis for loyal lo olketa wea loyal lo hem. (Readim Sams 18:25; Maeka 6:8, SIPB.) Tingim diswan: Olmaeti Creator blo iumi laekem tumas for iumi kamap klos fren blo hem! And taem olsem, no eni hard taem, enemy, and even dae savve spoelem datfala frenship. (Dan. 12:13; Luke 20:37, 38; Rome 8:38, 39) So hem barava important for iumi followim example blo Daniel for gohed loyal lo Jehovah!

GOHED LANE FROM EXAMPLE BLO DANIEL

17-18. Wat moa iumi savve lanem from Daniel?

¹⁷ Lo disfala article iumi storyim nomoa tufala wei blo Daniel. Bat iumi savve lanem staka samting moa from hem. For example, Jehovah mekem Daniel for lukim olketa vision and olketa dream, and Jehovah helpem hem tu for talem mining blo olketa profesi. Staka lo olketa profesi hia fulfill finis. Olketa nara profesi givim detail abaotem olketa samting wea bae happen lo future wea bae affectim evri pipol lo earth.

¹⁸ Lo next article, bae iumi storyim tufala profesi blo Daniel. For minim tufala profesi hia savve helpem iumi evriwan for mekem wise disison distaem, nomata olketa young wan and olketa olo tu. Tufala profesi hia savve strongim iumi tu for no fraet and gohed loyal lo Jehovah mekem iumi redi for feisim olketa test wea klosap for happen.