Hao for Adjust lo Niu Kongregeson

Nicolas and Céline feisim difren challenge. Tufala acceptim assignment from France branch for muv lo niu kongregeson. Tufala sei: “Lo firstaem mitufala barava hapi, bat then mitufala start for missim frens blo mitufala. Lo datfala taem, mitufala no garem yet olketa klos frens lo niu kongregeson.”a From hem no isi, wat nao iu savve duim for helpem iu taem iu muv lo niu kongregeson? Wat nao olketa narawan savve duim for help? Wat nao olketa spiritual blessing wea iu savve kasem, and hao nao iu savve encouragem niu kongregeson blo iu?

FOFALA PRINCIPLE FOR HELPEM IU

1. Depend lo Jehovah. (Ps. 37:5) Kazumi, lo Japan, mas lusim kongregeson wea hem bin stap insaed for 20 years bikos hasband blo hem mas muv lo nara ples for waka. Hao nao Kazumi hem ‘depend lo Jehovah’? Hem sei: “Mi story lo Jehovah from heart blo mi abaotem wei wea mi panic, lonely, and wari. Each taem mi prea lo Jehovah, hem strongim mi.”

Hao nao iu savve strongim go moa wei wea iu depend lo Jehovah? Olsem plant wea needim wata and gud graon for grow, iumi needim tokpiksa wata and gud graon for mekem faith blo iumi grow. Nicolas sei wei for ting raonem olketa example olsem Abraham, Jesus, and Paul, wea mekem staka sakrifaes for duim will blo Jehovah, hem strongim hem for trustim hao Jehovah bae sapotim hem. For garem gud schedule for duim personal study, bae no just helpem iu for deal witim eni change wea kamap, bat hem helpem iu tu for encouragem olketa narawan lo niu kongregeson.

2. No comparem old kongregeson witim niu wan. (Eccl. 7:10) Taem Jules muv from Benin go lo United States, hem mas mekem adjustment for fitim culture lo there wea barava difren. Hem sei: “Mi feel olsem mi mas explainim bakgraon blo mi lo evri niu person wea mi meetim.” From datwan, hem start for isolatem hemseleva from kongregeson bikos hem no getius lo kaen wei olsem. Bat, bihaen hem start for savve gud lo olketa brata and sista, hem changem tingting blo hem. Hem sei: “Mi luksavve hao nomata wea nao iumi stap, iumi evriwan semsem nomoa. Hao olketa story and duim samting nomoa hem difren. Hem important for iumi acceptim hao evriwan difren.” So no comparem old kongregeson witim niu wan. Wanfala pioneer sista wea nem blo hem Anne-Lise, hem sei, “Mi muv bikos mi laek for lanem olketa niu samting, and no bikos mi ting dat niu kongregeson blo mi bae semsem olsem old wan.”

Olketa elder tu mas no comparem niu kongregeson witim old kongregeson. If kongregeson garem difren wei for duim tings, datwan hem no minim hem rong. Hem wise for savve gud lo situation blo niu kongregeson firstaem bifor iumi mekem olketa suggestion. (Eccl. 3:​1, 7b) Hem beta for iu showimaot gud example for olketa brata, winim wei for laekem olketa for mas followim tingting blo iu.—2 Cor. 1:24.

3. Joinim kongregeson activity. (Phil. 1:27) For muv hem needim staka taem and strong. Nomata olsem, hem important for attendim olketa meeting lo niu kongregeson start from taem iu arrive. And if hem fitim, traem best for attend in person. Tingim, if olketa lo niu kongregeson no savve lukim iu or no lukim iu staka taem, hao nao bae olketa helpem iu? Lucinda, wea muv go lo wanfala big city lo South Africa witim tufala dota blo hem, sei: “Olketa frens blo mi encouragem mi for focus lo wei for fren gud witim olketa lo kongregeson, waka witim olketa narawan lo ministry, and attendim olketa meeting. Mifala offerim haos blo mifala for olketa brata iusim for preaching grup savve meet lo there.”

Taem iumi “waka tugeta” lo olketa theocratic activity witim olketa brata and sista lo niu kongregeson, datwan bae strongim faith blo iumi and olketa narawan lo gud nius. Anne-Lise, kasem encouragement from olketa elder for traem best for waka witim evriwan. Wat nao gud samting wea hem kasem? Hem sei: “Mi kwiktaem luksavve diswan hem helpem mi for getius lo niu kongregeson. And tu, taem iu volunteer for duim waka olsem klining and maintainim Kingdom Hall hem showim iu ting lo niu kongregeson olsem kongregeson blo iu. Taem iu duim moa samting witim kongregeson, bae olketa brata and sista getius lo iu and bae iu feel olsem olketa kamap niu spiritual famili blo iu.

4. Garem olketa niu frens. (2 Cor. 6:​11-13) For interest lo narawan hem best wei for garem niu frens, so kam early lo meeting mekem iu garem taem for story lo olketa brata and sista bifor and afta meeting, datwan bae helpem iu for savve gud lo olketa. Trae for savve lo nem blo olketa. Taem iu rememberim nem blo olketa and kaen, bae olketa feel free for story witim iu, and datwan bae lead go lo wei for garem olketa niu frens.

For olketa brata and sista acceptim iu, iu no need for act olsem difren person, bat just showimaot olketa real wei blo iu. Hem gud for duim wat Lucinda duim, hem sei: “Mifala garem olketa klos frens distaem, bikos mifala invaetem olketa narawan lo haos blo mifala.”

WELKAMIM NARAWAN

Hem no isi for go meeting lo Kingdom Hall wea iu no savve lo staka brata and sista. So, hao nao iu savve helpem olketa wea just muv kam? Aposol Paul encouragem iumi for “mas acceptim [or welkamim] narawan, olsem Christ tu hem acceptim iumi.” (Rome 15:7) Taem olketa elder followim example blo Christ, datwan mekem olketa niu wan for feel welkam. (Lukim tu box “Wat Nao Samfala Samting wea Help Taem Iu Muv.”) Bat, evriwan lo kongregeson, includim olketa pikinini, savve help for mekem olketa wea just muv kam for feel welkam.

For welkamim narawan hem minim for kaen lo olketa, maet hem for helpem olketa tu lo physical wei. Example, wanfala sista willing for iusim taem blo hem for tekem wanfala niu wan wea just muv kam for go lo taon and explainim hao for go lo pablik transport. Wat sista hia duim, really helpem datfala niu sista and mekem hem feel welkam.

CHANCE FOR GROW LO SPIRITUAL WEI

Taem wanfala grashopa gogo for mature, skin lo body blo hem savve aot tu-thri taem bifor wing blo hem savve mekem hem fit for flae. Lo sem wei tu, taem iu muv lo niu kongregeson, iu need for aotem feeling for fraet wea maet stopem iu for duim gud service blo iu for Jehovah, olsem datfala grashopa wea spredim wing blo hem for flae. Nicolas and Céline sei: “Wei for muv lo nara kongregeson hem nambawan training. For adjust for fitim niu pipol and niu ples, hem helpem mitufala for garem olketa niu wei.” Jean-Charles, storyim gud samting wea famili blo hem kasem, hem sei: “Wei wea mifala muv hem helpem olketa pikinini for kamap gud lo niu kongregeson. Bihaen tu thri month nomoa, dota blo mitufala duim olketa assignment lo midol week meeting and son blo mitufala hem kamap anbaptaes pablisa.”

Wat if situation blo iu hem mekem hem hard for iu muv, maet lo ples wea garem big need? Hao sapos iu followim olketa idea wea disfala article storyim and mekem old kongregeson blo iu for kamap olsem hem niu kongregeson? Depend lo Jehovah, and joinim olketa activity blo kongregeson lo wei for waka witim olketa narawan lo ministry, and duim samting for garem olketa niu fren or strongim frenship blo iu witim olketa wea iu savve finis. Hao if iu duim samting for helpem olketa niu wan wea kam lo kongregeson or olketa wea garem need? From love nao hem main wei blo olketa tru Christian, taem iu duim olsem hem helpem iu for grow lo spiritual wei. (John 13:35) Iu savve sure “God hem hapi long kaen sakrifaes olsem.”—Heb. 13:16.

Nomata hem no isi, staka Christian kasem gud samting taem olketa muv lo niu kongregeson, and iu tu savve olsem! Anne-Lise sei: “Wei for muv lo niu kongregeson, hem helpem mi for garem staka niu frens.” Kazumi barava convince wei for muv helpem hem. Hem sei: “Bae iu experiencem sapot blo Jehovah lo olketa wei wea iu no experiencem bifor.” And waswe lo Jules? Hem sei: “Taem mi garem olketa niu frens, hem helpem mi for getius lo kongregeson. And distaem mi feel olsem mi part lo niu kongregeson hia and bae mi sorre if mi lusim olketa.”