“Iufala Mas Followim Toktok Bilong God”

1-2. Why nao pipol blo God olketa hapi? (James 1:​22-25)

JEHOVAH and Son blo hem laekem iumi for hapi. Man wea raetem Psalm 119:2 hem sei: “Olketa wea followim olketa reminder blo hem, olketa nao hapi, wea lukaotem hem witim full heart blo olketa.” Jesus tu promis olsem: “Olketa wea herem toktok bilong God and obeyim datwan nao olketa hapi.”—Luke 11:28.

² From iumi worshipim Jehovah, iumi hapi. Why? Iumi garem staka reason for hapi, bat wanfala main reason hem bikos iumi evritaem readim Word blo God and traem best for followim wat iumi lanem.—Readim James 1:​22-25.

3. Wat nao gud samting iumi kasem taem iumi followim wat iumi readim lo Bible?

³ Iumi savve kasem staka gud samting taem iumi “followim toktok bilong God.” For example, iumi savve hem important for followim toktok blo God bikos datwan mekem Jehovah hapi. And taem iumi luksavve Jehovah hapi lo iumi, iumi tu bae hapi. (Eccl. 12:13) Taem iumi followim wat iumi readim lo Bible, hem savve impruvim famili laef blo iumi and helpem iumi garem strong frenship witim olketa brata and sista. Maet iu lukim finis datwan lo laef blo iu. And tu, iumi savve misstim staka problem wea kasem pipol wea no followim wei blo Jehovah. Tru nao, iumi agree witim toktok blo King David. Bihaen David sing abaotem olketa law, rul, and judgment blo Jehovah, hem sei: “Wei for obeyim olketa, man savve kasem big reward.”—Ps. 19:​7-11.

4. Why nao hem wanfala challenge for followim toktok blo God?

⁴ Hem no evritaem isi for followim toktok blo God. Iumi evriwan busy, so iumi mas markem taem for readim and studyim Bible mekem iumi savve minim wat Jehovah laekem iumi for duim. Distaem, bae iumi story raonem samfala idea wea savve helpem iumi for readim Bible evritaem. And tu, olketa samting wea savve helpem iumi for ting raonem wat iumi readim and hao for followim lo laef blo iumi.

MARKEM TAEM FOR READIM BIBLE

5. Wat nao olketa responsibility wea iumi barava busy for duim?

⁵ Evri pipol blo Jehovah barava busy. Iumi iusim staka taem for duim olketa responsibility wea Bible talem for iumi. For example, staka lo iumi waka for selen for provaedem wat iumiseleva and famili blo iumi needim. (1 Tim. 5:8) Staka brata and sista lukaftarem olketa relative wea sik or wea olo. And iumi evriwan need for tek kea lo health blo iumiseleva tu, wea datwan hem needim taem. And tu, iumi garem olketa assignment lo kongregeson. Wanfala main responsibility blo iumi hem for duim best lo preaching waka. Nomata iu garem staka responsibility, wat nao iu savve duim for faendem taem for readim Bible evriday, ting raonem, and followim wat iu readim?

6. Wat nao iu savve duim for showimaot Bible reading hem important lo iu? (Lukim tu piksa.)

⁶ Bible reading hem wanfala lo olketa “samting wea barava important,” so iumi need for markem taem for duim datwan. (Phil. 1:10) Firstfala Psalm storyim samting wea man wea hapi hem duim, hem sei: “Hem hapi lo law blo Jehovah, and hem read smol lo law blo God day and naet.” (Ps. 1:​1, 2) Diswan hem showimaot klia hao iumi need for markem taem for duim Bible reading. Wat taem nao hem best taem for iu readim Bible? Each person savve lo best taem wea fitim hem. Important samting, hem for duim evriday and lo semtaem. Brata Victor hem sei: “Mi savve laek for duim Bible reading lo morning. Nomata hem no isi for mi wekap lo early morning, mi faendem hem nao taem wea no staka samting savve distractim mi. Mind blo mi hem klia and mi savve focus.” Maet iu feel olsem tu. Hem gud for iuseleva tingim: ‘Wat taem nao hem best taem for mi readim Bible?’

TING RAONEM WAT IU READIM

7-8. Wat nao maet stopem iumi for kasem gud samting from wat iumi readim? Storyim example.

⁷ Tru samting nao, maet iumi garem schedule for readim staka information bat maet iumi no lanem eni samting from wat iumi readim. Waswe, enitaem iu read then bihaen iu no savve tingim wat nao iu readim? Datwan savve happen lo iumi evriwan. Sorre samting nao, diswan savve happen tu lo Bible reading blo iumi. Maet goal wea iumi markem hem for readim staka chapter lo Bible each day. Datwan hem gud. Iumi shud markem olketa goal and traem best for followim. (1 Cor. 9:26) Bat datwan hem just first step nomoa. Iumi need for duim moa samting if iumi laek for kasem gud samting from Word blo God.

⁸ Comparem datwan witim disfala example: Laef hem depend lo wata, and staka taem iumi kasem datwan from rain. Bat if insaed short taem nomoa hem rain big tumas, bae graon hem fulap tumas lo wata. Taem olsem, datfala rain hem no really helpem olketa plant. Bat taem rain hem foldaon isisi, datwan givim chance for wata go insaed lo graon and helpem olketa plant for grow. Lo sem wei tu, iumi shud no rush taem iumi readim Bible, bikos if iumi duim datwan, hem bae hard for iumi rememberim, kasem gud samting, and followim wat iumi readim.—Jas. 1:24.

9. Wat nao iumi shud duim if iumi garem habit for rush taem iumi readim Bible?

⁹ Hao, samfala taem iu rush for duim Bible reading? Taem olsem, wat nao iu shud duim? Read slow. Traem best for ting abaotem wat iu gohed for readim or wat iu just readim. Datwan hem no hard samting for duim. Maet taem iu herem encouragement for ting raonem wat iu readim, datwan here big tumas, bat really datwan hem just minim wei for ting abaotem wat iu readim. Maet iu disaed for increasim taem wea iu study mekem iu garem inaf taem for ting raonem. Or maet iu disaed for readim tu-thri verse nomoa and iusim lelebet taem for ting abaotem wat iu readim. Brata Victor sei: “Mi mekem Bible reading blo mi hem short, maet wan chapter nomoa. From mi readim Bible early lo morning, datwan helpem mi for ting abaotem wat mi readim lo full day.” Nomata wat taem nao iu disaed for duim Bible reading, hem important for read lo wei wea bae helpem iu for ting raonem wat iu readim.—Ps. 119:97; lukim box “Olketa Kwestin for Ting Raonem.”

10. Storyim example abaotem hao iu savve followim wat iu lanem. (1 Thessalonica 5:​17, 18)

¹⁰ Nomata wat taem nao iu chus for duim Bible reading and haomas taem iu spendem for duim datwan, mek sure iu traem best for followim wat iu readim. Taem iu readim wanfala point lo Bible, askem iuseleva: ‘Hao nao mi savve followim disfala information distaem or lo olketa months wea bae kam?’ Olsem example, maet Bible reading blo iu hem lo 1 Thessalonica 5:​17, 18. (Readim.) Afta iu readim tufala verse hia, stop and ting abaotem haomas taem iu savve prea and if prea blo iu hem really kam from heart. And tu, iu savve ting abaotem olketa samting wea iu appreciatim. Maet iu disaed for sei thankiu lo Jehovah for thrifala specific samting. Nomata iu spendem tu-thri minute nomoa for mekem mind blo iu focus lo olketa samting olsem, hem bae helpem iu for kamap man wea herem toktok blo God and followim. Tingim gud samting wea iu savve kasem if iu duim datwan lo Bible reading blo iu evriday! Datwan bae barava helpem iu for kamap man wea followim toktok blo God. Bat, hao if iu feel olsem staka samting nao iu need for impruv lo hem?

MARKEM OLKETA GOAL WEA IU FIT FOR KASEM

11. Why nao maet iu feel discourage samfala taem? Storyim example.

¹¹ Taem iu readim Bible and trae for followim olketa advaes blo hem, maet samfala taem iu feel discourage bikos iu need for impruv lo staka samting. Tingim disfala example: Insaed Bible reading blo iu hem garem kaonsel abaotem wei for no fevarem eniwan. (Jas. 2:​1-8) And iu luksavve dat iu need for impruv lo hao iu treatim olketa narawan, so iu disaed for changem samfala wei blo iu. Barava gud! Then lo next day, Bible reading blo iu storyim hao hem important for iu kontrolem toktok blo iu. (Jas. 3:​1-12) And iu luksavve dat samfala taem toktok blo iu hem barava negative. So iu disaed for talem toktok wea positive and encouraging. Then lo nara day moa, Bible reading blo iu garem warning againstim wei for kamap fren blo disfala world. (Jas. 4:​4-12) Iu luksavve dat iu need tu for careful lo wat kaen entertainment iu chusim. Kasem mek-fo day, maet iu start for feel discourage bikos evri samting wea iu need for impruv lo hem, hem staka tumas.

12. Taem iu duim Bible reading and luksavve iu need for impruv lo samfala samting, why nao iu shud no discourage? (Lukim tu footnote.)

¹² If iu need for impruv or changem samfala samting, no discourage. Datwan hem showim iu garem gud heart. Taem man wea hambol and honest hem readim Bible, hem bae luk for wat hem need for impruv lo hem.a Remember tu, for iumi garem “niufala wei” hem wanfala process wea no savve stop. (Col. 3:10; comparem study note lo English anda lo heding “is being made new.”) Wat nao bae helpem iu for followim toktok blo God?

13. Hao nao iu savve markem olketa goal wea fitim? (Lukim tu piksa.)

¹³ Instead for iu trae followim evriting wea iu read abaotem wantaem, markem wan or tufala goal wea fitim. (Prov. 11:2) Hem gud for traem disfala idea: Keepim list lo olketa tings wea iu need for impruv lo hem, and then selectim wan or tufala wea iu need for waka lo hem firstaem, and leavim olketa narawan for nara taem. Which goal nao bae iu start witim?

14. Wat kaen goal nao hem gud for iu start witim?

¹⁴ Maet iu disaed for start witim wanfala goal wea isi for iu kasem. Or iu chus for waka lo wanfala samting wea iu ting iu need for impruv lo hem. Taem iu markem finis goal blo iu, duim research lo olketa pablikeson blo iumi, olsem lo Watch Tower Publications Index or Research Index for Olketa Jehovah’s Witness. Prea abaotem goal blo iu, askem Jehovah for helpem iu garem feeling for laek duim and paoa for duim datwan. (Phil. 2:13) Then followim wat iu lanem. Taem iu lukim iu progress lo first goal blo iu, datwan bae muvim iu for duim best for kasem olketa nara goal. Staka taem, taem iu impruv lo wanfala Christian quality or mekem wanfala change lo laef blo iu, maet bae hem kamap moa isi for iu mekem olketa nara change tu.

LETEM BIBLE HELPEM IU “FOR DUIM GUD SAMTING”

15. Hao nao pipol blo Jehovah difren from staka wea readim Bible? (1 Thessalonica 2:13)

¹⁵ Samfala pipol sei olketa readim Bible staka taem. Bat hao, olketa really bilivim wat Bible talem? Hao, olketa followim or letem wat olketa readim lo Bible for affectim laef blo olketa? Staka taem, ansa hem no. Bat pipol blo Jehovah no olsem! Iumi olsem olketa Christian lo first century, wea bilivim hao Bible hem really “toktok bilong God.” And tu, iumi traem best for followim lo laef blo iumi.—Readim 1 Thessalonica 2:13.

16. Wat nao savve helpem iumi followim toktok blo God?

¹⁶ Hem no evritaem isi for readim and followim wat Bible talem. Maet iumi faendem hem hard for garem taem for read. Or maet iumi savve rush tumas taem iumi read and no really lanem eniting. Or maet iumi discourage bikos staka samting nao iumi need for impruv lo hem. Nomata watever challenge iu feisim, bae iu savve winim. Jehovah bae helpem iu. Iumi laek for disaed strong for acceptim help blo hem, and kamap man wea followim toktok blo God and no herem nomoa. For sure, taem iumi gohed readim Word blo God and followim lo laef blo iumi, bae iumi barava hapi.—Jas. 1:25.