Wanfala Leta wea Savve Helpem Iumi for Gohed Faithful Kasem End

1-2. (a) Wat nao situation blo olketa Hebrew Christian lo Judea taem aposol Paul raetem leta lo olketa? (b) Why nao datfala leta kam lo raet taem for helpem olketa?

AFTA Jesus dae, olketa Hebrew Christian lo Jerusalem and Judea kasem staka hard taem. No longtaem bihaen Christian kongregeson start, olketa kasem big persecution. (Acts 8:1) Then samting olsem 20 years bihaen, olketa follower blo Christ feisim barava hard taem saed lo selen, maet bikos lo wanfala big hangere wea kamap. (Acts 11:​27-30) Bat lo samting olsem 61 C.E., laef blo olketa Christian hia hem peaceful lelebet taem iumi comparem witim situation wea hem klosap for happen. During lo datfala taem, olketa kasem wanfala leta from aposol Paul. Datfala leta kam lo barava raet taem.

² Leta wea olketa Hebrew Christian kasem, hem kam lo raet taem bikos peace wea olketa enjoyim hem klosap for finis. Paul givim advaes wea bae helpem olketa Christian hia for gohed faithful taem olketa feisim bigfala trabol wea klosap for happen. Profesi blo Jesus abaotem hao system blo olketa Jew bae distroe, hem barava klosap for happen. (Luke 21:20) Paul and olketa Christian lo Judea no savve lo barava taem wea datfala big trabol bae happen. Nomata olsem, lelebet taem wea stap yet hem chance for olketa Christian hia duim samting for strongim faith blo olketa and for no givap, taem olketa duim datwan olketa redi for wat bae happen.—Heb. 10:25; 12:​1, 2.

3. Why nao iumi shud interest lo datfala leta wea Paul raetem for olketa Hebrew Christian?

³ Iumi tu klosap for feisim wanfala big trabol wea hem winim trabol wea olketa Hebrew Christian kasem bifor. (Matt. 24:21; Rev. 16:​14, 16) So bae iumi storyim samfala advaes wea Jehovah provaedem for olketa Christian lo datfala taem wea savve helpem iumi distaem tu.

“WAKA HARD FOR KAMAP MATURE”

4. Wat nao samfala challenge wea olketa Jew wea kamap Christian feisim? (Lukim tu piksa.)

⁴ Olketa Jew wea kamap Christian feisim wanfala big challenge. Lo bifor, olketa Jew nao pipol wea Jehovah chusim. Jerusalem hem ples wea representim Kingdom blo God, and temple nao center blo tru worship. Evri faithful Jew followim Law blo Moses and olketa rul wea olketa bigman lo religion blo olketa mekem. Olketa teaching hia affectim tingting blo olketa abaotem kaikai, wei for circumcise, and hao olketa treatim olketa Gentile. Bat bihaen Jesus dae, Jehovah no acceptim olketa sakrifaes blo olketa nao. Datwan hem wanfala challenge for olketa Jew Christian bikos olketa getius for followim Law blo Moses. (Heb. 10:​1, 4, 10) Nomata olketa mature Christian, olsem aposol Peter, faendem hem hard for followim samfala lo olketa change hia. (Acts 10:​9-14; Gal. 2:​11-14) Olketa niu biliv blo olketa Christian hia mekem olketa kamap target for olketa bigman lo Jew religion for persecutim olketa.

5. Wat nao olketa Christian lo bifor mas careful lo hem?

⁵ Olketa Hebrew Christian hia mas deal witim tufala grup wea againstim olketa. Wanfala grup hem olketa bigman blo Jew religion wea treatim olketa Christian hia olsem apostate. And nara grup, hem olketa Christian wea laekem evri follower blo Christ for mas followim Law blo Moses, maet olketa laek duim datwan for avoidim persecution. (Gal. 6:12) Wat nao bae helpem olketa faithful Christian for gohed hol strong lo truth?

6. Wat nao Paul encouragem olketa Christian for duim? (Hebrew 5:14–6:1)

⁶ Lo leta wea Paul raetem for olketa Hebrew Christian, hem encouragem olketa for duim deep study lo Word blo God. (Readim Hebrew 5:14–6:1.) Paul iusim olketa Hebrew Scripture for pruvim dat hao olketa Christian worship, hem winim hao olketa Jew worship.a Paul savve wei for increasim knowledge abaotem truth and for understandim gud, bae helpem olketa Christian for luksavve and rejectim olketa false idea wea savve leadim olketa for go difren from truth.

7. Olketa wanem challenge nao iumi mas deal witim distaem?

⁷ Olsem olketa Hebrew Christian, iumi tu mas deal witim staka information and idea wea againstim olketa raeteous standard blo Jehovah. Staka taem pipol againstim iumi and sei iumi no garem love and no kea abaotem pipol, bikos iumi followim wanem Bible talem saed lo sex. Olketa attitude and wei blo pipol lo world hem kamap moa worse and barava difren from tingting blo God. (Prov. 17:15) Dastawe, iumi mas waka hard for strongim ability blo iumi for luksavve and rejectim olketa idea wea pipol iusim for discouragem iumi or even leadim iumi for go difren from truth.—Heb. 13:9.

8. Wat nao savve helpem iumi for kamap mature lo spiritual wei?

⁸ Taem iumi followim kaonsel wea Paul givim lo olketa Hebrew Christian, hem savve helpem iumi tu for waka hard for kamap mature lo spiritual wei. So iumi need for duim deep study abaotem truth and garem sem tingting blo Jehovah abaotem samting. Bihaen iumi dedicate and baptaes, iumi need for gohed for duim datwan. Nomata iumi stap lo truth for longtaem, iumi evriwan mas gohed for readim and studyim Bible evritaem. (Ps. 1:2) For garem wanfala gud schedule for duim personal study, bae helpem iumi for strongim wanfala quality wea Paul storyim lo leta blo hem for olketa Hebrew Christian. Datfala quality nao, hem faith.—Heb. 11:​1, 6.

“GAREM FAITH WEA BAE MEKEM IUMI GOHED FOR LAEF”

9. Why nao hem important for olketa Hebrew Christian garem strong faith?

⁹ Olketa Hebrew Christian need for garem strong faith for helpem olketa for stap sef taem big trabol kasem Judea. (Heb. 10:​37-39) Jesus warnim olketa follower blo hem dat taem olketa lukim army camp raonem Jerusalem, olketa mas ranawe go lo maunten. Kaonsel blo Jesus hem for evri Christian lo datfala taem, nomata olketa stap insaed lo city or lo kantri-saed. (Luke 21:​20-24) Lo bifor, taem army hem redi for attakim wanfala ples, pipol savve ran go for kasem protection lo olketa city olsem Jerusalem wea garem wall raonem. So for olketa ranawe go lo maunten hem no mek sense, and olketa needim strong faith for duim datwan.

10. Taem olketa Christian garem strong faith, wat nao bae olketa duim? (Hebrew 13:17)

¹⁰ Olketa Hebrew Christian need for trustim tu olketa wea Jesus iusim for givim direction lo kongregeson. Luk olsem olketa wea lead lo datfala taem, givim specific instruction for helpem evriwan lo kongregeson for followim direction blo Jesus lo raet taem and lo wei wea organize. (Readim Hebrew 13:17.) Greek word wea iumi transleitim olsem “obeyim,” wea Paul iusim lo Hebrew 13:​17, hem garem mining wea join witim wei for barava trustim person wea givim direction. So diswan minim man wea obey hem duim datwan no just bikos datfala person wea givim instruction hem garem authority. Dastawe, olketa Hebrew Christian need for barava trustim olketa brata wea lead, bifor datfala big trabol hem happen. If olketa Christian obeyim olketa wea lead during lo taem wea laef hem peaceful, then bae hem moa isi for olketa obey lo taem blo trabol.

11. Why nao olketa Christian distaem need for garem strong faith?

¹¹ Iumi distaem tu needim strong faith olsem olketa Hebrew Christian wea Paul raet lo olketa. Iumi stap lo taem wea staka pipol rejectim and even tok spoelem warning wea Bible talem abaotem end blo disfala system. (2 Pet. 3:​3, 4) And nomata Bible storyim samfala samting abaotem big trabol staka samting iumi no savve yet. Iumi need for garem strong faith dat end blo disfala system bae kam lo taem wea God markem and iumi sure Jehovah bae kea for iumi.—Hab. 2:3.

12. Wat nao bae helpem iumi for sev lo taem blo big trabol?

¹² Iumi mas strongim tu faith blo iumi lo hao Jehovah hem iusim faithful and wise slave for leadim iumi distaem. (Matt. 24:45) Lo sem wei wea olketa Hebrew Christian maet kasem instruction taem army blo Rome camp raonem Jerusalem, maet iumi tu kasem olketa specific instruction wea bae sevem laef blo iumi taem big trabol hem start. Distaem nao hem important for iumi strongim trust blo iumi lo direction wea iumi kasem from olketa wea lead insaed lo organization blo Jehovah. If iumi no trustim and obeyim direction blo olketa distaem, bae hem hard for iumi obeyim direction wea iumi kasem lo taem blo big trabol.

13. Why nao kaonsel wea stap lo Hebrew 13:5 hem barava fitim?

¹³ Taem olketa Hebrew Christian gohed for weit for lukim saen wea bae showim hem taem for olketa ranawe, olketa need for gohed garem simpol laef and rejectim wei for “laekem tumas selen.” (Readim Hebrew 13:5.) Samfala lo olketa bin deal witim olketa taem blo hangere and wei for poor. (Heb. 10:​32-34) Maet firstaem, olketa willing for go thru lo olketa hard taem for saed blo gud nius, bat gogo samfala start for ting lo selen olsem main samting wea bae protectim olketa. Bat no eni selen savve protectim olketa from big trabol wea klosap for happen. (Jas. 5:3) And tu, maet hem bae no isi for eniwan wea lovem material samting for ranawe and leavim haos and olketa tings blo hem.

14. Hao nao strong faith savve affectim disison blo iumi saed lo material tings?

¹⁴ If iumi garem strong faith dat end blo disfala system hem barava klosap, datwan bae muvim iumi for rejectim wei for laekem tumas material tings. Lo datfala taem selen bae no garem eni value, hem olsem “olketa bae torowem silver blo olketa lo street” bikos olketa luksavve “silver and gold blo olketa bae no savve sevem olketa, lo day blo kros blo Jehovah.” (Ezek. 7:19) Winim wei for focus for mekem staka selen, iumi need for mekem olketa disison wea bae helpem iumi for garem simpol laef and semtaem gohed for servem Jehovah. Diswan minim tu for iumi againstim eni temptation wea bae mekem iumi for garem kaon, or busy tumas for lukaftarem olketa material tings blo iumi. Iumi mas careful tu for no lovem tumas olketa material tings wea iumi garem finis. (Matt. 6:​19, 24) Taem iumi weitim end blo disfala system, faith blo iumi bae kasem test saed lo olketa material tings and olketa nara samting tu.

“IUFALA MAS NO GIVAP”

15. Why nao olketa Hebrew Christian need for no givap?

¹⁵ Olketa Hebrew Christian need for redi for feisim staka samting wea bae testim faith blo olketa taem situation lo Judea hem kamap worse. (Heb. 10:36) Samfala Hebrew Christian bin kasem strongfala persecution, bat staka kamap Christian lo taem wea laef hem lelebet peaceful. Paul storyim dat nomata olketa kasem samfala hard test finis, olketa no feisim yet test olsem Jesus, wea hem nao for faithful go kasem taem olketa dae. (Heb. 12:4) From staka kamap Christian, olketa Jew wea againstim olketa barava kros and laek for killim olketa. Taem Paul go lo Jerusalem tu-thri year bifor, wanfala grup laek for attakim hem. Winim 40-fala Jew ‘swear satem olketa seleva for no kaikaim or drinkim eni samting go kasem taem wea olketa killim dae Paul.’ (Acts 22:22; 23:​12-14) Nomata olketa Christian mas deal witim wei wea olketa Jew heitim and persecutim olketa, olketa need for meet tugeta for worship, preachim gud nius, and gohed for strongim faith blo olketa.

16. Hao nao leta wea Paul raetem for olketa Hebrew Christian helpem olketa for garem stret tingting abaotem persecution? (Hebrew 12:7)

¹⁶ Wat nao bae helpem olketa Hebrew Christian for deal witim persecution? Paul savve olketa need for garem stret tingting abaotem olketa hard taem wea olketa feisim. So, hem explainim dat God savve letem faith blo olketa for kasem test bikos datwan hem part lo training wea wanfala Christian kasem. (Readim Hebrew 12:7.) Kaen training olsem savve helpem man for garem and impruvim olketa main Christian quality wea hem needim. Taem olketa Hebrew Christian focus lo gud samting wea kamaot from olketa hard taem olsem, bae hem helpem olketa for no givap.—Heb. 12:11.

17. Why nao Paul fit for givim advaes abaotem wei for no givap taem samwan kasem persecution?

¹⁷ Paul encouragem olketa Hebrew Christian for gohed strong and no givap taem olketa feisim hard taem. Hem barava fitim for aposol Paul talem disfala advaes. From hem persecutim olketa Christian bifor, hem minim gud wat nao olketa mas deal witim. Hemseleva tu no givap taem hem kasem persecution. Bihaen hem kamap Christian, hem feisim staka difren hard taem. (2 Cor. 11:​23-25) So Paul fit for storyim wei for no givap bikos hem understandim gud datwan. Dastawe hem remindim olketa Christian dat taem olketa kasem hard taem, olketa mas no depend lo olketa seleva bat depend lo Jehovah. Dastawe Paul no fraet and sei: “Jehovah nao hem helpem mi. Bae mi no fraet.”—Heb. 13:6.

18. For helpem iumi no givap taem iumi kasem persecution, wat nao iumi need for tingim?

¹⁸ Samfala brata and sista blo iumi gohed faithful nomata olketa kasem persecution distaem. Iumi savve loyal for sapotim olketa thru lo olketa prea blo iumi, and lo olketa narawe tu. (Heb. 10:33) Bat Bible talem klia dat “pipol bae spoelem tu eniwan wea laek for faithful long God and followim Christ Jesus.” (2 Tim. 3:12) Dastawe, iumi evriwan need for redi for olketa hard taem wea bae kamap. So iumi laek for gohed for barava trustim Jehovah, and sure dat hem bae helpem iumi for no givap lo eni hard taem wea maet iumi kasem. Klosap nao bae hem helpem evriwan wea faithful for kamap free from evri hard taem.—2 Thess. 1:​7, 8.

19. Wat nao olketa samting wea iumi need for duim for helpem iumi redi for big trabol? (Lukim tu piksa.)

¹⁹ For sure, leta blo Paul for olketa Hebrew Christian lo first century hem redyim olketa for big trabol wea olketa klosap for feisim. Paul encouragem olketa brata and sista for duim deep study and understandim Word blo God. Taem olketa duim datwan, hem bae helpem olketa for luksavve and rejectim olketa teaching, wea savve spoelem faith blo olketa. Hem encouragem olketa for strongim faith blo olketa mekem olketa kwiktaem followim direction blo Jesus and olketa wea lead lo kongregeson. And hem helpem olketa Christian for no givap taem olketa garem stretfala tingting lo olketa hard taem wea olketa feisim, and luksavve hao olketa hard taem hia hem part lo training wea olketa kasem from loving Dadi blo olketa. Iumi tu laek for followim disfala kaonsel from Bible. Taem iumi duim olsem bae iumi savve gohed faithful go kasem end.—Heb. 3:14.