Hao War and Violent Conflict Affectim Evriwan
“Since World War II, namba blo olketa violent conflict hem barava increase, and 2 billion pipol wea hem samting olsem wan aot of evri fofala pipol stap lo ples wea violent conflict affectim olketa.”
United Nations Deputy Secretary-General Amina J. Mohammed, January 26, 2023.
War and violent conflict savve brekaot lo olketa ples wea pipol no expectim for hem happen. Even pipol wea stap farawe from ples wea war happen, olketa tu maet safa from datwan. And olketa nogud samting wea war kosim savve stap longtaem afta war end. Tingim samfala example:
Kaikai hem short. World Food Programme sei, “war hem main samting wea kosim hangere. And 70 percent blo pipol lo world wea no garem inaf kaikai stap lo ples wea war and violence happen.”
Physical and mentol health problem. Taem luk olsem war bae happen lo wanfala ples, datwan savve kosim pipol for barava stress and wari tumas. Pipol wea stap lo ples wea war gohed no just safa bikos olketa garekil bat hem savve kosim tu mentol health problem. And staka taem, olketa garem limited access lo olketa medical service.
Pipol displace. United Nations High Commissioner for Refugees storyim, kasem September 2023, winim 114 million pipol raonem world ranawe from ples blo olketa. Main reason for diswan hem war and violent conflict.
Hard taem saed lo economy. Staka taem war kosim problem saed lo economy. Hem mekem price blo olketa tings for barava increase. Pipol maet safa bikos gavman divertim olketa resources wea hem shud iusim for health kea and education for fundim nao olketa tings for military. And kost for buildim bak olketa samting wea distroe hem big tumas.
Problem saed lo environment. Pipol safa taem natural resources wea olketa depend lo hem distroe. War pollutim wata, air, and graon and hem savve kosim health problem for longtaem, and even afta war olketa samting wea left bihaen savve killim pipol.
War distroem and kostim samting.