Gud Samting wea Iumi Kasem From Love blo Jehovah

1. Wat nao iumi savve duim for mekem Jehovah hapi?

IMAGINIM dat iu givim wanfala spesol present wea luk naes and wea barava iusful lo samwan wea iu lovem. If hem putim datfala present lo box and no iusim, maet bae iu no feel hapi lo wat hem duim! Bat if hem iusim gud and talem thankiu for datfala present, iu bae hapi tumas. So wat nao iumi lanem from disfala example? Jehovah givim Son blo hem for dae for iumi. For sure, Jehovah hapi tumas taem hem lukim dat iumi tinghae lo datfala spesol present and love wea muvim hem for provaedem ransom!—John 3:16; Rome 5:​7, 8.

2. Wat nao bae iumi discussim lo disfala article?

² Taem iumi stap lo truth for longtaem, maet iumi start for no tinghae lo datfala present blo ransom. Hem olsem iumi putim datfala present wea God givim insaed box and forgetim. Iumi hapi for kasem, bat iumi no iusim. For datwan no happen, iumi mas ting raonem evritaem wat God and Christ duim for iumi. Disfala article bae helpem iumi for duim datwan. Bae iumi discussim gud samting wea iumi kasem from ransom distaem and hao iumi savve kasem gud samting lo future. And tu, bae iumi discussim hao iumi savve showimaot iumi tinghae lo love blo Jehovah, especially during lo Memorial season.

GUD SAMTING WEA IUMI KASEM DISTAEM

3. Wat nao wanfala gud samting wea iumi kasem from ransom distaem?

³ Distaem iumi gohed for kasem gud samting from ransom sakrifaes blo Jesus. For example, bikos lo ransom, Jehovah forgivim olketa sin blo iumi. Hem shud no forgive iumi. Bat, hem laek for duim datwan. Wanfala man for raetem psalm hem sing olsem: “Iu O Jehovah, iu gud tumas and redi for forgive.”—Ps. 86:5; 103:​3, 10-13.

4. Jehovah provaedem ransom for hu? (Luke 5:32; 1 Timothy 1:15)

⁴ Samfala maet feel olketa no fit for kasem forgiveness blo Jehovah. For tok stret, iumi evriwan no fit for kasem. Aposol Paul tu feel olsem dastawe hem sei “hem no fitim for olketa kolem [hem] wanfala aposol.” Nomata olsem, hem sei: “From God hem kaen long mi nao mi duim disfala waka.” (1 Cor. 15:​9, 10) Taem iumi repent from sin blo iumi, Jehovah forgivim iumi. Why? No bikos iumi fit for kasem forgiveness, bat bikos hem lovem iumi. If iu feel iusles bikos iu tingse iu no fit, remember Jehovah provaedem ransom, no for prefect pipol, bat for olketa sinner wea repent.—Readim Luke 5:32; 1 Timothy 1:15

5. Hao, Jehovah mas showim mercy lo iumi? Explainim.

⁵ No eniwan lo iumi fit for tingse hem shud kasem mercy blo Jehovah bikos hem servem Jehovah for staka year finis. Hem tru, Jehovah barava appreciatim wei wea iumi gohed faithful for servem hem for staka year. (Heb. 6:10) Nomata olsem, hem givim kam Son blo hem olsem free present, no olsem payment bikos iumi servem hem. If iumi garem tingting for claimim dat mercy hem payment for wat iumi duim or bikos lo situation blo iumi, then hem olsem iumi ting nating lo dae blo Christ.—Comparem Galatia 2:21.

6. Why nao Paul waka hard lo service blo Jehovah?

⁶ Paul luksavve nomata hem duim staka samting, forgiveness blo Jehovah hem no olsem payment for wat hem duim. So if olsem, why nao hem waka hard lo service blo Jehovah? Paul no duim datwan for pruvim dat hem shud kasem mercy, bat hem waka hard for showim hem appreciatim wei wea Jehovah hem kaen tumas. (Eph. 3:7) Olsem Paul, iumi tu gohed strong for servem Jehovah no for kasem mercy blo Jehovah olsem payment, bat for showimaot iumi appreciatim datfala mercy.

7. Wat nao nara gud samting wea iumi kasem from ransom distaem? (Rome 5:1; James 2:23)

⁷ Nara gud samting wea iumi kasem from ransom distaem, hem wei wea each wan lo iumi savve fren klos witim Jehovah.a Olsem iumi studyim lo article bifor diswan, taem iumi born iumi no fren witim God. Bat bikos lo ransom, iumi savve “fren gud witim God” and datwan helpem iumi for kamap klos fren blo hem.—Readim Rome 5:1; James 2:23.

8. Why nao iumi shud thankiu lo Jehovah for privilege for prea?

⁸ Tingim wanfala spesol samting wea savve helpem iumi for fren klos witim Jehovah, hem nao privilege for prea. Jehovah no just herem nomoa prea blo pipol blo hem taem olketa hipap tugeta, bat hem herem tu prea wea each wan talem taem hem stap seleva. Prea savve helpem iumi for no wari and garem peace lo mind, and hem no just samting for mekem iumi feel gud nomoa. Prea savve strongim frenship blo iumi witim God. (Ps. 65:2; Jas. 4:8; 1 John 5:14) Taem Jesus lo earth, hem prea evritaem bikos hem savve Jehovah lisin lo hem and hem luksavve prea savve strongim frenship blo hem witim Dadi blo hem. (Luke 5:16) Iumi barava hapi dat bikos lo ransom sakrifaes blo Jesus, iumi savve kamap fren blo Jehovah, and iumi savve story witim Hem lo prea!

GUD SAMTING IUMI SAVVE KASEM LO FUTURE

9. Wat nao gud samting wea olketa wea faithful for worshipim Jehovah bae kasem from ransom lo future?

⁹ Wat nao gud samting wea olketa wea faithful for worshipim Jehovah bae kasem from ransom lo future? Jehovah bae givim laef olowe lo olketa. Staka pipol tingse datwan hard for happen bikos for staka thousand years olketa man gohed for dae. Bat original plan blo Jehovah, hem for olketa man laef olowe. If Adam no sin, evriwan bae laef olowe. Nomata laef olowe hem spesol samting for iumi, bat samting wea barava spesol winim datwan hem nao datfala hae price blo laef blo Son blo hem, wea Jehovah willing for peim mekem iumi savve kasem laef olowe.—Rome 8:32.

10. Wat nao olketa anointed wan and olketa nara sheepsheep luk forward for hem?

¹⁰ Nomata laef olowe hem gud samting wea bae iumi kasem lo future, Jehovah laekem iumi for luk forward lo datwan. Olketa anointed wan luk forward for laef olowe lo heven and olketa bae rul ovarem disfala earth witim Christ. (Rev. 20:6) Olketa nara sheepsheep luk forward for laef olowe lo paradaes earth, wea bae olketa free from wei for kasem pain and sorre. (Rev. 21:​3, 4) Hao, iu wanfala lo olketa nara sheepsheep wea garem hope for laef olowe lo earth? Datfala reward hem spesol samting! Hem laef wea Jehovah designim for iumi enjoyim. Dastawe for laef olowe lo earth, hem samting wea bae mekem iumi hapi tumas.

11-12. Wat nao samfala blessing lo Paradaes wea iumi savve luk forward lo hem? (Lukim tu olketa piksa.)

¹¹ Imaginim laef blo iu lo Paradaes earth. Iu bae no need for wari abaotem sik or dae. (Isa. 25:8; 33:24) Jehovah bae barava satisfaem evri gud samting wea iu laekem. Wat nao maet iu interest for lanem? Physics? Chemistry? Music? Art? Masbi lo paradaes, iumi bae needim olketa architect, olketa builder, and olketa farmer. And tu, bae iumi waka for sapotim each other olsem for duim maintenance waka, preparem kaikai, mekem olketa tul, and plantim olketa beautiful garden. (Isa. 35:1; 65:21) From iu bae laef olowe, iu bae garem staka taem for lanem eni skill wea iu interest lo hem.

¹² Hem hapi samting taem iumi welkamim bak olketa loved wans blo iumi wea resurrect! (Acts 24:15) Imaginim tu, hao iu bae enjoy for lanem staka samting moa abaotem Jehovah taem iu lukluk lo creation. (Ps. 104:24; Isa. 11:9) And best samting, bae iu hapi for worshipim Jehovah and no even feel guilty lo eni samting! Hao, bae iu exchangem olketa blessing hia wea iu bae kasem lo Paradaes witim wei for “duim sin wea savve mekem man hapi for lelebet taem nomoa”? (Heb. 11:25) Barava nomoa nao! Olketa blessing hia winim eni sakrifaes wea iumi savve mekem distaem. Tingim hao hope wea iumi garem for Paradaes earth bae hem kamap tru. Hem bae wanfala real samting wea iumi enjoyim evriday. Diswan hem possible for iumi kasem, only bikos Jehovah hem lovem iumi tumas and givim Son blo hem for dae for iumi!

SHOWIMAOT IU TINGHAE LO LOVE BLO JEHOVAH

13. Wat nao iumi savve duim for showim iumi tinghae lo love blo Jehovah? (2 Corinth 6:1)

¹³ Wat nao iumi savve duim for showim iumi tinghae lo wei wea Jehovah provaedem ransom? Hem nao for iumi putim waka blo hem olsem important samting lo laef blo iumi. (Matt. 6:33) Bikos Jesus dae for iumi, datwan minim “olketa wea laef no duim nomoa wanem olketa seleva laekem, bat for olketa mas duim wanem hem laekem.” (2 Cor. 5:15) Iumi no laek for duim eni samting wea showim dat iumi ting nating lo wei wea Jehovah kaen tumas.—Readim 2 Corinth 6:1.

14. Hao nao iumi savve showimaot faith lo direction blo Jehovah?

¹⁴ Iumi savve showim iumi tinghae tu lo love blo Jehovah taem iumi showimaot faith lo olketa direction blo hem. Hao nao iumi savve duim datwan? Taem iumi need for mekem olketa disison olsem haomas education iumi needim, or wat kaen waka for selen bae iumi duim, iumi mas evritaem tingim wat Jehovah laekem iumi for duim. (1 Cor. 10:31; 2 Cor. 5:7) Taem iumi mekem olketa disison wea showimaot faith, iumi bae kasem nambawan samting, faith blo iumi and wei wea iumi fren witim Jehovah bae kamap moa strong. Datwan bae mekem iumi barava sure lo hope blo iumi.—Rome 5:​3-5; Jas. 2:​21, 22.

15. During lo Memorial season, hao nao iumi savve showimaot iumi tinghae lo Jehovah?

¹⁵ Nara samting tu iumi savve duim for showimaot iumi tinghae lo love blo Jehovah. Iumi savve mekius lo disfala Memorial season for showim lo Jehovah dat iumi thankiu tumas for datfala ransom. Iumi savve plan gud for attendim disfala Memorial, and invaetem olketa narawan tu for attend. (1 Tim. 2:4) Explainim wat nao bae kamap lo Memorial lo olketa wea iu invaetem. Hem gud for showim tufala video hia wea stap lo jw.org, Why Nao Jesus Hem Dae? and Rememberim Dae Bilong Jesus. Olketa elder shud mek sure for invaetem olketa wea inactive. Tingim bigfala hapi wea bae kamap lo heven and lo earth taem wanfala sheepsheep wea lus hem kam bak lo kongregeson! (Luke 15:​4-7) Lo Memorial, iumi no just laek for greetim each other nomoa, bat iumi laek for greetim olketa niu wan or olketa wea no attend for longtaem. Iumi laekem for olketa feel welkam!—Rome 12:13.

16. Why nao hem gud for duim moa samting lo ministry during lo Memorial season?

¹⁶ Hao, iu savve duim moa samting for Jehovah during lo Memorial season? Taem iu duim datwan, hem wanfala nambawan wei for iu showim iu tinghae lo evri samting wea God and Christ duim for iu. Taem iumi duim moa samting lo service blo Jehovah, bae iumi lukim hao hem sapotim iumi, from datwan, trust blo iumi lo Jehovah bae kamap moa strong. (1 Cor. 3:9) And tu, hem gud for followim Bible reading wea stap lo Lukluk lo Olketa Scripture Evriday or iusim datfala chart wea stap lo midweek meeting buk blo iumi. Iu maet chus for iusim olketa Bible verse hia olsem study project blo iu.

17. Wat nao Jehovah hapi lo hem? (Lukim tu box “Samfala Wei for Showim Iu Tinghae lo Love blo Jehovah.”)

¹⁷ Maet situation blo iu mekem hem no isi for iu duim evri samting wea iumi storyim lo disfala article. Bat remember, Jehovah lukim wat nao lo heart blo iu, and hem no comparem wat iu fit for duim witim wat olketa narawan duim. Hem hapi taem hem lukim iu barava tinghae lo datfala nambawan present wea hem nao ransom.—1 Sam. 16:7; Mark 12:​41-44.

18. Why nao iumi thankiu for wat Jehovah God and Jesus Christ duim?

¹⁸ Ransom nomoa mekem iumi fit for kasem forgiveness for olketa sin blo iumi, garem klos frenship witim Jehovah, and garem hope for laef olowe. Iumi evritaem laek for showimaot iumi thankiu tumas for love blo Jehovah wea muvim hem for provaedem olketa blessing hia. (1 John 4:19) And tu, iumi laek for duim samting for showimaot iumi tinghae lo Jesus, wea lovem iumi tumas and willing for givim laef blo hem for iumi!—John 15:13.