Duim Samting for Baptaes and No Delay

1. Why nao hem gud for iu baptaes?

HAO, iu lovem Jehovah God, man wea givim iu laef and evri gud present? Hao, iu laek for duim samting for showim iu lovem hem? Best samting for duim, hem for dedicatem iuseleva lo Jehovah and baptaes. Taem iu duim datwan, iu kamap part lo famili blo Jehovah. And then, hem kamap Dadi and Fren blo iu and bae hem protectim and leadim iu bikos iu blo hem. (Ps. 73:24; Isa. 43:​1, 2) And tu, taem iu dedicate lo God and baptaes, bae iu garem hope for enjoyim laef olowe.—1 Pet. 3:21.

2. Wat nao bae iumi storyim lo disfala article?

² Hao, eni samting mekem iu hol bak for baptaes? Ino iuseleva nomoa feel olsem. Staka million pipol wea worshipim Jehovah tu changem wei and tingting blo olketa mekem olketa qualify for baptaes. And olketa gohed strong and hapi for servem Jehovah. Hao nao example blo samfala wea baptaes lo first century hem savve helpem iu? Bae iumi storyim samfala challenge wea olketa feisim and wat iumi savve lanem from example blo olketa.

PIPOL LO SAMARIA OLKETA BAPTAES

3. Wat nao olketa challenge wea samfala Samaritan need for winim mekem olketa qualify for baptaes?

³ Lo taem blo Jesus, olketa Samaritan garem own religion blo olketa, and main ples wea olketa stap hem lo Shechem and lo Samaria, wea hem north lo Judea. Olketa Samaritan need for kasem accurate knowledge abaotem Word blo God bifor olketa savve baptaes. Olketa Samaritan ting dat only first faevfala buk lo Bible hem kam from God, wea hem nao Genesis kasem Deuteronomy and maet buk blo Joshua. Nomata olsem, olketa Samaritan expectim Messiah bae kam bikos lo promis blo God wea stap lo Deuteronomy 18:​18, 19. (John 4:25) For olketa qualify for baptaes, olketa mas acceptim dat Jesus nao datfala promis Messiah. And hem nao wat staka “pipol bilong Samaria” duim. (John 4:39) Maet samfala lo olketa mas waka hard for changem wei blo olketa bikos olketa Samaritan and olketa Jew savve ting daonem each other.—Luke 9:​52-54.

4. Olsem Acts 8:​5, 6, 14 storyim, wat nao samfala pipol lo Samaria duim taem Philip preach lo olketa?

⁴ Wat nao helpem olketa Samaritan for baptaes? Philip hem man for talemaot gud nius and taem hem preach “abaotem Christ,” samfala “pipol long Samaria olketa biliv.” (Readim Acts 8:​5, 6, 14.) Nomata Philip hem wanfala Jew, olketa lisin taem hem preach. Maet olketa tingim olketa verse wea stap lo first faevfala buk lo Bible wea storyim God no savve fevarem eniwan. (Deut. 10:​17-19) Nomata olsem, olketa “barava interest taem olketa herem samting wea Philip talem” abaotem Christ, and olketa lukim klia pruv wea showim spirit blo God stap witim Philip. Hem duim tu staka mirakol, olsem for healim olketa wea sik and aotem olketa demon from pipol.—Acts 8:7.

5. Wat nao olketa leson wea iu savve lanem from olketa Samaritan?

⁵ Olketa Samaritan hia bae hard for progress for baptaes if olketa letem wei for ting daon narawan or wei for no garem accurate knowledge for stopem olketa. Bat olketa no duim datwan. Olketa Samaritan no weit moa, bat olketa disaed for baptaes bikos olketa convince dat Philip hem teachim truth. Bible sei: “Taem Philip talem olketa datfala gud nius abaotem Kingdom bilong God and abaotem nem bilong Jesus Christ, olketa man and woman bilivim samting wea hem talem and olketa baptaes.” (Acts 8:12) Hao, iu convince Word blo God hem nao truth, and dat Olketa Jehovah’s Witness no fevarem eniwan and showimaot tru love wea Jesus storyim, wea hem mark blo olketa tru Christian? (John 13:35) Sapos olsem, hem gud for iu disaed for baptaes and trustim hao Jehovah bae blessim iu.

6. Hao nao example blo Ruben savve helpem iu?

⁶ Ruben, hem from Germany, and hem growap lo famili wea Olketa Jehovah’s Witness. Bat taem hem young, hem daotem if Jehovah hem really stap. Wat nao helpem hem for winim olketa daot wea hem garem? Hem luksavve hem no garem inaf knowledge, so hem disaed for faendaot moa. Hem sei: “Taem mi duim personal study, mi laek for faendem ansa for olketa daot wea mi garem. Tu-thri taems nao mi studyim topic abaotem evolution.” Hem readim datfala buk Is There a Creator Who Cares About You? Datfala pablikeson hem barava helpem Ruben. Hem ting: ‘Mi just luksavve nao! Jehovah hem really stap.’ And taem Ruben visitim world hedquarter, hem appreciatim go moa spesol wei wea olketa brata and sista evriwea lo world olketa wan mind. Taem Ruben go bak lo Germany, hem baptaes taem hem 17 years old. If iu garem daot abaotem wat iu lanem, duim research lo olketa pablikeson blo iumi for faendem olketa ansa. Accurate knowledge abaotem olketa “tru samting” savve helpem iumi for winim olketa daot. (Eph. 4:​13, 14) And taem iu herem olketa experience abaotem love and wan mind wea pipol blo Jehovah showim for each other evriwea lo world, and iu lukim diswan lo kongregeson blo iuseleva, bae iu barava appreciatim go moa wei wea iumi part lo famili blo Jehovah.

SAUL FROM TARSUS HEM BAPTAES

7. Wat nao stretfala tingting wea Saul need for garem?

⁷ Tingim example blo Saul from Tarsus. Hem savve tumas lo religion blo olketa Jew bifor and pipol tinghae lo Jewish baekgraon blo hem. (Gal. 1:​13, 14; Phil. 3:5) Lo datfala taem, staka Jew tingse olketa Christian olketa apostate, so Saul barava strong for persecutim olketa Christian. Hem tingse hem duim stret samting wea God laekem. (Acts 8:3; 9:​1, 2; 26:​9-11) So Saul seleva mas willing for acceptim dat if hem showimaot faith lo Jesus and baptaes olsem wanfala Christian, bae hem kasem persecution.

8. (a) Wat nao helpem Saul for baptaes? (b) Olsem Acts 22:​12-16 storyim, hao nao Ananias helpem Saul? (Lukim tu piksa.)

⁸ Wat nao helpem Saul for baptaes? Taem Lord Jesus story kam lo Saul from heven, wanfala braet laet mekem Saul for blind. (Acts 9:​3-9) For thrifala day, Saul fasting and luk olsem hem meditate abaotem wat hem happen. For sure, Saul convince dat Jesus hem Messiah and dat olketa Christian nao followim tru religion. Masbi hem sorre tumas bikos hem sapotim olketa wea killim dae Stephen! (Acts 22:20) Afta thrifala day, wanfala disaepol wea nem blo Ananias kam lo Saul and healim hem, and encouragem hem for mas baptaes and no weit moa. (Readim Acts 22:​12-16.) Saul hambol for acceptim datfala help and hem baptaes.—Acts 9:​17, 18.

9. Wat nao olketa leson wea iu savve lanem from Saul?

⁹ Iumi savve lanem staka leson from Saul. Hem isi for Saul letem wei for praod or wei for fraetem man for stopem hem for baptaes. Bat hem no duim datwan. Saul hambol taem hem willing for changem laef blo hem and followim Christ. (Acts 26:​14, 19) Saul willing for kamap wanfala Christian nomata hem savve dat bae hem kasem persecution. (Acts 9:​15, 16; 20:​22, 23) And afta hem baptaes, hem gohed depend lo Jehovah for helpem hem for winim olketa test. (2 Cor. 4:​7-10) Taem iu baptaes for kamap wanfala Jehovah’s Witness maet datwan mekem iu for feisim olketa situation wea bae testim faith blo iu or kasem olketa hard taem, bat bae iu kasem help. Iu savve sure dat God and Christ bae gohed for sapotim iu.—Phil. 4:13.

10. Hao nao example blo Anna savve helpem iu?

¹⁰ Anna hem from wanfala Kurdish famili lo Eastern Europe. Afta mami blo hem baptaes, dadi blo Anna letem hem for studyim Bible taem hem 9 years old. Bat diswan kosim wanfala problem for Anna bikos olketa relative wea stap lo haos witim olketa, no hapi taem hem start for studyim Bible. Olketa relative ting dat if samwan lo famili lusim religion blo olketa grani blo olketa, datwan hem mek shame lo famili. Taem Anna 12 years old, hem askem dadi blo hem for hem baptaes. Dadi laek for savve if datwan hem personal disison blo hem or samwan nao forcem hem. Anna sei: “Mi lovem Jehovah.” So dadi blo hem agree for hem baptaes. Bihaen Anna baptaes, olketa relative tok spoelem hem and treatim hem nogud. Wanfala relative talem hem olsem, “Hem beta if iu garem laef wea olobaot and iu smoke, winim for iu kamap wanfala Jehovah’s Witness.” Hao nao Anna deal witim datwan? Hem sei: “Jehovah helpem mi for gohed strong, and parents blo mi barava sapotim mi.” Anna savve raetem list blo olketa specific taem wea Jehovah helpem hem. And then samfala taem, hem savve luk bak lo wat hem raetem mekem hem no forgetim hao Jehovah helpem hem. If iu fraetem persecution, remember Jehovah bae helpem iu tu.—Heb. 13:6.

CORNELIUS HEM BAPTAES

11. Wat nao olketa challenge wea Cornelius hem feisim?

¹¹ Bible storyim tu example blo Cornelius. Hem wanfala “bigman” or komanda blo samting olsem 100 soldia lo army blo Rome. (Acts 10:1) Bikos lo datwan, maet hem garem hae position insaed community and lo army. Hem savve “duim gud samting for pipol wea poor.” (Acts 10:2) Jehovah sendem aposol Peter for talemaot gud nius lo hem. Hao, position blo Cornelius mekem hem for hol bak for baptaes?

12. Wat nao helpem Cornelius for baptaes?

¹² Wat nao helpem Cornelius for baptaes? Bible sei: “Hem witim full famili bilong hem olketa worshipim God.” And Cornelius gohed for prea strong lo God evritaem. (Acts 10:2) Taem Peter talemaot gud nius lo Cornelius, hem and famili blo hem acceptim Christ and semtaem nomoa olketa baptaes. (Acts 10:​47, 48) For sure, Cornelius willing for mekem watever change wea hem need for duim mekem hem and famili blo hem savve worshipim Jehovah tugeta.—Josh. 24:15; Acts 10:​24, 33.

13. Wat nao iu savve lanem from Cornelius?

¹³ Olsem Saul, Cornelius savve letem position blo hem for stopem hem for kamap wanfala Christian. Bat Cornelius no duim datwan. Hao, for iu acceptim truth iu need for mekem samfala big change lo laef blo iu? Sapos olsem, Jehovah bae helpem iu. Hem bae blessim iu if iu disaed strong for followim olketa Bible principle.

14. Hao nao example blo Brata Tsuyoshi savve helpem iu?

¹⁴ Tsuyoshi, from Japan, hem need for mekem samfala change lo waka blo hem mekem hem qualify for baptaes. Hem assistant blo hedmasta blo Ikenobo skul blo olketa flaoa arrangement. Taem hedmasta no fit for attendim olketa funeral, Tsuyoshi nao staka taem savve representim hem lo olketa ceremony blo olketa Buddhist. Bat, taem Tsuyoshi lanem truth abaotem olketa wea dae, hem luksavve dat hard for hem qualify for baptaes if hem gohed attendim olketa ceremony olsem. So hem disaed for stop for joinim olketa ceremony blo olketa Buddhist. (2 Cor. 6:​15, 16) Tsuyoshi story lo hedmasta abaotem datwan. Wat nao result? Hedmasta letem Tsuyoshi for gohed waka bat no join insaed olketa ceremony hia. So samting olsem wan year bihaen hem studyim Bible, hem baptaes.a If iu need for changem samfala samting lo waka blo iu for mekem God hapi, trustim dat hem bae provaedem wat iu and famili blo iu needim.—Ps. 127:2; Matt. 6:33.

OLKETA LO CORINTH BAPTAES

15. Wat nao samfala challenge wea olketa lo Corinth feisim wea mekem hem no isi for olketa baptaes?

¹⁵ Pipol lo Corinth bifor lovem tumas material samting and wei blo olketa barava nogud. Staka lo olketa duim samting wea God no hapi lo hem. Masbi for stap lo kaen ples olsem hem wanfala challenge for eniwan wea laek for acceptim truth. Bat taem aposol Paul kam lo datfala taon and preachim gud nius abaotem Christ, staka “pipol long Corinth wea herem gud nius, olketa biliv and baptaes.” (Acts 18:​7-11) Then Lord Jesus Christ hem appear lo Paul lo wanfala vision and sei: “Staka pipol long disfala taon bae biliv long mi.” So Paul gohed for preach lo there for wan and haf year.

16. Wat nao helpem samfala lo Corinth for winim olketa challenge wea mekem hem no isi for olketa baptaes? (2 Corinth 10:​4, 5)

¹⁶ Wat nao helpem olketa lo Corinth for baptaes? (Readim 2 Corinth 10:​4, 5.) Word blo God and paoa blo holy spirit helpem olketa for mekem olketa big change lo laef blo olketa. (Heb. 4:12) Olketa lo Corinth wea acceptim gud nius abaotem Christ, olketa stop for duim olketa barava nogud wei olsem for drunk, steal, and wei for homosexual.—1 Cor. 6:​9-11.b

17. Wat nao iu savve lanem from olketa lo Corinth?

¹⁷ Tingim, nomata samfala lo Corinth garem olketa barava nogud wei wea olketa mas changem, olketa no concludem dat bae hem hard nao for olketa kamap Christian. Olketa waka hard for followim datfala road wea no isi for wakabaot lo hem, wea lead go lo laef olowe. (Matt. 7:​13, 14) Hao, iu stragol for winim wanfala bad habit or nogud wei wea mekem iu no qualify for baptaes? No givap! Begim Jehovah for holy spirit for helpem iu for againstim feeling for laek duim nogud samting.

18. Hao nao example blo Monika savve helpem iu?

¹⁸ Monika, wea kam from kantri wea nem blo hem Georgia, waka hard for changem samfala wei blo hem wea mekem hem no qualify for baptaes, olsem wei for talem olketa nogud toktok and for watchim olketa nogud entertainment. Hem sei: “Taem mi teenager, mi kasem strong from wei for prea. Jehovah savve mi laek for duim stret samting, and hem evritaem helpem mi and showim mi wat for duim.” Monika hem baptaes taem hem 16 years old. Hao, iu need for lusim samfala nogud wei mekem iu savve servem Jehovah lo wei wea hem bae acceptim? Gohed askem hem for givim iu strong wea iu needim for mekem olketa change lo laef blo iu. Jehovah willing tumas for givim holy spirit for helpem iu.—John 3:34.

FAITH BLO IU SAVVE MUVIM MAUNTEN

19. Wat nao savve helpem iu for winim olketa hard taem wea olsem wanfala maunten? (Lukim tu piksa.)

¹⁹ Trustim dat Jehovah lovem iu and laekem iu for kamap part lo famili blo hem. Nomata watever challenge iu feisim wea mekem hem hard for iu qualify for baptaes, Jehovah hem lovem iu. Jesus sei olsem lo samfala disaepol blo hem lo first century: “Nomata sapos faith bilong iufala hem smol olsem wanfala seed bilong mustard tree nomoa, iufala bae sei long disfala maunten, ‘Iu muv go long narasaed,’ and bae hem muv nao, and no eni samting bae hard for iufala.” (Matt. 17:20) Olketa wea stap witim Jesus lo datfala taem, olketa followim hem for tu-thri years nomoa, so olketa need for mekem faith blo olketa for kamap moa strong. Jesus sei if olketa strongim go moa faith blo olketa, Jehovah bae helpem olketa for winim olketa hard taem wea olsem wanfala maunten. And Jehovah bae helpem iu tu for duim sem samting!

20. Hao nao example blo olketa Christian lo first century and distaem tu wea iumi storyim lo disfala article hem helpem iu?

²⁰ If iu luksavve lo eni challenge wea stopem iu for qualify for baptaes, no delay for duim samting for winim datwan. Kasem comfort and strong from example blo olketa Christian lo first century and distaem tu. Letem example blo olketa encouragem iu and muvim iu for dedicatem iuseleva lo Jehovah and for baptaes. Diswan nao hem best disison wea iu savve mekem!