Lane From Example blo Jesus for Barava Laek for Preach

1. Wat nao wanfala samting wea mekem pipol blo Jehovah difren from pipol lo world?

WANFALA samting wea mekem pipol blo Jehovah difren from olketa narawan wea sei olketa Christian, hem nao wei wea olketa laekem tumasa for duim ministry. (Titus 2:14) Bat samfala taem, maet iu no barava laek for duim preaching waka. Maet iu garem sem tingting olsem wanfala elder wea waka hard lo kongregeson wea sei, “Samfala taem, mi no feel laek for go preaching.”

2. Why nao samfala taem iumi no barava laek for duim ministry?

² Iumi maet barava enjoy for duim olketa nara waka lo organization blo Jehovah winim for duim preaching waka. Why? Maet bikos taem iumi buildim and maintainim olketa theocratic building, help lo disaster relief waka, or encouragem olketa brata and sista, iumi kwiktaem for lukim result and feel satisfae lo wat iumi duim. Iumi enjoyim datfala peace and love wea iumi experiencem taem iumi waka witim olketa brata, and iumi savve olketa appreciatim wat iumi duim. Bat, maet taem iumi preach lo sem territory for staka year, iumi no lukim eni positive result. Or maet iumi meetim pipol wea les for herem message blo iumi. And taem iumi tingim dat end hem kakam klosap, iumi savve pipol bae barava les go moa lo message blo iumi. (Matt. 10:22) Wat nao savve helpem iumi for laek gohed duim preaching waka or even increasim feeling blo iumi for laek duim datwan?

3. Hao nao illustration lo Luke 13:​6-9 showim Jesus barava laek for duim preaching waka?

³ Iumi savve lane from example blo Jesus for barava laek for duim preaching waka. During lo ministry blo hem, no enitaem hem stop for waka hard for preach. Instead, hem just increasim go moa preaching waka blo hem. (Readim Luke 13:​6-9.) Lo illustration blo Jesus, hem comparem waka blo hem witim wanfala man wea waka hard for thri years for mekem wanfala fig tree for garem frut, bat datfala tree nating garem eni frut. Lo sem wei, Jesus waka hard for preach lo olketa Jew for samting olsem thri years, bat staka no acceptim message blo hem. Bat, olsem hao datfala man hem no givap for trae mekem datfala fig tree for garem frut, Jesus tu no givap for helpem pipol or slow daon lo ministry blo hem. Instead, hem barava waka hard for trae for kasem heart blo olketa.

4. Wat nao fofala samting wea iumi bae lanem from example blo Jesus?

⁴ Lo disfala article, bae iumi discussim hao Jesus showimaot hem barava laek for duim preaching waka, especially during lo last six months lo ministry blo hem. (Lukim “After these things” lo English study note lo Luke 10:1.) Taem iumi lane from wat hem teachim and followim example blo hem, datwan bae helpem iumi for barava laek for gohed duim preaching distaem. Bae iumi storyim fofala samting wea Jesus duim: (1) Hem focus lo wat Jehovah laekem hem for duim, (2) hem luksavve lo Bible profesi and duim samting followim, (3) hem depend lo Jehovah for sapotim hem, and (4) hem gohed garem positive tingting and sure samfala pipol bae lisin lo hem.

HEM FOCUS LO WAT JEHOVAH LAEKEM HEM FOR DUIM

5. Hao nao Jesus showimaot dat hem focus lo wat God laekem hem for duim?

⁵ Jesus barava laek for preachim “gud nius abaotem Kingdom” bikos hem savve datwan nao waka wea God laekem hem for duim. (Luke 4:43) Jesus mekem ministry kamap main samting lo laef blo hem. Nomata taem ministry blo hem gogo for end, hem travel “go long evri taon and vilij,” for teachim olketa narawan. (Luke 13:22) Hem trainim tu samfala disaepol moa for waka witim hem for preach.—Luke 10:1.

6. Hao nao olketa nara assignment hem sapotim preaching waka? (Lukim tu piksa.)

⁶ Distaem tu, main waka wea Jehovah and Jesus laekem iumi for duim hem nao for preachim gud nius. (Matt. 24:14; 28:​19, 20) Olketa nara theocratic assignment hem for sapotim preaching waka. For example, olketa theocratic building project or olketa waka lo Bethel, hem for sapotim waka lo field. And wei for provaedem disaster relief hem no just helpem olketa brata and sista lo physical wei, bat iumi helpem olketa for duim bak spiritual activity wea includim tu preaching waka. Taem iumi luksavve preaching waka hem important and iumi tingim dat hem nao main waka wea Jehovah laekem iumi for duim, datwan motivatim iumi for evritaem laek for duim ministry. János, wanfala elder lo Hungary, hem sei: “Mi savve remindim miseleva dat no eni nara theocratic activity hem winim preaching waka; datwan nao main assignment blo iumi.”

7. Why nao Jehovah laekem iumi for gohed duim preaching waka? (1 Timothy 2:​3, 4)

⁷ Taem iumi ting lo pipol olsem hao Jehovah ting lo olketa, bae iumi barava laek for duim ministry. Jehovah laekem staka pipol nao for herem gud nius and acceptim. (Readim 1 Timothy 2:​3, 4.) From datwan, hem trainim iumi for kamap gud lo wei for duim disfala waka for sevem laef blo pipol. For example, datfala brochure Lovem Pipol—Mek Disaepol hem teachim iumi olketa gud idea wea helpem iumi for startim story witim goal for mek disaepol. Even if pipol no kamap disaepol distaem, maet olketa bae garem chance for duim datwan bifor lo end blo datfala big trabol. Wat iumi talem lo olketa distaem, maet bae motivatim olketa for duim samting lo future. Bat datwan bae only happen if iumi gohed for preach.

HEM LUKSAVVE LO BIBLE PROFESI AND DUIM SAMTING

8. Hao nao wei wea Jesus savve lo Bible profesi hem affectim hao hem iusim taem blo hem?

⁸ Jesus luksavve hao olketa Bible profesi bae fulfill lo datfala taem. Hem savve ministry blo hem bae gohed for just thri and haf years. (Dan. 9:​26, 27) Hem savve tu lo olketa profesi abaotem taem wea hem bae dae and hao datwan bae happen. (Luke 18:​31-34) From Jesus luksavve lo olketa profesi hia, datwan affectim hao hem iusim taem blo hem. So, hem gohed strong for preach mekem hem completim waka wea Jehovah givim hem for duim.

9. Why nao olketa Bible profesi motivatim iumi for barava laek for gohed preach?

⁹ If iumi luksavve lo olketa Bible profesi wea gohed for fulfill, datwan savve motivatim iumi for barava laek for preach. Iumi savve klosap disfala system bae hem finis. Iumi luksavve samting wea happen lo world distaem and attitude blo pipol hem barava fulfillim wat Bible talem abaotem olketa last day. Iumi lukim datfala England-America World Paoa hem gohed for compete witim Russia and olketa kantri wea sapotim hem, wea diswan hem fulfillim profesi abaotem king blo south and king blo north “lo taem blo end.” (Dan. 11:40) Iumi understandim tu hao feet blo datfala image wea Daniel 2:​43-45 storyim, hem representim England-America World Paoa. And iumi convince dat olsem profesi hia talem, klosap nao Kingdom blo God bae distroem evri gavman lo world. Evri profesi hia helpem iumi for luksavve lo taem wea iumi stap lo hem, and datwan motivatim iumi for preach bikos iumi savve disfala waka hem urgent tumas.

10. Hao nao olketa Bible profesi savve helpem iumi for barava laek for preach?

¹⁰ Olketa Bible profesi garem tu olketa message wea iumi barava laek for sharem. Carrie, wanfala sista lo Dominican Republic sei: “Olketa nambawan promis blo Jehovah abaotem future hem motivatim mi for sharem truth witim olketa narawan.” Hem sei tu: “Taem mi lukim olketa problem wea pipol deal witim, mi luksavve olketa nambawan promis hia hem no for mi nomoa, bat hem for olketa tu.” Olketa Bible profesi showim Jehovah sapotim preaching waka and datwan encouragem iumi for no hol bak. Leila, wea stap lo Hungary, hem sei: “Isaiah 11:​6-9 motivatim mi for sharem gud nius witim olketa narawan, even witim pipol wea luk olsem olketa no acceptim. Mi luksavve Jehovah savve helpem eniwan for change.” And Christopher, wanfala brata from Zambia, hem sei: “Olsem Mark 13:10 talem, disfala gud nius mas kasem evri ples lo world, and hem privilege for mi share insaed waka for fulfillim disfala profesi.” Which Bible profesi nao motivatim iu for gohed for preach?

HEM DEPEND LO JEHOVAH FOR SAPOTIM HEM

11. Why nao Jesus need for depend lo Jehovah for helpem hem for gohed strong for preach? (Luke 12:​49, 53)

¹¹ Jesus depend lo Jehovah for sapotim hem for gohed strong for preach. Nomata Jesus story kaen, hem savve gud nius blo Kingdom bae mekem samfala for pipol kros and samfala bae againstim. (Readim Luke 12:​49, 53.) Bikos lo wat Jesus preachim, olketa bigman blo religion staka taem trae for killim hem. (John 8:59; 10:​31, 39) Bat Jesus gohed for preach bikos hem savve Jehovah sapotim hem. Hem sei: “Dadi wea sendem mi kam . . . hem stap witim mi. Hem no lusim mi bikos mi evritaem duim samting wea hem laekem.”—John 8:​16, 29.

12. Hao nao Jesus redyim olketa disaepol for gohed preach even taem olketa kasem persecution?

¹² Jesus remindim olketa disaepol blo hem dat olketa fit for depend lo Jehovah for sapotim olketa. Staka taem hem talem olketa Jehovah bae helpem olketa even taem olketa kasem persecution. (Matt. 10:​18-20; Luke 12:​11, 12) Hem encouragem olketa for mas careful. (Matt. 10:16; Luke 10:3) Hem givim instruction for no forcem pipol for acceptim datfala message sapos olketa les. (Luke 10:​10, 11) And hem talem olketa disaepol for ranawe if olketa kasem persecution. (Matt. 10:23) Nomata Jesus strong for preach and hem trustim Jehovah, hem no putim hemseleva lo danger taem hem no need for duim datwan.—John 11:​53, 54.

13. Why nao iu savve sure Jehovah bae helpem iu?

¹³ Distaem tu, iumi needim Jehovah for helpem iumi for gohed strong for preach nomata pipol againstim iumi. (Rev. 12:17) Why nao iu savve sure Jehovah bae sapotim iu? Tingim prea blo Jesus lo John chapter 17. Jesus askem Jehovah for lukaftarem olketa aposol, and Jehovah ansarem datfala prea. Buk blo Acts storyim hao hem helpem olketa aposol for gohed strong for preach nomata olketa kasem persecution. Lo prea blo Jesus, hem askem Jehovah for lukaftarem olketa wea showimaot faith lo message wea olketa aposol preachim. Datwan includim iu tu. Jehovah gohed for duim wat Jesus askem lo datfala prea, hem helpem olketa aposol and hem bae helpem iu tu.—John 17:​11, 15, 20.

14. Why nao iumi sure dat iumi bae gohed strong for preach? (Lukim tu piksa.)

¹⁴ Even if hem kamap moa hard for iumi preachim disfala gud nius taem end hem kakam klosap, iumi bae kasem sapot wea iumi needim. (Luke 21:​12-15) Olsem Jesus and olketa disaepol blo hem, iumi letem pipol for disaed seleva if olketa laek for lisin or nomoa, and iumi avoidim wei for raoa. Nomata lo olketa kantri wea olketa restrictim waka blo iumi, olketa brata gohed sharem disfala gud nius bikos olketa depend lo Jehovah and no lo own strong blo olketa. Jehovah givim strong lo olketa Christian lo first century, and distaem tu hem givim strong for iumi savve “barava duim gud datfala waka for talemaot gud nius” go kasem taem wea Jehovah sei hem finis. (2 Tim. 4:17) Iu savve sure dat if iu depend lo Jehovah, iu bae fit for gohed strong for preach.

HEM GOHED GAREM POSITIVE TINGTING

15. Wat nao showimaot Jesus garem positive tingting abaotem ministry?

¹⁵ Jesus gohed for garem positive tingting abaotem preaching waka. Datwan helpem hem for gohed hapi lo ministry blo hem. For example, gogo for end lo 30 C.E., Jesus lukim hao staka nao acceptim message wea hem preachim, and hem sei olketa olsem planteison wea redi for harvest. (John 4:35) Samting olsem wan year bihaen, hem talem olketa disaepol dat waka for ‘harvest’ hem big tumas. (Matt. 9:​37, 38) And bihaen hem sei moa: “Staka samting nao stap for harvestim . . . So askem man wea ownim planteison for sendem go olketa wakaman for harvestim planteison bilong hem.” (Luke 10:2) Jesus evritaem tingim hao chance hem stap for pipol acceptim gud nius, and hem hapi taem olketa duim datwan.—Luke 10:21.

16. Hao nao tufala illustration wea Jesus iusim helpem iumi for garem positive tingting abaotem ministry? (Luke 13:​18-21) (Lukim tu piksa.)

¹⁶ Jesus teachim olketa disaepol for gohed garem positive tingting abaotem message blo olketa, datwan encouragem olketa for barava laek for duim ministry. For example, tingim tufala illustration wea Jesus storyim. (Readim Luke 13:​18-21.) Jesus comparem message blo Kingdom witim smol mustard seed wea grow and kamap wanfala big tree, wea minim pipol bae acceptim gud nius and no eni samting savve stopem datwan for grow. And then Jesus comparem Kingdom message witim yeast, wea kwiktaem for spred and mekem olketa change for kamap, nomata maet iumi no lukim olketa change hia. So, Jesus helpem olketa disaepol for lukim dat message wea olketa preachim bae hem successful.

17. Wat nao samfala reason wea helpem iumi for gohed garem positive tingting abaotem ministry?

¹⁷ Taem iumi ting raonem hao disfala waka hem gohed evriwea lo world distaem, datwan motivatim iumi for barava laek for gohed preach. Each year, staka million pipol wea interest attendim Memorial and start for studyim Bible. Staka handred thousand pipol baptaes and joinim iumi for duim preaching waka. Iumi no savve hao many pipol moa bae acceptim Kingdom message, bat iumi savve Jehovah gohed for hipap wanfala big crowd wea bae laef thru lo datfala big trabol. (Rev. 7:​9, 14) Jehovah wea ownim planteison, hem lukim hao staka pipol stap yet for harvestim, so datwan hem gud reason for iumi gohed for preach.

18. Wat nao iumi laekem pipol for luksavve lo hem taem iumi duim ministry?

¹⁸ From bifor kam yet, pipol luksavve lo olketa disaepol blo Jesus bikos olketa evritaem barava laek for preach. Taem pipol lukim hao olketa aposol no fraet for preach, olketa luksavve dat olketa hia “savve gogo witim Jesus bifor.” (Acts 4:13) Taem iumi no fraet and hapi for duim ministry, pipol bae luksavve dat iumi followim example blo Jesus for barava laek for preach.