“Iufala Seleva Chusim . . . Hu Nao Bae Iufala Worshipim”

1. Wat nao iumi mas duim for kasem trufala hapi, and why nao olsem? (Isaiah 48:​17, 18)

DADI blo iumi lo heven hem barava lovem iumi, and laekem iumi for enjoyim laef distaem and lo future. (Eccl. 3:​12, 13) Hem creatim iumi for garem samfala outstanding talent, bat hem no givim iumi ability for rulim iumiseleva or for disaedem seleva wat hem raet and rong. (Eccl. 8:9; Jer. 10:23) Hem savve, dat for iumi kasem trufala hapi, iumi mas worshipim hem and followim olketa standard blo hem.—Readim Isaiah 48:​17, 18.

2. Wat nao Satan laekem iumi for bilivim, and wat nao Jehovah duim for pruvim dat Satan laea?

² Satan laekem iumi for bilivim dat iumi bae hapi nomata iumi no worshipim Jehovah, and iumi olketa man savve rulim iumiseleva. (Gen. 3:​4, 5) For pruvim dat Satan hem laea, Jehovah letem olketa man for rulim olketa seleva for lelebet taem. Iumi barava lukim klia staka nogud samting wea kamaot from wei wea olketa man rul. Nomata olsem, Bible garem staka example blo olketa man and woman wea barava hapi bikos olketa iusim laef blo olketa for worshipim Jehovah. Wanfala best example hem Jesus Christ. Lo disfala article, firstaem, bae iumi lukim olketa reason why Jesus chus for worshipim Jehovah. Then, bae iumi story raonem why Dadi blo iumi lo heven hem fit for kasem worship from iumi. And, bae iumi storyim samfala reason why iumi chus for worshipim Jehovah.

WHY JESUS CHUS FOR WORSHIPIM JEHOVAH

3. Wat nao Satan offerim lo Jesus, and wat nao Jesus chus for duim?

³ Taem Jesus stap lo earth hem mas chusim hu nao bae hem worshipim. No longtaem bihaen Jesus baptaes, Satan offerim lo hem evri kingdom lo earth, if hem baodaon and worshipim hem wanfala taem nomoa. Jesus sei: “Iu go nao Satan! Olketa Holy Raeting talem finis: ‘Iu mas baodaon lo Jehovah, God blo iu and iu mas worshipim hem nomoa.’” (Matt. 4:​8-10) Why nao Jesus chus for duim datwan? Bae iumi storyim samfala reason.

4-5. Wat nao samfala reason why Jesus chus for worshipim Jehovah?

⁴ Main reason why Jesus chus for worshipim Jehovah hem nao love, and no eniting savve brekem strongfala love wea Jesus garem for Dadi blo hem. (John 14:31) And tu, Jesus worshipim Jehovah bikos hem nao stret samting for duim. (John 8:​28, 29; Rev. 4:11) Hem savve Jehovah nao Source blo laef and fit for iumi trustim Hem and hem kaen. (Ps. 33:4; 36:9; Jas. 1:17) Jehovah evritaem talem tru samting lo Jesus and givim hem evriting wea hem garem. (John 1:14) Bat Satan hem barava difren, bikos hem nao man wea kosim dae. Hem man for laea, greedy, and tingim hemseleva. (John 8:44) Jesus savve lo datwan, dastawe hem no even ting for followim example blo Satan for againstim Jehovah.—Phil. 2:​5-8.

⁵ Nara reason why Jesus chus for worshipim Jehovah hem bikos Jesus luk forward lo result wea bae kamaot from loyal service blo hem for Jehovah. (Heb. 12:2) Hem savve dat if hem gohed for faithful, hem bae help for kliarem nem blo Dadi blo hem, and hem bae provaedem sakrifaes wea bae finisim evri wei for safa wea Satan kosim.

WHY JEHOVAH FIT FOR KASEM WORSHIP FROM IUMI

6-7. Why nao staka no worshipim Jehovah, bat why nao iumi shud worshipim hem?

⁶ Staka pipol distaem no worshipim Jehovah bikos olketa no savve yet lo olketa gudfala quality blo hem, and olketa no savve tu lo olketa gud samting wea Jehovah duim for olketa. Olketa olsem tu pipol wea aposol Paul preach lo olketa lo Athens.—Acts 17:​19, 20, 30, 34.

⁷ Paul explainim lo olketa lo Athens dat tru God “hem givim lo evri pipol, laef and brith and evri samting.” Then hem sei: “Bikos lo hem nao iumi laef and muv and exist.” God nao hem Creator wea “wakem . . . evri nation aot lo wanfala man nomoa,” so hem garem raet for kasem worship from iumi.—Acts 17:​25, 26, 28.

8. Wat nao Jehovah bae no enitaem duim? Explainim.

⁸ From Jehovah hem Creator and Sovereign blo universe, hem fit for forcem pipol for worshipim hem. Bat, Jehovah bae no enitaem duim datwan. Instead, hem provaedem evidence wea showimaot hem exist and hem barava lovem each wan lo iumi. Hem laekem staka pipol for kamap fren blo hem for olowe. (1 Tim. 2:​3, 4) Bikos lo datwan, Jehovah trainim iumi for teachim olketa narawan abaotem purpose blo hem and for talem olketa abaotem evri gud samting wea hem bae duim for pipol. (Matt. 10:​11-13; 28:​19, 20) Jehovah organizem iumi for stap lo olketa kongregeson and hem mekem arrangement for olketa overseer for lukaftarem iumi.—Acts 20:28.

9. Wat nao Jehovah duim wea showimaot hem lovem pipol?

⁹ Nambawan love blo Jehovah hem showaot tu lo hao hem treatim pipol wea chus for ignorem dat hem exist. Tingim diswan: Start from bifor kam, staka billion pipol chus for followim own standard blo olketa saed lo wat hem stret and wat hem rong. Nomata olsem, Jehovah hem kaen tumas for givim wat olketa needim for gohed laef and for enjoyim datwan. (Matt. 5:​44, 45; Acts 14:​16, 17) Hem creatim olketa tu lo wei wea olketa savve garem olketa frens, for garem famili, and for kasem gud samting from hard waka blo olketa. (Ps. 127:3; Eccl. 2:24) Datwan hem klia pruv wea showim Dadi blo iumi lo heven hem lovem iumi evriwan. (Ex. 34:6) Distaem bae iumi storyim samfala reason why iumi chus for worshipim Jehovah and wat hem duim for iumi.

WHY IUMI CHUS FOR WORSHIPIM JEHOVAH

10. (a) Wat nao main reason why iumi worshipim Jehovah? (Matthew 22:37) (b) Wat nao gud samting wea iumi kasem from Jehovah hem patient? (Psalm 103:​13, 14)

¹⁰ Olsem Jesus, strongfala love nao main reason wea motivatim iumi for worshipim Jehovah. (Readim Matthew 22:37.) Taem iumi lane abaotem olketa quality blo Jehovah, datwan mekem iumi laek for fren klos witim hem. For example, tingim wei wea Jehovah hem patient witim iumi. Taem olketa Israelite disobeyim hem, Jehovah askem olketa and sei: “Tane bak, plis, from olketa nogud wei blo iufala.” (Jer. 18:11) Jehovah tingim hao iumi no perfect and hem savve iumi dust nomoa. (Readim Psalm 103:​13, 14.) Taem iu meditate abaotem hao Jehovah hem patient and olketa nara gud quality blo hem, hao, datwan motivatim iu for laek worshipim hem for olowe?

11. Wat nao samfala nara reason why iumi chus for worshipim Dadi blo iumi lo heven?

¹¹ Nara reason wea motivatim iumi for worshipim Jehovah, hem bikos datwan nao stret samting for duim. (Matt. 4:10) And tu, iumi savve lo result wea bae kamaot from loyal service blo iumi for Jehovah. Wei for gohed faithful for worshipim Jehovah hem help for kliarem nem blo Jehovah from eni blame, hem pruvim Satan hem laea, and iumi mekem heart blo Dadi blo iumi for hapi. And if iumi chus for worshipim Jehovah distaem, iumi garem chance for worshipim hem for olowe!—John 17:3.

12-13. Wat nao iumi lanem from experience blo Jane and Pam?

¹² Nomata iumi young, iumi savve mekem grow strongfala love for Jehovah, and datfala love bae gohed for kamap moa strong. Tingim example blo Jane and Pam,a wea tufala really sista. Jane hem 11 years old and Pam hem 10 years old taem tufala start for studyim Bible. Nomata parents blo tufala no interest for study, tufala letem Jane and Pam for studyim Bible witim olketa Witness, bat lo olketa weekend tufala mas still go lo church witim famili blo tufala. Jane sei: “Wat olketa Witness teachim from Bible hem helpem mi for againstim pressure from olketa nara young wan for tekem drugs and for durong.”

¹³ Bihaen samfala year Jane and Pam kamap pablisa. Then, tufala start for pioneer and lukaftarem parents blo tufala wea olo. Taem Jane tingim bak evriting wea Jehovah duim for hem, hem sei: “Mi experiencem hao Jehovah barava kea for olketa fren blo hem, and olsem 2 Timothy 2:19 talem, ‘Jehovah savve hu nao man blo hem.’” No eni daot hem stap dat Jehovah kea for olketa wea chus for lovem and worshipim hem!

14. Hao nao toktok blo iumi and wat iumi duim help for kliarem nem blo Jehovah? (Lukim tu piksa.)

¹⁴ Iumi laek for helpem Jehovah for kliarem nem blo hem from eni blame. Tingim disfala example: Iu garem wanfala klos fren wea hem willing tumas for givim samting, hem kaen, and savve forgive. Wanday, iu herem samwan accusim fren blo iu and sei hem raf and no honest. Wat nao bae iu duim? Iu bae defendim hem. Lo sem wei tu, taem Satan and olketa pipol wea hem influencim spredim olketa laea wea spoelem reputation blo Jehovah, iumi kwiktaem for talem truth abaotem Jehovah and barava defendim nem blo Hem. (Ps. 34:1; Isa. 43:10) Wat iumi talem and duim hem showim iumi laek for worshipim Jehovah witim full soul blo iumi.

15. Wat nao gud samting wea aposol Paul kasem taem hem adjustim olketa goal blo hem? (Philippians 3:​7, 8)

¹⁵ Iumi willing for adjustim olketa goal blo iumi mekem iumi savve worshipim Jehovah lo wei wea hem acceptim or for duim moa samting for servem hem. For example, aposol Paul chus for lusim hae position wea hem garem lo community blo hem mekem hem savve followim Christ and worshipim Jehovah. (Gal. 1:14) From datwan, hem kasem staka blessing lo service blo hem for Jehovah and hem kasem privilege for rul witim Christ lo heven. Paul nating regretim disison blo hem for worshipim Jehovah, and if iumi mekem disison olsem bae iumi tu no regret.—Readim Philippians 3:​7, 8.

16. Wat nao iumi lanem from experience blo Julia? (Lukim tu olketa piksa.)

¹⁶ If main focus blo iumi hem for worshipim Jehovah, iumi bae kasem staka blessing distaem and lo future. Tingim experience blo Sista Julia. Taem Julia smol gele yet, hem joinim church choir. Wanfala professional opera singer luksavve lo talent blo hem and trainim hem for sing. No longtaem, Julia kamap famous and hem savve perform lo olketa famous music hall. During lo taem wea hem attendim wanfala famous music skul, wanfala classmate story abaotem God lo hem and explainim dat nem blo God hem Jehovah. No longtaem afta, Julia start for studyim Bible tu-taems lo week. Gogo, instead for hem kamap opera singer, hem disaed for iusim laef blo hem for worshipim Jehovah. Datwan hem no isi disison. Julia sei: “Staka pipol talem dat mi weistim datfala gift blo mi, bat mi laek for iusim full laef blo mi for worshipim Jehovah.” Hao nao hem feel abaotem datfala disison wea hem mekem winim 30 years ago? Julia sei: “Mi garem peace lo mind, and mi trustim dat lo future Jehovah bae givim evri samting wea mi laekem.”—Ps. 145:16.

CONTINUE FOR WORSHIPIM JEHOVAH

17. From iumi stap klosap lo taem blo end, hao nao datwan affectim olketa wea chus finis for worshipim God and olketa wea no duim datwan yet?

¹⁷ Iumi barava stap klosap lo end blo disfala system. Aposol Paul sei: “‘Lelebet taem nomoa stap,’ then ‘man wea bae kam bae hem arrive nao and bae hem no leit.’” (Heb. 10:37) Hao nao diswan affectim iumi? For olketa wea no savve yet lo Jehovah, lelebet taem nomoa hem stap for olketa chus for worshipim hem. (1 Cor. 7:29) And for iumi wea chus finis for worshipim God, iumi luksavve dat olketa hard taem wea iumi feisim hem for “lelebet taem nomoa.”

18. Wat nao Jesus and Jehovah laekem iumi for duim?

¹⁸ Jesus encouragem olketa disaepol blo hem for start for followim hem and for gohed followim hem. (Matt. 16:24) So if iumi worshipim Jehovah for staka year finis, iumi shud disaed strong for no givap. Iumi mas gohed traem best blo iumi for followim disison blo iumi for worshipim hem. Maet hem no isi, nomata olsem, iumi savve kasem staka blessing and barava feel satisfae distaem!—Ps. 35:27.

19. Wat nao iumi lanem from experience blo Gene?

¹⁹ Samfala ting dat for worshipim Jehovah, man mas sakrifaesim staka samting. If iu young, hao, iu ting dat wei for worshipim Jehovah bae mekem iu miss aot lo staka samting? Wanfala young brata wea nem blo hem Gene hem sei: “Mi feel dat from mi wanfala Jehovah’s Witness laef blo mi hem strict tumas. Staka pikinini wea mifala growap tugeta, luk olsem olketa enjoyim wei for party, garem boyfren or gelfren, or pleim olketa violent video game, bat mi, mi have tu go olowe nomoa lo olketa meeting and ministry.” Hao nao datkaen tingting affectim Gene? Hem sei: “Mi start for garem dabol laef, and for lelebet taem mi enjoyim. Bat hem no mekem mi kasem trufala hapi. Mi start for ting abaotem olketa Bible truth wea mi chus for ignorem and mi disaed for worshipim Jehovah witim full heart blo mi. Start from datfala taem, mi lukim hao Jehovah ansarem evri prea blo mi.”

20. Wat nao iumi shud disaed strong for duim?

²⁰ Man wea raetem disfala psalm, hem singsing olsem lo Jehovah: “Man wea iu chusim and tekem kam klosap for stap lo olketa courtyard blo iu hem hapi.” (Ps. 65:4) Iumi tu laek for gohed worshipim Jehovah and disaed strong olsem Joshua, wea sei: “Mi and famili blo mi, mifala bae worshipim Jehovah.”—Josh. 24:15.