For Fren Klos Witim Each Other Hem Gud Samting for Iumi!

1-2. Wat nao wanfala samting wea hem important lo Jehovah, and wat nao hem laekem iumi for duim?

HAO iumi treatim olketa narawan hem barava important lo Jehovah. Jesus teachim iumi for mas lovem olketa neiba, olsem iumi lovem iumiseleva. (Matt. 22:​37-39) Diswan minim for iumi mas kaen tu lo olketa wea no worshipim Jehovah. Taem iumi showimaot wei for kaen olsem, iumi followim example blo Jehovah wea “mekem sun hem shaen lo pipol wea gud and pipol wea wicked and hem mekem hem rain lo pipol wea raeteous and pipol wea no raeteous.”—Matt. 5:45.

² Jehovah lovem evri pipol, bat hem especially lovem olketa wea duim stret samting. (John 14:21) Hem laekem iumi for followim example blo hem. So hem encouragem iumi for “barava lovem” olketa brata and sista blo iumi and mas duim samting for showim iumi “lovem each other.” (1 Pet. 4:8; Rom. 12:10) Wei for showim love for each other olsem, hem semsem witim love wea iumi garem for wanfala klos relative or wanfala klos fren blo iumi.

3. Wat nao iumi need for tingim abaotem lovem?

³ Tingim, love hem olsem wanfala pot plant wea needim iumi for lukaftarem mekem hem savve grow. Aposol Paul givim disfala kaonsel lo olketa Christian: “Iufala mas gohed for lovem each other olsem olketa brata.” (Heb. 13:1) Jehovah laekem iumi for gohed mekem grow love blo iumi for olketa narawan. Lo disfala article, bae iumi discussim why nao iumi shud mekem frenship blo iumi witim olketa brata and sista kamap moa klos, and hao nao iumi savve gohed for duim datwan?

WHY NAO IUMI SHUD FREN KLOS GO MOA WITIM EACH OTHER?

4. Olsem Psalm 133:1 storyim, wat nao iumi savve duim for gohed tinghae lo wei wea iumi wan mind? (Lukim tu piksa.)

⁴ Readim Psalm 133:1. Iumi agree witim man wea raetem datfala psalm wea sei trufala wei for fren witim olketa wea lovem Jehovah hem “barava gud and naes tumas.” Bat lo sem wei wea maet iumi savve ting smol lo wanfala beautiful tree wea iumi lukim evriday, maet iumi savve ting smol tu lo spesol wei wea iumi wan mind witim olketa brata and sista. Iumi savve lukim olketa brata and sista blo iumi staka taem, maet tu-thri taems insaed lo week. Wat nao iumi savve duim for gohed tinghae lo olketa? If iumi spendem taem for ting abaotem hao each wan lo olketa hem important lo kongregeson and lo iumi, love blo iumi for olketa bae hem grow.

5. Hao nao love wea iumi showimaot for olketa brata and sista savve affectim narawan?

⁵ Samfala wea hem firstaem blo olketa for attendim wanfala meeting, olketa sapraes for lukim love wea iumi showim for each other. Maet datwan nao main samting wea mekem olketa for barava bilivim dat iumi olketa tru Christian. Jesus sei: “Sapos iufala lovem iufala evriwan, pipol bae savve iufala olketa disaepol blo mi.” (John 13:35) Tingim experience blo Chaithra, wanfala university student wea study witim Olketa Jehovah’s Witness. Hem acceptim wanfala invitation for attendim wanfala regional convention. Bihaen first day wea hem attendim datfala convention, hem talem Bible study conductor blo hem: “No enitaem parents blo mi hem hagem mi. Bat lo convention blo iufala, lo wanday nomoa olketa hagem mi 52 taems! Mi feel dat Jehovah iusim spiritual famili blo hem for showim hem lovem mi. Mi laek for kamap part lo datfala famili.” Chaithra gohed gud lo Bible study blo hem and hem baptaes lo 2024. Tru nao, taem olketa niu wan lukim gudfala samting wea iumi duim, and love wea iumi showim for each other, staka taem datwan bae muvim olketa for worshipim Jehovah.—Matt. 5:16.

6. Hao nao wei for fren klos witim olketa brata and sista savve protectim iumi?

⁶ Taem iumi duim samting for fren klos witim olketa brata and sista, datwan savve protectim iumi. Paul encouragem olketa Christian and sei: “Gohed for encouragem narawan each day, . . . mekem paoa wea sin garem for trikim man no mekem heart blo eniwan lo iufala hem strong.” (Heb. 3:13) If iumi start for barava discourage and start for go difren from datfala stret road, Jehovah savve iusim wanfala brata or sista wea luksavve lo datwan, for givim help wea iumi needim. (Ps. 73:​2, 17, 23) Encouragement olsem hem barava gud samting for iumi.

7. Hao nao love join witim wan mind? (Colossians 3:​13, 14)

⁷ Iumi part lo wanfala grup blo pipol wea waka hard for showimaot love lo each other, so iumi kasem staka blessing from datwan. (1 John 4:11) For example, love muvim iumi for “gohed patient witim narawan,” and datwan helpem iumi for gohed wan mind witim olketa brata and sista blo iumi. (Readim Colossians 3:​13, 14; Eph. 4:​2-6) Dastawe, winim eni nara grup blo pipol lo world, iumi savve barava enjoyim association witim each other lo olketa meeting blo iumi.

SHOWIM HONOR LO EACH OTHER

8. Wat nao Jehovah duim for helpem iumi wan mind witim olketa brata and sista?

⁸ Wan mind wea iumi garem witim olketa brata and sista evriwea raonem world hem wanfala mirakol. Jehovah nao mekem iumi fit for gohed wan mind nomata iumi no perfect. (1 Cor. 12:25) Bible sei: ‘God nao teachim iumi for lovem narawan.’ (1 Thess. 4:9) Diswan minim, Jehovah iusim Bible for talem iumi wat iumi really need for duim mekem iumi fren klos witim each other. Iumi letem ‘God teachim iumi’ taem iumi studyim gud Bible and followim datwan. (Heb. 4:12; Jas. 1:25) And hem nao samting wea Olketa Jehovah’s Witness traem best for duim.

9. Wat nao iumi lanem from Romans 12:​9-13 abaotem wei for showimaot honor lo each other?

⁹ Hao nao Bible teachim iumi for fren klos go moa witim each other? Lukim wat Paul talem abaotem diswan lo Romans 12:​9-13. (Readim.) Iumi laek for tingim disfala toktok: “Iufala nao mas lead for showim honor lo each other.” Wat nao datwan minim? Iumi shud no hol bak for duim samting for showimaot “love” taem iumi willing for forgive, welkamim narawan, and kaen lo each other, and tu, lo staka nara wei. (Eph. 4:32) Iu no need for weitim olketa brata or sista for fren klos witim iu. Bat iu nao savve “lead” lo wei for duim samting for fren klos witim olketa. Jesus hem sei: “Bigfala hapi hem kam from wei for givim samting winim wei for kasem samting.”—Acts 20:35.

10. Wat nao iumi savve duim for waka hard for “showim honor lo each other”? (Lukim tu piksa.)

¹⁰ Hem interesting hao stretawe afta Paul talem iumi for lead lo wei for showim honor lo each other, hem encouragem iumi for “mas waka hard, no lesy.” Samwan wea waka hard hem strong for duim waka and duim gud waka blo hem. Taem hem kasem wanfala assignment, hem willing for duim gud datwan. Proverbs 3:​27, 28 hem sei: “No hol bak for duim gud samting lo olketa wea iu shud helpem, sapos iu garem paoa for duim datwan.” So taem iumi lukim samwan hem needim help, iumi duim wat iumi fit for duim for helpem hem. Iumi mas kwiktaem for duim datwan, and no tingse narawan nao bae duim.—1 John 3:​17, 18.

11. Wat nao savve helpem iumi for fren klos witim each other?

¹¹ Nara wei for showim honor lo olketa narawan, hem taem iumi kwiktaem for forgivim olketa taem olketa mekem iumi feel nogud. Ephesians 4:26 sei: “No letem sun hem go daon and iu still kros yet.” Why nao olsem? Verse 27 sei sapos iumi duim datwan, iumi “givim chance lo Devil.” Lo Bible, Jehovah talem iumi staka taem for iumi mas forgivim each other. Colossians 3:13 hem encouragem iumi for “gohed . . . redi for forgivim narawan.” Wanfala best wei for fren klos witim olketa narawan, hem nao for forgivim mistek blo olketa. Taem iumi duim datwan, iumi help for ‘keepim wei for wan mind wea holy spirit helpem iumi for garem mekem iumi stap gud tugeta.’ (Eph. 4:3) So, taem iumi forgivim narawan, datwan savve barava helpem iumi for garem peace and wan mind.

12. Hao nao Jehovah helpem iumi for forgive?

¹² Hem tru, maet hem no isi for forgivim olketa wea mekem iumi feel nogud. Bat holy spirit blo God savve helpem iumi for duim datwan. Bihaen Paul encouragem olketa Christian for “lovem each other” and for “mas waka hard,” hem sei: “Iufala mas letem holy spirit waka lo iufala.” Taem man letem holy spirit ‘waka lo hem,’ bae hem fulap lo holy spirit or shaen from hem hapi bikos hem garem holy spirit. (Lukim English study note lo Romans 12:11.) So holy spirit savve helpem iumi for showimaot love lo each other and willing for forgivim narawan. Dastawe, iumi barava laek for begim Jehovah for helpem iumi.—Luke 11:13.

“NO ENI SAMTING SHUD MEKEM IUFALA DIVAED”

13. Wat nao savve mekem iumi for divaed?

¹³ Insaed kongregeson iumi garem “evri difren kaen pipol” from olketa difren baekgraon. (1 Tim. 2:​3, 4) If iumi no careful, wei wea each wan lo iumi difren and free for disaedem seleva olketa samting olsem wat for werem, lukluk blo iumi, medical treatment, or entertainment, hem savve divaedem iumi. (Rom. 14:4; 1 Cor. 1:10) Bikos ‘God teachim iumi for lovem each other,’ iumi mas careful for no forcem narawan for acceptim dat idea blo iumi nao hem beta winim narawan.—Phil. 2:3.

14. Wat nao iumi shud evritaem traem best for duim, and why nao olsem?

¹⁴ Nara samting wea iumi savve duim for kongregeson no divaed, hem nao for iumi evritaem traem best for encouragem and strongim olketa narawan. (1 Thess. 5:11) No longtaem go nomoa, staka wea inactive or wea olketa aotem from kongregeson olketa kam bak. Iumi hapi for welkamim olketa! (2 Cor. 2:8) Tingim wanfala sista wea bin inactive for 10 years, and then hem kam bak lo Kingdom Hall. Hem sei, “Evriwan smile and kam sekhand witim mi.” (Acts 3:19) Hao nao datwan affectim hem? Hem sei, “Hem mekem mi feel olsem hand blo Jehovah hem leadim mi kam bak for hapi moa.” Taem iumi encouragem olketa narawan, Christ savve iusim iumi for strongim olketa wea “waka hard and wea karem hevi samting.”—Matt. 11:​28, 29.

15. Wat nao nara samting wea savve mekem iumi gohed wan mind? (Lukim tu piksa.)

¹⁵ Nara samting wea savve mekem iumi for gohed wan mind, hem toktok blo iumi. Job 12:11 hem sei: “Hao, ino ear nao heresavve lo olketa word olsem tongue savve teistim kaikai?” Olsem samwan wea kuki savve evritaem teistim kaikai wea hem kukim bifor hem servem for olketa narawan, iumi tu need for tingting gud bifor iumi talem samting. (Ps. 141:3) Goal blo iumi hem for evritaem mek sure wat iumi laek for talem bae encouragem, strongim, and “helpem olketa wea herem.”—Eph. 4:29.

16. Hu nao olketa wea especially shud trae for talem toktok wea encouragem narawan?

¹⁶ Olketa hasband and olketa parents shud traem best for talem toktok wea encouragem narawan. (Col. 3:​19, 21; Titus 2:4) From olketa elder lukaftarem sheepsheep blo Jehovah, olketa tu shud traem best for talem toktok for strongim and comfortim olketa narawan. (Isa. 32:​1, 2; Gal. 6:1) Wanfala Bible proverb hem sei: “Toktok wea man talem lo raet taem, hem gud tumas!”—Prov. 15:23.

LOVE HEM SHOWAOT LO WAT IUMI DUIM AND HEM MAS TRU WAN

17. Hao nao iumi savve mek sure love blo iumi for olketa brata and sista hem tru wan?

¹⁷ Aposol John encouragem iumi for showim love, “no lo toktok or lo wanem iumi talem nomoa, bat lo samting wea iumi duim and hem mas tru wan.” (1 John 3:18) Iumi laekem love blo iumi for olketa brata and sista for mas kam from heart. Hao nao iumi savve duim datwan? Taem iumi spendem taem witim olketa brata and sista iumi bae fren klos go moa witim olketa, and love blo iumi for each other bae kamap moa strong. So duim samting for spendem taem witim olketa narawan, maet lo olketa meeting and lo ministry. Go visitim olketa narawan. Taem iumi duim datwan, iumi showimaot dat ‘God teachim iumi for lovem each other.’ (1 Thess. 4:9) And iumi bae gohed for experiencem hao hem “barava gud and naes tumas for olketa brata stap tugeta and garem wan mind!”—Ps. 133:1.