Acceptim Dat Jehovah Lovem Iu

1. Why nao iu dedicatem laef blo iu lo Jehovah? (Lukim tu piksa.)

HAO, iu tingim yet taem wea iu dedicatem laef blo iu lo Jehovah? Iu mekem datfala disison bikos iu lane abaotem hem and lovem hem. Iu promis lo hem dat important samting lo laef blo iu nao for duim will blo hem and bae iu gohed for lovem hem witim full heart, soul, mind, and strong blo iu. (Mark 12:30) Start from datfala taem, love blo iu for Jehovah hem barava strong go moa. So, wat nao bae iu talem if samwan askem iu, “Hao, iu sure iu lovem Jehovah?” For sure, bae iu no hol bak for sei, “Mi lovem hem winim eniwan or eni nara samting!”

2-3. Wat nao Jehovah laekem iumi for acceptim, and wat nao bae iumi storyim lo disfala article? (Jeremiah 31:3)

² Bat, wat nao bae iu talem if samwan askem iu, “Hao, iu sure dat Jehovah lovem iu?” Hao, bae iu hol bak for ansa bikos iu tingse iu nating gud nomoa and no fit for kasem love blo Jehovah? Wanfala sista wea laef blo hem no isi taem hem growap, hem sei: “Mi savve mi lovem Jehovah. Mi no daotem datwan. Bat staka taem mi no sure, if Jehovah lovem mi.” Bat wat nao really feeling blo Jehovah abaotem iu?

³ Jehovah laekem iu for barava sure dat hem lovem iu. (Readim Jeremiah 31:3.) And Jehovah nao pullim iu kam lo hem. Taem iu dedicatem laef blo iu lo hem and baptaes, iu kasem wanfala spesol present, hem nao loyal love blo hem. Datfala love hem barava strong and stap for olowe. Datfala love muvim Jehovah for ting lo olketa faithful worshiper blo hem, olsem “spesol pipol” blo hem, datwan includim iu tu. (Mal. 3:17) Jehovah laekem iu for barava sure lo love wea hem garem for iu, olsem hao aposol Paul sure lo love blo Jehovah for hem. Paul trustim datwan and sei: “Mi barava sure dat dae or laef or olketa angel or olketa gavman or olketa samting wea stap distaem or wea bae kamap bihaen or eni paoa or eniting antap or eniting lo daon or eni nara creation, bae no savve separatem love blo God from iumi.” (Rom. 8:​38, 39) Lo disfala article, bae iumi storyim why iumi need for duim samting for barava sure dat Jehovah lovem iumi, and wat nao savve helpem iumi for duim datwan.

WHY IUMI NEED FOR ACCEPTIM DAT JEHOVAH LOVEM IUMI

4. Wat nao iumi savve duim for faet againstim wanfala lo olketa kleva trik blo Satan?

⁴ Taem iumi acceptim dat Jehovah lovem iumi, iumi savve faet againstim wanfala lo olketa “kleva trik” blo Satan. (Eph. 6:11) Satan bae duim eniting wea hem fit for duim for stopem iumi for servem Jehovah. Wanfala lo olketa kleva trik blo Satan nao, hem for mekem iumi ting dat Jehovah no lovem iumi, wea datwan hem barava no tru. No forgetim dat Satan hem lukaotem eni chance nomoa. Staka taem hem attakim iumi taem iumi feel daon bikos lo samting wea maet happen lo iumi bifor, olketa challenge wea iumi feisim distaem, or olketa wari blo iumi abaotem wat bae happen lo iumi. (Prov. 24:10) Satan hem olsem wanfala lion. Taem lion lukim wanfala animal wea no strong for defendim hemseleva, hem bae attakim. Lo sem wei tu, taem Satan lukim iumi feel daon and sorre, hem bae attakim iumi bikos hem laek for mekem iumi givap. Bat if iumi gohed for duim samting for mekem iumi barava sure dat Jehovah lovem iumi, bae iumi fit for “stand strong againstim” Satan and olketa kleva trik blo hem.—1 Pet. 5:​8, 9; Jas. 4:7.

5. Why nao iumi need for feelim love blo Jehovah and wei wea hem kea for iumi?

⁵ Taem iumi acceptim dat Jehovah lovem iumi, iumi bae fren klos go moa witim hem. Tingim why iumi sei olsem. Jehovah creatim iumi for garem disfala need for samwan lovem iumi and for iumi lovem samwan. Taem samwan lovem iumi, iumi bae lovem hem tu. Evritaem wea iumi feelim love and wei wea Jehovah kea for iumi, datwan bae mekem iumi for barava lovem hem go moa. (1 John 4:19) And taem love blo iumi for Jehovah hem grow, love blo hem for iumi bae grow tu. Bible talem klia olsem: “Kam klosap lo God and bae hem kam klosap lo iufala.” (Jas. 4:8) Bat, wat nao iumi savve duim for helpem iumi barava sure dat Jehovah lovem iumi?

WAT NAO SAVVE HELPEM IUMI FOR ACCEPTIM DAT JEHOVAH LOVEM IUMI?

6. For acceptim dat Jehovah lovem iu, wat nao iu savve prea abaotem?

⁶ Gohed for prea and askem hem for helpem iu minim why hem lovem iu. (Luke 18:1; Rom. 12:12) Askem Jehovah for helpem iu for garem sem tingting wea hem garem abaotem iu, and if iu need for duim datwan staka taem each day, duim datwan. Hem tru, taem heart blo iumi judgem iumiseleva, samtaems hem hard for iumi bilivim dat Jehovah lovem iumi. Bat remember dat Jehovah hem big winim heart blo iumi and hem savve lo evri samting. (1 John 3:​19, 20) Hem savve gud lo iu winim hao iu savve lo iuseleva, hem lukim olketa gudfala wei blo iu wea iuseleva no lukim. (1 Sam. 16:7; 2 Chron. 6:30) So no hol bak for “pourimaot” evri feeling blo iu lo hem, askem hem for helpem iu for acceptim dat hem lovem iu. (Ps. 62:8) Then duim samting followim wat iu prea abaotem taem iu followim olketa idea hia.

7-8. Hao nao olketa scripture lo Psalms helpem iumi for barava sure lo love blo Jehovah for iumi?

⁷ Trustim wat Jehovah talem. Jehovah iusim holy spirit for muvim olketa wea raetem Bible for describem tru samting abaotem hem. Tingim loving wei wea David describem Jehovah lo wanfala psalm, hem sei: “Jehovah stap klosap lo olketa wea heart blo olketa brek. Hem sevem olketa wea discourage.” (Ps. 34:18) Taem iu feel sorre tumas, iu maet feel dat no eniwan hem tingim iu. Bat lo olketa taem olsem, Jehovah promis bae hem stap klosap lo iu, bikos hem luksavve iu needim hem winim eni nara taem. Lo nara psalm, David sei: “Kolektem olketa tias blo mi lo skin botol blo iu.” (Ps. 56:8) Jehovah lukim evri samting wea iu stragol witim. Hem barava kea abaotem iu and wat iu gohed for deal witim. Jehovah hem kolektem olketa tias blo iu and hem important lo hem, hem olsem wata wea important tumas insaed lo skin botol blo samwan wea travel farawe. Psalm 139:3 hem sei: “Iu [Jehovah] savve gud lo evri wei blo mi.” Jehovah lukim evri wei blo iu, bat hem focus lo gud samting wea iu duim. (Heb. 6:10) Why nao olsem? Bikos Jehovah barava tinghae lo evri samting wea iu duim taem iu gohed traem best for mekem hem hapi.a

⁸ Jehovah iusim olketa scripture olsem for comfortim iu, hem olsem hem sei lo iu: “Mi laekem iu for savve dat mi barava lovem iu and kea for iu.” Bat olsem iumi bin storyim, Satan trae for mekem iu ting dat Jehovah no lovem iu. So if enitaem iu daotem dat Jehovah lovem iu, stop and askem iuseleva, ‘Hu nao bae mi bilivim, “dadi blo wei for laea” or “datfala God blo truth”?’—John 8:44; Ps. 31:5.

9. Wat nao Jehovah promisim lo olketa wea lovem hem? (Exodus 20:​5, 6)

⁹ Ting abaotem wat Jehovah duim taem samwan lovem hem. Tingim wat Jehovah talem lo Moses and olketa Israelite. (Readim Exodus 20:​5, 6.) Jehovah promis dat bae hem gohed for showim loyal love lo olketa wea lovem hem. Toktok hia mekem iumi barava sure dat if olketa wea worshipim datfala loyal God lovem hem, hem bae lovem olketa tu. (Neh. 1:5) So if samfala taem iu start for daot dat Jehovah lovem iu, stop and askem iuseleva, ‘Hao, mi lovem Jehovah?’ Then tingim diswan: If iu lovem hem and traem best blo iu for mekem hem hapi, trustim dat hem barava lovem iu tumas. (Dan. 9:4; 1 Cor. 8:3) So if iu no daotem dat iu lovem Jehovah, no daotem tu dat hem lovem iu. Love blo Jehovah and wei wea hem loyal lo iu, hem samting wea iu no fit for daotem.

10-11. Hao nao Jehovah laekem iu for ting lo ransom? (Galatians 2:20)

¹⁰ Ting raonem ransom. Datfala ransom sakrifaes blo Jesus Christ hem nao best present wea Jehovah givim for iumi olketa man. (John 3:16) Bat hao, datfala ransom hem present wea Jehovah givim especially for iu? Yes! Tingim experience blo aposol Paul. Hem duim samfala barava serious sin bifor hem kamap wanfala Christian and hem mas gohed for deal witim olketa wik point blo hemseleva. (Rom. 7:​24, 25; 1 Tim. 1:​12-14) Nomata olsem, hem ting lo datfala ransom olsem present wea Jehovah givim especially for hem. (Readim Galatians 2:20.) Remember, Jehovah iusim holy spirit for muvim Paul for raetem olketa toktok hia. And evri samting wea olketa raetem lo Bible hem for teachim iumi. (Rom. 15:4) Toktok blo Paul hem showim dat Jehovah laekem iu for ting lo ransom olsem present wea hem givim especially for iu. Taem iu ting olsem abaotem ransom, datwan savve helpem iu for barava sure dat Jehovah lovem iu.

¹¹ Iumi thankiu lo Jehovah for sendem kam Jesus lo earth for dae for iumi. Bat nara reason why Jesus kam lo earth hem for talem truth abaotem God. (John 18:37) Datfala truth includim hao Jehovah feel abaotem iumi olketa pikinini blo hem.

WAT JESUS DUIM FOR HELPEM IUMI ACCEPTIM DAT JEHOVAH LOVEM IUMI

12. Why nao iumi fit for trustim samting wea Jesus talem abaotem Jehovah?

¹² Taem Jesus lo earth, hem laekem tumas for helpem pipol for savve lo wat kaen person nao Jehovah. (Luke 10:22) Iumi fit for barava trustim wat Jesus talem abaotem Jehovah. Tingim, Jesus nao stap witim Jehovah lo heven for staka billion year bifor hem kam lo earth. (Col. 1:15) From Jesus stap witim Jehovah, hem lukim and hem savve hao big nao love blo Jehovah for olketa faithful son and dota blo hem. Wat nao Jesus duim for helpem olketa narawan for acceptim dat God lovem olketa?

13. Hao nao Jesus laekem iumi for ting lo Jehovah?

¹³ Jesus laekem iumi for ting lo Jehovah olsem hao hem ting lo Jehovah. Lo olketa Gospel, Jesus kolem Jehovah “Dadi” winim 160 taems. And taem hem story lo olketa follower blo hem, hem iusim olketa toktok olsem “Dadi blo iufala” or “Dadi blo iufala lo heven.” (Matt. 5:16; 6:26) English study note blo Matthew 5:16 sei: “Olketa servant blo God bifor savve iusim staka title, taem olketa story lo Jehovah and taem olketa describem hem, diswan includim olketa toktok olsem ‘Olmaeti,’ ‘Most Hae,’ and ‘Nambawan Creator.’ Bat staka taem Jesus iusim nomoa disfala simpol toktok ‘Dadi’ for showim hao God hem fren klos witim olketa wea worshipim Hem.” So, Jesus laekem iumi for ting lo Jehovah olsem Dadi wea lovem iumi olketa pikinini blo hem. Hem nao hao Jesus ting lo Jehovah. Distaem bae iumi storyim tufala example blo olketa taem wea Jesus iusim disfala toktok “Dadi.”

14. Hao nao Jesus showim dat each wan lo iumi barava spesol lo Dadi blo iumi lo heven? (Matthew 10:​29-31) (Lukim tu piksa.)

¹⁴ First, tingim toktok blo Jesus lo Matthew 10:​29-31. (Readim.) Olketa sparrow, olketa barava smol bird wea hard for lovem or worshipim Jehovah. Nomata olsem, olketa bird hia important lo Dadi blo iumi, dastawe nomata taem wanfala hem foldaon lo graon, hem savve. So if Jehovah ting olsem abaotem wanfala smol bird, hao mas moa samwan wea faithful for worshipim hem bikos olketa lovem hem! Lo verse 30, English study note abaotem disfala toktok, “Hem kaontem finis tu evri hair lo hed blo iufala,” hem sei: “Wei wea Jehovah barava savve abaotem evri smol detail olsem, hem showim dat Jehovah interest tumas lo each wan lo olketa follower blo Christ.” For sure, Jesus laekem iumi for acceptim dat each wan lo iumi hem barava spesol lo Dadi blo iumi lo heven.

15. Wat nao iu lanem abaotem Dadi blo iu lo heven from toktok blo Jesus lo John 6:44?

¹⁵ Tingim second example lo hao Jesus iusim datfala toktok “Dadi.” (Readim John 6:44.) Dadi blo iumi lo heven nao leadim iu, or helpem iu, for interest lo truth. Why nao hem duim datwan? Bikos hem lukim iu garem gud heart. (Acts 13:48) English study note lo John 6:44 sei, maet Jesus iusim toktok wea klosap semsem witim wat Jeremiah talem lo theme text blo disfala article, wea sei: “Mi pullim iu kam lo mi bikos lo loyal love blo mi [or, gohed for showim loyal love lo iu].” (Jer. 31:3; ftn.; comparem Hosea 11:4.) Tingim datwan, loving Dadi blo iumi lo heven hem gohed for lukim olketa gud wei blo iu wea iuseleva maet no lukim.

16. (a) Wat nao Jesus laekem iumi for tingim, and why nao iumi shud bilivim hem? (b) Wat nao iu savve duim for helpem iu barava sure dat Jehovah nao Dadi wea iu needim? (Lukim box “Hem Nao Father wea Iumi Evriwan Needim.”)

¹⁶ Taem Jesus describem Jehovah olsem Dadi blo iumi, really hem olsem Jesus sei lo iumi: “Jehovah hem no Dadi blo mi nomoa; hem Dadi blo iufala tu. And mi talem iu dat hem lovem iu and hem barava kea for each wan lo iufala.” So if samfala taem iu feel dat Jehovah no lovem iu, stop and askem iuseleva, ‘Hao, mi fit for trustim datfala Son wea savve gud lo Dadi and wea evritaem talem tru samting?’—1 Pet. 2:22.

GOHED DUIM SAMTING FOR HELPEM IU BARAVA SURE DAT JEHOVAH LOVEM IU

17. Why nao iumi need for gohed duim samting for helpem iumi barava sure dat Jehovah lovem iumi?

¹⁷ Iumi need for gohed duim samting for helpem iumi barava sure dat Jehovah lovem iumi. Olsem iumi lanem finis, kleva enemy blo iumi, Satan, bae no stop for trae mekem iumi givap for servem Jehovah. For mekem iumi wikdaon, Satan bae gohed for trae mekem iumi for bilivim dat God no lovem iumi. Iumi mas no letem Satan win!—Job 27:5.

18. Wat nao iu savve duim for helpem iu barava sure dat Jehovah lovem iu?

¹⁸ For helpem iu barava sure dat Jehovah hem lovem iu, gohed prea lo Jehovah for helpem iu for garem sem tingting wea hem garem abaotem iu. Ting raonem hao olketa scripture lo Bible describem love blo Jehovah and wei wea hem kea. Ting raonem tu wat hem duim taem samwan lovem hem, hem evritaem showimaot love lo olketa wea lovem hem. Ting raonem why iu savve ting lo datfala ransom olsem present wea hem givim especially for iu. And trustim wat Jesus talem hao Jehovah hem Dadi blo iu lo heven. Then if samwan askem iu: “Hao, iu sure Jehovah lovem iu?” bae iu confident for sei: “Yes, hem lovem mi! And mi bae duim best blo mi evriday for showim dat mi lovem hem!”