Hao for Faet Againstim Feeling for Laek Duim Rong Samting

1. Wat nao iumi evriwan wea no perfect deal witim?

HAO, enitaem iu barava laek for duim samting wea Jehovah no hapi lo hem? If iu feel olsem, no tingse iu nomoa feisim kaen test olsem. Bible sei: “Olketa temptation wea kasem iufala hem kasem tu evri man.” (1 Cor. 10:13) Diswan minim, feeling for laek duim rong samting wea iu stragol for deal witim, olketa narawan tu stragol for deal witim. Jehovah savve helpem iu for win for faet againstim datwan, so iu no need for stragol witim datwan seleva.

2. Wat nao olketa difren temptation wea samfala Christian and Bible student stragol for deal witim? (Lukim tu piksa.)

² Bible sei tu: “Each wan hem kasem test taem samting wea hemseleva laekem nao hem traem hem.” (Jas. 1:14) Samting wea savve temptim wanfala person hem savve difren from narawan. For example, samfala Christian maet garem feeling for laek durong witim samwan lo opposite sex, bat olketa nara Christian maet garem feeling for homosexual. Olketa wea lusim finis wei for lukluk lo pornography maet garem strong feeling for laek lukluk moa lo datwan. Staka wea lusim finis wei for iusim drug or alcohol feisim tu olketa sem challenge. Diswan hem samfala lo olketa temptation wea samfala Christian and Bible student stragol for deal witim. Samfala taem, iumi evriwan maet feel olsem aposol Paul wea sei: “Taem mi laek for duim stret samting, tingting for duim nogud samting tu hem stap witim mi.”—Rom. 7:21.

3. Taem samwan gohed stragol for deal witim feeling for laek duim rong samting, hao nao datwan savve affectim hem?

³ If iu gohed stragol for deal witim feeling for laek duim rong samting, maet iu feel olsem iu no strong for winim datwan, and hard for iu faet againstim datfala temptation. And tu, maet iu feel hopeles, and feel dat Jehovah bae judgem iu bikos iu garem datfala rong feeling. Bat tufala tingting hia hem no tru! For explainim why nao olsem, disfala article bae storyim tufala kwestin: (1) Hu nao laekem iu for feel dat iu no strong and for feel hopeles? (2) Hao nao iu savve win for faet againstim feeling for laek duim rong samting?

“DATFALA WICKED WAN” LAEKEM IUMI FOR FEEL HAO?

4. (a) Why nao Satan laekem iumi for feel dat iumi no strong for winim temptation? (b) Wat nao mekem iumi sure dat iumi savve strong for faet againstim temptation?

⁴ Satan laekem iumi for feel olsem iumi no garem strong for winim temptation. Jesus luksavve lo diswan, dastawe hem teachim olketa follower blo hem for prea olsem: “No letem mifala foldaon lo temptation, bat sevem mifala from datfala wicked wan.” (Matt. 6:13) Satan sei if eni man kasem temptation bae hem no willing for obeyim Jehovah. (Job 2:​4, 5) Datwan nao Satan duim. Feeling blo hemseleva nao traem hem, and hem no willing for gohed faithful lo Jehovah. So maet hem tingse iumi olsem hem, and bae hem isi nomoa for iumi lusim Jehovah taem iumi kasem temptation. Satan even tingse hem savve mekem perfect Son blo God for foldaon lo temptation! (Matt. 4:​8, 9) Bat tingim diswan: Hao, iumi really no garem strong for faet againstim feeling for laek duim rong samting? Nomoa! Iumi luksavve wat aposol Paul talem hem tru: “Nomata wanem samting hem kasem mi, paoa wea mi kasem from God nao hem strongim mi for gohed.”—Phil. 4:13.

5. Hao nao iumi savve Jehovah hem sure iumi savve faet againstim feeling for laek duim rong samting?

⁵ Jehovah hem difren from Satan, Jehovah barava sure iumi savve faet againstim feeling for laek duim rong samting. Hao nao iumi savve lo datwan? Bikos Jehovah talem finis dat wanfala big crowd blo olketa wea faithful for worshipim hem bae sev lo datfala big trabol. Tingim wat nao datwan minim. Jehovah, wea no savve laea, hem sei staka pipol, no tu-thri nomoa, bae go insaed lo niu world, bikos olketa “wasim finis kaleko blo olketa and mekem kamap white lo blood blo datfala Lamb,” wea minim olketa klin front lo Jehovah. (Rev. 7:​9, 13, 14) Hem klia, Jehovah hem no ting lo iumi olsem iumi no strong for faet againstim feeling for laek duim rong samting.

6-7. Why nao Satan laekem iumi for feel hopeles taem iumi faet againstim temptation?

⁶ Satan no just laekem iumi for feel dat iumi no strong, bat hem laekem iumi for feel hopeles tu, and for tingse Jehovah judgem iumi bikos iumi garem feeling for laek duim rong samting. Bat really, datwan nao situation blo Satan. Satan nao hem hopeles, Jehovah judgem hem finis for no kasem laef olowe. (Gen. 3:15; Rev. 20:10) Dastawe, Satan laekem iumi tu for feel hopeles, especially bikos iumi nao garem chance for kasem olketa blessing wea hem bae no kasem. So, iumi no hopeles. Bible promisim iumi dat Jehovah laek for helpem iumi, no judgem iumi. Hem “no laekem eniwan for dae bat hem laekem evriwan for repent.”—2 Pet. 3:9.

⁷ So, if iumi bilivim dat iumi no garem strong or iumi hopeles for faet againstim feeling for laek duim rong samting, datwan minim iumi followim tingting wea Satan laekem iumi for garem. Wei for luksavve lo datwan, savve helpem iumi for disaed for stand strong againstim Satan.—1 Pet. 5:​8, 9.

FROM IUMI NO PERFECT DATWAN MEKEM IUMI FEEL HAO?

8. Wat nao datfala word sin hem minim samfala taem? (Psalm 51:5) (Lukim tu “Mining blo Wanfala Toktok.”)

⁸ Nara samting tu savve mekem iumi for feel olsem iumi no garem strong and hopeles for faet againstim feeling for laek duim rong samting. Wat nao datwan? Hem nao wei wea iumi inheritim sin from first parents blo iumi.a—Job 14:4; readim Psalm 51:5.

9-10. (a) Hao nao sin affectim Adam and Eve? (Lukim tu piksa.) (b) Hao nao sin affectim iumi?

⁹ Tingim hao sin affectim Adam and Eve. Afta tufala disobeyim Jehovah, tufala haed and trae for kavarem body blo tufala. Insight on the Scriptures hem sei olsem abaotem datwan: “Sin hem mekem tufala for feel guilty, wari, no sef, and shame.” Hem olsem Adam and Eve lok insaed lo wanfala haos wea garem nomoa fofala rum hia, wei for feel guilty, wari, no sef, and shame. So Adam and Eve savve go lo each rum bat tufala no savve go aot from datfala haos. Tufala no savve ranawe from wei wea tufala garem sin.

¹⁰ Bat, situation blo iumi hem no semsem olsem Adam and Eve. Datfala ransom hem savve helpem iumi for klin from sin blo iumi and garem klin konsens, bat datfala ransom hem no for tufala. (1 Cor. 6:11) Nomata olsem, iumi inheritim sin, so iumi no perfect. Dastawe, iumi tu savve feel guilty, wari, no sef, and shame. Bible sei dat sin gohed for barava affectim iumi olketa man. Hem affectim tu “olketa [wea] no duim sin olsem Adam.” (Rom. 5:14) Bat datwan shud no mekem iumi feel dat iumi no garem strong and feel hopeles. Iumi savve rejectim olketa negative feeling olsem. Hao nao iumi savve duim datwan?

11. Wat nao iumi shud duim if iumi feel dat iumi no garem strong for winim feeling for laek duim rong samting, and why nao olsem? (Romans 6:12)

¹¹ Taem iumi feel dat iumi no garem strong for winim feeling for laek duim rong samting, datwan hem olsem datfala sin wea iumi inheritim hem toktok kam lo iumi, so iumi mas no lisin lo hem. Why? Bikos Bible teachim iumi dat iumi no need for letem sin gohed for “rul olsem king” ovarem iumi. (Readim Romans 6:12.) Diswan minim taem iumi garem feeling for laek duim rong samting, iumi savve chus for no duim datwan. (Gal. 5:16) Jehovah hem sure iumi savve winim temptation, dastawe hem talem iumi for againstim temptation. (Deut. 30:​11-14; Rom. 6:6; 1 Thess. 4:3) So hem klia, iumi savve garem strong for faet againstim feeling for laek duim rong samting.

12. Wat nao iumi shud duim if iumi feel hopeles, and why nao olsem?

¹² Lo sem wei tu, taem iumi feel hopeles from iumi tingse Jehovah bae judgem iumi bikos iumi garem feeling for laek duim rong samting, datwan hem olsem datfala sin wea iumi inheritim hem toktok kam lo iumi, so iumi mas no lisin lo hem. Why? Bikos Bible teachim iumi dat Jehovah understandim dat iumi inheritim sin and iumi no perfect. (Ps. 103:​13, 14) Hem “savve lo evri samting” abaotem iumi, includim olketa difren wei wea sin savve affectim feeling blo iumi for laek duim rong samting. (1 John 3:​19, 20) So if iumi no duim rong samting wea iumi feel laek for duim, Jehovah savve ting lo iumi olsem iumi klin. Why nao iumi sure lo datwan?

13-14. Hao, wei for garem feeling for laek duim rong samting hem minim iumi nogud nao? Explainim.

¹³ Bible showim dat for duim rong samting hem difren from wei for feel laek duim rong samting. Iumi savve kontrolem iumiseleva for no duim rong samting, bat feeling for laek duim rong samting savve kamap seleva samfala taem. For example, lo first century samfala Christian lo Corinth bin duim homosexuality. Paul sei: “Hem nao wat samfala lo iufala duim bifor.” Hao, datwan minim olketa hia wea homosexual bifor no garem moa datfala feeling? Maet datfala feeling savve kamap, bikos kaen feeling olsem hem no isi for lusim. Nomata olsem, Jehovah hapi lo olketa Christian wea kontrolem olketa seleva and no duim datfala rong samting. Hem ting lo olketa olsem olketa “kamap klin.” (1 Cor. 6:​9-11) Iu tu savve olsem.

¹⁴ Nomata wat nao olketa rong feeling wea iu stragol for faet againstim, iu savve winim. Nomata if iu faendem hem hard for barava stopem olketa feeling hia, iu savve kontrolem iuseleva and no ‘duim olketa nogud samting wea body laekem and no followim tingting blo iuseleva.’ (Eph. 2:3) Wat nao iu savve duim for helpem iu for faet againstim feeling for laek duim rong samting?

HAO FOR WIN

15. For iumi win for faet againstim feeling for laek duim rong samting, why nao iumi need for honest lo iumiseleva?

¹⁵ For iu win for faet againstim feeling for laek duim rong samting, iu bae need for honest lo iuseleva abaotem wik point blo iu. Iu mas careful for no letem olketa ‘tingting wea no stret for laea lo iu.’ (Jas. 1:22) No ting smol lo datfala problem and sei, ‘Olketa narawan nao savve drink winim mi,’ or blamem narawan and sei, ‘Hard for mi lukluk lo pornography if waef blo mi lovem mi.’ Olketa kaen tingting olsem bae mekem hem isi for iu foldaon lo temptation. So no trae for talem excuse, or mek excuse lo mind blo iu, for rong wea iu duim. Tek responsibility for wat iu duim.—Gal. 6:7.

16. Wat nao iu savve duim for helpem iu disaed strong for duim stret samting?

¹⁶ Witim wei for honest lo iuseleva abaotem olketa wik point blo iu, iu need for disaed strong tu for no letem feeling for laek duim rong samting for winim iu. (1 Cor. 9:​26, 27; 1 Thess. 4:4; 1 Pet. 1:​15, 16) Iu need for luksavve wat nao savve barava temptim iu and lo olketa wanem taem datwan savve kamap. Maet hem wanfala samting wea iu barava laekem or maet datfala temptation savve kamap lo wanfala specific taem. For example, hao, datfala temptation savve kamap strong taem iu taed or lo olketa leit naet? Luksavve lo datfala temptation, and redyim tingting blo iu for duim samting for protectim iuseleva. Best taem for duim datwan, hem bifor iu kasem temptation.—Prov. 22:3.

17. Wat nao iumi savve lanem from example blo Joseph? (Genesis 39:​7-9) (Lukim tu piksa.)

¹⁷ Tingim wat Joseph duim taem waef blo Potiphar trae for switim hem. Hem kwiktaem duim samting for rejectim datfala woman. (Readim Genesis 39:​7-9.) Wat nao iumi lanem from datwan? Joseph savve finis dat hem no stret for tekem waef blo nara man bifor waef blo Potiphar trae for switim hem. Lo sem wei tu, iu savve disaed strong for duim stret samting bifor wanfala situation kamap wea bae temptim iu. Taem iu duim olsem, nomata iu kasem temptation, bae hem isi for iu followim disison wea iu mekem finis.

“GOHED FOR TESTIM IUFALA SELEVA”

18. Hao nao iu savve win for faet againstim feeling for laek duim rong samting? (2 Corinthians 13:5)

¹⁸ For iu win for faet againstim feeling for laek duim rong samting, iu bae need for “gohed for testim” iuseleva. Diswan minim for lukluk gud lo iuseleva evritaem, for lukim hao nao iu distaem. (Readim 2 Corinthians 13:5.) Samfala taem hem gud for gohed chekim wat iu savve ting abaotem and wat iu duim. Then adjustim samfala samting wea iu need for impruv lo hem. For example, even taem iu win for rejectim temptation, iu savve askem iuseleva: ‘Hao, mi kwiktaem for sei no?’ If iu luksavve iu delay lelebet, no judgem iuseleva. Instead, ting abaotem wat iu savve duim for impruv. Askem iuseleva olketa kwestin olsem: ‘Hao, eniting mi savve duim for no delay and kwiktaem aotem rong tingting from mind blo mi? Hao, olketa entertainment wea mi chusim hem mekem hem moa hard for mi againstim temptation? Hao, mi kwiktaem luk difren from olketa dirty piksa? Hao, mi luksavve olketa standard blo Jehovah hem nao evritaem best samting for duim nomata maet datwan minim mi mas kontrolem miseleva?’—Ps. 101:3.

19. Hao nao olketa smol disison wea no wise savve mekem hem moa hard for iumi faet againstim feeling for laek duim rong samting?

¹⁹ Taem iu gohed testim iuseleva, iu shud no mek excuse for iuseleva. Bible sei: “Heart savve laea lo man winim eni nara samting and hem savve duim eni nogud samting.” (Jer. 17:9) Jesus sei “wicked tingting” hem kamaot from heart. (Matt. 15:19) For example, bihaen samfala taem, samwan wea bin stop for lukluk lo pornography maet tingse hem “no danger” for hem lukluk lo olketa piksa wea isi for mekem hem for garem rong tingting, from hem ting dat olketa piksa hia no showim pipol wea naked. Or maet hem ting, ‘Hem no rong nomoa for imaginim wei for durong, bat for duim nao hem rong.’ If samwan garem tingting olsem, heart blo hem wea laea lo hem gohed ‘planim finis for aftarem olketa samting wea body laekem.’ (Rom. 13:14) Wat nao savve helpem iu for no duim datwan? Mas careful and stap klia for no mekem olketa smol disison wea no wise wea savve lead go lo wei for mekem olketa big disison wea no wise, olsem for man durong.b Rejectim tu eni tingting, or “wicked tingting,” wea mekem man for mek excuse for duim rong samting.

20. Wat nao iumi luk forward lo hem lo future, and hu nao helpem iumi distaem?

²⁰ Olsem iumi lanem, Jehovah savve givim iumi paoa for helpem iumi for faet againstim temptation. And tu, from hem showim mercy lo iumi, iumi garem hope for kasem laef olowe lo niu world. Iumi bae hapi tumas taem iumi bae servem Jehovah witim heart and mind wea barava klin! Go kasem datfala taem, iumi sure dat iumi garem strong and iumi no hopeles for faet againstim feeling for laek duim rong samting. Taem iumi traem best, Jehovah bae blessim iumi and iumi savve win!