Kwestin From Reader
Wat nao datfala tingting wea Jehovah klosap for mekem olketa nation for garem?
Lo Revelation 17:16, 17 hem storyim wat bae happen lo start blo bigfala trabol, hem sei: “Tenfala horn wea iu lukim and datfala wild animal, bae heitim datfala jury woman and bae olketa tekem evri samting blo hem and mekem hem naked, and olketa bae kaikaim body blo hem and bonem hem lo fire. Bikos God putim insaed tingting blo olketa for duim samting wea hem laekem, yes, hem for olketa garem sem tingting, hem nao for givim paoa blo olketa for rul lo datfala wild animal.” Lo bifor, olketa pablikeson blo iumi sei dat disfala tingting wea Jehovah bae putim insaed tingting blo olketa nation hem nao for olketa nation hia distroem evri false religion.
Bat, wanfala adjustment kamap abaotem diswan. Disfala adjustment nao hem hao Jehovah bae putim insaed tingting blo olketa nation for “duim samting wea hem laekem” wea hem nao for olketa nation hia givim “paoa blo olketa for rul lo datfala wild animal.” For understandim hao diswan bae hem fulfill, ting raonem olketa kwestin hia.
Hu nao olketa wea disfala profesi storyim? “Datfala jury woman” wea Bible kolem tu lo “Bigfala Babylon,” hem representim evri false religion lo world. Datfala “wild animal wea kala blo hem red” hem representim wanfala organization for peace wea start lo 1919, wea hem League of Nations and distaem hem nao United Nations. (Rev. 17:3-5) “Tenfala horn” hem representim evri gavman lo world wea rul and wea sapotim datfala wild animal.
Wat nao datfala jury woman duim lo datfala wild animal wea kala blo hem red? Datfala jury woman hem gohed for “sidaon antap” lo datfala wild animal, gohed sapotim datfala wild animal, and trae for influencim hem and even kontrolem hem.
Wat nao bae happen lo datfala jury woman? Datfala wild animal, witim tenfala horn wea sapotim hem “bae heitim datfala jury woman.” Heit blo olketa bae showaot taem olketa tekem evri riches blo hem and mekem pipol for lukim klia evri wicked wei blo hem. And olketa bae karem aot judgment blo Jehovah againstim datfala woman for barava finisim hem. (Rev. 17:1; 18:8) Datwan minim evriting wea join witim olketa false religion bae finis. Bat, bifor datwan hem happen, Jehovah bae mekem olketa nation for duim wanfala samting wea no enitaem hem happen lo history.
Wat nao bae Jehovah mekem olketa nation for duim? Hem bae putim insaed tingting blo tenfala horn for “duim samting wea hem laekem,” wea hem nao for olketa “givim paoa blo olketa for rul lo datfala wild animal [wea kala blo hem red],” datfala United Nations. (Rev. 17:13) Tingim diswan. Hao, olketa gavman blo man bae disaed seleva nomoa for givim paoa and authority blo olketa go lo datfala wild animal? Nomoa! Profesi showim dat God seleva nao bae mekem olketa for duim datwan. (Prov. 21:1; comparem Isaiah 44:28.) Hao, bae olketa isisi givim go paoa lo datfala wild animal? Nomoa! Luk olsem olketa bae kwiktaem nomoa duim datwan. Then, taem datfala wild animal kasem paoa from olketa nation, hem bae karem aot judgment blo Jehovah againstim evri organization blo false religion and finisim olketa for olowe.
So, wat nao iumi savve expectim for happen? Iumi shud no expect for lukim or herem lo nius dat olketa gavman bae isisi givim moa sapot lo United Nations. Wat iumi expectim hem diswan: Bae seknomoa Jehovah putim insaed tingting blo olketa nation for duim samting wea hem laekem, wea hem nao for olketa givim paoa blo olketa lo datfala wild animal. Taem datwan happen, iumi savve bigfala trabol hem redi for start. So “iumi mas gohed wekap and garem gudfala tingting” bikos klosap nao olketa change bae seknomoa happen!—1 Thess. 5:6.