Wat Nao Bible Talem Abaotem Tithing?

Ansa from Bible

Hem wei blo olketa ancient Israelite for givim contribution for sapotim tru worship, and God givim komand for olketa givim tithe,a or wan tenth, blo annual income blo olketa. God talem olketa: “Iufala mas givim wan tenth [“tithe,” King James Version] blo evri kaikai wea iufala harvestim lo garden blo iufala evri year.”—Deuteronomy 14:22.

Datfala komand for givim tithe hem part lo Law blo Moses, law wea God givim lo nation blo Israel bifor. Olketa Christian no stap anda lo Law blo Moses, so olketa no need for givim tithe. (Colossians 2:13, 14) Instead, each Christian savve givim contribution “wea hem disaedem finis insaed lo heart blo hem, and no feel nogud taem hem givim samting or hem give from narawan forcem hem, bikos God hem lovem man wea hapi for givim samting.”—2 Corinthians 9:7.

• Tithing lo Bible​—“Old Testament”

• Tithing lo Bible​—“Niu Testament”

Tithing lo Bible—“Old Testament”

Word tithe olketa mentionim staka taem lo part blo Bible wea olketa kolem lo Old Testament. Staka story abaotem tithe hem kamap afta lo taem wea God givim Law lo olketa Israelite thru lo Moses (Law blo Moses). Bat, tu-thri story abaotem datwan hem happen bifor datfala taem.

Bifor Law blo Moses

First person Bible storyim wea givim tithe hem Abram (Abraham). (Genesis 14:18-20; Hebrews 7:4) Abram givim tithe wantaem nomoa lo king wea hem priest blo Salem. No eni evidence lo Bible wea storyim dat Abraham or olketa pikinini givim tithe moa.

Second person wea Bible mentionim wea givim tithe hem Jacob, granson blo Abraham. Hem promisim dat if God blessim hem, hem bae givim lo God “wan tenth blo evri samting” hem kasem. (Genesis 28:20-22) Samfala Bible scholar sei, maet tithe wea Jacob givim hem olketa animal sakrifaes. Nomata Jacob keepim datfala promis and givim tithe, hem no talem famili blo hem for gohed duim datwan.

Anda Law blo Moses

Olketa ancient Israelite kasem komand for givim tithe olsem wanfala wei for sapotim olketa waka lo worship blo olketa.

• Datfala tithe hem for sapotim olketa wea waka full taem saed lo worship, olsem olketa Levite, includim olketa priest, bikos olketa no garem pis land for wakem garden. (Numbers 18:20, 21) Olketa Levite wea no priest kasem tithe from olketa Israelite and olketa givim best ‘tenth part blo datfala tenth part’ lo olketa priest.—Numbers 18:26-29.

• Luk olsem olketa Israelite mas givim second tithe lo year, wea datwan benefitim olketa Levite and pipol wea no Levite. (Deuteronomy 14:22, 23) Olketa Israelite famili iusim disfala provision taem olketa celebratem olketa spesol festival, and samfala year olketa sharem datwan for helpem pipol wea barava poor.—Deuteronomy 14:28, 29; 26:12.

Hao nao olketa calculatem datfala tithe? Olketa Israelite putim wan tenth blo olketa tings wea olketa harvestim lo land blo olketa each year. (Leviticus 27:30) If olketa chus for givim selen olsem tithe instead for givim tings wea olketa harvestim, olketa mas addim 20 percent lo value blo olketa tings hia. (Leviticus 27:31) Olketa kasem komand tu for givim “mek-ten buluka and sheepsheep.”—Leviticus 27:32.

For savve lo olketa animal wea bae hem tithe blo olketa, olketa Israelite chusim evri mek-ten animal wea kamaot from fence blo olketa. Datfala Law sei dat olketa mas no chekim or exchangem olketa animal hia wea olketa chusim finis, olketa mas no salem olketa animal hia for givim selen hia for tithe. (Leviticus 27:32, 33) Bat, datfala second tithe for iusim lo olketa annual festival, olketa savve salem and iusim datfala selen for tithe. Disfala provision mekem hem isi for olketa Israelite wea mas travel for long distance for attendim olketa festival.—Deuteronomy 14:25, 26.

Wat taem nao olketa Israelite givim tithe? Olketa Israelite givim tithe evri year. (Deuteronomy 14:22) Bat, lo evri mek-seven year olketa no duim. Datfala year hem sabbath, or year for rest, hem taem wea olketa Israelite no plantim eni garden. (Leviticus 25:4, 5) Diswan hem spesol taem, so olketa no givim tithe lo taem blo harvest. Evri third and sixth year blo datfala seven-year Sabbath cycle, olketa Israelite sharem datfala second tithe witim pipol wea poor and olketa Levite.—Deuteronomy 14:28, 29.

Wat nao panis for man wea no peim tithe? Datfala Law blo Moses no talem dat man bae kasem panis if hem no peim tithe. Olketa Israelite givim tithe bikos olketa savve hem stret samting for duim, no bikos olketa bae kasem panis if olketa no duim. Olketa Israelite mas talemaot front lo God dat olketa givim datfala tithe and for askem blessing blo God for datwan. (Deuteronomy 26:12-15) God ting lo man wea no givim tithe olsem man hia steal from hem.—Malachi 3:8, 9.

Hao, for givim tithe hem wanfala burden? Nomoa. God promisim nation blo Israel dat if olketa givim tithe blo olketa, hem bae pourim aot blessing blo hem lo olketa and olketa bae no short lo eni samting. (Malachi 3:10) Bat, taem nation blo Israel no givim tithe, olketa safa. Olketa no kasem nao blessing blo God. And tu, olketa priest and Levite mas spendem taem for duim waka for kasem selen and no focus nao for helpem olketa Israelite for worshipim God.—Nehemiah 13:10; Malachi 3:7.

Tithing lo Bible—“Niu Testament”

Taem Jesus lo earth, tithing hem still wanfala requirement for olketa worshiper blo God. Bat, disfala requirement hem stop afta Jesus dae.

Lo taem blo Jesus

Lo Niu Testament, Bible showim dat olketa Israelite continue for duim tithing taem Jesus lo earth. Jesus acknowledgim dat tithing hem samting wea olketa mas duim, bat hem tok againstim olketa religious leader wea faithful tumas for givim tithe bat “ting nating lo olketa barava important samting wea Law talem, olsem for followim justice and showim mercy and for faithful.”—Matthew 23:23.

Afta Jesus dae

Afta Jesus dae, olketa man no need for givim tithe. Sakrifaes blo Jesus hem aotem, or finisim, datfala Law blo Moses, includim datfala komandment for “kasem tithe.”—Hebrews 7:5, 18; Ephesians 2:13-15; Colossians 2:13, 14.