Devil Hem Luk Hao?

Ansa from Bible

Devil hem invisible spirit person, wea minim hem no garem physical appearance.—Ephesians 6:11, 12.

Staka artist drawim Devil hem holem wanfala pitchfork. Lukluk blo hem olsem goat wea garem horn and tail.

Staka artist drawim Devil hem olsem goat wea garem horn, tail, and wanfala pitchfork. Samfala pipol biliv dat olketa artist wea laef moa than 1,000 years ago, olketa nao drawim olketa piksa hia. Luk olsem samfala man wea garem paoa nao influencim olketa for drawim olketa kastom story or laea story olsem.

Hao nao Bible describem Devil?

Bible iusim staka metaphor for describem Devil. Diswan helpem iumi for understandim, no appearance nomoa bat personality blo hem tu. Samfala lo olketa metaphor hia hem:

Angel blo laet. Hem mekem pipol ting if olketa followim olketa teaching blo hem, bae olketa kasem gud samting instead for followim teaching blo God.—2 Corinthians 11:14.
Lion wea singaot big. Hem barava attakim pipol wea worshipim God.—1 Peter 5:8.
Wanfala big dragon. Hem mekem man fraet, hem paoaful, and spoelem man.—Revelation 12:9.

Olketa Bible verse abaotem Devil

2 Corinthians 11:14: “Satan nao act olsem wanfala angel blo laet.”

Mining: Satan pretend olsem hem gud man, in order for hem trikim pipol for followim olketa teaching blo hem instead for followim olketa teaching blo God.
Ephesians 6:11: “Werem full sut for faet wea God givim mekem iufala savve stand strong againstim olketa kleva trik blo Devil.”

Mining: Devil iusim olketa evil tactic for mekem pipol disobeyim God.
James 4:7: “Iufala mas stap anda lo God bat againstim Devil, and hem bae ranawe from iufala.”

Mining: Wanfala person savve winim Satan taem hem obeyim God instead for obeyim Devil.
1 Peter 5:8: “Devil, wea hem enemy blo iufala, hem wakabaot raon olsem lion wea singaot big and wea laekem tumas for kaikaim eniwan.”

Mining: Devil heitim pipol wea obeyim God and laek for distroem relationship blo olketa witim God.