Wat Taem Nao God Start for Creatim Universe?
Ansa from Bible
Bible no talem wat taem nao God start for creatim universe or hao long nao hem duim datwan. Bible sei nomoa: “Lo start, God creatim skae and earth.” (Genesis 1:1) Bible no specific taem hem sei “lo start.” Bat, universe hem already exist bifor sixfala period blo taem, or sixfala “day” blo creation hem start, wea Bible buk Genesis hem storyim.
Hao, sixfala day blo creation hem olketa literal 24 hour day?
Nomoa. Taem Bible iusim datfala word “day” hem savve minim olketa difren length of taem, and hem depend lo context. For example, wanfala verse hem iusim word wanfala day for describem full period of taem wea God creatim evriting.—Genesis 2:4.
Wat nao happen during sixfala day blo creation?
God transformim ‘earth wea emti, and wea wata hem fulap raonem’ for kamap planet wea living tings savve stap insaed. (Genesis 1:2) Then hem creatim living tings for laef lo earth. Bible describem sixfala day, or period of taem, wea God creatim olketa difren samting:
Day 1: God mekem laet for reachim surface blo earth, and result blo datwan, cycle blo naet and day hem start.—Genesis 1:3-5.
Day 2: God formim wanfala big spes and spes hia hem stap between wata wea stap lo surface blo earth and wata wea stap hae antap lo spes hia.—Genesis 1:6-8.
Day 3: God mekem drae land for appear. Hem creatim tu evri difren kaen plant.—Genesis 1:9-13.
Day 4: God mekem laet from sun, moon, and olketa star for shaen kam lo earth.—Genesis 1:14-19.
Day 5: God creatim olketa animal wea laef insaed wata, and olketa animal wea flae lo skae.—Genesis 1:20-23.
Day 6: God creatim olketa animal lo land and olketa human.—Genesis 1:24-31.
Lo end blo mek-six day, God rest from waka hia, and hem stop for creatim olketa samting.—Genesis 2:1, 2.
Hao, story lo Genesis hem accurate witim science?
Taem Bible storyim creation blo world, hem no storyim evri scientific detail abaotem datwan. Bat, hem describem creation lo simpol wei mekem olketa reader, nomata pipol wea laef lo taem wea Bible storyim, olketa savve understandim wat God hem creatim lo each day. Story abaotem creation hem no contradict witim olketa facts wea science hem faendemaot. Wanfala astrophysicist, wea nem blo hem Robert Jastrow raet olsem: “Evri important facts wea mifala faendemaot saed lo science hem semsem witim story lo Genesis, only olketa smol detail nomoa hem difren. Olketa tings wea kamap wea lead go for man hem laef hem happen kwiktaem nomoa, lo wanfala definite taem.”
Wat taem nao God creatim sun, moon, and olketa star?
Sun, moon, and olketa star already exist olsem part blo “skae” wea God creatim “lo start.” (Genesis 1:1) Bat, laet wea kam from olketa tings hia no reachim yet surface blo earth bikos atmosphere lo surface hia hem barava dark. (Genesis 1:2) So nomata lo first day laet hem lelebet shaen thru lo surface hia, hem hard for lukim source blo laet hia. Lo mek-fo day, atmosphere hem start for klia. Bible sei dat sun, moon, and olketa star start for “shaen kam lo earth,” wea if eniwan stap lo earth hem nao wat bae hem lukim.—Genesis 1:17.
According lo Bible, hao long nao earth hem exist?
Bible no talem eniting abaotem hao long nao earth hem exist. Genesis 1:1 sei nomoa dat physical universe, includim earth wea iumi stap insaed, hem garem start. Wat disfala verse talem hem no disagree witim olketa principle blo science or witim olketa estimation blo olketa scientist abaotem hao long nao earth hem exist.