Mi Feel Guilty—Hao, Bible Savve Helpem Mi for Feel Beta?

Ansa from Bible

Yes. Bible savve helpem iumi for duim wat iumi fit for duim mekem iumi stop for feel guilty. (Psalm 32:1-5) If iumi barava sorre from rong samting wea iumi duim, God bae forgivim iumi and helpem iumi for recover. (Psalm 86:5) Bible showim dat samtaems feeling for guilty hem gud bikos hem mekem iumi for stop for duim samting wea no stret and traem best for avoidim datwan lo future. (Psalm 51:17; Proverbs 14:9) Bat Bible advaesem iumi tu for no ova guilty tumas, maet iumi judgem iumiseleva and tingse iumi hopeles and no important lo God. Kaen tingting olsem savve mekem iumi for “feel sorre and givap.”—2 Corinthians 2:7, Contemporary English Version.

• Wat nao savve kosim wei for feel guilty?

• Hao nao mi savve deal witim guilty feeling?

• Olketa Bible verse abaotem wei for guilty and forgiveness

Wat nao savve kosim wei for feel guilty?

Staka samting savve mekem iumi feel guilty. Maet iumi duim samting wea hurtim samwan iumi lovem or fail for duim wat iumi ting iumi shud duim. Samtaems iumi maet feel guilty nomata iumi no really guilty. For example, if iumi setim samfala hae standard for iumiseleva wea iumi no fit for kasem, iumi savve feel guilty evritaem wea iumi no kasem olketa standard hia. Dastawe Bible encouragem iumi for garem reasonable expection.​—Ecclesiastes 7:16.

Hao nao mi savve deal witim guilty feeling

Instead for feel hopeles bikos lo rong iu duim, duim wat iu fit for duim for stretem datwan. Hao?

• Talemaot mistek blo iu. Lo prea, askem Jehovaha God for forgivim iu. (Psalm 38:18; Luke 11:4) Iu savve sure dat God bae herem iu if iu repent, barava sorre, and traem best for no repeatim sem mistek. (2 Chronicles 33:13; Psalm 34:18) Hem lukim wat insaed heart, wea no eni human savve lukim. Taem God lukim iumi traem best for stop for duim rong samting, “hem faithful and hem raeteous, so bae hem forgivim iumi.”—1 John 1:9; Proverbs 28:13.

  If iu duim nogud samting lo samwan, iu maet need for luksavve lo datwan and sincerely apologize lo datfala person. Datwan maet hem no isi! Man mas hambol and no fraet. Bat taem man sorre from heart blo hem datwan hem help lo tufala important samting: Hem liftim wanfala hevi burden from shoulder blo iu, and hem restorem peace.—Matthew 3:8; 5:23, 24.

• Tingim olketa scripture abaotem mercy blo God. For example, tingim 1 John 3:19, 20. Bible hem sei “heart blo iumi mekem iumi feel guilty,” wea minim iumi maet feel nogud lo iumiseleva, and feel olsem God no lovem iumi. Bat, datfala verse sei moa “God hem big winim heart blo iumi.” Hao? God savve lo evriting abaotem iumi and hem fully understandim feeling and olketa weakness blo iumi. Hem savve tu dat iumi imperfect, and hem isi for duim rong samting.b (Psalm 51:5) Dastawe hem no rejectim olketa wea really sorre from rong samting olketa duim.—Psalm 32:5.

• No gohed ting abaotem olketa past mistek. Bible story abaotem staka man and woman wea duim nogud samting bat bihaen olketa changem wei blo olketa. Wanfala example hem Saul blo Tarsus, wea bihaen olketa kolem lo aposol Paul. From hem wanfala Pharisee, hem barava persecutim nogud olketa follower blo Jesus. (Acts 8:3; 9:1, 2, 11) Bat taem hem savve hem againstim God and datfala Messiah, or Christ, hem repent, changem wei blo hem and kamap gud example for olketa Christian. Yes, Paul barava regretim past behavior blo hem, bat hem no gohed ting abaotem datwan. Taem hem luksavve lo bigfala mercy blo God, Paul kamap wanfala man wea strong for preach and hem evritaem ting abaotem hope for laef olowe.—Philippians 3:13, 14.

Olketa Bible verse abaotem wei for guilty and forgiveness

Jeremiah 31:34: “Mi bae forgivim rong samting wea olketa duim, and mi bae no tingim moa sin blo olketa.”

Mining: Once God forgivim iumi, hem bae no mekem iumi tingim moa olketa sin blo iumi. Mercy blo God hem tru wan.