Hu Nao John Baptaesa?

Ansa from Bible

John Baptaesa hem wanfala profet blo God. (Luke 1:76) Hem born just bifor Jesus hem born and stap lo first century C.E. God givim hem assignment for redyim road for Messiah, or Christ. John duim diswan taem hem preachim message blo God lo olketa Jew mekem olketa kam bak lo God.—Mark 1:1-4; Luke 1:13, 16, 17.

Message wea John preachim hem helpem pipol wea garem gud heart for luksavve Jesus blo Nazareth nao datfala promis Messiah. (Matthew 11:10) John encouragem olketa wea lisin lo hem for repent from olketa sin blo olketa and then for baptaes wea datwan showim olketa repent. (Luke 3:3-6) From hem baptaesim staka pipol, olketa kolem hem John the Baptist or Baptaesa. Most important baptism wea John duim nao hem taem hem baptaesim Jesus.a—Mark 1:9.

Lo disfala article

• Wat nao mekem John Baptaesa hem difren?

• Hu nao parents blo John Baptaesa?

• Hu nao killim dae John Baptaesa?

• Hao, John Baptaesa and Jesus compete?

• Hao many man wea nem blo olketa John nao Bible storyim?

Wat nao mekem John Baptaesa hem difren?

Bible talem profesi abaotem waka wea hem bae duim: Preaching waka wea John duim, hem fulfillim datfala profesi abaotem messenger blo Jehovah. (Malachi 3:1; Matthew 3:1-3) Waka wea hem duim “mekem olketa kamap pipol wea redi for Jehovah” wea minim hem helpem olketa Jew for redi for acceptim message blo Jehovah God wea Jesus Christ bae preachim.—Luke 1:17.

Legacy: Jesus hem sei dat “lo olketa man wea born lo earth, no eniwan hem winim John Baptaesa, bat man wea no important tumas insaed lo Kingdom blo heven hem winim hem.” (Matthew 11:11) No eni servant blo God wea stap bifor John hem hae winim hem, bikos hem wanfala profet and hem “messenger” wea profesi story abaotem. Wat Jesus talem showim tu dat John bae no king lo Kingdom lo heven.b Disfala faithful profet dae bifor Christ openem road for pipol go lo heven. (Hebrews 10:19, 20) Bat, John bae garem chance for laef olowe lo Paradaes lo earth taem Kingdom blo God hem rul.—Psalm 37:29; Luke 23:43.

Hu nao parents blo John Baptaesa?

Parents blo John nem blo tufala hem Zechariah and Elizabeth. Zechariah hem wanfala Jew and hem priest. Hao John hem born hem wanfala mirakol, bikos mami blo hem no savve garem pikinini, or no fit for bornem pikinini. And tu, Elizabeth and Zechariah “tufala evriwan olo nao.”—Luke 1:5-7, 13.

Hu nao killim dae John Baptaesa?

King Herod Antipas nao givim order for killim dae John. Hem duim diswan bikos waef blo hem Herodias nao askem hem for duim datwan. Woman hia heitim John bikos John tok stret lo Herod dat hem brekem law blo olketa Jew for maritim Herodias.—Matthew 14:1-12; Mark 6:16-19.

Hao, John Baptaesa and Jesus compete?

Tingting wea sei John and Jesus tufala compete hem no stap insaed Bible. (John 3:25-30) And John talem stret dat responsibility blo hem for redyim road for Messiah, no for compete witim hem. John sei: “Mi kam for baptaesim pipol lo wata . . . mekem olketa blo Israel for savve lo hem.” Then hem sei moa: “Diswan nao hem Son blo God.” (John 1:26-34) Dastawe John hem hapi tumas for herem nius abaotem ministry blo Jesus.