Wat Nao Bible Talem Abaotem Frenship?
Ansa from Bible
Frens savve helpem iumi garem hapi and successful laef. Gud frens savve garem gud influence lo each other and impruvim gud quality blo each other.—Proverbs 27:17.
Nomata olsem, Bible storyim hem barava important for chusim olketa frens wisely. Hem givim warning abaotem olketa consequence man savve kasem if hem garem olketa rong frens. (Proverbs 13:20; 1 Corinthians 15:33) Kaen frens olsem savve kosim wanfala person for mekem olketa karangge disison or spoelem olketa gud quality blo hem.
Lo disfala article
Wat nao mekem samwan hem gud fren?
Bible teachim dat for garem gud frenship hem shud base lo samting wea moa important, instead for just garem similar interest or hobby nomoa. For example, Psalm 119:63 sei: “Mi fren blo evriwan wea fraet lo iua and blo olketa wea followim olketa instruction blo iu.” Disfala Bible raeta talem hem chusim frens wea no laek for mekem God feel nogud and wea laekem tumas for followim olketa standard blo God lo laef.
Bible storyim tu olketa quality wea wanfala gud fren shud garem. For example:
“Wanfala tru fren hem showim love evritaem. And hem kamap wanfala brata blo iu lo taem blo trabol.”—Proverbs 17:17.
“Samfala pipol spoelem fren blo olketa, bat wanfala fren hem stap wea hem lovem iu winim brata blo iu.”—Proverbs 18:24.
Olketa verse hia showim dat wanfala gud fren hem loyal, loving, kaen, and generous. Man savve depend lo wanfala tru fren for sapot taem laef hem no isi. And tru fren bae no fraet tu for stretem iumi if iumi start for go difren from wat hem stret or start for mekem olketa rong disison.—Proverbs 27:6, 9.
Hu nao samfala example blo gud frens lo Bible?
Bible storyim samfala example blo olketa gud frens between pipol from difren age, baekgraon, culture, and position. Read abaotem thrifala frenship olsem.
Ruth and Naomi. Ruth hem dota-in-law blo Naomi, and luk olsem age difference between tufala hem big tumas tu. And, cultural baekgraon blo Ruth hem difren from Naomi. Nomata olsem, tufala lovem and garem klos frenship.—Ruth 1:16.
David and Jonathan. Nomata hem klia Jonathan hem 30 years older than David, Bible sei dat David and Jonathan tufala “fren gud tugeta.”—1 Samuel 18:1.
Jesus and olketa aposol blo hem. Jesus garem hae position and paoa winim olketa aposol blo hem, from hem teacher and masta blo olketa. (John 13:13) Bat hem no ting lo olketa dat olketa no fit for fren witim hem. Instead, Jesus fren klos witim olketa hia wea followim teaching blo hem. Hem sei: “Mi kolem iufala olketa fren, bikos mi talem iufala evri samting wea mi herem from Dadi blo mi.”—John 15:14, 15.
Hao, man savve fren witim God?
Yes, hem possible for olketa human fren witim God. Bible sei: “Hem fren gud witim man wea duim stret samting.” (Proverbs 3:32) In other words, God chus for fren witim olketa wea traem best for kaen, honest, and respectable, and wea waka hard for followim olketa standard blo hem lo wat hem stret and no stret. For example, Bible specifically kolem faithful man Abraham lo fren blo God.—2 Chronicles 20:7; Isaiah 41:8; James 2:23.
a Lo context blo psalm hem showim dat “iu” lo disfala verse hem refer lo God.