Wat Nao Hem Minim For Kamap Wanfala “Gud Samaritan”?
Ansa from Bible
Datfala expression “Gud Samaritan” hem commonly use for describem person wea duim samting for helpem olketa wea in need. Datfala term hem originate from wanfala story, or parabol, wea Jesus talem for showim dat wanfala gud neiba hem tingim olketa narawan and duim samting for helpem olketa nomata which kantri or baekgraon olketa kam from.a
Lo disfala article
Wat nao parabol blo datfala “Gud Samaritan”?
Diswan nao brief summary blo datfala story wea Jesus talem: Wanfala Jewish Man hem travel from Jerusalem for Jericho. Taem hem followim road, olketa man for steal holem hem, killim hem nogud, and leavim hem haf dead lo there.
Wanfala Jewish priest and bihaen nara Jewish religious leader wakabaot pasim nomoa datfala man. Nomata olketa from sem kantri, no eniwan lo tufala hia stop for helpem datfala man.
Gogo, wanfala man from nara kantri followim kam datfala road. Hem wanfala Samaritan. (Luke 10:33; 17:16-18) From datfala Samaritan hem sorre tumas lo man hia, hem treatim nao olketa garekil blo datfala man. Then hem tekem datfala man wea garekil go lo wanfala resthaos. Hem lukaftarem man hia for full naet. Next day, hem peim man wea onam datfala resthaos for lukaftarem datfala man and hem sei eni selen wea hem iusim for lukaftarem datfala man, hem bae changem taem hem kam bak.—Luke 10:30-35.
Why nao Jesus storyim disfala parabol?
Jesus talem datfala story lo wanfala man wea tingse olketa neiba blo hem, hem pipol wea olketa kam from sem race and garem sem religion nomoa. Jesus laek for teachim datfala man lo wanfala important leson, hem for datfala man understandim dat “neiba” hem no olketa Jew nomoa, bat hem includim tu olketa wea no Jew. (Luke 10:36, 37) Disfala story hem stap lo Bible for teachim wanfala important samting lo evriwan wea laek for mekem God hapi.—2 Timothy 3:16, 17.
Wat nao leson from disfala parabol?
Datfala story teachim dat wanfala gud neiba hem duim samting for showim hem sorre lo narawan. Hem bae duim samting for helpem samwan wea safa nomata wat kaen baekgraon, race, or nationality hem kam from. Gud neiba hem treatim olketa narawan olsem hao hem laekem olketa narawan for treatim hem.—Matthew 7:12.
Hu nao olketa Samaritan?
Olketa Samaritan stap north lo Judea. Olketa kam from laen blo olketa Jew wea maritim olketa wea no Jew.
Then lo first century C.E., olketa Samaritan formim religion blo olketa seleva. Olketa acceptim first faevfala buk lo Hebrew Scripture bat rejectim evri nara buk.
Staka Jew lo taem blo Jesus no laekem olketa Samaritan and no laek for associate witim olketa. (John 4:9) Samfala Jew iusim term “Samaritan” for tok spoelem narawan.—John 8:48.
Hao, datfala story abaotem “Gud Samaritan” hem really happen?
Olketa Scriptures no talem whether parabol abaotem Samaritan hem base lo tru samting wea happen. Nomata olsem, staka taem Jesus iusim kastom and ples wea pipol savve gud taem hem teach, mekem hem isi for olketa wea lisin for understandim point wea Jesus laek for teachim.
Staka detail insaed datfala story hem accurate witim history. For example:
Road from Jerusalem go kasem Jericho wea hem winim 20 kilometer (12 mi) long, hem go daon followim wanfala hill wea steep blo hem 1 kilometer (0.6 mi). Datfala story hem talem klia dat olketa wea travel olketa lusim Jerusalem and “go daon lo Jericho.”—Luke 10:30.
Olketa priest and olketa nara Jewish religious leader wea stap lo Jericho savve travel go lo Jerusalem followim disfala road evritaem.
Olketa man for steal savve haed followim road lo ples wea no eniwan stap, olketa weit for attakim eniwan wea travel, especially olketa wea travel seleva.
a Datfala parabol blo “Gud Samaritan” pipol kolem tu lo “Neighborly Samaritan.”