Wanfala Blind Woman Kasem Ansa for Prea blo Hem

Yanmei, wanfala Witness wea stap lo Asia, laek for helpem wanfala blind woman wea nem blo hem Mingjie for akrosim wanfala road.a Mingjie sei: “Thankiu. God blessim iu!” Bihaen datwan, Yanmei askem Mingjie sapos hem laek for meet for story tugeta abaotem Bible. Then Mingjie sei hem bin prea evriday lo God for leadim hem lo trufala kongregeson blo hem. Why nao hem bin askem God for datwan?

Lo 2008, wanfala blind fren blo Mingjie askem hem for go witim hem lo wanfala church wea savve helpem olketa wea disable. Bihaen priest hem finisim sermon blo hem, Mingjie askem hem which buk nao hem quotem. Priest talem Mingji hem Bible, wea hem trufala Toktok blo God. Mingjie barava laek for readim Bible. So hem kasem Bible lo Chinese braille languis and hem readim 32 volume hia lo sixfala month. Taem Mingjie gohed readim Bible, hem luksavve teaching abaotem Trinity hem no stret, bat olketa teachim datwan lo church wea hem attendim. Hem lanem tu hao God hem garem nem Jehovah.

Gogo Mingjie feel nogud lo samting wea olketa member lo church duim. Hem luksavve olketa no followim wanem hem readim lo Bible. Olsem example, olketa member lo church givim fresh kaikai lo pipol wea no blind bat leftova kaikai lo olketa wea blind. Mingjie feel nogud from wei wea olketa duim samting wea no stret, so hem gohed lukaotem nara church lo area blo hem. Dastawe Mingjie hem gohed prea for faendem trufala Christian kongregeson.

From Yanmei kaen lo Mingjie, hem willing for acceptim Bible study. Bihaen datwan Mingjie attendim first meeting blo hem witim Olketa Jehovah’s Witness. Mingjie sei: “Hard for mi forgetim datfala first meeting wea mi go lo hem. Olketa brata and sista barava welkamim mi. Hem spesol samting. Nomata mi blind, olketa no tingim daonem mi bat olketa lovem mi.”

Mingjie gohed for study and attendim olketa meeting. Hem enjoyim wei for singim olketa Kingdom song, bat hem no isi for hem bikos hem no garem songbuk lo braille languis blo hem. So kongregeson helpem Mingjie for mekem songbuk blo hem. Hem tekem Mingjie 22 hour for raetem 151 song lo braille languis blo hem! Lo April 2018, Mingjie joinim preaching waka and hem gohed for spendem samting olsem 30 hour each month lo waka hia.

For helpem Mingjie prepare for baptism, Yanmei mekem audio recording blo olketa kwestin and scripture lo Bible from datfala buk Organized to Do Jehovah’s Will. Lo July 2018, Mingjie baptaes. Hem sei: “Mi barava feel hapi from love wea olketa brata and sista showim mi lo datfala convention. Mi krae bikos nao mi part blo trufala kongregeson blo God.” (John 13:34, 35) Distaem Mingjie preachim gud nius full taem bikos hem tu laek showimaot sem love wea olketa narawan showimaot lo hem.