HELP FOR FAMILI | MARIT
Hao, Mitufala Shud Stap Tugeta Bifor Marit?
Staka man and woman stap tugeta bifor olketa marit. Samfala duim olsem bikos olketa laek for lukim if tufala fitim each other or nomoa, and bikos olketa hope datwan bae increasim chance blo olketa for garem gudfala marit. Hao, hem gud idea for stap tugeta bifor marit?
Lo disfala article
Wat nao Bible talem?
Bible no acceptim tufala wea no marit for duim sex. For example, hem sei: “Stap klia lo wei for durong.” (1 Thessalonica 4:3; 1 Corinth 6:18) Datwan includim sex between tufala wea stap tugeta, nomata tufala plan for marit bihaen.a Olketa standard blo Bible protectim man and woman for no kasem staka problem, olsem for woman babule nating and other negative consequences wea kamaot from wei for stap tugeta bifor marit.
Marit arrangement hem kam from God. Taem God startim marit, hem sei: “Man bae lusim dadi and mami blo hem and hem bae stap olowe witim waef blo hem, and tufala bae kamap wanfala body nomoa.” (Genesis 2:24) Marit promis wea man and woman talem lo each other hem olsem strong faondeson wea mekem marit blo tufala savve garem love and hapi.
Hao, for stap tugeta bae preparem iu for marit?
Samfala sei yes. Lo tingting blo olketa, man and woman wea stap tugeta bae kasem gudfala experience taem tufala duim tugeta olketa waka lo haos and observim wei blo each other. Bat, wanfala barava important samting wea mekem marit for succeed hem marit promis wea tufala talem lo each other.
Wat nao savve helpem wanfala couple for stay tugeta olowe during lo gud taems or bad taems? If tufala stap tugeta bifor tufala marit, tufala evriwan bae ting lo relationship blo tufala olsem samting for traem nomoa and eniwan lo tufala savve walk aot from datfala relationship. Bat, if tufala evriwan tinghae lo marit promis wea tufala talem lo each other and waka tugeta for deal witim eni problem wea kamap, bae tufala succeed lo marit blo tufala.
Main point blo diswan: Instead for prepare for marit, tufala wea disaed for stap tugeta bifor marit, maet endap tufala separate.
Bible principle: “Eni samting wea hem plantim, datwan nao bae hem harvestim.”—Galatia 6:7.
Hao, wei for stap tugeta bae benefitim iu financially?
Samfala sei yes. Wanfala Pew Research Center survey faendaot dat lo United States, samting olsem fofala aot of tenfala adult wea stap tugeta bifor marit duim datwan for financial reasons. Bat, bihaen olketa stap tugeta for lelebet longtaem, staka sei wanfala main reason why olketa no redi for marit yet hem bikos olketa garem financial problems.
Wei for stap tugeta bifor marit savve kosim olketa problem tu, especially for olketa woman. For example, bihaen tufala endim relationship blo tufala, staka taem olketa woman nao tekem responsibility for lukaftarem olketa pikinini.
Main point blo diswan: Negative samting wea kamaot from wei for stap tugeta bifor marit hem staka winim eni benefit wea tufala tingse tufala bae kasem.
Bible principle: “Mi, Jehovah, mi God blo iufala, Man wea teachim iufala for iufala nao kasem gud samting.”—Isaiah 48:17.
Hao, wei for stap tugeta bae helpem iu for no maritim rong person?
Samfala sei yes. Nomata olsem, “staka taem pipol wea stap tugeta bifor marit no luksavve datwan mekem hem hard for tufala brek ap,” hem nao samting wea datfala buk Fighting for Your Marriage hem talem. Why nao olsem? Samfala wea stap tugeta maet faendaot dat olketa barava no fitim each other. Bat bikos tufala garem samfala responsibility, olsem tufala garem eni pet, saenem lease blo haos tugeta, or garem pikinini wea tufala no planim, tufala garem relationship wea olketa researcher kolem “the inertia of cohabitation.”b Nara wei for explainim diswan, buk Fighting for Your Marriage sei “samfala wea really laek for brek ap bifor olketa marit, endap olketa marit nomoa bikos hem moa isi for gohed olsem nomoa.”
Main point blo diswan: Instead of helpem iu for mekem gud disison, wei for stap tugeta bifor marit savve mekem hem moa hard for endim wanfala bad relationship.
Bible principle: “Wise man hem lukim danger and hem haed from datwan, bat man wea no garem experience hem go nomoa and hem safa lo datwan.”—Proverbs 22:3.
Hao, eni beta option hem stap?
Iu savve avoidim olketa risk wea connect witim wei for stap tugeta bifor marit and increasim olketa chance blo iu for garem gud marit. Wat nao iu mas duim? Followim gud olketa Bible standard saed lo marit. Spendem inaf taem for savve lo person wea iu laek for maritim bifor iutufala marit and stap tugeta olsem hasband and waef. Hem beta for chusim person wea iu bae maritim base lo tings olsem wei for garem olketa sem value and biliv, wea hem moa important winim sexual attraction.
Bible garem advaes wea savve helpem iu for leim strong faondeson for garem hapi marit.c For example, Bible garem olketa principle wea savve helpem iu for . . .
avoidim wei for no faithful
kamap person wea bae mekem iu gud hasband or waef
luksavve lo tings wea showim samwan hem no fitim iu taem iutufala dating
For kasem moa information lo olketa topic hia, lukim “Marit and Famili” sekson lo jw.org.
Bible principle: “Evri toktok insaed long olketa Holy Raeting hem kam from God. Hem savve teachim pipol.”—2 Timothy 3:16.
a Lukim article “Does Romantic Love Justify Premarital Sex?”
b From article “Sliding Versus Deciding: Inertia and the Premarital Cohabitation Effect,” wea Scott M. Stanley, Galena Kline Rhoades, and Howard J. Markman, pablisim lo journal Family Relations.
c Lo samfala culture, parents nao main wan wea help for chusim hasband or waef for son or dota blo olketa. If datwan hem culture blo iu, Bible savve helpem parents for savve wat kaen qualities nao hem important for olketa luk for hem.