Olketa Christian and War—Wat Nao Bible Talem Abaotem Diswan?

Olsem iumi lukim lo faet wea gohed lo Ukraine, staka leader blo olketa Christian religion teksaed lo war. Lukim hao olketa bigman blo church sapotim tufala saed wea gohed for faet:

• “Bigfala praise and thankiu for olketa soldia wea faet for defendim pipol lo Ukraine from Russia . . . Heart blo mifala, prea blo mifala, and sapot blo mifala bae stap evritaem witim iufala.”—Metropolitan Epiphanius I of Kyiv, wea The Jerusalem Post, March 16, 2022 reportim.

• “Bigman blo Russian Orthodox Church organizem wanfala spesol church program for olketa soldia blo Russia lo Sunday and hem encouragem olketa for defendim kantri ‘bikos only olketa Russian nomoa savve duim’ taem army lo Moscow gohed for attakim Ukraine.”—Reuters, April 3, 2022.

Olketa Christian shud join lo war? Wat nao Bible talem abaotem diswan?

Wanem Bible talem

Bible talem olketa wea followim Jesus Christ shud no join insaed war.

• “Leavim sword ia. Eniwan wea iusim sword for killim dae narawan, bae olketa iusim sword for killim hem dae tu.”—Matthew 26:52.

  Iu tingse man wea sei hem stret for faet or join lo war hem obeyim toktok blo Jesus?

• “Mi givim wanfala niu law long iufala. Iufala mas lovem iufala evriwan. Mi lovem iufala, and iufala tu mas lovem iufala evriwan long sem wei. Sapos iufala lovem iufala evriwan, pipol bae savve iufala olketa disaepol bilong mi.”—John 13:34, 35.

  Hao, man wea sapotim war hem showimaot diskaen love wea Jesus sei hem mark blo olketa disaepol or olketa follower blo hem?

For samfala information moa, readim disfala article “Waswe, Olketa Christian Savve Sapotim War?”

Olketa Christian and war distaem

Waswe, hem stret for expectim olketa Christian for no sapotim war lo taem blo iumi? Yes. Lo taem blo iumi wea Bible kolem lo “olketa last day,” pipol from evri nation bae no “lanem moa hao for faet,” olsem Jesus hem bin teachim.—Isaiah 2:2, 4, footnote.

• For lanem moa samting, readim disfala article lo English Wastaoa wea garem title “How Does God View War?”

Klosap nao Jehovah,a “God wea givim peace,” iusim gavman blo hem lo heven for sevem pipol from olketa wea mekem olketa narawan safa and from violence.—Philippi 4:9; Psalm 72:14.

• For savve moa, lukim disfala video Wanem Nao Kingdom Bilong God?