Olketa Politikol Issue wea Fulfillim Bible Profesi

Distaem politiks hem barava divaedem pipol. Olketa disagree lo olketa law wea affectim laef blo olketa evriday, and olketa no fraet for expressim opinion blo olketa abaotem politiks nomata datwan bae kosim raoa. Insaed lo gavman, staka taem olketa lawmaker and other officials barava disagree witim each other and no willing for compromise. Kaen disagreement olsem savve kosim olketa politikol issue wea spoelem ability blo gavman for duim waka blo hem.

Bat, olketa politikol issue lo United States and Britain (wea nara nem blo hem United Kingdom) hem garem big mining. Why nao olsem? Bikos Bible profesi talem dat disfala politikol issue bae exist between tufala nation hia, and lo taem hia nao, gavman blo God lo heven bae completely changem evriting lo earth.

Olketa politikol issue “lo last part blo olketa day”

Bible garem wanfala interesting profesi wea stap insaed buk blo Daniel. Lo datfala profesi, God showim “samting wea bae happen lo last part blo olketa day,” wea lo datfala taem hem refer lo wanfala taem lo future wea olketa important change bae happen lo history blo olketa man.—Daniel 2:28.

God mekem king blo Babylon for dream abaotem disfala Bible profesi. Insaed datfala dream, king hia lukim wanfala maeti image wea olketa wakem from olketa difren metal. Bihaen, profet Daniel explainim dat start from hed blo datfala image go kasem feet blo hem, hem representim olketa world paoa wea bae kamap paoaful, and then bae olketa lusim paoa blo olketa thru aot lo history.a Gogo, datfala image bae hem completely distroe taem wanfala ston wea representim wanfala Kingdom, wea hem gavman wea God setimap, bae hem hitim datfala image.—Daniel 2:36-45.

Olsem datfala profesi talem, Kingdom blo God bae replacem evri gavman blo man. Diswan nao Kingdom wea Jesus teachim olketa follower blo hem for prea for hem, taem hem sei: “Mifala laekem Kingdom blo iu for kam.”—Matthew 6:10.

Bat which part lo disfala profesi lo Bible nao hem talem dat olketa politikol issue bae happen? Tingim, feet blo datfala image olketa wakem from “iron wea mix witim clay.” (Daniel 2:33) Mixture hia hem difren from olketa nara part blo datfala image, bikos olketa nara part hia hem olketa solid metal. Datfala mixture hem showim dat world paoa hia bae hem difren from olketa nara world paoa. Hao nao olsem? Profesi blo Daniel hem sei:

According lo profesi hia, feet blo datfala image nao representim world paoa hia wea bae kasem olketa politikol issue. World paoa hia bae lusim paoa blo hem bikos own pipol blo hem nao bae mekem hem for kamap wik.

Profesi blo Daniel fulfill distaem

Feet blo datfala image hem representim most paoaful gavman lo distaem, wea hem nao United States and Britain wea tufala waka tugeta. Hao nao olketa events wea happen lo taem blo iumi hem pruvim datwan?

Feet blo image hia wea hem “iron wea mix witim clay,” hem wanfala mixture wea bae mekem datfala feet hem wik. (Daniel 2:42) Distaem, paoa wea United States and Britain garem hem kamap wik bikos own pipol blo tufala, olketa divaed. For example, olketa citizen blo tufala kantri hia againstim each other. Pipol iusim violence taem olketa protest for rights blo olketa. Staka taem, olketa politician wea pipol electim no agree lo olketa difren issue wea kamap. From pipol lo tufala gavman hia barava divaed, tufala evriwan no able for implementim olketa policy blo olketa effectively.

Bae iumi storyim mining blo samfala detail lo profesi blo Daniel and hao olketa fulfill distaem:

Profesi: “Datfala kingdom bae divaed, bat part blo datfala kingdom bae strong olsem iron.”—Daniel 2:41.

Mining: Nomata United States and Britain garem division insaed lo gavman blo tufala, tufala evriwan garem paoaful military force. Bikos lo datwan, tufala garem paoa for duim olketa samting wea affectim evri kantri lo world, wea hem showim tufala strong olsem iron.

Fulfillment

Lo 2023, lo wanfala list wea showim haomas selen each kantri spendem lo military, combine total amount blo United States and United Kingdom, hem winim combine total amount blo next 12-fala kantri lo datfala list.—Stockholm International Peace Research Institute.

“Relationship between United States and United Kingdom for protectim and defendim kantri blo tufala. . . hem kamap strongest partnership blo eni tufala kantri wea iusim latest technology and ideas. . . . Mifala waka tugeta, mifala stand tugeta, mifala faet tugeta.”—Strategic Command, U.K. Ministry of Defence, April 2024.

Profesi: “Olsem olketa toe blo tufala foot wea hem iron wea mix witim clay, part blo kingdom hia bae strong and part blo hem bae wik tu.”—Daniel 2:42.

Mining: Nomata United States and Britain garem strong army, tufala no able for duim evriting wea tufala laek for duim bikos lo hao democratic gavman blo tufala hem set ap. If majority no agree lo policy wea olketa vote for hem, hem savve hard for tufala gavman hia duim wat tufala plan for duim.

Fulfillment

“Samfala expert lo politiks sei dat olketa division insaed lo gavman blo America, hem mekem hem hard for [United States] duim wat hem promisim lo full world, for example, saed lo security and trade.”—“The Wall Street Journal.”

“Britain garem staka politikol problem wea never happen bifor wea distractim olketa politician, and mekem civil serviceb no able for applyim olketa reform blo [British] gavman.”—Institute for Government.

Profesi: “Olketa [datfala kingdom] bae mix witim olketa man nating. Bat olketa bae no wan mind.”—Daniel 2:43, footnote.

Mining: Ordinary pipol maet garem lelebet kontrol ovarem wat happen lo gavman blo olketa, bat result blo datwan, hem no mekem olketa politican or voters for hapi.

Fulfillment

“Distaem, staka pipol lo America garem negative view abaotem politiks and olketa politician.”—Pew Research Center.

“Trust wea pipol garem lo gavman and olketa politician, and confidence wea olketa garem lo system blo gavman, hem barava low distaem winim last 50 years.”—“National Centre for Social Research.”

Hao profesi blo Daniel bae fulfill lo future

Profesi blo Daniel showim dat United States-Britain alliance bae hem nao last world paoa wea rul taem Kingdom blo God replacem evri gavman blo man.—Daniel 2:44.

Lo Bible buk Revelation wea hem profesi abaotem sem samting, hem sei dat “olketa king evriwea lo earth” bae hipap tugeta for againstim Jehovahc God lo war blo Armageddon, “datfala war wea hem bigfala day blo God, datfala Olmaeti.” (Revelation 16:14, 16; 19:19-21) Lo disfala war, Jehovah bae distroem evri gavman blo man, and taem hem duim datwan, hem bae aotem evriting wea connect witim olketa world paoa, wea image lo profesi blo Daniel hem representim.

For lanem moa samting, lukim article “Wat Nao War blo Armageddon?”

Benefit from profesi blo Daniel abaotem olketa politikol issue

Olketa politikol issue wea kamap insaed lo United States and Britain, Bible hem profesi abaotem datwan finis. And if iu lane abaotem diswan, bae hem helpem iu for garem difren tingting abaotem olketa current events wea happen.

• Iu bae understandim why Jesus laekem olketa follower blo hem for neutral from eniting wea join witim politiks. (John 17:16) And tu, iu bae understandim why Jesus, king wea God chusim for rul lo Kingdom, hem sei: “Kingdom blo mi hem no part lo disfala world.”—John 18:36.

• Iu bae encouraged for savve dat klosap nao Kingdom blo God bae duim samting for replacem evriting, and rulership blo God bae givim blessing lo olketa man olsem hem promisim.—Revelation 21:3, 4.

• Iu bae confident abaotem future, and no wari dat olketa issue wea olketa kantri garem witim each other bae distroem world.—Psalm 37:11, 29.

Profesi blo Daniel showim dat feet blo datfala image wea representim United States-Britain alliance, hem nao bae last world paoa for rulim olketa man. Afta datwan, wanfala perfect gavman nao bae rul from heven, wea hem Kingdom blo God!

For lanem moa samting abaotem wat Kingdom blo God bae duim for olketa man, watchim video Wanem Nao Kingdom Bilong God?