Why Nao Olketa Jehovah’s Witness No Join Insaed Olketa Ceremony Wea Mekhae Lo Kantri?

Olketa Jehovah’s Witness respectim olketa gavman and olketa symbol wea representim kantri blo olketa. Iumi respectim tu wei wea pipol chus for talem wanfala pledge, salutim wanfala flag, or singim wanfala national anthem.

Nomata olsem, Olketa Jehovah’s Witness chus for no join insaed olketa ceremony olsem, bikos iumi bilivim datwan hem againstim olketa Bible teaching. Iumi tinghae lo wei wea olketa narawan respectim biliv blo iumi olsem iumi tu respectim olketa difren biliv wea olketa garem.

Lo disfala article

• Wanem nao Bible teachim?

• Waswe sapos olketa putim law for evriwan mas join?

• Waswe, Olketa Jehovah’s Witness trae for joinim wanfala social or politikol party?

Wanem nao Bible teachim?

Tufala main Bible teaching hia nao affectim disison blo iumi:

• God nomoa iumi shud worshipim. Bible sei: “Iu mas baodaon long God bilong iu Jehovah, and iu mas worshipim hem nomoa.” (Luke 4:8) Staka taem, olketa pledge and olketa national anthem garem olketa toktok wea man promis for mekhae lo wanfala kantri nomoa winim eni nara samting moa. So olketa Jehovah’s Witness feel olsem konsens blo olketa no letem olketa for join insaed olketa ceremony olsem.

  Olketa Jehovah’s Witness feel olsem wei for salutim flag hem wanfala wei for worship, or for worshipim idol, wea Bible hem barava againstim. (1 Corinth 10:14) Samfala savveman sei olketa flag hem symbol blo religion. Carlton J. H. Hayes.a wea hem man for raetem history sei: “Nationalism hem olsem religion and symbol wea showimaot worship blo olketa, hem nao flag.” Nara man for raet, Daniel P. Mannix hem sei olsem abaotem olketa Christian lo bifor: ‘Olketa no laek givim sakrifaes lo olketa spirit blo [Roman] emperor, distaem hem semsem tu, olketa Christian no laek for salutim flag.’b

  Nomata olsem, Olketa Jehovah’s Witness no salutim flag, no spoelem, no bonem, or duim eni samting for showim olketa no respectim flag or eni nara symbol wea representim kantri.

• Evriwan semsem nomoa lo eye blo God. (Acts 10:34, 35) Bible sei “God wakem pipol long evri kantri long world from wanfala man nomoa.” (Acts 17:26) From diswan, olketa Jehovah’s Witness bilivim hem rong for mekhae lo eni ethnic grup or nationality. Iumi respectim evri difren kaen pipol, nomata wea nao olketa kam from and wea nao olketa stap.—1 Peter 2:17.

Waswe sapos olketa putim law for evriwan mas join?

Olketa Jehovah’s Witness no againstim gavman. Iumi bilivim wei wea olketa gavman wea rul hem part lo arrangement blo God, and hem nao letem datwan for gohed. (Rome 13:1-7) Iumi bilivim tu hao olketa Christian shud obeyim olketa gavman wea rul.—Luke 20:25.

Hao sapos law talem iu for duim samting bat datwan no fitim law blo God? Samfala taem, hem fitim for mekem wanfala legal request go lo gavman for adjustim datfala law.c Sapos law no fit for change, lo wei wea showimaot respect, olketa Jehovah’s Witness bae chus for obeyim God olsem ruler winim olketa man.—Acts 5:29.

Waswe, Olketa Jehovah’s Witness trae for joinim wanfala social or politikol party?

Nomoa. Olketa Jehovah’s Witness no teksaed lo eni social and politikol issue. Taem olketa no talem pledge, salutim flag, or singim national anthem, datwan no minim olketa laek for againstim gavman. Bat hem bikos olketa followim wat olketa lanem from Bible abaotem olketa ceremony hia.