Hao Nao Olketa Jehovah’s Witness Treatim Olketa wea Bin Joinim Religion blo Olketa?

Mifala traem best for showim love lo evriwan, kaen lo olketa and respectim olketa. If wanfala Jehovah’s Witness hem slow daon or stop for worshipim Jehovah, mifala reach aot for helpem hem,a reassurem hem dat mifala lovem hem, and trae encouragem hem for strongim moa frenship blo hem witim God.—Luke 15:4-7.

Lo samfala situation, samting wea man duim nao maet lead go for olketa aotem hem from kongregeson. (1 Corinthians 5:13) Bat, from mifala barava lovem fellow believers blo mifala, mifala traem best for helpem datfala person firstaem, mekem hem no need for aot from kongregeson. And even if hem aot from kongregeson, mifala duim samting wea showim mifala still lovem hem and respectim hem, olsem Bible encouragem iumi for duim.—Mark 12:31; 1 Peter 2:17.

Wat nao savve mekem wanfala person for olketa aotem hem from kongregeson?

Bible talem klia dat if wanfala Christian duim wanfala serious sin and no laek for change, olketa shud aotem hem from kongregeson.b (1 Corinthians 5:11-13) Bible talem klia tu olketa sin wea barava serious wea savve mekem samwan for aot from kongregeson. For example, hem listim samfala samting olsem adultery, drunk, murder, domestic abuse, and wei for steal.—1 Corinthians 6:9, 10; Galatians 5:19-21; 1 Timothy 1:9, 10.

Bat, mifala no stretawe aotem wanfala person from kongregeson taem hem duim serious sin. Firstaem, bae olketa elderc lo kongregeson trae for helpem hem for changem wei blo hem. (Romans 2:4) Olketa traem best for kasem heart blo hem, taem olketa kaen lo hem and isi witim hem. (Galatians 6:1) Datwan savve helpem man wea duim serious sin for luksavve lo mistek blo hem and laek for repent. (2 Timothy 2:24-26) Nomata hem kasem help staka taem finis, if hem continue for duim olketa samting wea Bible stopem, hem mas aot from kongregeson. Olketa elder bae announcem lo kongregeson dat person hia hem no longer wanfala Jehovah’s Witness.

Why nao hem gud for aotem samwan wea continue for duim serious sin? Wanfala reason, datwan helpem kongregeson for maintainim olketa klin standard blo God and for protectim kongregeson from negative influence blo datfala person. (1 Corinthians 5:6; 15:33; 1 Peter 1:16) Nara samting tu, datwan maet helpem person wea duim serious sin for stop for duim rong samting, and traem best blo hem for change.—Hebrews 12:11.

Hao nao Olketa Jehovah’s Witness treatim samwan wea hem aot from kongregeson?

Bible sei olketa Christian shud “stop associate” witim samwan wea olketa aotem from kongregeson, and “no even kaikai witim kaen man olsem.” (1 Corinthians 5:11) So mifala no socialize witim samwan wea olketa aotem from kongregeson. Nomata olsem, mifala no ignorem hem. Mifala treatim hem witim respect. Hem welkam for attendim olketa religious service blo mifala, and Olketa Jehovah’s Witnessd wea attendim olketa meeting hia savve disaed if olketa bae greetim hem. Hem savve askem olketa elder tu for helpem hem kam bak lo kongregeson.

Hao if samwan wea olketa aotem from kongregeson, spouse blo hem and olketa pikinini blo hem still Jehovah’s Witness? Nomata hem no longer worshipim Jehovah witim famili blo hem, relationship blo famili hem still stap. From olketa stap lo sem haos, relationship blo hem witim spouse and olketa pikinini hem still continue, and olketa shud continue for treatim each other witim love.

Samwan wea olketa aotem from kongregeson savve askem olketa elder for visitim hem, olketa elder bae storyim olketa loving kaonsel from Bible and lo kaenfala wei olketa encouragem hem for repent and kam bak lo God. (Zechariah 1:3) If hem stop for duim rong samting and duim samting wea showim hem barava laek for followim wat Bible talem, hem savve joinim kongregeson moa. Olketa lo kongregeson bae “willing for forgivim hem and comfortim hem,” olsem olketa Christian lo Corinth duim bifor taem wanfala man wea duim serious sin hem repent.—2 Corinthians 2:6-8.

Wat nao feeling blo olketa wea bin aot from kongregeson?

Lukim koment blo samfala Jehovah’s Witness wea bin aot from kongregeson and bihaen olketa disaed for kam bak lo God.

“Taem mi disaed for kam bak lo kongregeson, mi tingse bae olketa elder laek for savve lo evri samting wea mi bin duim during staka years wea mi aot from kongregeson. Instead, olketa just sei, ‘Mifala laekem iu for focus lo wat iu bae duim distaem.’ Taem mi herem datwan, mi no wari nao.”—Maria, United States.

“Olketa lo kongregeson barava hapi for lukim mi kam bak. Mi feelim dat olketa lovem mi. Olketa spiritual brata and sista helpem mi for luksavve dat Jehovah forgivim mi finis and for muv on and focus lo future. Olketa elder redi evritaem for helpem mi strongim bak frenship blo mi witim Jehovah. Olketa comfortim and helpem mi for lukim dat Jehovah still tingim mi and lovem mi.”—Malcom, Sierra Leone.

“Mi hapi dat Jehovah lovem pipol blo hem tumas dastawe hem laek for keepim organization blo hem klin. Nomata pipol wea no worshipim Jehovah tingse diswan hem harsh, bat really hem wanfala arrangement wea showim love. Mi appreciatim dat Dadi blo iumi lo heven, hem wanfala loving God and hem savve forgive.”—Sandi, United States.