Hao, Bible Stopem Wei for Enjoyim Sex?

Ansa from Bible

Bible no stopem wei for enjoyim sex, bat hem talem dat datwan hem present from God for pipol wea marit. Hem creatim olketa human “wanfala man and wanfala woman” and hem lukim wat hem wakem hem “gud tumas.” (Genesis 1:​27, 31) Taem hem tekem first man and woman for marit and stap tugeta, hem sei “tufala bae kamap wanfala body nomoa.” (Genesis 2:​24) Diswan includim tu wei for enjoyim sex and for feel klos lo each other.

Bible describem hapi wea hasband kasem lo marit blo hem, hem sei: “Hapi witim waef wea iu maritim taem iu young . . . Susu blo hem bae mekem iu hapi evritaem. Love blo hem mekem iu laekem hem evritaem.” (Proverbs 5:​18, 19) God laekem olketa waef tu for enjoyim sex. Bible sei: “Hasband and waef mas satisfaem sexual need blo each other.”​—1 Corinthians 7:3, God’s Word Bible.

Law blo God abaotem sex

God putim law dat sex hem only for olketa wea marit, olsem Hebrews 13:4 storyim: “Evriwan mas respectim marit, and datfala marit bed hem mas klin, bikos God bae judgem pipol wea durong and wea duim adultery.” Olketa marit couple mas keepim promis and gohed faithful lo each other. Olketa bae hapi tumas, no from olketa duim samting wea olketa seleva laekem, bat taem olketa applyim disfala Bible principle: “Bigfala hapi hem kam from wei for givim samting winim wei for kasem samting.”​—Acts 20:35.