Hao, Jesus Dae lo Cross?
Ansa from Bible
Staka pipol tingim cross hem common symbol blo Christianity. Bat, Bible no even describem timba wea olketa hangem Jesus lo hem, so no eniwan barava sure lo sheip blo datfala timba. Still, Bible provaedem olketa evidence wea showim Jesus dae, no lo wanfala cross, bat lo wanfala stret post.
Taem Bible tok abaotem post wea olketa hangem Jesus lo hem, hem iusim datfala Greek word stau·rosʹ. (Matthew 27:40; John 19:17) Nomata samfala Bible transleitim disfala word “cross,” staka scholar agree dat actual basic mining blo hem, hem “stret post wea standap.”a According lo A Critical Lexicon and Concordance to the English and Greek New Testament, datfala word stau·rosʹ “hem no minim tufala pis timba hem joinim each other lo eni angle.”
Bible hem iusim tu Greek word xyʹlon olsem synonym for stau·rosʹ. (Acts 5:30; 1 Peter 2:24) Disfala word minim “wood,” “timba,” “stik,” or “tree.”b Dastawe The Companion Bible hem sei olsem: “No eni ples lo Greek Bible blo N[iu] T[estament] hem tok abaotem tufala pis timba.”
Hao, God hem acceptim wei for iusim cross lo worship?
Crux simplex—Latin word for singol post wea olketa iusim for hangem olketa criminal lo hem
Nomata wat nao sheip blo timba wea Jesus dae lo hem, olketa fact and olketa Bible verse lo daon showim dat iumi shud no iusim cross lo worship.
God rejectim worship wea iusim image or olketa symbol, includim cross. God komandim olketa Israelite for no iusim “eni idol wea luk olsem eni samting” lo worship blo olketa, and Bible talem lo olketa Christian distaem tu for mas “ranawe from wei for worshipim idol.”—Deuteronomy 4:15-19; 1 Corinthians 10:14.
Olketa first-century Christian no iusim cross lo worship blo olketa.c Olketa teaching and example blo olketa aposol setim pattern lo olketa samting wea evri Christian shud followim.—2 Thessalonians 2:15.
Wei for iusim cross lo worship hem garem pagan origin.d Staka handred year afta Jesus dae, taem olketa church go difren nao from olketa teaching blo hem, olketa niu church member “letem olketa member hia for tekem kam olketa pagan saen and olketa symbol blo olketa,” includim cross. (The Expanded Vine’s Expository Dictionary of New Testament Words) Bat, Bible no talem iumi for iusim olketa pagan symbol lo worship blo iumi.—2 Corinthians 6:17.
a Lukim New Bible Dictionary, Third Edition, wea D. R. W. Wood hem raetem, page 245; Theological Dictionary of the New Testament, Volume VII, page 572; The International Standard Bible Encyclopedia, Revised Edition, Volume 1, page 825; and The Imperial Bible-Dictionary, Volume II, page 84.
b Lukim The Expanded Vine’s Expository Dictionary of New Testament Words, page 1165; A Greek-English Lexicon, by Liddell and Scott, Ninth Edition, page 1191-1192; and Theological Dictionary of the New Testament, Volume V, page 37.
c Lukim Encyclopædia Britannica, 2003, lo entry “Cross”; The Cross—Its History and Symbolism, page 40; and The Companion Bible, Oxford University Press, appendix 162, page 186.
d Lukim The Encyclopedia of Religion, Volume 4, page 165; The Encyclopedia Americana, Volume 8, page 246; and Symbols Around Us, page 205-207.