Wat Nao Hem Minim for Born Again?
Ansa from Bible
Datfala term born again or “born moa” hem refer lo niu beginning lo relationship between God and datfala person wea born again. (John 3:3, 7) God adoptim olketa wea born again olsem olketa pikinini blo hem. (Romans 8:15, 16; Galatians 4:5; 1 John 3:1) Semsem olsem olketa pikinini wea man legally adoptim, olketa tu experiencem change lo status blo olketa, olketa kamap part lo famili blo God.—2 Corinthians 6:18.
Why nao wanfala person born again?
Jesus sei: “Sapos man no born moa [born again], hard for hem lukim Kingdom blo God.” (John 3:3) So for born again hem redyim wanfala person for rul witim Christ lo Kingdom blo God. Disfala Kingdom rul from heven, so Bible describem “niu laef” olsem inheritance wea “stap finis lo heven” for samwan. (1 Peter 1:3, 4) Olketa wea born again, olketa barava sure dat olketa bae “rul tugeta olsem king” witim Christ.—2 Timothy 2:12; 2 Corinthians 1:21, 22.
Hao nao man savve born again?
Taem Jesus storyim datfala subject, hem sei dat olketa wea born again olketa bae “born lo wata and lo holy spirit.” (John 3:5) Disfala expression refer lo wei for baptaes lo wata then baptaes lo holy spirit.—Acts 1:5; 2:1-4.
Jesus nao first person for born again. Hem baptaes lo Jordan River, then afta God anointim (or, baptaesim) hem lo holy spirit. So Jesus hem born again lo holy spirit olsem son blo God and garem hope for go bak and laef lo heven. (Mark 1:9-11) God fulfillim diswan taem hem resurrectim Jesus olsem wanfala spirit creature.—Acts 13:33.
Olketa narawan wea born again, olketa baptaes lo wata tu bifor olketa kasem holy spirit.a (Acts 2:38, 41) Olketa tu garem sure hope for laef lo heven, wea God bae fulfillim diswan lo resurrection.—1 Corinthians 15:42-49.
Tingting wea no stret abaotem born again
Tingting wea no stret: Wanfala person mas born again for hem kasem salvation or for hem kamap wanfala Christian.
Tru samting: Sakrifaes blo Christ provaedem salvation no for olketa wea born again olsem olketa wea bae rul witim Christ lo heven nomoa, bat hem for olketa wea bae stap lo earth tu, anda lo Kingdom blo God. (1 John 2:1, 2; Revelation 5:9, 10) Datfala second grup blo olketa Christian garem opportunity for stap olowe lo paradaes lo earth.—Psalm 37:29; Matthew 6:9, 10; Revelation 21:1-5.
Tingting wea no stret: Wanfala person savve chus for born again.
Tru samting: Opportunity for garem relationship witim God and kasem salvation hem open for evriwan. (1 Timothy 2:3, 4; James 4:8) Bat, God nao chusim olketa wea bae born again, or anointim lo holy spirit. According lo Bible, for born again hem “no depend lo wat man laekem or hard waka blo hem, bat lo God.” (Romans 9:16) Datfala expression ‘born again’ olketa savve transleitim tu olsem “born from antap,” hem confirmim dat selection for olketa wea bae born again hem kam “from antap,” or from God.—John 3:3.
a Wanfala example hem Cornelius and olketa wea stap witim hem.—Acts 10:44-48.