Wat Nao “Olketa Key blo Kingdom”?
Ansa from Bible
“Olketa key blo Kingdom,” samtaems olketa kolem tu “olketa key for go insaed kingdom,” hem representim authority for openem wei for pipol “go insaed Kingdom blo God.” (Matthew 16:19; The New American Bible; Acts 14:22)a Jesus givim Peter “olketa key blo Kingdom blo heven.” Diswan minim Peter kasem authority for showim hao faithful pipol, wea kasem holy spirit blo God, savve enjoyim privilege for go insaed Kingdom blo heven.
Olketa key hia hem for hu?
Peter iusim authority hem kasem from God for openem wei for thrifala grup for go insaed Kingdom:
Olketa Jew and olketa Jew wea kamap Christian. No longtaem afta Jesus dae, Peter encouragem olketa Jew wea biliv for acceptim Jesus olsem man wea God chusim for rul lo datfala Kingdom. Peter showim olketa wat olketa mas duim for sev. So hem openem wei for olketa go insaed Kingdom, and staka thousand pipol “acceptim toktok blo hem.”—Acts 2:38-41.
Olketa Samaritan. Bihaen Peter go lo olketa Samaritan.b Hem iusim moa key blo Kingdom taem hem, witim aposol John, “prea for God givim holy spirit lo olketa.” (Acts 8:14-17) Diswan openem wei for olketa Samaritan go insaed lo Kingdom.
Olketa Gentile. Thri and haf years afta Jesus dae, God showim lo Peter dat olketa Gentile (olketa wea no Jew) olketa garem tu opportunity for go insaed Kingdom. From datwan, Peter iusim wanfala lo olketa key hia taem hem preach lo olketa Gentile, so hem openem door for olketa kasem holy spirit, kamap Christian, and garem chance for kamap member blo Kingdom.—Acts 10:30-35, 44, 45.
Wat nao hem minim for “go insaed lo Kingdom”?
Olketa wea “go insaed Kingdom” kamap olketa king wea rul witim Jesus lo heven. Bible talem dat olketa bae “sidaon lo olketa throne” and “kamap olketa king for rul ovarem disfala earth.”—Luke 22:29, 30; Revelation 5:9, 10.
Tingting wea no stret abaotem olketa key blo Kingdom
Tingting wea no stret: Peter disaedem hu nao bae go lo heven.
Tru samting: Bible talem dat Christ Jesus nao bae “judgem olketa wea laef and olketa wea dae,” no Peter. (2 Timothy 4:1, 8; John 5:22) Bat, Peter seleva talem dat Jesus “nao man wea God appointim for judgem olketa wea laef and olketa wea dae finis.”—Acts 10:34, 42.
Tingting wea no stret: Heven weitim Peter for disaedem wat taem for iusim olketa key blo Kingdom.
Tru samting: Taem Jesus story abaotem olketa key blo Kingdom, hem talem Peter: “Eni samting wea iu stopem lo earth hem samting olketa stopem finis lo heven, and eni samting wea iu letem lo earth hem samting olketa letem finis lo heven tu.” (Matthew 16:19, The New American Bible) Nomata samfala man wea readim disfala verse sei dat Peter nao mekem disison abaotem heven, bat original Greek verb showim dat Peter followim olketa disison wea kam finis from heven, hem no mekem olketa disison firstaem.c
Samfala taem Bible storyim day Peter garem raet for iusim olketa key blo Kingdom lo heven. For example, hem respond followim olketa instruction hem kasem from God taem hem iusim mek-thri key.—Acts 10:19, 20.
a Samtaems, Bible iusim datfala term “key” olsem symbol blo authority and responsibility.—Isaiah 22:20-22; Revelation 3:7, 8.
b Olketa Samaritan garem religion wea difren from Judaism bat followim sem teaching and practice from datfala Mosaic Law.
c Lukim study note for Matthew 16:19 lo New World Translation of the Holy Scriptures (Study Edition).