Hao, Smoking Hem Wanfala Sin?

Ansa from Bible

Bible no mentionim smokinga or olketa nara wei for iusim tobacco. Bat, insaed Bible hem garem olketa principle wea showim God no acceptim olketa unhealthy and unclean habit, and datwan showim smoking hem wanfala sin.

Respectim laef. “God . . . nao mekem olketa man laef and savve brith.” (Acts 17:24, 25) Since laef hem gift from God, iumi shud no duim eniting for shortem laef blo iumi, olsem smoking. Smoking nao hem wanfala main samting wea kosim staka pipol for dae evriwea lo world, wea shud no happen nomoa.
Lovem neiba. “Iu mas lovem narawan long sem wei wea iu lovem iuseleva.” (Matthew 22:39) Man wea smoke taem olketa narawan stap hem no showim love. Eniwan wea stap between pipol wea smoke garem hae risk for kasem olketa sem disease wea pipol wea smoke savve kasem.
Mas holy. “Givim body bilong iufala olsem wanfala sakrifaes wea laef and holy and wea God savve hapi long hem.” (Rome 12:1) “Iumi mas klinim from body bilong iumiseleva eni samting wea savve mekem body or tingting bilong iumi for no klin, mekem iumi kamap holy from iumi fraet long God.” (2 Corinth 7:1) Smoking hem no natural samting and hem mekem man for no holy, wea minim hem no klin or pure, bikos man wea smokem tobacco hem min for putim toxin insaed lo body blo hem, wea datwan savve barava spoelem health blo hem.

Hao, Bible talem eniting abaotem recreational use blo marijuana or other drugs?

Bible no mentionim nem blo olketa drugs, olsem marijuana (wea staka savve lo hem olsem weed or pot), or olketa nara similar drugs. Bat Bible garem olketa principle wea showim dat recreational drugs wea man savve addict lo hem, hem no stret. Witim olketa principle wea iumi storyim finis, olketa principle lo daon hem fitim tu:

Iumi mas kontrolem tingting blo iumi. “Iu mas lovem God bilong iu Jehovah . . . long full mind bilong iu.” (Matthew 22:37, 38) “Gohed for garem gudfala tingting.” (1 Peter 1:13) Samwan wea iusim drugs no savve kontrolem full tingting blo hem, and staka pipol wea iusim drugs gogo olketa savve addict lo hem tu. Main samting wea mind blo olketa focus lo hem, hem for faendem drugs and iusim, instead for tingim olketa gud tings.—Philippi 4:8.
Obeyim olketa law blo gavman. “Obeyim olketa gavman and olketa wea garem paoa.” (Titus 3:1) Lo staka kantri, gavman putim olketa strict law wea stopem wei for iusim samfala drugs. If iumi laek for mekem God hapi, iumi shud obeyim olketa wea garem authority.—Rome 13:1.

Tobacco and Health blo Iu

World Health Organization estimatem dat evri year, abaotem six million pipol dae from olketa disease wea kamaot from wei for iusim tobacco, and winim 600,000 pipol wea no smoke tu dae bikos olketa stap between pipol wea smoke. Tingim hao tobacco affectim health blo pipol wea iusim and health blo pipol wea stap witim olketa.

Cancer. Smoke blo tobacco hem garem winim 50 chemical wea savve kosim cancer. Encyclopædia Britannica hem sei “90 percent blo evriwan wea garem lung cancer” hem kos from smoke blo tobacco. Smoke blo tobacco savve kosim cancer lo olketa nara organ tu, includim mouth, trachea, esophagus, throat, larynx, liver, pancreas, and bladder.

Respiratory disease. Smoke blo tobacco hem increasim chance blo olketa respiratory disease olsem pneumonia and influenza. Olketa pikinini wea evritaem brithim smoke blo tobacco from pipol wea olketa stap witim, hem isi for olketa safa from asthma, kofkof wea no savve finis, and hem reducim growth and function lo lung blo olketa.

Heart disease. Olketa wea smoke garem hae chance for kasem stroke and garem heart disease. Carbon monoxide wea stap lo smoke blo tobacco hem isi for pas thru lo lung go lo blood and hem displacim oxygen. From blood no garem inaf oxygen, heart mas waka hard for pumpim oxygen go lo full body.

Effect blo tobacco lo pregnancy. Olketa woman wea smoke taem olketa pregnant increasim risk for baby blo olketa born premature, anda weight taem hem born, or born witim samfala defect olsem cleft lip. Olketa baby hia savve start for garem olketa respiratory problem or dae from sudden infant death syndrome.

a Smoking hem minim wei for smokem tobacco, cigarette, cigar, pipe, or wata pipe. Bat, olketa principle lo disfala article hem fitim tu wei for chewim tobacco, snuff, iusim electronic cigarette wea garem nicotine, and kaen samting olsem.