Story blo Noah and Datfala Big Flood—Hao, Hem Kastom Story Nomoa?
Ansa from Bible
Datfala Flood hem wanfala real event. God mekem diswan happen for distroem wicked pipol, bat hem talem Noah for buildim ark for sevem laef blo pipol and olketa animal. (Genesis 6:11-20) Iumi savve biliv dat Flood really happen bikos record blo hem stap lo olketa Scripture, wea “hem kam from God.”—2 Timothy 3:16.
Tru story or kastom story?
Bible showim dat Noah hem real person and datfala Flood hem real event, no wanfala kastom story.
Olketa Bible raeta biliv dat Noah hem real person. For example, olketa Bible raeta olsem Ezra and Luke olketa skill historian, olketa includim Noah insaed genealogy blo nation blo Israel. (1 Chronicles 1:4; Luke 3:36) Gospel raeta olsem Matthew and Luke recordim wat Jesus talem abaotem Noah and datfala Flood.—Matthew 24:37-39; Luke 17:26, 27.
And tu, profet Ezekiel and aposol Paul storyim Noah hem wanfala gud example blo man wea garem faith and raeteous fasin. (Ezekiel 14:14, 20; Hebrews 11:7) Hao, hem mek sense for olketa raeta hia storyim samwan wea no exist olsem samwan wea showim gud example for followim? Hem klia, Noah and olketa nara man and woman wea garem faith olketa gud example for imitatim bikos olketa real pipol.—Hebrews 12:1; James 5:17.
Bible storyim olketa specific detail abaotem Flood. Story lo Bible abaotem Flood hem no start witim olketa toktok olsem “Once upon a time,” olsem wanfala fairy tale story. Bat, Bible storyim year, month, and day wea datfala event happen wea connect witim Flood. (Genesis 7:11; 8:4, 13, 14) Hem storyim tu size blo ark wea Noah buildim. (Genesis 6:15) Olketa detail hia showim dat Flood wea Bible storyim hem no kastom story bat hem tru story.
Why nao Flood hem happen?
Bible storyim dat bifor Flood “wei blo olketa man lo earth hem nogud tumas.” (Genesis 6:5) And tu hem talem “God lukim dat earth hem fulap lo wicked fasin” bikos earth hem fulap witim violence and wei for durong.—Genesis 6:11; Jude 6, 7.
Bible talem dat staka trabol wea happen, olketa wicked angel wea lusim heven and duim sexual relation witim olketa woman nao kosim. Olketa angel hia garem olketa pikinini wea olketa kolem Nephilim, olketa nao duim olketa nogud samting wea spoelem olketa man. (Genesis 6:1, 2, 4) God disaed for distroem wicked pipol from earth and gud pipol nomoa bae stap.—Genesis 6:6, 7, 17.
Hao, pipol savve dat Flood bae kam?
Yes. God talem Noah wat bae happen and talem hem for buildim wanfala ark for sevem famili blo hem and olketa animal. (Genesis 6:13, 14; 7:1-4) Noah warnim pipol abaotem Flood wea bae kam, bat pipol ignorem datfala warning. (2 Peter 2:5) Bible sei: “Olketa nating luksavve nomoa go kasem taem Flood kam and evriwan draon nao.”—Matthew 24:37-39.
Ark blo Noah hem luk hao?
Datfala ark hem wanfala rectangular box, wea 133 meters (437 ft) long, 22 meters (73 ft) waed, and 13 meters (44 ft) hae.a Olketa wakem ark hia lo resinous wood, and pasim insaed and aotsaed witim tar. Hem garem thri story, or olketa deck, and staka rum. Hem garem door lo saed, and luk olsem hem garem window lo top. Luk olsem ark hia garem ruf lo midol wea hae wea allowim wata for go aot.—Genesis 6:14-16.
Hao long nao Noah buildim datfala ark?
Bible no talem hao long nao Noah buildim datfala ark, bat luk olsem Noah spendem staka year for buildim datwan. Noah hem winim 500 years old taem first son blo hem born, and hem 600 years old taem Flood hem happen.b—Genesis 5:32; 7:6.
God talem Noah for buildim ark afta thrifala son blo hem marit finis, wea maet hem tekem 50 or 60 years. (Genesis 6:14, 18) If diswan hem tru, hem reasonable for conclude dat hem tekem 40 or 50 years for completim ark.
a Bible iusim cubit taem hem storyim size blo ark. Buk hia storyim “standard Hebrew cubit hem 17.5 inch (44.45 cm).”—The Illustrated Bible Dictionary, Revised Edition, Part 3, page 1635.
b Regardim laef span blo pipol olsem Noah, lukim article “Waswe, Hem Tru Pipol Long Taem Bifor Laef Longtaem?” lo January 1, 2011, issue blo Wastaoa.