Hu Nao “Thrifala Wise Man”? Hao, Olketa Followim “Star” blo Bethlehem?
Ansa from Bible
Lo taem blo Christmas, staka pipol tok abaotem “thrifala wise man” or “thrifala king” wea go for lukim Jesus afta hem born. Bat Bible no story olsem abaotem olketa visitor hia. (Matthew 2:1) Instead, Gospel raeta Matthew iusim Greek word ma’goi for story abaotem olketa wea visitim Jesus. Datfala word savve refer lo olketa wea expert lo astrology and olketa nara samting wea join witim demon.a Staka Bible transleison kolem olketa, “olketa astrologer” or “magi.”b
Hao many “wise man” nao lo there?
Bible no talem, bat staka difren opinion abaotem hao many wise man hem stap. According lo Encyclopedia Britannica, hem sei, “Pipol lo Asia biliv dat namba hem 12-fala Magi, bat staka pipol wea stap lo Europe and America biliv namba hem thri, diswan hem base lo thrifala present blo ‘gold, frankincense, and myrrh’ (Matthew 2:11) wea olketa givim for datfala pikinini.”
Hao, olketa “wise man” hia olketa king?
Nomata lo taem blo Christmas pipol actim olketa visitor olsem, no eni ples lo Bible hem kolem olketa man hia olketa king. According lo Encyclopedia Britannica, hem storyim centuries afta Jesus born, pipol addim samfala detail abaotem taem Jesus born and staka pipol start for sei dat olketa visitor hia hem olketa king.
Hu nao nem blo olketa “wise man” hia?
Bible no talem nem blo olketa astrologer hia. According lo The International Standard Bible Encyclopedia, hem sei “olketa kastom story trae for givim nem lo olketa hia (example, Gaspar, Melchior, and Balthasar).”
Wat taem nao olketa “wise man” visitim Jesus?
Olketa astrologer maet kam visitim Jesus samfala month afta hem born. Iumi savve lo diswan bikos King Herod, wea laek for killim Jesus dae, hem givim order for olketa mas killim dae olketa boy wea tu years old and go daon. Hem duim olsem base lo age range followim information wea hem kasem from olketa astrologer.—Matthew 2:16.
Olketa astrologer no visitim Jesus lo naet wea hem born. Bible sei: “Taem olketa go insaed lo haos, olketa lukim datfala pikinini witim mami blo hem, Mary.” (Matthew 2:11) Diswan showim dat lo taem ia, famili blo Jesus stap lo wanfala haos, and Jesus hem no longer wanfala baby wea leidaon insaed manger.—Luke 2:16.
Hao, God nao talem olketa “wise man” hia for followim datfala “star” blo Bethlehem?
Samfala pipol biliv dat God nao sendem datfala star wea olketa kolem star blo Bethlehem for leadim olketa astrologer go lo Jesus. Lukim why tingting olsem hem no tru.
Wanfala star leadim olketa astrologer go firstaem lo Jerusalem. Bible sei: “Olketa astrologer from East, olketa kam lo Jerusalem. Olketa ask olsem: ‘Wea nao datfala pikinini wea bae hem king blo olketa Jew? Mifala lukim wanfala star wea directim mifala go lo hem, taem mifala lo East, and mifala kam for baodaon lo hem.’”—Matthew 2:1, 2.
King Herod nao sendem olketa astrologer go firstaem lo Bethlehem, no datfala “star.” Taem Herod herem pikinini hia bae “hem king blo olketa Jew,” Herod laek savve wea nao ples wea Christ hem born. (Matthew 2:3-6) Taem hem savve dat pikinini hia born lo Bethlehem, hem talem olketa astrologer for go luk for datfala pikinini, and report bak lo hem.
So olketa astrologer hia go lo Bethlehem. Bible hem sei: “Bihaen olketa herem samting wea king talem, olketa go nao, and lukim, datfala star wea olketa lukim lo East hem go firstaem lo olketa, and gogo, hem stop antap lo ples wea datfala pikinini hem stap.”—Matthew 2:9.
Afta pipol lukim datfala “star,” tings start for happen wea putim laef blo Jesus lo danger and datwan mekem olketa killim dae olketa innocent pikinini. Taem olketa astrologer lusim Bethlehem, God warnim olketa for no go bak lo Herod.—Matthew 2:12.
Hao nao Herod react? Bible sei: “Taem Herod savve olketa man from East trikim hem, hem barava kros fogud. So hem sendem olketa man go lo Bethlehem and lo evri ples lo datfala area, for killim dae olketa boy wea age blo olketa tu years old and go daon. Hem duim olsem bikos hem ting raonem nao barava taem wea olketa man from East lukim datfala star.” (Matthew 2:16) God hard for duim olketa wicked samting olsem.—Job 34:10.
a Herodotus, wanfala Greek historian lo mek-faev century B.C.E., sei dat lo taem blo olketa, olketa savve kolem ma’goi lo wanfala tribe blo olketa lo Media (Persia) wea savve tumas lo astrology and wea savve interpretim olketa dream.
b Lukim New American Standard Bible, The New American Bible, The New English Bible, and New International Version Study Bible. King James Version storyim olketa visitor hia olsem olketa “wise man,” bat hem no talem dat olketa hia thrifala man.