Teeth blo Limpet

Limpet, hem wanfala kokosu lo sea wea sela blo hem sheip olsem cone, and hem garem teeth wea barava strong. Aotsaed blo teeth hem goethite, wea datwan hem strong tumas and insaed lo teeth hem wanfala protein wea no strong tumas.

Tingim: Radula blo datfala Limpet, wea hem luk olsem wanfala tongue, hem garem staka lo olketa smol teeth hia lo hem, wea size blo olketa wan millimeter nomoa. Olketa kamap olsem wanfala file. Evri smol teeth hia mas barava strong mekem datfala kokosu savve iusim radula blo hem for aotem algae wea grow lo olketa ston and kaikaim.

Olketa savveman iusim wanfala atomic force microscope for testim strong (tensile strong) blo olketa teeth hia. Machine hia holem tufala end blo teeth and pullim go kasem hem brek. Olketa faendem teeth hia hem strong winim eni nara samting olketa testim, and hem strong winim olketa string lo haos blo spider tu. Boss blo datfala research hem sei: “Iumi shud followim design hia for wakem olketa samting.”

Olketa savveman sei iumi savve followim design blo teeth hia for wakem olketa trak, ship, aeroplane, and false teeth for man tu.

Wanem Nao Tingting blo Iu? Waswe, spesol teeth blo limpet kamap seleva nomoa? Or waswe, samwan nao designim?