SAMWAN NAO DESIGNIM?
Ability blo Olketa Cell for Change Go lo Difren Type Cell
Taem iu conceive, laef blo iu hem start olsem wanfala tiny cell wea nem blo hem zygote, wea man no savve lukim lo eye blo hem. Nomata olsem, samfala months bihaen nomoa, iu wanfala baby wea fully form finis. Wanfala cell hia nomoa hem multiply and change go lo winim 200 difren type cell wea garem olketa difren sheip, size, and function.
Tingim: Wanfala zygote cell mekem copy blo DNA blo hemseleva and divaed go lo tufala cell. Then tufala cell hia duim sem samting, and process hia hem repeat staka taem. Lo firstaem, evri niu cell hia hem identical. Lo DNA blo olketa, olketa garem evri instruction wea olketa needim for mekem olketa difren type cell.
Wan week afta iu conceive, olketa cell start for divaed lo tufala grup. Wanfala grup blo olketa cell hia bae kamap embryo, and nara grup bae kamap placenta and olketa nara tissue bae helpem embryo for grow.
Lo third week, olketa cell blo embryo bae organize lo thrifala layer. Olketa cell lo outer layer bae change go lo olketa cell blo nerve, brain, mouth, skin, and olketa nara cell. Olketa cell lo midol layer bae change go lo blood, olketa bone, tufala kidney, olketa masol, and olketa nara tissue tu. Olketa cell lo inner layer bae change go lo olketa organ insaed body, olsem tufala lung, bladder, and big haf blo digestive system.
Taem wanfala baby insaed bele hem grow, olketa cell multiply and change go lo winim 200 difren type cell
During pregnancy, samfala individual cell, or grup cell, muv from wanfala part lo embryo, go lo nara part blo embryo. Olketa nara cell join tugeta and formim olketa difren structure wea luk olsem olketa sheet, cord, or structure wea garem cavities. Olketa process hia needim olketa cell for barava waka gud tugeta. For example, lo raet taem blo hem, olketa cell wea flat olsem olketa sheet coilim olketa seleva for kamap olketa smol tube. Disfala process hem happen semtaem lo olketa difren part blo embryo. Then olketa smol tube hia start for long and spred aot, and gogo olketa connect tugeta for kamap wanfala complete system blo olketa blood vessel.
Kasem taem wea wanfala healthy baby hem born, staka handred billion cell change finis lo correct type cell, lo correct location, and lo correct taem.
Wat nao tingting blo iu? Hao, ability blo olketa cell for change go lo difren type cell hem kamap seleva nomoa? Or samwan nao designim?