Waka for Transleitim “Evritaem Hapi”! 2020 Regional Convention

Lo July and August 2020, hem firstaem for olketa brata and sista evriwea lo world bae lukluk lo regional convention program lo semtaem. For duim diswan, olketa mas transleitim and recordim disfala program lo winim 500 languis. Staka taem hem savve tekem wan year or winim datwan for organizem waka for recordim and transleitim olketa tok and video. Bat bikos lo sik coronavirus, olketa transleita mas barava waka hard insaed samting olsem fofala month nomoa for transleitim “Evritaem Hapi”! 2020 Regional Convention.

Transleison Services and Global Purchasing lo World Hedquarter blo Olketa Jehovah’s Witness duim samting for help lo disfala big project. Transleison Services luksavve staka transleison team needim olketa gud quality microphone for duim disfala waka. Global Purchasing mekem arrangement for baem 1,000 microphone and sendem go lo klosap 200 difren ples.

For sevem selen, Global Purchasing baem staka microphone. Olketa sendem olketa microphone hia lo wanfala ples, then olketa sendem go lo olketa transleita evriwea lo world. From mifala baem staka, cost blo each microphone and freit blo hem, hem samting olsem 170 U.S. dollar. Datwan hem barava cheap winim for pei wanwan.

Global Purchasing mekem arrangement for sendem olketa equipment hia lo April and May 2020. Lo datfala taem, staka bisnis no ap-tu-date lo waka blo olketa bikos lo datfala sik. Nomata olsem, kasem end lo May, staka lo olketa remote transleison office, branch office, and olketa nara ples wea olketa duim transleison kasem olketa equipment hia.

Brata Jay Swinney, overseer blo Global Purchasing sei: “Olketa Bethel department and olketa difren bisnis waka gud tugeta lo disfala project. Holy spirit blo Jehovah nao mekem mifala fit for duim diswan kwiktaem and for iusim gud olketa donation for helpem olketa brata and sista.”

Nicholas Ahladis, wea waka lo Transleison Services sei: “Olketa transleita wea lockdaon barava hapi taem olketa kasem olketa equipment hia. Nomata olketa stap seleva from olketa nara member lo transleison team, olketa savve waka gud tugeta for transleitim and recordim olketa tok, video, and olketa song lo winim 500 languis.”

Diswan hem wanfala lo olketa project wea mifala duim, for mekem olketa brata and sista evriwea lo world for lukim “Evritaem Hapi”! 2020 Regional Convention. Olketa donation wea iufala givim online lo donate.jw.org and lo olketa nara wei mekem mifala fit for peim olketa samting hia.