Wanfala Library Iu Savve Holem lo Hand Nomoa

“No longtaem go nomoa, wei for kasem spiritual kaikai lo digital format hem samting iumi no tingim.” Waswe, iu garem sem tingting tu? Hem samting wea Geoffrey Jackson storyim lo 2020 Governing Body Update #6. Hem sei tu: “Bat taem iumi luk bak, iumi ting hao nao bae iumi deal witim disfala pandemic sapos no eniting olsem JW Library. Lo olketa year wea go pas Jehovah bin redyim iumi for kaen samting olsem.”

Hao nao Jehovah hem bin redyim iumi? Wanem waka nao olketa duim for mekem datfala JW Library app, and wat nao olketa gohed duim for lukaftarem datfala app and mekem hem moabeta?

Hem Firstaem Iumi Garem Samting Olsem

Lo May 2013, Governing Body askem MEPS Programming, wea hem wanfala department lo world hedquarter, for wakem wanfala app wea garem datfala revised New World Translation lo hem. Paul Willies, wea waka lo MEPS Programming hem sei: “Go kasem datfala taem, mifala no enitaem releasem wanfala mobile app lo eni app store. So mifala markem wanfala team, stop for duim samfala nara project, and waka witim samfala nara department for designim and wakem disfala niu app and information for putim lo hem. Mifala prea evritaem and witim help blo Jehovah datfala app hem redi for pipol daonlodim taem annual meeting hem kamap just faevfala month bihaen!”

Next big samting wea mifala need for duim hem for mekem datfala app olsem wanfala real library wea garem plande moa pablikeson lo hem and for iumi savve daonlodim lo staka moa languis. Lo January 2015, staka lo olketa pablikeson wea iumi iusim lo English hem stap for daonlodim lo app, and then bihaen just sixfala month, olketa wea iusim app savve daonlodim olketa pablikeson hia lo plande handred languis.

Kam kasem distaem, olketa brata blo iumi gohed for mekem datfala app moabeta lo wei for addim olketa video, putim olketa pablikeson and media for olketa kongregeson meeting lo wan ples and olketa wea iusim app nao savve luk lo olketa reference lo Research Index taem olketa click lo wanfala Bible verse.

Gohed Lukaftarem Library

Evriday 8 million device openem JW Library and evri month winim 15 million device openem datfala app! Wat nao olketa mas duim for mek sure datfala app hem waka gud lo olketa device hia? Brother Willies explainim olsem: “Hard for finisim evribit wanfala mobile app. Mifala gohed for addim olketa niu samting lo datfala app and for mekem hem moa isi for iusim. From commercial operating system for olketa digital device hem gohed for update, mifala mas gohed for updatem datfala app tu mekem hem savve gohed waka witim datfala operating system. And mifala need for lukaftarem and upgradem software wea mifala iusim bikos namba blo olketa pablikeson and recording lo JW Library gohed for kamap moa big.” Sapos iumi kaontem evri pablikeson and evri audio and video recording lo evri languis, distaem iumi garem samting olsem 200,000 pablikeson and winim 600,000 audio and video recording lo JW Library!

For gohed iusim disfala app, iumi bae needim computer equipment and staka moa samting. Iumi need for peim samfala software license tu. Wanfala software license hem kostim $1,500 (U.S.) evri year. And tu, MEPS Programming spendem samting olsem $10,000 (U.S.) evri year for baem olketa niu device for mek sure datfala app hem gohed for waka gud lo olketa niu computer, tablet, and phone wea olketa company salem.

For Daonlodim Olketa Pablikeson Sevem Selen

Wei for garem JW Library hem sevem staka selen wea iumi bin iusim for printim, wakem, and sendem literature. Olsem example, tingim datfala buk Lukluk lo Olketa Scripture Evriday. Mifala printim klosap 12 million copy blo Lukluk lo Olketa Scripture—2013. Bat for 2020 edition, mifala printim samting olsem five million nomoa, nomata namba blo olketa pablisa lo world hem go ap samting olsem 700,000. Why nao diswan hem change? Plande lo olketa brata and sista readim text for each day lo JW Library.a

“Barava Spesol Samting”

JW Library hem savve help lo plande difren wei tu. Geneviève, wea hem stap lo Canada, luksavve hao datfala app helpem hem for study evritaem. Hem sei: “Iu savve, sapos mi mas aotem staka buk for iusim for study, ating bae mi no duim evri morning. Bat from mi garem datfala app, mi savve holem tablet blo mi nomoa and mi garem evri samting wea mi needim. From mi study evritaem, datwan strongim faith blo mi and helpem mi for fren gud witim Jehovah.”

Datfala app hem barava helpem iumi especially taem COVID-19 pandemic gohed. Charlyn, from United States, hem sei: “From COVID-19 hem affectim full world, mi no lukim eni niu pablikeson wea olketa printim for winim wanfala year. Bat JW Library hem mekem iumi savve kasem wanem iumi needim for strongim faith blo iumi, and mi thankiu lo Jehovah for diswan.”

Faye, wea hem stap lo Philippines, hem garem sem feeling olsem plande narawan. Hem sei: “Mi iusim disfala nambawan app for helpem mi gohed fren gud witim Jehovah. Hem first samting wea mi readim lo morning. Hem samting wea mi lisin lo hem taem mi duim waka. Hem samting wea mi iusim for duim study for olketa meeting. Hem wanem mi iusim for prepare for Bible study blo mi. Mi watchim olketa video lo hem taem mi garem free taem. Taem mi weit lo laen, mi savve readim olketa article or Bible. Disfala app hem barava spesol samting.”

Disfala app hem barava helpem iumi lo ministry tu. Olsem example, taem wanfala sista lo Cameroon go preaching, hem laek for iusim wanfala scripture wea hem lukim nara sista iusim tu-thri week bifor. Bat hem no savve rememberim which verse lo Bible sista hia hem iusim. Hem sei: “Bat gud nao mi rememberim wanfala toktok from datfala verse. Mi openem datfala app, go lo Bible, and mi search for datfala toktok. Stretawe mi faendem datfala scripture. Taem mi iusim app, mi savve faendem staka verse wea mi savve forgetim bifor.”

Olketa donation wea iu givim lo donate.jw.org hem help for designim, lukaftarem, and mekem datfala JW Library app moabeta for olketa brata and sista raonem world. Thankiu nao for donation wea iu givim.

Olketa Important Date for JW Library

1. 

   October 2013—Olketa releasem app and hem garem revised New World Translation lo hem

2. 

   January 2015—Olketa nara pablikeson available lo English, and then lo staka handred nara languis tu

3. 

   November 2015—Iumi savve haelaetim olketa word

4. 

   May 2016—Meetings tab stap lo app

5. 

   May 2017—Savve raetem olketa note lo app

6. 

   December 2017—Study Bible hem stap lo app

7. 

   March 2019—Savve daonlodim olketa audio recording, stream olketa video, and lukim olketa reference from Research Index

8. 

   January 2021—Savve garem olketa niu samting wea join witim datfala buk Enjoyim Laef for Olowe!