Hao Jehovah Mekem Iumi Sure Earth Bae Kamap Paradaes

1. Wat nao message blo profet Isaiah for olketa Israelite?

PROFET Isaiah sei Jehovah hem “God blo truth.” Hebrew word wea olketa transleitim lo “truth” hem minim “amen.” (Isa. 65:16, ftn.) “Amen” hem minim “ia, hem nao” or “barava nao.” Staka taem lo Bible, olketa iusim datfala word “amen” for showim wanem Jehovah or Jesus talem bae hem kamap tru. So, diswan nao message blo Isaiah for olketa Israelite: Wanem Jehovah talem hem always happen and olketa fit for trustim. Jehovah pruvim datwan, taem hem fulfillim each promis wea hem talem.

2. Why nao iumi savve trustim olketa promis blo Jehovah abaotem future blo iumi, and wat nao tufala kwestin wea iumi bae storyim?

² Hao, iumi tu savve trustim olketa promis blo Jehovah abaotem future blo iumi? Klosap 800 years bihaen taem blo Isaiah, aposol Paul storyim why iumi savve sure hao olketa promis blo God bae always kamap tru. Paul sei: “God no savve laea.” (Heb. 6:18) Tingim diswan. Wanfala spring wata wea producem fresh wata, no savve producem solwata. Lo sem wei tu, from Jehovah hem God blo truth, hem no savve laea. Dastawe iumi savve barava trustim evri samting wea Jehovah talem, wea minim tu evri samting wea hem promisim for iumi lo future. Lo disfala article, bae iumi storyim tufala kwestin hia: Wat nao Jehovah promisim for iumi lo future? And hao nao Jehovah mekem iumi sure dat wat hem promisim bae kamap tru?

WAT NAO JEHOVAH PROMISIM?

3. (a) Wanem promis nao hem spesol lo pipol blo Jehovah? (Revelation 21:3, 4) (b) Hao nao samfala pipol respond taem iumi storyim disfala promis lo olketa?

³ Promis wea iumi bae discussim lo disfala article hem spesol lo pipol blo Jehovah evriwea lo world. (Readim Revelation 21:3, 4.) Jehovah promis hao lo future “no eniwan bae dae and no enitaem bae pipol sorre or krae or feelim pain tu.” Staka lo iumi iusim disfala scripture for comfortim pipol wea iumi preach lo olketa and for showim hao nao laef lo paradaes. Hao nao samfala pipol respond taem iumi storyim disfala promis lo olketa? Maet olketa sei: “Hem barava here naes, bat mi no bilivim if hem savve kamap tru?”

4. (a) Taem Jehovah mekem promis abaotem paradaes, wat nao hem savve bae happen lo taem blo iumi? (b) Taem hem mekem promis, wat moa hem duim?

⁴ Taem Jehovah iusim aposol John for raetem disfala promis abaotem laef lo paradaes, Jehovah savve hao distaem iumi bae storyim disfala hope lo olketa narawan taem iumi preachim Kingdom message. Jehovah savve tu hao staka pipol bae faendem hard for bilivim datfala promis abaotem “olketa niu samting” wea bae happen lo future. (Isa. 42:9; 60:2; 2 Cor. 4:3, 4) So hao nao iumi savve helpem olketa narawan and iumiseleva tu, for trustim dat olketa blessing wea Revelation 21:3, 4 storyim bae kamap tru? Jehovah no talem nomoa datfala promis bat hem givim olketa reason wea mekem iumi sure hem bae keepim disfala promis. Wat nao olketa reason hia?

JEHOVAH MEKEM IUMI SURE PROMIS BLO HEM BAE KAMAP TRU

5. Olketa wanem reason nao iumi garem for trustim promis blo God abaotem Paradaes, and wat scripture nao storyim datwan?

⁵ Lo Revelation 21:5, 6 hem storyim olketa reason wea mekem iumi trustim datfala promis blo Jehovah abaotem paradaes. Hem sei: “God wea sidaon long throne hem sei: ‘Mi wakem evri niu samting.’ Hem sei tu: ‘Raetem diswan, bikos man savve trustim olketa toktok hia and hem barava tru.’ Hem sei long mi: ‘Olketa toktok hia hem kamap tru nao! Mi nao Alpha and Omega,’” wea minim hem nao start and end.—Rev. 21:5, 6a, ftn.

6. Why nao olketa toktok lo Revelation 21:5, 6 strongim trust blo iumi lo promis blo God?

⁶ Why nao olketa toktok lo disfala scripture strongim trust blo iumi lo promis blo God? Revelation Climax buk story olsem abaotem datfala scripture: “Wat Jehovah duim, hem olsem hem saenem wanfala document for mekem iumi sure hem bae keepim promis blo hem.”b God talem promis blo hem lo Revelation 21:3, 4. Then lo 5 and 6, hem saenem signature blo hem, for mekem iumi sure wat hem promisim bae kamap tru. Distaem bae iumi storyim olketa toktok wea Jehovah talem wea mekem iumi trustim promis blo hem.

7. Hu nao story lo start blo verse 5, and why nao hem spesol?

⁷ Lo verse 5 hem start witim disfala toktok: “God wea sidaon long throne hem sei.” (Rev. 21:5a) Olketa toktok hia hem spesol bikos lo buk blo Revelation, diswan hem wanfala lo thrifala taem wea Jehovah seleva story kam lo olketa vision. So ino wanfala angel or Jesus wea resurrect nao story lo iumi, bat Jehovah seleva nao story lo iumi! Datwan mekem iumi fit for trustim next samting wea hem talem. Why nao olsem? Bikos Jehovah “no savve laea.” (Titus 1:2) So datwan mekem iumi savve sure, wat Revelation 21:5, 6 storyim bae kamap tru.

“MI WAKEM EVRI NIU SAMTING”

8. Wat nao Jehovah talem wea showim promis blo hem bae kamap tru? (Isaiah 46:10)

⁸ Distaem, bae iumi storyim wat Jehovah talem lo Revelation 21:5. Lo Greek languis, first toktok wea Jehovah talem, iumi savve transleitim lo “Plis lukim!” Disfala sem toktok olketa iusim tu lo olketa nara verse insaed buk blo Revelation. Wanfala buk storyim hao datfala toktok hem “for mekem reader redi for next toktok wea bae kamap.” Wat nao next toktok wea God talem? Hem sei: “Mi wakem evri niu samting.” Hem tru, Jehovah storyim olketa change wea bae kamap lo future. Bat from hem sure bae hem fulfillim promis blo hem, hem storyim olketa change hia olsem hem happen finis.—Readim Isaiah 46:10.

9. (a) Wat nao datfala toktok “mi wakem evri niu samting” hem minim? (b) Wat nao bae happen lo “skae” and “earth” wea stap distaem?

⁹ Distaem bae iumi storyim next toktok lo Revelation 21:5 wea Jehovah sei: “Mi wakem evri niu samting.” Lo disfala chapter, datfala toktok hem minim tufala samting wea Jehovah bae duim. Hem bae replacim and mekem olketa samting for kamap niu. Firstaem, wat nao Jehovah bae replacim? Revelation 21:1 hem sei: “Skae and earth wea stap bifor hem nomoa nao.” “Skae . . . wea stap bifor” hem minim olketa gavman, wea Satan and olketa demon influencim olketa. (Matt. 4:8, 9; 1 John 5:19) Lo Bible, datfala toktok “earth” hem minim pipol lo earth. (Gen. 11:1; Ps. 96:1) So “earth wea stap bifor” hem minim olketa nogud pipol. Jehovah bae no impruvim nomoa datfala “skae” and “earth” wea stap distaem, bat hem bae distroem olketa. Hem bae replacim datfala skae and earth witim “wanfala niu skae and wanfala niu earth,” wea minim wanfala niu gavman and pipol lo earth wea Jehovah acceptim olketa.

10. Wat nao olketa samting wea Jehovah bae mekem for kamap niu?

¹⁰ Next samting wea Jehovah storyim lo Revelation 21:5, hem olketa samting wea hem bae mekem for kamap niu. Tingim, Jehovah sei: “Mi wakem evri niu samting.” Diswan minim hem bae mekem evri samting for kamap niu. Jehovah bae mekem earth and olketa pipol for kamap perfect, wea minim olketa kamap niu. Olsem Isaiah storyim, Jehovah bae mekem full earth for kamap wanfala beautiful ples olsem garden blo Eden. And hem bae mekem iumi kamap niu, taem hem healim each wan lo iumi. Hem bae healim pipol wea kripol, blind, and deaf, and hem bae resurrectim tu olketa wea dae.—Isa. 25:8; 35:1-7.

“MAN SAVVE TRUSTIM OLKETA TOKTOK HIA AND HEM BARAVA TRU. . . . OLKETA TOKTOK HIA HEM KAMAP TRU NAO!”

11. Wat nao Jehovah talem lo John for raetem, and wanem reason nao hem givim lo John?

¹¹ Wat moa God talem wea mekem iumi savve trustim hem? Jehovah sei lo John: “Raetem diswan, bikos man savve trustim olketa toktok hia and hem barava tru.” (Rev. 21:5) Jehovah no talem John for “raetem” nomoa, bat hem givim reason tu. Hem sei: “Man savve trustim olketa toktok hia and hem barava tru,” wea minim iumi savve trustim toktok blo God. Iumi hapi John obeyim Jehovah and “raetem” diswan. From datwan, iumi savve readim promis blo God abaotem Paradaes and ting raonem olketa blessing wea iumi bae kasem lo future.

12. Why nao Jehovah sei: “Olketa toktok hia hem kamap tru nao!”

¹² Wat nao next samting wea God talem? Hem sei: “Olketa toktok hia hem kamap tru nao!” (Rev. 21:6) Why nao Jehovah sei olketa promis hia hem kamap tru finis? Bikos no eni samting savve stopem hem for fulfillim plan blo hem. Then Jehovah talem nara samting wea mekem iumi sure hao promis blo hem bae kamap tru. Wat nao hem talem?

“MI NAO ALPHA AND OMEGA”

13. Why nao Jehovah sei hem “Alpha and Omega”?

¹³ Olsem iumi storyim finis, Jehovah seleva story kam thrifala taem lo vision lo John. (Rev. 1:8, ftn; 21:5, 6; 22:13) Each taem, Jehovah talem disfala sem toktok: “Mi nao Alpha and Omega.” Alpha hem first leta lo Greek alphabet, and omega hem last leta. Taem Jehovah sei hem “Alpha and Omega,” diswan showim taem hem startim samting, hem mas finisim.

14. (a) Taem Jehovah sei “Alpha” and “Omega,” wat nao hem minim? (b) Wat nao Jehovah talem lo Genesis 2:1-3 wea mekem iumi sure plan blo hem bae kamap tru?

¹⁴ Afta Jehovah creatim Adam and Eve, hem talem original plan blo hem for olketa man and disfala earth. Bible sei: “God blessim tufala, and sei: ‘Garem pikinini, kamap staka and fulimap disfala earth and lukaftarem earth.’” (Gen. 1:28) Firstaem wea Jehovah talem plan blo hem, hem olsem hem sei “Alpha.” Plan blo hem klia hao gogo olketa perfect pikinini blo Adam and Eve wea obey bae stap evriwea lo earth and mekem full earth kamap paradaes. Lo future, taem datfala original plan blo Jehovah complete, hem olsem hem sei “Omega.” Bihaen “God finis for creatim skae and earth, and evriting wea stap insaed,” hem talem samting wea mekem iumi sure plan blo hem bae kamap tru. Iumi savve lukim datwan lo Genesis 2:1-3. (Readim.) Jehovah sei mek-seven day hem holy. Diswan showimaot plan blo Jehovah for iumi olketa man and disfala earth bae kamap tru and succeed lo end blo datfala mek-seven day.

15. Why nao maet hem luk olsem Satan mekem hem no possible for God fulfillim plan blo hem for iumi olketa man?

¹⁵ Bihaen Adam and Eve againstim Jehovah, tufala kamap sin and pasim sin and dae lo olketa pikinini blo tufala. (Rome 5:12) Datwan maet mekem hem luk olsem hem no possible for plan blo God for perfect pipol wea obey for fulimap disfala earth. Satan maet mekem hem luk olsem hem no possible nao for Jehovah sei “Omega.” Satan maet tingse Jehovah hem garem tu-thri option nomoa. Wanfala option hem for killim dae Adam and Eve and creatim nara perfect couple for fulfillim plan blo hem for iumi olketa man. Bat if God duim datwan, Satan bae accusim God and sei hem laea. Why nao olsem? Bikos lo Genesis 1:28, Jehovah talem finis lo Adam and Eve hao olketa pikinini blo tufala bae fulimap disfala earth.

16. Why nao maet Satan tingse hem savve accusim Jehovah and sei hem no fit for fulfillim plan blo hem?

¹⁶ Wat moa nara option wea maet Satan tingse Jehovah bae chusim? Maet Satan tingse Jehovah bae letem Adam and Eve for garem olketa pikinini, bat olketa bae no savve kamap perfect. (Eccl. 7:20; Rome 3:23) If olsem, Satan bae accusim Jehovah and sei plan blo hem fail. Why nao olsem? Bikos disfala option bae no fulfillim plan God for olketa perfect pikinini blo Adam and Eve wea obey, for fulimap Paradaes earth.

17. Nomata Satan and Adam and Eve againstim Jehovah, wat nao Jehovah duim for fulfillim plan blo hem, and wat nao result? (Lukim tu piksa.)

¹⁷ Jehovah garem best wei for fulfillim plan blo hem wea Satan nating imaginim, nomata hem and Adam and Eve againstim Jehovah. (Ps. 92:5) Bat for pruvim Jehovah hem no laea, hem letem Adam and Eve for garem olketa pikinini. And Jehovah showimaot if hem talem samting, hem bae duim and no eni samting savve stopem hem. Jehovah mek sure plan blo hem bae kamap tru, taem hem provaedem wanfala “pikinini” wea bae sevem olketa pikinini blo Adam and Eve wea obey. (Gen. 3:15; 22:18) Satan hem no expectim datfala ransom arrangement blo Jehovah! Why nao olsem? Bikos datfala arrangement hem base lo trufala love. (Matt. 20:28; John 3:16) Satan hem selfish, hem no garem datfala wei. So wat nao bae happen bikos lo disfala ransom arrangement? Lo end blo 1,000 year rul blo Christ, olketa perfect pikinini blo Adam and Eve wea obey bae fulimap disfala paradaes earth, wea hem nao original plan blo Jehovah. Lo datfala taem, hem olsem Jehovah sei, “Omega.”

HAO FOR STRONGIM TRUST BLO IUMI LO PROMIS BLO JEHOVAH ABAOTEM PARADAES

18. Wat nao thrifala reason wea mekem iumi sure promis blo God bae kamap tru? (Lukim tu box “Thrifala Reason wea Mekem Iumi Trustim Promis blo Jehovah.”)

¹⁸ Lo disfala article, iumi storyim olketa reason wea mekem iumi sure disfala earth bae kamap paradaes. Wat nao iumi savve talem lo olketa narawan for mekem olketa sure hao diswan bae kamap tru? First samting, Jehovah nao mekem datfala promis. Bible buk Revelation sei: “God wea sidaon long throne hem sei: ‘Mi wakem evri niu samting.’” Jehovah garem wisdom, paoa, and hem barava laek for mekem promis blo hem kamap tru. Second samting, Jehovah sure bae hem fulfillim promis blo hem, so hem storyim datwan olsem hem happen finis. Hem sei: “Man savve trustim olketa toktok hia and hem barava tru. . . . Olketa toktok hia hem kamap tru nao!” Third samting, no eni samting savve stopem Jehovah for completim samting wea hem startim finis. Dastawe hem sei: “Mi nao Alpha and Omega.” Jehovah bae pruvim hao Satan hem laea and hem no savve stopem hem for fulfillim plan blo hem.

19. Taem pipol faendem hard for bilivim promis blo God abaotem Paradaes, wat nao iu savve duim?

¹⁹ Tingim, taem iu storyim lo pipol wanem Jehovah talem wea mekem iu sure olketa promis blo hem bae kamap tru, datwan strongim tu trust blo iu lo Jehovah. So next taem iu readim disfala comforting promis abaotem paradaes wea Revelation 21:4 lo samwan, and hem sei: “Hem barava here naes, bat mi no bilivim if hem savve kamap tru.” Wat nao bae iu duim? Iu savve readim and explainim verse 5 and 6 for olketa. Explainim hao olketa toktok hia wea Jehovah talem, hem olsem hem saenem witim own signature blo hem, wea mekem iumi sure hem bae fulfillim promis blo hem.—Isa. 65:16.