“Iu Barava Nambawan Woman”

Disfala toktok bilong praise hem for wanfala young Moabite woman. Hem wanfala widow wea nem bilong hem Ruth, dota-in-law bilong wanfala Israelite woman, Naomi. Taem hem stap long Israel samting olsem 3000 year bifor, taem olketa judge rul, Ruth kasem wanfala gudfala nem. (Ruth 3:11) Hao nao hem kasem disfala gud nem? Hu nao savve kasem gud samting from example bilong hem?

Ruth no woman wea kaikaim “bred bilong lesy fasin,” bat hem savve waka hard for longfala taem olsem man for kolektem leftova kaikai long garden, and hard waka bilong hem mekem pipol for praisem hem. Nomata olketa talem hem for isisi lelebet from hevi waka, hem go ahed for waka hard, hem duim moa samting winim wanem olketa expectim hem for duim. Samting wea Bible talem abaotem wanfala waef wea fit for kasem praise, wea fit for duim samting and waka hard barava fitim hem.—Proverbs 31:10-31; Ruth 2:7, 15-17.

Spiritual fasin bilong Ruth—hambol wei wea hem sakrifaesim seleva and loyal love bilong hem—hem main samting wea mekem hem garem gud nem. Hem lusim parents and kantri bilong hem and followim Naomi, nomata lelebet chance nomoa stap for hem marit and garem sef living. Long semtaem, Ruth talemaot hao hem barava want for servem Jehovah, God bilong mami-in-law bilong hem. Taem hem storyim wei wea hem no woman nating, Bible sei hao hem “moabeta long [Naomi] winim sevenfala son.”—Ruth 1:16, 17; 2:11, 12; 4:15.

Nomata record bilong Ruth hem barava nambawan long olketa wea hem kaban witim, samting wea moa important hem wei wea God tinghae long gudfala fasin bilong hem and rewardim hem witim privilege for kamap granmami bilong Jesus Christ. (Matthew 1:5; 1 Peter 3:4) Hem barava gudfala example no for olketa Christian woman nomoa bat for evriwan wea sei olketa worshipim Jehovah!