Kwestin From Reader
Waswe, wei wea David and olketa man bilong hem kaikaim holy bred, hem minim hem olraet nomoa for brekem law bilong God sapos man kasem hard taem?—1 Samuel 21:1-6.
Leviticus 24:5-9 hem sei holy bred wea olketa savve changem long evri Sabbath hem kaikai bilong olketa priest nomoa. Reason why olketa priest nao fit for kaikaim, hem bikos bred hia hem holy and hem kaikai bilong olketa man wea duim waka bilong God. Hem barava rong for givim long olketa wakman or for kaikaim from man laek for kaikai nomoa. Nomata olsem, priest Ahimelech nating sin taem hem givim holy bred long David and olketa man bilong hem.
Luk olsem David duim wanfala spesol assignment wea hem kasem from King Saul. David and olketa man bilong hem hangre. And tu, Ahimelech luksavve olketa klin saed long law. Saed long law olketa man hia no fit for kaikaim holy bred, bat long narasaed hem olraet nomoa bikos olketa bae iusim long stretfala wei. From datwan Ahimelech givim go olketa holy bred hia. Jesus Christ tu iusim disfala story olsem wanfala example for showimaot hao hem no stret for olketa Pharisee forcem wei for followim Sabbath law long strict wei followim tingting bilong olketa seleva.—Matthew 12:1-8.
Bat, diswan no minim hem olraet nomoa for brekem Law bilong Jehovah taem man kasem hard taem. Example, taem olketa Israelite faetem olketa Philistine, luk olsem wanfala hard samting hem kamap. King Saul hem sei: “Trabol bae kasem eni man wea kaikaim bred bifor evening and go kasem taem mi killim dae evri enemy bilong mi!” Bible sei: “Long datfala day olketa gohed for killim dae olketa Philistine.” Olketa soldia faet gogo olketa barava taed and hangre tu, and then olketa ‘killim dae olketa animal long graon, and evri pipol start for kaikaim nomata blood stap insaed.’ (1 Samuel 14:24, 31-33) Olketa hia sin from olketa brekem law bilong Jehovah saed long blood. Samting wea olketa duim hem againstim only wei wea God markem for iusim blood, hem nao “for kavarem” sin. (Leviticus 17:10-12; Genesis 9:3, 4) Bat Jehovah showimaot mercy and acceptim spesol sakrifaes for sin bilong olketa.—1 Samuel 14:34, 35.
So nomata wanem samting kamap, samting wea Jehovah tambuim hem tambu nao and hem expectim iumi for obeyim evri law bilong hem. Aposol John hem sei: “Diswan nao wanem hem minim for lovem God, for iumi obeyim olketa komandment bilong hem.”—1 John 5:3.
[Piksa long page 30]
Niu holy bred wea olketa savve changem long evri Sabbath insaed tabernacle