Faithful Long God Long Full Heart Bilong Iu
“Mi bae followim olketa trufala toktok bilong iu. Helpem mi for fraet long nem bilong iu long full heart bilong mi.”—PS. 86:11.
1, 2. (a) Olsem Psalm 86:2, 11 hem talem, wanem samting nao bae helpem iumi for faithful long Jehovah? (b) Waswe, iumi faithful long Jehovah taem iumi kasem test nomoa? Why nao olsem?
SAMFALA Christian faithful for staka year long prison and olketa faithful nomata pipol spoelem olketa, bat gogo bihaen olketa laek kasem staka material samting. Why nao olsem? Hem bikos long samting wea insaed long heart bilong man wanwan. Psalm 86 hem storyim man wea faithful nao hem worshipim Jehovah long full heart bilong hem. David, wea raetem disfala psalm, hem prea olsem: “Plis iu lukaftarem mi, bikos mi faithful long iu. Iu nao God bilong mi. Plis iu sevem mi, from mi wanfala wakman bilong iu wea trustim iu.” David talem tu: “Plis Jehovah, iu lanem mi long olketa samting wea iu laekem mi for duim. Mi bae followim olketa trufala toktok bilong iu. Helpem mi for fraet long nem bilong iu long full heart bilong mi.”—Ps. 86:2, 11.
2 Sapos iumi no trustim Jehovah long full heart bilong iumi, samfala samting savve spoelem faith bilong iumi. Wanfala nao maet iumi laek for kasem samting for iumiseleva nomoa. Diswan hem olsem wanfala trap wea iumi no savve lukim. Maet iumi winim samfala hard taem finis and faithful long Jehovah, bat nomata olsem iumi savve foldaon long olketa trap bilong Satan. Dastawe iumi mas barava faithful long Jehovah distaem, taem no eni big test kasem iumi yet! Bible hem sei: “Iu mas protectim gud heart bilong iu winim eni nara samting.” (Prov. 4:23) Iumi savve lanem olketa gudfala samting from wanem hem happen long datfala profet wea Jehovah talem for go lukim King Jeroboam.
“Mi Laek Givim Wanfala Present Long Iu”
3. Wanem nao Jeroboam duim taem profet bilong God talem strongfala toktok long hem?
3 Tingim samting wea happen. Wanfala profet bilong God hem talemaot strongfala toktok long King Jeroboam. Disfala king hem wakem tufala buluka for olketa Israelite long tenfala tribe long north for olketa worshipim. Taem king hia herem datfala strong toktok, hem kros fogud. Hem talem olketa man bilong hem for kasholem datfala profet. Bat Jehovah hem lukaftarem profet bilong hem. Semtaem nomoa hand bilong datfala king hem nogud nao, and altar wea olketa iusim hem brek tu. Jeroboam fraet nao and hem askem datfala profet olsem: “Plis iu askem God bilong iu Jehovah for mekem hand bilong mi gud bak moa.” Profet hia hem prea long God, then nomoa hand bilong king hem gud bak nao.—1 Ki. 13:1-6.
4. (a) Taem king laek givim samting long datfala profet, long wanem wei nao datwan hem testim faith bilong hem? (b) Wanem nao datfala profet talem long king?
4 Then Jeroboam talem datfala profet olsem: “Iu kam long haos bilong mi for iu kaikai. And mi laek givim wanfala present long iu.” (1 Ki. 13:7) Wanem nao datfala profet duim? Waswe, hem go long haos bilong king bihaen hem talem strongfala toktok long hem? (Ps. 119:113) Or waswe, hem no go long haos bilong king nomata hem luk olsem king hia hem sorre long samting wea hem duim? Jeroboam hem wanfala rich man and hem savve givim olketa naesfala present long olketa fren bilong hem. Sapos profet hia hem laekem tumas olketa material samting, bae hem hapi nomoa for tekem samting wea king laek givim long hem. Bat Jehovah hem talem finis long datfala profet: “Iu mas no kaikaim bred or drinkim wata, and iu mas no go bak followim sem road wea iu kam long hem.” So profet hia hem tok stret olsem long king: “Nomata sapos iu givim mi haf long evri samting wea iu garem, bae mi no kam witim iu and kaikaim bred or drinkim wata long disfala ples.” Then nomoa profet hia lusim Bethel nao and go followim narafala road. (1 Ki. 13:8-10) Sapos iumi tingim samting wea profet hia hem duim, wanem nao iumi lanem abaotem wei for faithful long heart?—Rom. 15:4.
“Hapi Nomoa Long Samting wea Iumi Garem”
5. Long wanem wei nao wei for laek kasem staka material samting savve testim faith bilong iumi?
5 Wanfala samting wea savve testim faith bilong iumi nao hem wei for laek kasem staka material samting. So waswe, iumi trustim Jehovah from hem talem finis bae hem givim olketa samting wea iumi needim? (Matt. 6:33; Heb. 13:5) Waswe, iumi savve hapi nomoa long wanem iumi garem and no aftarem olketa samting wea hard tumas for iumi kasem and wea iumi no needim nomoa? (Readim Philippians 4:11-13.) Waswe, maet iumi no laek for duim samfala waka long kongregeson or long ministry bikos iumi busy distaem for kasem olketa material samting? Waswe, wei for worshipim Jehovah nao hem nambawan samting long laef bilong iumi? Samting iumi duim nao bae showimaot sapos iumi worshipim God long full heart bilong iumi or nomoa. Aposol Paul talem olsem: “Sapos iumi lovem God and hapi nomoa long wanem iumi garem finis, iumi bae kasem plande gudfala samting. Iumi savve, iumi no tekem kam eni samting long world taem iumi born, and taem iumi dae, iumi no savve tekem eni samting go aot from world. So sapos iumi garem kaikai and ples for stap, iumi hapi nomoa long samting wea iumi garem.”—1 Tim. 6:6-8.
6. Maet iumi garem chance for duim wanem samting? Wanem nao hem gud for iumi tingim firstaem bifor iumi duim eni samting?
6 Tingim sapos boss bilong iu laek givim iu nara waka moa wea bae mekem iu tekem big pei witim samfala nara samting tu. Or maet sapos iu go waka long nara kantri or nara province, bae iu kasem staka material samting moa. Firstaem maet iu tingse olketa samting hia hem blessing from Jehovah. Bat bifor iumi duim eni samting, iumi mas tingim why nao iumi laek for kasem kaen waka olsem or for muv go long nara ples? Iumi mas tingim diswan firstaem, “Waswe, bae datwan spoelem wei wea mi fren witim Jehovah?”
7. Why nao iumi mas aotem tingting for laek kasem staka material samting?
7 World bilong Satan hem barava mekhae long wei for man garem staka material samting. (Readim 1 John 2:15, 16.) Devil laek spoelem tingting bilong iumi. Dastawe iumi mas lukluk gud long iumiseleva nogud iumi garem tingting for laek kasem staka material samting. Sapos iumi garem kaen tingting olsem, iumi mas aotem. (Rev. 3:15-17) Hem no hard nomoa long Jesus for talem stret long Satan hem no laekem olketa kingdom wea Satan laek givim long hem. (Matt. 4:8-10) Jesus hem sei: “Iufala mas lukaot gud and no kavet, bikos nomata sapos man garem staka samting, olketa samting hia no savve givim laef long hem.” (Luke 12:15) Sapos iumi faithful, iumi bae no trustim iumiseleva bat iumi bae trustim Jehovah.
Wanfala Olo Profet “Trikim Hem”
8. Wanem moa nara samting wea testim faith bilong datfala profet bilong God?
8 Sapos datfala profet bilong God go bak stret long hom bilong hem, bae evri samting hem gud nomoa. Bat seknomoa hem kasem nara test moa. Bible hem sei: “Long datfala taem wanfala olo profet hem stap long Bethel and olketa son bilong hem kam storyim hem evri samting wea happen long datfala day. Taem hem herem datwan nomoa, olo profet hia askem olketa for redyim donkey bilong hem mekem hem savve go kasem datfala profet bilong God. No longtaem bihaen, hem kasem datfala profet wea sidaon rest andanit wanfala big tree. Hem sei long hem: “Iu kam long haos bilong mi for iumi kaikaim bred.” Datfala profet bilong God hem les for go, so datfala olo man sei long hem: “Mi tu wanfala profet olsem iu, and wanfala angel nao kam talem disfala toktok bilong Jehovah long mi, ‘Iu go talem hem for kam long haos bilong iu mekem hem savve kaikaim bred and drinkim wata.’” Bat Bible sei datfala olo man “trikim hem” nomoa.—1 Ki. 13:11-18.
9. Wanem nao Bible talem abaotem pipol wea savve laea? Hu nao pipol wea savve laea olketa spoelem?
9 Bible no talem why nao datfala olo man duim datwan, bat iumi savve hem laea. Long firstaem maet datfala olo man hem wanfala profet bilong Jehovah wea faithful, bat gogo hem no faithful nao, and hem trikim datfala profet bilong God. Bible sei God barava heitim kaen wei olsem. (Readim Proverbs 3:32.) Pipol wea savve laea olketa no spoelem nomoa wei wea olketa seleva fren witim Jehovah, bat olketa spoelem nara pipol tu.
“Hem Go Long Haos” Bilong Datfala Olo Man
10. Wanem nao profet bilong God duim taem datfala olo man askem hem for go long haos bilong hem? Wanem nao kasem hem?
10 Hem fitim nomoa for datfala profet bilong God luksavve datfala olo man hem trikim hem. Hem shud tingting olsem firstaem, ‘Hao nao Jehovah sendem angel long nara man nao for talem mi wanem for duim?’ Datfala profet shud askem Jehovah firstaem for talem hem wanem nao hem mas duim. Bat Bible no storyim eni samting olsem. Bible sei: “Hem go long haos bilong [datfala olo man] for kaikaim bred and drinkim wata.” Jehovah hem no hapi long samting wea hem duim. Taem datfala profet bilong God go bak long Judah, wanfala lion nao kaikaim hem long road. Barava nogud samting nao kasem disfala profet!—1 Ki. 13:19-25.a
11. Wanem nao Ahijah duim wea showimaot hem faithful?
11 Bat Ahijah hem wanfala profet wea faithful long God long full laef bilong hem. Hem nao profet wea Jehovah talem hem for anointim Jeroboam for kamap king. Taem Ahijah hem olo and hem blind, son bilong Jeroboam hem sik, so king hia talem waef bilong hem for go long Ahijah and askem hem wanem nao bae kasem son bilong tufala. Ahijah no fraet for talem son bilong Jeroboam bae dae. (1 Ki. 14:1-18) Ahijah kasem staka gud samting. Wanfala samting nao, datfala priest Ezra hem storyim raeting bilong Ahijah long buk bilong hem.—2 Chron. 9:29.
12-14. (a) Wanem nao iumi lanem from samting wea kasem profet bilong God? (b) Wanem tufala example nao showimaot iumi mas prea long Jehovah and ting raonem kaonsel wea olketa elder givim from Bible?
12 Bible no talem why nao datfala profet no askem Jehovah firstaem bifor hem go long haos bilong datfala olo man. Waswe, hem from datfala olo man talem samting wea profet bilong God laek for herem nomoa? Wanem nao iumi lanem from diswan? Iumi mas barava bilivim hao samting wea Jehovah laekem iumi for duim hem nao stret samting. And iumi mas followim olketa samting hia nomata wanem kaen test nao iumi kasem.
13 Taem samfala kasem kaonsel, olketa laek herem nomoa wanem olketa laekem. Tingim diswan. Hao sapos boss bilong wanfala brata laek givim hem samfala waka moa wea bae tekem taem wea hem shud stap witim famili and duim olketa spiritual samting? Maet hem askem wanfala elder for helpem hem long diswan. First samting, datfala elder bae talem brata hia hemseleva nao mas disaedem hao for lukaftarem famili bilong hem, and bae datfala elder no talem hem wanem nao hem mas duim. Bihaen, datfala elder savve storyim long brata hia olketa nogud samting wea savve happen sapos hem tekem datfala waka. Waswe, datfala brata bae tingim nomoa first samting wea elder talem, or bae hem tingting strong long samting wea elder talem bihaen? Brata hia mas disaedem wanem nao bae helpem hem for gohed fren gud witim Jehovah.
14 Tingim nara samting. Maet wanfala sista askem wanfala elder for helpem hem. Sista hia laek savve sapos hem olraet nomoa for hem separate from hasband bilong hem wea no wanfala Witness. Firstaem, elder bae talem sista hemseleva nao mas disaed sapos hem bae separate or nomoa. Then elder hia bae storyim wanem nao Bible talem abaotem diswan. (1 Cor. 7:10-16) Waswe, bae datfala sista ting raonem evri samting wea elder talem? Or waswe, hem disaed finis for lusim hasband bilong hem? Hem bae kasem gud samting sapos hem prea long Jehovah and ting raonem samting wea Bible talem.
Iumi Mas Hambol
15. Wanem nao iumi savve lanem from mistek wea datfala profet bilong God hem duim?
15 Wanem moa iumi savve lanem from mistek wea datfala profet bilong God hem duim? Proverbs 3:5 hem talem olsem: “Barava trustim Jehovah and no depend long savve bilong iuseleva.” Datfala profet bilong God hem followim nomoa tingting bilong hemseleva bat hem nating depend long Jehovah olsem hem savve duim bifor. From datwan, God no hapi long hem and hem dae tu. Samting wea kasem hem showimaot iumi mas hambol and faithful for worshipim Jehovah!
16, 17. Wanem nao bae helpem iumi for gohed faithful long Jehovah?
16 Heart bilong iumi savve leadim iumi go rong. Bible hem sei: “Heart hem savve trikim man winim eni nara samting and hem nating hol bak for duim eni samting wea hem laekem.” (Jer. 17:9) Sapos iumi laek gohed faithful long Jehovah, iumi mas lusim olketa nogud wei bilong iumi olsem wei for bighed and for followim tingting bilong iumiseleva. Bat iumi mas garem olketa gudfala wei ‘wea God hem laekem. Iumi mas gohed faithful and duim samting wea stret.’—Readim Ephesians 4:22-24.
17 Proverbs 11:2 hem talem: “Olketa wea hambol nao olketa wise.” Sapos iumi hambol and depend long Jehovah, datwan bae helpem iumi for no duim olketa mistek wea mekem iumi kasem barava nogud samting. Tingim diswan, samfala taem wei for feel wikdaon savve mekem iumi no tingting stret. (Prov. 24:10) Maet iumi start for ting smol long samfala waka wea iumi duim for Jehovah and iumi tingse from iumi duim datwan for staka year finis, maet hem fitim for narawan moa for duim. Or maet iumi laek for garem kaen laef olsem nara pipol. Bat sapos iumi “waka hard” and “gohed strong for duim waka bilong Lord,” datwan bae protectim heart bilong iumi.—Luke 13:24; 1 Cor. 15:58.
18. Sapos iumi no savve wanem nao stret samting for iumi duim, wanem nao iumi mas duim?
18 Maet samfala taem iumi mas disaedem big samting and iumi no savve wanem nao stret samting for iumi duim. Long taem olsem, waswe, bae iumi followim nomoa tingting bilong iumiseleva? Iumi mas prea long Jehovah for helpem iumi taem iumi disaedem olketa big samting. James 1:5 hem sei: “Sapos eniwan long iufala hem no garem wisdom, hem shud gohed for askem God, from hem givim plande samting long evriwan.” Dadi bilong iumi long heven bae givim holy spirit long iumi mekem iumi disaedem stret samting.—Readim Luke 11:9, 13.
Disaed Strong for Gohed Faithful
19, 20. Wanem nao iumi laek gohed for duim?
19 Olketa nogud samting wea happen bihaen Solomon hem lusim tru worship hem barava testim faith bilong pipol wea worshipim God. Iumi savve samfala Israelite long datfala taem olketa no gohed faithful long God. Nomata olsem, samfala gohed faithful long Jehovah.
20 Olketa samting wea iumi mas disaedem evriday savve testim faith bilong iumi. Nomata olsem, iumi tu savve gohed faithful long Jehovah. Iumi mas faithful long Jehovah long full heart bilong iumi from iumi savve bae hem blessim olketa wea gohed faithful long hem.—2 Sam. 22:26.
[Footnote]
a Bible no talem sapos Jehovah killim dae datfala olo man or nomoa.
Wanem Nao Ansa Bilong Iu?
• Sapos iumi garem tingting for laek kasem staka material samting, why nao iumi mas aotem kaen tingting olsem?
• Wanem nao bae helpem iumi for gohed faithful long Jehovah?
• Sapos iumi hambol, hao nao datwan helpem iumi for gohed faithful long God?
[Piksa long page 9]
Waswe, iu faendem hem isi for faithful?
[Piksa long page 10]
Waswe, bae iu prea and ting raonem kaonsel wea iu kasem from Bible?