Word Bilong Jehovah Hem Laef
Olketa Main Point From Buk Bilong Esther
LUK olsem datfala plan no savve fail. Bae olketa killim dae evri Jew. Long wanfala day wea olketa markem firstaem, evri Jew wea stap anda long rul bilong Persia, from India go kasem Ethiopia, bae olketa finis evribit. Hem nao tingting bilong man wea plan for duim diswan. Bat wanfala important samting nao hem no tingim. Hem hao datfala God bilong heven savve sevem pipol bilong hem from eni samting wea mekem laef bilong olketa stap long danger. Bible buk bilong Esther nao storyim hao Jehovah sevem pipol bilong hem.
Mordecai, wanfala olo Jew man, raetem buk bilong Esther. Hem storyim olketa samting wea happen insaed 18-fala year, taem King bilong Persia, King Ahasuerus, wea nara nem bilong hem Xerxes I, hem rul. Disfala interesting story hem showimaot hao Jehovah sevem pipol bilong hem from olketa nogud plan bilong olketa enemy, nomata olketa servant bilong hem stap long plande difren ples long bigfala area wea Persia rulim. Distaem, wei for savve long story hia strongim faith bilong pipol bilong Jehovah wea gohed for givim holy service long hem insaed long 235 kantri. And tu, buk bilong Esther storyim samfala example for iumi followim and samfala example wea iumi shud no followim. Tru nao, “word bilong God hem laef and garem paoa for duim samting.”—Hebrews 4:12.
QUEEN NAO MAS DUIM SAMTING FOR HELP
Insaed long mek-thri year long rul bilong King Ahasuerus (493 B.C.E.), hem mekem wanfala feast. Nomata Queen Vashti hem barava luk naes, King Ahasuerus no appruvim hem and olketa aotem hem olsem queen. King nao chusim datfala Jew gele Hadassah from evri young gele wea luk naes tumas, for kamap queen. Hadassah followim direction from kasin bilong hem Mordecai, and hem haedem Jew nem bilong hem and iusim nem bilong hem long languis bilong Persia, wea hem nao Esther.
Gogo, wanfala man wea praod tumas wea nem bilong hem Haman, kasem position for serve olsem prime minister. From Haman hem barava kros fogud long wei wea Mordecai nating laek for baodaon long hem, hem plan for killim dae evri Jew wea stap anda long Rul bilong Persia. (Esther 3:2) Haman hem win for mekem Ahasuerus agree witim tingting bilong hem for givim wanfala komand for evri Jew mas dae. Mordecai hem ‘werem kaleko bilong sorre and putim asis long body bilong hem.’ (Esther 4:1) So, Esther mas duim samting stretawe. Hem invaetem king and prime minister bilong hem long wanfala private feast. Taem olketa kam, Esther askem tufala for kam long next day for wanfala nara feast. Haman hem hapi, bat long semtaem, hem kros fogud long wei wea Mordecai nating willing for honorim hem. So hem plan nao for killim dae Mordecai bifor datfala feast long next day.
Ansa for Olketa Bible Kwestin:
1:3-5—Waswe, datfala feast hem gohed for 180 day? Scripture no talem hao long nao datfala feast hem gohed, bat hem talem hao king showim olketa samting wea luk naes tumas and olketa richfala samting bilong kingdom bilong hem long olketa bigman for 180 day. Maet king iusim 180 day hia for showim glory bilong kingdom bilong hem long olketa bigman, mekem olketa tinghae long hem and bilivim hao hem savve fulfillim olketa plan bilong hem. Sapos olsem, verse 3 and 5 savve minim datfala 7-day feast hem kamap bihaen datfala 180-day hipap.
1:8—Why nao ‘law hem sei, no eniwan savve forcem narawan for drink’? Luk olsem, long disfala taem nomoa, King Ahasuerus duim samting wea difren from kastom bilong Persia, wea long kaen hipap olsem, olketa forcem narawan for drinkim wanem olketa markem. Wanfala buk hem sei: “Olketa savve disaed seleva haomas nao olketa bae drinkim, sapos staka or lelebet nomoa.”
1:10-12—Why nao Queen Vashti nating willing for kam front long king? Samfala savveman sei queen hem no willing for obeyim king bikos hem no laek for “daonem hemseleva long wei for kam front long olketa guest bilong king wea drunk.” Or maet disfala queen wea luk naes tumas, no laek for stap anda long king. Nomata Bible no talem wanem nao muvim hem for olsem, olketa wise man long datfala taem tingim hao wei for obeyim hasband hem wanfala serious samting and nogud example bilong Vashti bae affectim evri waef wea stap long olketa province bilong Persia.
2:14-17—Waswe, Esther durong witim king? Nomoa. Bible hem sei long morning, olketa nara woman wea kam front long king go bak long mek-tu haos wea olketa stap witim eunuch bilong king, ‘man for lukaftarem olketa concubine.’ Olketa woman wea sleep witim king kamap olketa concubine, or mek-tu waef bilong hem. Bat bihaen Esther lukim king, olketa no tekem hem long datfala haos wea olketa concubine stap. Taem olketa tekem Esther kam front long Ahasuerus, “king lovem Esther winim evri nara woman wea mekem hem kasem moa favor and loving-kaeness winim evri nara young gele.” (Esther 2:17) Hao nao Esther kasem “favor and loving-kaeness” from Ahasuerus? Long sem wei hem kasem favor bilong olketa narawan. “From datfala young gele luk naes long [Hegai], hem showimaot loving-kaeness long hem.” (Esther 2:8, 9) Hegai favorim hem saed long wanem hem lukim nomoa—olketa gudfala fasin and lukluk bilong hem. For tok tru, ‘evriwan wea lukim Esther gohed for favorim hem.’ (Esther 2:15) Olsem tu, king hem tinghae long wei bilong Esther and dastawe hem lovem hem.
3:2; 5:9—Why nao Mordecai nating willing for baodaon long Haman? Hem no againstim Law bilong Jehovah for olketa Israelite baodaon long man wea garem hae position for showimaot honor. Bat saed long Haman, hem minim moa samting. Haman hem wanfala Agagite, wea maet hem wanfala Amalekite, and Jehovah markem datfala sekson bilong Amalek for finis evribit. (Deuteronomy 25:19) So long tingting bilong Mordecai, for baodaon long Haman bae minim hem no loyal long Jehovah. Hem talem stret hao hem wanfala Jew and hem nating willing for duim datwan.—Esther 3:3, 4.
Olketa Leson for Iumi:
2:10, 20; 4:12-16. Esther acceptim direction and kaonsel from wanfala mature worshiper bilong Jehovah. Iumi wise tu sapos iumi “obeyim olketa wea leadim [iumi] and stap anda long olketa.”—Hebrews 13:17.
2:11; 4:5. Iumi shud ‘no tingim samting for iumiseleva nomoa, bat tingim tu samting for olketa narawan.’—Philippians 2:4.
2:15. Esther showimaot fasin for kontrolem seleva and no ova tumas long wei for no askem moa jewelry or naesfala kaleko winim wanem Hegai provaedem. Hem datfala “really fasin insaed heart, datfala kaleko bilong kwaet and hambol fasin” wea mekem king favorim Esther.—1 Peter 3:4.
2:21-23. Esther and Mordecai showimaot gudfala example long wei wea tufala “stap anda long olketa hae paoa.”—Romans 13:1.
3:4. Samfala taem, maet hem wise and fitim for stap kwaet abaotem hu nao iumi, olsem Esther duim. Bat, taem iumi saed witim olketa important samting, olsem wei for sapotim sovereign rul bilong Jehovah and faithful fasin bilong iumi, iumi mas no fraet for talemaot long pipol hao iumi wanfala Jehovah’s Witness.
4:3. Taem iumi feisim olketa hard taem, iumi shud prea long Jehovah for wisdom and for hem strongim iumi.
4:6-8. Mordecai lukaotem wanfala wei saed long law for stretem problem wea kamap from nogud plan bilong Haman.—Philippians 1:7.
4:14. Mordecai showimaot nambawan example long wei wea hem trust long Jehovah.
4:16. Esther depend long Jehovah evribit, and hem faithful and nating fraet taem hem feisim wanfala problem wea maet minim hem mas dae. Hem important tumas for iumi lane for depend long Jehovah and no long iumiseleva.
5:6-8. For kasem favor bilong Ahasuerus, Esther invaetem hem long mek-tu feast. Esther iusim gudfala tingting, and iumi tu shud duim olsem.—Proverbs 14:15.
EVRI SAMTING HEM CHANGE
Taem olketa plan start for happen, evri samting barava change. Olketa hangem Haman long datfala post wea hem mekem for Mordecai, and Mordecai nao kamap prime minister! Wanem nao bae happen long disfala plan for killim dae evri Jew? Diswan tu mas barava change.
Faithful Esther story moa long king. Nomata laef bilong hem stap long danger, hem barava askem king for faendem wanfala wei for stopem nogud plan bilong Haman. Ahasuerus savve wanem nao hem need for duim. So taem datfala day hem kam for killim dae evri Jew, olketa Jew no dae, bat olketa wea trae for duim diswan nao dae. Mordecai markem datfala Festival bilong Purim for kamap evri year for rememberim disfala wei wea olketa Jew sev. Nomata King Ahasuerus garem hae position ovarem hem, Mordecai ‘waka for duim gud samting for pipol bilong hem and storyim peace long evri pikinini bilong olketa.’—Esther 10:3.
Ansa for Olketa Bible Kwestin:
7:4—Hao nao wei for killim dae evri Jew bae ‘spoelem king’? For helpem king luksavve long wanem nogud samting bae kasem hem sapos hem finisim evri Jew, firstaem Esther story raonem wei for salem olketa Jew olsem olketa slave. Datfala 10,000 silver selen wea Haman promis for givim hem iusles nomoa long king for treasury bilong hem, bat sapos Haman plan for salem olketa Jew olsem olketa slave, bae hem mekem king kasem moa selen. Sapos datfala plan bilong Haman gohed, diswan minim queen mas dae nao.
7:8—Why nao olketa bigman bilong king kavarem feis bilong Haman? Luk olsem diswan minim man kasem bigfala shame or klosap olketa killim hem dae. Olsem wanfala buk hem sei, “samfala taem, olketa pipol bifor kam savve kavarem hed bilong pipol wea olketa plan for killim dae.”
8:17—Long wanem wei nao ‘plande pipol bilong datfala land sei olketa nao olketa Jew’? Plande pipol bilong Persia kamap Jew, from olketa tingse datfala komand for killim dae olketa Jew hem finis nao and God showimaot favor long olketa. Datfala sem samting hem happen distaem wea buk bilong Zechariah profesi abaotem. Hem sei: “Tenfala man from evri languis bilong olketa nation bae holem, tru nao, olketa bae barava holem kaleko bilong man wea hem wanfala Jew, and sei: ‘Mifala bae go witim iufala pipol, from mifala herem finis hao God hem stap witim iufala pipol.’ ”—Zechariah 8:23.
9:10, 15, 16—Nomata datfala komand sei hem olraet for tekem olketa samting bilong olketa enemy, why nao olketa Jew no tekem datwan? Wei wea olketa no willing for tekem olketa samting hia showimaot klia hao olketa no interest for kasem olketa richfala samting, bat olketa laekem pipol bilong olketa for sev nomoa.
Olketa Leson for Iumi:
6:6-10. “Praod fasin mekem man foldaon, and fasin for praod tumas bae mekem man stambol.”—Proverbs 16:18.
7:3, 4. Waswe, iumi no fraet for talemaot hao iumi wanfala Jehovah’s Witness, nomata iumi maet kasem persecution taem iumi duim olsem?
8:3-6. Iumi shud askem gavman and olketa kot for protectim iumi from olketa enemy bilong iumi, and hem stret for duim datwan.
8:5. Esther iusim gudfala tingting for no storyim hao king nao garem blame for datfala komand for killim dae pipol bilong hem. Long sem wei tu, iumi need for iusim gudfala tingting taem iumi givim witness long olketa wea garem hae position.
9:22. Iumi shud rememberim olketa wea poor wea stap midolwan long iumi.—Galatians 2:10.
Jehovah Bae Provaedem ‘Help and Wei for Sev’
Mordecai storyim hao maet hem plan bilong God for Esther kamap queen. Taem olketa Jew stap long danger, olketa stop for kaikai and gohed prea for help. Nomata queen kam front long king taem hem no invaetem hem, king hem hapi for lisin long hem. Long datfala important naet, king hem no savve sleep nao. Tru nao, buk bilong Esther story abaotem hao Jehovah nao bihaenem olketa samting wea happen for helpem pipol bilong hem.
Datfala interesting story bilong Esther hem barava encouragem iumi wea stap long “taem bilong end.” (Daniel 12:4) “Long lastfala part bilong olketa day,” wea hem nao lastfala part bilong taem bilong end, Gog bilong Magog—Satan—bae barava attakim pipol bilong Jehovah. Goal bilong hem nao for finisim evribit olketa tru worshiper bilong Jehovah. Bat olsem long taem bilong Esther, Jehovah bae provaedem ‘help and wei for sev’ for olketa worshiper bilong hem.—Ezekiel 38:16-23; Esther 4:14.
[Piksa long page 6]
Esther and Mordecai kam front long Ahasuerus