Againstim Tingting wea No Stret!
THRIFALA fren bilong Job visitim hem taem hem kasem bigfala trabol. Olketa nao Eliphaz, Bildad, and Zophar. Olketa kam for lukim Job for showimaot sorre bilong olketa and for comfortim hem. (Job 2:11) Maet Eliphaz nao man wea firstaem long Bildad and Zophar, and hem tu leadim olketa. Hem first wan for toktok and hem savve toktok tumas. Wanem kaen tingting nao showaot long thrifala taem wea Eliphaz hem story?
Eliphaz story olsem abaotem wanfala samting wea kasem hem wantaem: “Wanfala spirit hem go pas long feis bilong mi; Hair long body bilong mi start for standap. Gogo hem no muv, bat mi no luksavve long lukluk bilong hem; samting stap front long eye bilong mi; evri samting kwaet, and mi herem wanfala voice.” (Job 4:15, 16) Wanem kaen spirit nao affectim Eliphaz? Nogud toktok wea kamap bihaen showimaot hao datfala spirit hem no wanfala raeteous angel bilong God. (Job 4:17, 18) Hem wanfala wicked spirit. Dastawe, Jehovah kaonselem Eliphaz and tufala fren bilong hem from toktok bilong olketa no tru. (Job 42:7) Tru nao, demon nao affectim tingting bilong Eliphaz. Toktok bilong hem showimaot hem no garem tingting bilong God.
Wanem nao tingting wea showaot long toktok wea Eliphaz talem? Why nao hem important for againstim tingting wea no stret? And hao nao iumi savve duim datwan?
“Hem No Trustim Olketa Servant Bilong Hem”
Long thrifala taem wea Eliphaz story, hem talem idea hao God askem olketa servant bilong hem for duim tumas samting and nomata wanem nao olketa duim, olketa no savve mekem hem hapi. Eliphaz talem Job hao God “no trustim olketa servant bilong hem. And hem accusim olketa angel bilong hem.” (Job 4:18) Bihaen, Eliphaz sei olsem abaotem God: “Hem no trustim olketa holy wan bilong hem, and nomata skae hem no klin long eye bilong hem.” (Job 15:15) And hem ask olsem: “Waswe, datfala Olmaeti Wan hem hapi long wei wea iu raeteous?” (Job 22:3) Bildad agree witim hem, from hem sei: “Moon hem stap and hem no braet; and olketa star nating klin long eye bilong [God].”—Job 25:5.
Iumi mas careful long kaen tingting olsem wea savve spoelem iumi. Hem savve leadim iumi for garem tingting hao God askem iumi for duim tumas samting. Diswan savve barava spoelem wei wea iumi fren witim Jehovah. And tu, sapos iumi garem tingting olsem, wanem nao bae iumi duim taem iumi kasem discipline wea iumi needim? Winim wei for hambol for acceptim datwan, maet heart bilong iumi kamap “kros long Jehovah,” and iumi keepim datfala kros. (Proverbs 19:3) Datwan savve barava spoelem wei wea iumi fren witim God!
“Waswe, God Needim Man?”
Datfala idea wea sei God askem iumi for duim tumas samting hem klosap semsem witim kaen tingting for sei God ting olketa man iusles. Long mek-thri taem wea Eliphaz story hem askem disfala kwestin: “Waswe, God needim man, mekem eniwan wea garem fasin for luksavve fit for helpem hem?” (Job 22:2) Eliphaz talem idea hao God no needim man. Bildad talem sem samting tu: “Hao nao man nating hem savve stret front long God, or hao nao man wea born long woman savve klin?” (Job 25:4) Sapos kaen tingting olsem hem tru, Job wea wanfala man nating, hem no fit for tingse hem raeteous front long God!
Samfala pipol distaem feel nogud long olketa seleva. Olketa samting wea savve mekem disfala feeling kamap hem maet from famili wea man growap insaed, hevi long laef, wei for heitim man wea garem difren kala skin, or difren tribe. Bat, Satan and olketa demon bilong hem tu hapi for spoelem man. Sapos olketa savve mekem wanfala man for tingim hao nomata wanem hem duim hem no savve mekem Olmaeti God hapi, hem moa isi for man wikdaon. Gogo, datfala man maet isisi go difren, or maet min for lusim God.—Hebrews 2:1; 3:12.
Olketa problem saed long health and taem man start for kamap olo savve stopem iumi for duim samfala samting. Sapos iumi markem samting iumi duim for kingdom taem iumi young, healthy, and strong witim samting wea iumi duim distaem, maet hem luk smol nomoa. Hem barava important for luksavve hao Satan and olketa demon bilong hem laekem iumi for tingse nomata wanem iumi duim iumi no savve mekem God hapi! Iumi mas againstim kaen tingting olsem.
Hao for Againstim Wei for Tingim Nogud Saed
Nomata Job safa from samting wea Satan duim long hem, hem sei: “Go kasem taem mi dae, bae mi no lusim faithful fasin bilong mi!” (Job 27:5) From Job lovem God, hem disaed strong for keepim faithful fasin bilong hem nomata wanem happen, and hem no letem eni samting for changem datwan. Diswan showimaot wanfala important samting wea helpem iumi for againstim wei for tingim nogud saed. Iumi mas savve gud abaotem love bilong God and mekem grow wei for tinghae long datwan. Iumi need tu for garem deep love for hem. Iumi savve kasem diswan thru long wei for studyim Bible evritaem and for ting raonem witim prea samting iumi lanem.
Olsem example, John 3:16 hem sei: “God lovem world tumas dastawe hem givim only Son wea hemseleva nao wakem.” Jehovah garem deep love for olketa man, and wei wea hem deal witim olketa man kam kasem distaem showimaot datfala love. Wei for ting raonem olketa example bilong bifor bae mekem iumi tinghae go moa long Jehovah, and mekem moa deep love bilong iumi for hem, and helpem iumi for againstim tingting wea no stret and for no tingim nogud saed.
Tingim wei wea Jehovah deal witim Abraham taem hem redi for distroem Sodom and Gomorrah. Eitfala taem Abraham kwestinim Jehovah abaotem judgment bilong Hem. Jehovah nating showimaot hem feel nogud or kros long datfala taem. Bat, olketa ansa bilong hem strongim and comfortim Abraham. (Genesis 18:22-33) Bihaen, taem God sevem Lot and famili bilong hem from Sodom, Lot askem Jehovah for letem hem ranawe long wanfala taon wea stap klosap nomoa, no long olketa maunten. Jehovah ansarem hem olsem: “Mi bae tingim iu tu long diswan, long wei for no distroem datfala taon wea iu talem.” (Genesis 19:18-22) Waswe, olketa story hia showimaot Jehovah hem wanfala raf ruler wea askem iumi for duim tumas samting, and wea no garem love? Nomoa. Tufala story hia showimaot wanem kaen man nao hem—wanfala ruler wea showimaot love, kaenfala fasin, garem mercy, and hem minim gud olketa man.
Example bilong Aaron, David, and Manasseh long Israel bifor showimaot hao kaen tingting for sei God hem man for faendem mistek and nomata wanem samting eni man savve duim hem no savve mekem God hapi, hem no tru. Aaron duim thrifala serious samting wea no stret. Hem wakem datfala gold buluka, join witim sista bilong hem Miriam for tok againstim Moses, and fail for honorim and givim glory long God long Meribah. Nomata olsem, Jehovah lukim olketa gudfala fasin bilong hem and letem hem for gohed serve olsem priest go kasem taem hem dae.—Exodus 32:3, 4; Numbers 12:1, 2; 20:9-13.
King David duim olketa bigfala sin taem hem rul. Hem duim adultery, planim dae bilong wanfala man wea no guilty, and duim wanfala census wea againstim law. Nomata olsem, Jehovah luksavve wei wea David really repent and Jehovah loyal long datfala Kingdom covenant long wei wea hem letem David for serve olsem king go kasem taem hem dae.—2 Samuel 12:9; 1 Chronicles 21:1-7.
King Bilong Judea, Manasseh, hem wakem olketa altar for Baal, bonem olketa son bilong hem long fire, duim spiritism, and buildim olketa altar bilong giaman religion long olketa courtyard bilong temple. Nomata olsem, Jehovah forgivim hem, mekem hem kamap free from prison, and letem hem for rul moa bihaen hem showimaot hem barava repent from heart. (2 Chronicles 33:1-13) Waswe, olketa samting hia wea God duim hem showimaot hem tingim man hem iusles? Barava nomoa nao!
Man wea Accusim God Hem Nao Guilty
Iumi no sapraes hao Satan nao garem evri fasin wea hem sei Jehovah garem. Satan nao raf and askem man for duim tumas samting. Wei for sakrifaesim olketa pikinini wea hem part long false worship bifor, hem showimaot klia diswan. Olketa apostate Israelite bonem olketa son and dota bilong olketa long fire—samting wea nating kamap insaed heart bilong Jehovah.—Jeremiah 7:31.
Satan nao man for faendem mistek, no Jehovah. Revelation 12:10 storyim Satan olsem “datwan wea accusim olketa brata bilong iumi, wea accusim olketa day and naet front long God bilong iumi!” Bat, man wea raetem psalm sing olsem abaotem Jehovah: “Sapos olketa mistek nao samting wea iu lukaotem, O Jah, O Jehovah, hu nao savve standap? From iu garem trufala wei for forgive.”—Psalm 130:3, 4.
Taem Tingting wea No Stret Finis for Olowe
Olketa angel mas barava hapi taem Jesus raosem Satan and olketa demon bilong hem from heven! (Revelation 12:7-9) Bihaen datwan, olketa wicked spirit hia no savve spoelem waka bilong olketa angel wea olketa nao famili bilong Jehovah long heven.—Daniel 10:13.
Klosap nao olketa wea stap long earth bae hapi. Wanfala angel wea kam from heven wea garem key bilong datfala hol wea deep tumas and wanfala chain long hand bilong hem, bae taemapem Satan and olketa demon bilong hem and torowem olketa insaed datfala hol and olketa bae no fit for duim eni samting. (Revelation 20:1-3) Iumi bae hapi tumas taem datwan hem happen!
Distaem, iumi mas againstim tingting wea no stret. Taem iumi savve iumi start for garem tingting wea no stret or tingim nogud saed, iumi need for againstim datwan long wei for tingim love bilong Jehovah. Then ‘peace bilong God wea winim evri tingting bilong man bae protectim heart and tingting bilong iumi.’—Philippians 4:6, 7.
[Piksa long page 26]
Job againstim wei for tingim nogud saed
[Piksa long page 28]
Lot lanem hao Jehovah hem wanfala Ruler wea minim gud olketa man