Wakabaot Long Faithful Wei
“Bat mi, mi bae wakabaot long faithful fasin.”—PSALM 26:11.
1, 2. (a) Why nao faithful fasin bilong olketa man hem important part long kwestin abaotem wei wea God garem right for rul or nomoa? (b) Hao nao olketa man and angel savve showimaot olketa sapotim rul bilong Jehovah?
TAEM Satan go againstim Jehovah long garden bilong Eden, hem mekem kwestin kamap abaotem wei wea God garem right for rulim olketa man and angel. Bihaen, hem challengem wei wea olketa man servem God taem hem sei olketa duim datwan nomoa for kasem gud samting. (Job 1:9-11; 2:4) So, faithful fasin bilong olketa man hem kamap important part long kwestin abaotem wei wea Jehovah garem right for rul or nomoa.
2 Nomata rul bilong God hem no depend long faithful fasin bilong olketa man and angel, olketa hia savve showimaot hu nao olketa sapotim saed long diswan. Long wanem wei? Taem olketa chus for faithful or nomoa. Dastawe, judgment wea man kasem hem depend long bigfala wei long faithful fasin wea hem showimaot.
3. (a) Job and David laekem Jehovah for lukluk and judgem wanem bilong tufala? (b) Wanem nao olketa kwestin wea kamap saed long faithful fasin?
3 Job hem no hol bak for sei: “[Jehovah] bae weim mi long stretfala scale and God bae savve long faithful fasin bilong mi.” (Job 31:6) King David long Israel bifor askem Jehovah for lukluk gud long faithful fasin bilong hem taem hem prea olsem: “Judgem mi, O Jehovah, from mi wakabaot long faithful fasin bilong mi, and mi trust long Jehovah, mekem mi no seksek.” (Psalm 26:1) Hem important tumas for iumi tu wakabaot long faithful wei! Bat wanem nao faithful fasin, and wanem nao hem minim for wakabaot followim? Wanem nao bae helpem iumi for gohed faithful?
‘Mi Wakabaot Long Faithful Fasin Bilong Mi’
4. Wanem nao faithful fasin?
4 Faithful fasin hem minim for garem stretfala fasin, raeteous fasin and no garem blame. Nomata olsem, faithful fasin hem minim moa samting winim wei for duim stretfala samting nomoa. Hem minim tu for worshipim God witim full heart. Satan kwestinim why Job hem faithful taem hem sei olsem long God: “So putim hand bilong iu, plis, and tasim bon and meat bilong [Job] and lukluk sapos hem bae cursim iu front long feis bilong iu.” (Job 2:5) Faithful fasin hem no minim nomoa for man duim samting wea stret, bat for duim datwan bikos feeling from heart nao muvim hem.
5. Wanem nao showimaot hao wei for garem faithful fasin no minim iumi mas perfect?
5 For garem faithful fasin hem no minim man mas perfect. King David hem no perfect and hem duim samfala big mistek long laef bilong hem. Nomata olsem, Bible storyim hem olsem man wea wakabaot “witim heart wea faithful.” (1 Kings 9:4) Why nao Bible sei olsem? From David hem lovem Jehovah. Heart bilong hem faithful long God. Hem willing for talemaot olketa mistek bilong hem, acceptim discipline and stretem olketa wei bilong hem. Tru tumas, faithful fasin bilong David hem showaot long worship wea hem duim witim full heart and love wea hem garem for God bilong hem Jehovah.—Deuteronomy 6:5, 6.
6, 7. Wanem nao hem minim for wakabaot long faithful wei?
6 Faithful fasin hem no samting saed long worship nomoa. Hem affectim full laef bilong man. David hem “wakabaot” long faithful fasin bilong hem. Long tokpiksa wei, ‘wakabaot’ savve minim ‘olketa samting wea man duim long laef bilong hem’ or ‘living bilong man.’ Taem hem story abaotem “olketa wea garem stretfala fasin” man wea raetem psalm hem sing olsem: “Hapi nao olketa wea obeyim olketa toktok bilong [God]; olketa gohed for luk aotem hem witim full heart. Olketa barava no duim eni samting wea no raeteous. Olketa wakabaot followim olketa wei bilong hem.” (Psalm 119:1-3) Faithful fasin hem minim man mas evritaem luk aotem wei for duim will bilong God and wakabaot followim.
7 For wakabaot long faithful wei hem minim for loyal long God, nomata long olketa hard taem. Taem iumi gohed strong long olketa test, or againstim olketa temptation from pipol long world wea no followim God, faithful fasin bilong iumi hem showaot klia. Iumi ‘mekem heart bilong Jehovah hapi’ bikos hem fit for ansarem datwan wea tok daonem hem. (Proverbs 27:11) From diswan, iumi savve strong for disaed olsem Job taem hem sei: “Go kasem taem mi dae bae mi no lusim faithful fasin bilong mi!” (Job 27:5) Mek-26 psalm showimaot wanem bae helpem iumi for wakabaot long faithful wei.
“Klinim Kidney Bilong Mi and Heart Bilong Mi”
8. Wanem nao iumi lanem from toktok bilong David taem hem askem Jehovah for lukluk gud long kidney and heart bilong hem?
8 David hem prea olsem: “Lukluk gud long mi, O Jehovah, and testim mi; klinim kidney bilong mi and heart bilong mi.” (Psalm 26:2) Kidney barava stap deep insaed man. Long tokpiksa wei, kidney hem piksarem deep tingting and feeling bilong man. And tokpiksa heart hem minim full man—wanem muvim hem, olketa feeling and savve wea hem garem. Taem David askem Jehovah for lukluk long hem, hem prea for Jehovah lukluk gud long barava deep tingting and feeling bilong hem.
9. Long wanem wei nao Jehovah klinim tokpiksa kidney and heart bilong iumi?
9 David ask for Jehovah klinim kidney and heart bilong hem. Long wanem wei nao Jehovah klinim full man? David hem singsing olsem: “Mi bae blessim Jehovah, wea givim advaes long mi. Long olketa naet nao kidney bilong mi stretem mi.” (Psalm 16:7) Wanem nao datwan minim? Hem minim hao kaonsel from God hem barava go deep insaed long David and stap long there and stretem deep tingting and feeling bilong hem. Kaonsel bilong God savve stretem iumi tu sapos iumi tinghae and ting raonem kaonsel wea iumi kasem from Word bilong God, olketa wea stand for hem, and organization bilong hem. Wei for evritaem prea long Jehovah for klinim iumi olsem David bae helpem iumi for wakabaot long faithful wei.
‘Loving-Kaeness Bilong Iu Hem Stap Front long Mi’
10. Wanem nao helpem David for wakabaot followim truth bilong God?
10 David hem sei moa: “Loving kaeness bilong iu hem stap front long eye bilong mi. And mi wakabaot long truth bilong iu.” (Psalm 26:3) David savve gud long olketa kaenfala samting wea Jehovah duim, and hem tinghae and ting raonem olketa. Hem sing olsem: “Blessim Jehovah, O soul bilong mi and no forgetim evriting wea hem duim.” From David tingim wanfala samting wea God “duim,” hem gohed for sei: “Jehovah hem gohed for duim olketa raeteous samting and judge for evriwan wea pipol ravem. Hem showimaot olketa wei bilong hem long Moses, olketa fasin bilong hem long olketa son bilong Israel.” (Psalm 103:2, 6, 7) Maet David tingim hao olketa bilong Egypt ravem olketa Israelite long taem bilong Moses. Sapos olsem, wei wea David ting raonem hao Jehovah showim long Moses hao hem bae sevem olketa Israelite, hem mas muvim heart bilong David and strongim hem for gohed wakabaot followim truth bilong God.
11. Wanem nao savve helpem iumi for wakabaot long faithful wei?
11 Wei for studyim Word bilong God evritaem and ting raonem samting iumi lanem bae helpem iumi tu for wakabaot long faithful wei. Olsem example, wei for tingim hao Joseph ranawe taem waef bilong Potiphar trae for switim hem bae encouragem iumi for ranawe from semkaen samting long ples iumi waka, long skul or long nara ples. (Genesis 39:7-12) Waswe taem iumi kasem temptation saed long wei for garem staka material samting, or bigfala nem and hae position long world? Iumi savve tingim example bilong Moses, wea rejectim evri samting hia long Egypt. (Hebrews 11:24-26) Sapos iumi tingim wei wea Job stand strong, diswan bae helpem iumi for strong for stap loyal long Jehovah nomata iumi kasem sik and trabol. (James 5:11) Waswe sapos iumi kasem persecution? Wei for tingim Daniel insaed hol bilong olketa lion bae mekem iumi strong nomata iumi fraet!—Daniel 6:16-22.
“Mi No Sidaon Witim Olketa Man wea No Talem Trufala Samting”
12, 13. Wanem kaen pipol nao iumi shud no kaban witim?
12 Taem David storyim nara samting wea strongim faithful fasin bilong hem, hem sei: “Mi no sidaon witim olketa man wea no talem trufala samting; and mi no stap witim olketa wea haedem really fasin bilong olketa. Mi heitim pipol wea duim nogud samting, and mi no sidaon witim wicked pipol.” (Psalm 26:4, 5) David barava no laek for sidaon witim wicked pipol. Hem heitim wei for kaban witim nogud pipol.
13 Waswe long iumi? Waswe, iumi barava les for sidaon witim olketa man wea no talem tru samting long olketa television program, video, Internet, or nara samting? Waswe, iumi mek sure iumi no kaban witim olketa wea haedem really fasin bilong olketa? Samfala wea iumi skul or waka witim maet act olsem fren bilong iumi. Bat waswe, iumi laek for kamap klos fren bilong olketa wea no wakabaot followim truth bilong God? Olketa apostate maet sei olketa talem trufala samting, bat really goal bilong olketa hem for mekem iumi lusim Jehovah. Waswe sapos samfala insaed long Christian kongregeson garem dabol laef? Olketa tu haedem really fasin bilong olketa. Jayson, wea distaem hem serve olsem wanfala ministerial servant, garem kaen fren olsem taem hem young. Hem sei olsem abaotem olketa: “Wanday, wanfala long olketa sei long mi: ‘Wanem iumi duim distaem hem no important bikos long niu system bae iumi dae nao. Bae iumi no savve long eniting mekem iumi feel sorre bihaen.’ Datkaen toktok hem mekem mi seke fogud. Taem niu system kam, mi no laek for dae.” Jayson hem finis for kaban witim olketa hia. Aposol Paul talem disfala warning: “No letem eniwan giamanim iu. Wei for kaban witim nogud pipol hem spoelem gudfala fasin.” (1 Corinthians 15:33) Hem barava important for iumi no kaban witim nogud pipol!
‘Mi Bae Talemaot Evri Nambawan Waka Bilong Iu’
14, 15. Long wanem wei nao iumi “march raonem altar bilong [Jehovah]”?
14 David hem sei moa: “Mi bae wasim hand bilong mi for showimaot mi no guilty, and mi bae march raonem altar bilong iu, O Jehovah.” Why nao olsem? “For mekem pipol barava herem wei for talem thankiu, and for talemaot evri nambawan waka bilong iu.” (Psalm 26:6, 7) David laek for stap klin saed long fasin mekem hem fit for worshipim Jehovah and talemaot love bilong hem for God.
15 Evri samting wea kamap saed long tru worship long tabernacle and tu long temple, hem “olsem example and shadow bilong olketa samting long heven.” (Hebrews 8:5; 9:23) Datfala altar hem piksarem will bilong Jehovah for acceptim sakrifaes bilong Jesus Christ for baem bak olketa man. (Hebrews 10:5-10) Taem iumi showimaot faith long datfala sakrifaes, iumi wasim hand bilong iumi for showimaot iumi no guilty and “march raonem altar bilong [Jehovah]”.—John 3:16-18.
16. Wanem gud samting nao iumi kasem taem iumi talem nara pipol abaotem olketa nambawan samting wea God duim?
16 Taem iumi tingim wei wea datfala ransom givim chance for iumi kasem staka samting, heart bilong iumi fulap witim thankiu for Jehovah and Son bilong hem! So, from iumi garem disfala feeling for thankiu insaed heart bilong iumi, iumi talemaot long nara pipol olketa nambawan samting wea God duim—start long taem wea hem wakem man long garden bilong Eden go kasem taem wea hem bae mekem evri samting kamap gud moa long niu world bilong hem. (Genesis 2:7; Acts 3:21) And waka for preach abaotem Kingdom and mek disaepol hem barava protectim iumi long spiritual wei! (Matthew 24:14; 28:19, 20) From iumi busy long datwan, faith bilong iumi long olketa promis bilong God and hope bilong iumi for future hem strong. Diswan mekem love bilong iumi for God and olketa nara man hem strong.
“Mi Laekem Tumas for Stap Long Haos Bilong Iu”
17, 18. Hao nao iumi shud ting long olketa Christian meeting?
17 Main ples for pipol worshipim Jehovah long Israel hem long datfala tabernacle wea garem altar for olketa duim sakrifaes long hem. David talemaot hapi bilong hem long datfala ples taem hem sei: “Jehovah, mi laekem tumas for stap long haos bilong iu and ples wea glory bilong iu stap.”—Psalm 26:8.
18 Waswe, iumi savve laekem tumas for hipap long olketa ples wea iumi lane abaotem Jehovah? Ples bilong tru worship long evri community hem nao olketa Kingdom Hall wea garem program for spiritual teaching. And tu, evri year iumi garem olketa convention, circuit assembly, and spesol assembly day. Olketa “toktok” bilong Jehovah nao iumi savve herem long olketa meeting hia. Sapos iumi lane for “barava lovem olketa,” bae iumi laekem tumas for attendim olketa meeting and lisin gud tu. (Psalm 119:167) Iumi barava kasem strong taem iumi stap witim olketa nara brata and sista wea interest tumas long laef bilong iumi wanwan and wea helpem iumi for gohed wakabaot long faithful wei!—Hebrews 10:24, 25.
‘No Aotem Laef Bilong Mi’
19. David no laek for guilty long wanem?
19 From David savve gud long samting wea kamaot taem man go difren from wei for wakabaot followim truth bilong God, hem barava ask olsem: “No aotem soul bilong mi witim olketa sinner and laef bilong mi witim olketa man wea guilty saed long blood, wea dirty fasin stap long hand bilong olketa, and raet hand bilong olketa fulap witim raverave fasin.” (Psalm 26:9, 10) David no laek for stap midolwan olketa man wea guilty from olketa duim dirty and raverave fasin.
20, 21. Wanem nao savve mekem iumi wakabaot olsem pipol wea no lovem God?
20 World distaem hem fulap witim dirty fasin. Television, olketa magasin, and movie encouragem olobaot fasin olsem ‘fornication and fasin wea no klin.’ (Galatians 5:19) Samfala kamap olsem slave long dirty piksa, wea staka taem mekem olketa duim dirty fasin. Olketa young pipol nao isi tumas for foldaon insaed long diswan. Long samfala kantri, hem wei bilong olketa for boy and girl for fren tugeta, and diswan mekem olketa teenager ting olketa mas duim datwan tu. From diswan, staka young wan fren nomata olketa young tumas for marit. For satisfaem feeling wea kamap for laekem sex, olketa duim fasin wea no klin gogo olketa duim fornication nao.
21 Olketa full-grown man tu savve foldaon long nogud samting. Raverave fasin saed long bisnis and wei for disaedem samting long selfish wei for kasem gud samting for seleva, hem showimaot man no honest. Sapos iumi wakabaot followim fasin bilong pipol long world, diswan bae mekem iumi stap farawe from Jehovah. Iumi want for “heitim nogud samting, and lovem gud samting” and gohed for wakabaot long faithful wei.—Amos 5:15.
“Sevem Mi and Rememberim Mi”
22-24. (a) Hao nao toktok bilong Psalm 26 hem encouragem iu? (b) Wanem trap nao bae iumi storyim long next article?
22 David finisim toktok bilong hem long God taem hem sei: “Bat mi, mi bae wakabaot long faithful fasin. Sevem mi and rememberim mi. Bae mi standap long level ples; midolwan long staka pipol wea hipap tugeta mi bae praisem Jehovah.” (Psalm 26:11, 12) For join witim wei wea David want for gohed strong long faithful wei hem askem God for sevem hem. Datwan barava encouragem iumi! Nomata iumi sinner, Jehovah bae helpem iumi sapos iumi traem best for wakabaot long faithful wei.
23 Evri part long laef bilong iumi mas showimaot iumi respectim and tinghae long rul bilong God. Each wan long iumi savve prea long Jehovah for lukluk gud and klinim olketa deep tingting and feeling bilong iumi. Sapos iumi traem best for studyim Word bilong God, bae iumi evritaem tingting long truth. So, iumi no want for kaban witim nogud pipol bat praisem Jehovah midolwan long staka pipol wea hipap tugeta. Iumi want for strong for join insaed waka for preach abaotem Kingdom and mek disaepol, no letem world for spoelem spesol wei wea iumi fren witim Jehovah. Taem iumi duim best bilong iumi for wakabaot long faithful wei, iumi sure Jehovah bae sevem iumi.
24 From faithful fasin hem join witim evri part long laef, iumi need for luksavve long wanfala barava nogud trap—wei for ova tumas long alcohol. Bae iumi story abaotem diswan long next article.
Waswe, Iu Remember?
• Why nao judgment wea man kasem hem depend long bigfala wei long faithful fasin bilong hem?
• Wanem nao faithful fasin, and wanem nao hem minim for wakabaot long faithful wei?
• Wanem nao bae helpem iumi for wakabaot long faithful wei?
• For gohed faithful, wanem nao olketa danger wea iumi mas luksavve and stap klia long olketa?
[Piksa long page 14]
Waswe, iu evritaem askem Jehovah for lukluk gud long olketa deep tingting bilong iu?
[Piksa long page 14]
Waswe, loving-kaeness bilong Jehovah stap front long eye bilong iu evritaem?
[Piksa long page 15]
Wei wea iumi gohed faithful nomata iumi kasem test hem mekem heart bilong Jehovah hapi
[Olketa Piksa long page 17]
Waswe, iu iusim gud olketa samting wea Jehovah provaedem for helpem iu wakabaot long faithful wei?