Trustim Toktok Bilong Jehovah

“Mi trustim toktok bilong iu.”—Psalm 119:42.

1. Wanem nao iumi savve abaotem man wea raetem Psalm 119, and waswe fasin bilong hem?

MAN wea raetem Psalm 119 hem barava lovem toktok bilong Jehovah. Maet datfala man hem Prince Hezekiah bilong Judah. Olketa feeling wea disfala song storyim hem fitim fasin bilong Hezekiah, wea hem “gohed for stap klos long Jehovah” taem hem serve olsem king bilong Judah. (2 Kings 18:3-7) Nomata iumi no barava sure hu nao raetem datwan, hem wanfala man wea luksavve long spiritual need bilong hem.—Matthew 5:3.

2. Wanem nao Psalm 119 mekhae long hem, and hao nao datfala man hem raetem?

² Psalm 119 hem mekhae long toktok, or message bilong God. Luk olsem man wea raetem disfala song hem iusim alphabet for helpem man baeheartim. Disfala psalm garem 176 verse wea each verse hem start witim difren leta bilong alphabet. Long Hebrew languis, disfala psalm hem garem 22 sekson, and each sekson garem 8-fala laen wea start witim sem leta. Hem storyim toktok, law, olketa reminder, wei, komandment, and olketa judicial disison bilong God. Long disfala article and long next article tu, bae iumi iusim stretfala transleison bilong Hebrew Bible for story raonem Psalm 119. Taem iumi ting raonem olketa experience bilong olketa servant bilong Jehovah bifor and distaem tu, datwan savve mekem iumi barava minim gud disfala song from God and tinghae go moa long Word bilong hem, Bible.

Obeyim Toktok Bilong God and Bae Iumi Hapi

3. Explainim and givim example wea showimaot wanem nao hem minim for no duim eni rong samting.

³ Trufala hapi hem kam from wei wea iumi wakabaot followim law bilong God. (Psalm 119:1-8) Sapos iumi duim olsem, Jehovah bae ting long iumi olsem iumi “no duim eni rong samting.” (Psalm 119:1) Wei for no duim eni rong samting no minim iumi perfect, bat hem showimaot iumi trae hard for duim will bilong Jehovah God. Noah “no garem blame midolwan long pipol” long taem bilong hem, and hem man wea “wakabaot witim trufala God.” From datfala faithful man and famili bilong hem followim samting wea Jehovah talem olketa for duim, olketa sev taem Flood hem kam. (Genesis 6:9; 1 Peter 3:20) Olsem tu, for iumi sev taem disfala world hem finis, hem depend long wei wea iumi ‘followim olketa komand bilong God long klos wei,’ wea minim iumi duim will bilong hem.—Psalm 119:4.

4. Wei for iumi hapi and win hem depend long wanem?

⁴ Jehovah bae nating lusim iumi sapos iumi ‘praisem hem witim heart wea stret and gohed followim olketa law bilong hem.’ (Psalm 119:7, 8) God no lusim Joshua, leader bilong olketa Israelite, wea followim kaonsel for ‘readim datfala buk bilong law evri day and evri naet mekem hem duim evri samting wea olketa raetem insaed long hem.’ Datwan nao mekem hem win and duim samting wea wise. (Joshua 1:8) Klosap long taem wea hem dae, Joshua gohed praisem God and savve sei olsem long olketa Israelite: “Iufala barava savve witim full heart bilong iufala and witim full soul bilong iufala hao no eni toktok long evri gudfala toktok wea God bilong iufala Jehovah talem long iufala hem fail.” (Joshua 23:14) Olsem Joshua, and man wea raetem Psalm 119, iumi savve hapi and win taem iumi praisem Jehovah and trustim toktok bilong hem.

Toktok Bilong Jehovah Keepim Iumi Klin

5. (a) Explainim hao man savve stap klin long spiritual wei. (b) Wanem help nao wanfala young wan wea duim bigfala sin savve kasem?

⁵ Iumi savve klin long spiritual wei sapos iumi gohed for luk aot followim toktok bilong God. (Psalm 119:9-16) Diswan hem tru nomata sapos dadi and mami bilong iumi nating showimaot gudfala example. Nomata dadi bilong Hezekiah hem man for worshipim idol, Hezekiah ‘klinim wei bilong hem.’ Luk olsem diswan minim hem klinim hemseleva from olketa heathen samting. Tingim sapos wanfala young wan wea servem God distaem hem duim bigfala sin. Wei for repent, prea, help from dadi and mami, and loving help from olketa Christian elder savve helpem hem for duim samting Hezekiah duim and ‘klinim wei bilong hem and gohed for luk aot.’—James 5:13-15.

6. Hu nao tufala woman wea ‘klinim wei bilong olketa and gohed for luk aot followim toktok bilong God’?

⁶ Nomata Rahab and Ruth laef longfala taem bifor man wea raetem Psalm 119, tufala ‘klinim wei bilong tufala.’ Rahab hem wanfala Canaanite jury woman, bat bihaen, pipol savve long hem olsem wanfala woman wea worshipim Jehovah and garem strongfala faith. (Hebrews 11:30, 31) Datfala woman from Moab, Ruth, hem lusim olketa god bilong hem, servem Jehovah, and obeyim Law wea God givim for Israel. (Ruth 1:14-17; 4:9-13) Tufala woman hia wea no Israelite gohed for ‘luk aot followim toktok bilong God’ and kasem nambawan privilege, from Jesus Christ nao kam from laen bilong olketa.—Matthew 1:1, 4-6.

7. Hao nao Daniel and thrifala nara young Hebrew showimaot nambawan example taem olketa stap klin long spiritual wei?

⁷ “Wei bilong heart bilong man hem saedem nogud samting start from taem hem young yet,” bat olketa young wan savve followim klinfala wei, nomata long disfala nogud world wea Satan kontrolem. (Genesis 8:21; 1 John 5:19) Taem Daniel and thrifala nara young Hebrew stap olsem prisoner long Babylon, olketa ‘gohed for luk aot followim toktok bilong God.’ Olsem example, olketa no laek for kamap dirty thru long wei for kaikaim ‘spesol kaikai bilong king.’ (Daniel 1:6-10) Olketa bilong Babylon kaikaim olketa animal wea no klin and wea tambu saed long Law Bilong Moses. (Leviticus 11:1-31; 20:24-26) Olketa no evritaem aotem blood from olketa animal wea olketa busarem, and wei wea olketa kaikaim meat witim blood insaed hem againstim law bilong God. (Genesis 9:3, 4) Iumi minim hao fofala Hebrew no laek kaikaim spesol kaikai bilong king! Olketa young wan hia wea servem God stap klin long spiritual wei and showimaot nambawan example.

Toktok Bilong God Helpem Man for Faithful

8. Iumi need for garem wanem tingting and savve, mekem iumi fit for minim and followim law bilong God?

⁸ For iumi gohed faithful long Jehovah, hem important for iumi lovem toktok bilong hem. (Psalm 119:17-24) Sapos iumi olsem man wea raetem Psalm 119, iumi bae barava laek for minim “olketa nambawan samting” insaed law bilong God. Bae iumi evritaem ‘barava laekem olketa judicial disison bilong Jehovah’ and bae iumi showimaot iumi ‘lovem olketa reminder bilong hem.’ (Psalm 119:18, 20, 24) Nomata sapos iumi dedicate long Jehovah no longtaem go nomoa, waswe, iumi “mekem grow feeling for barava hangre for datfala klinfala milk wea hem nao toktok bilong God”? (1 Peter 2:1, 2) Iumi need for minim olketa main teaching insaed Bible mekem iumi fit for minim and followim law bilong God.

9. Wanem nao iumi shud duim taem olketa man askem samting wea againstim law bilong God?

⁹ Maet iumi lovem olketa reminder bilong God, bat waswe sapos olketa wea garem paoa, “olketa prince,” tok againstim iumi? (Psalm 119:23, 24) Plande taem pipol distaem wea garem paoa trae forcem iumi for putim olketa law bilong man fastaem long law bilong God. Taem olketa man askem samting wea againstim will bilong God, wanem nao bae iumi duim? Wei wea iumi lovem toktok bilong God bae helpem iumi gohed faithful long Jehovah. Olsem olketa aposol bilong Jesus Christ wea kasem persecution, iumi bae sei: “Mifala mas obeyim God olsem ruler and no olketa man.”—Acts 5:29.

10, 11. Givim example wea showimaot hao iumi savve gohed faithful long Jehovah nomata iumi kasem barava hard samting.

¹⁰ Iumi savve gohed faithful long Jehovah nomata sapos barava hard samting kasem iumi. (Psalm 119:25-32) For stap faithful long God iumi mas willing for lane and iumi mas prea evritaem for direction bilong hem. And tu, iumi mas chusim “wei bilong faithful fasin.”—Psalm 119:26, 30.

¹¹ Hezekiah, wea maet hem nao man wea raetem Psalm 119, hem chusim “wei bilong faithful fasin.” Hem duim olsem nomata olketa false worshiper stap raonem hem and maet olketa wea waka for king tu tok spoelem hem. Luk olsem ‘soul bilong hem no sleep from hem sorre tumas’ bikos long olketa samting wea kasem hem. (Psalm 119:28) Nomata olsem, Hezekiah hem trust long God, hem gudfala king, and hem duim “samting wea stret long eye bilong Jehovah.” (2 Kings 18:1-5) Taem iumi depend long God, iumi tu savve stand strong long olketa test and gohed faithful long hem.—James 1:5-8.

Toktok Bilong Jehovah Strongim Man

12. Hao nao iumi wanwan savve followim Psalm 119:36, 37?

¹² Taem iumi followim toktok bilong God iumi savve kasem strong for deal witim olketa test wea iumi feisim long laef. (Psalm 119:33-40) Long hambol wei iumi luk aotem direction bilong Jehovah mekem iumi savve followim law bilong hem “witim full heart.” (Psalm 119:33, 34) Olsem man wea raetem datfala psalm, iumi askem God: “Mekem heart bilong mi laekem olketa reminder bilong iu, and no for kasem samting for seleva,” wea savve minim “raverave profit.” (Psalm 119:36; footnote) Olsem aposol Paul, iumi “duim evri samting long honest wei.” (Hebrews 13:18) Sapos wanfala boss laekem iumi for duim samting wea no honest, iumi mas no fraet and mas followim direction bilong God—and Jehovah evritaem blessim man wea duim olsem. Tru nao, God helpem iumi for kontrolem olketa feeling for laekem nogud samting. Dastawe iumi mas prea olsem: “Mekem eye bilong mi no lukim iusles samting.” (Psalm 119:37) Iumi no laek for ting long samting wea God heitim olsem samting wea gud. (Psalm 97:10) Tufala samting wea disfala prea savve helpem iumi for stap klia from, hem pornography and spiritism.—1 Corinthians 6:9, 10; Revelation 21:8.

13. Hao nao olketa disaepol bilong Jesus wea kasem persecution kasem strong for no fraet for givim witness?

¹³ Taem iumi garem strefala savve saed long toktok bilong God, iumi feel strong and no fraet for givim witness. (Psalm 119:41-48) And iumi needim fasin for no fraet for ‘ansarem wan wea tok daonem iumi.’ (Psalm 119:42) Samfala taem, maet iumi olsem olketa disaepol bilong Jesus wea kasem persecution, wea prea olsem: “Jehovah, . . . givim paoa for olketa slave bilong iu gohed for talemaot toktok bilong iu and no fraet.” Wanem nao kamaot from datwan? “Evriwan fulap witim holy spirit and gohed for talemaot toktok bilong God witim fasin for no fraet.” Datfala Sovereign Lord savve mekem iumi tu no fraet for talemaot toktok bilong hem.—Acts 4:24-31.

14. Wanem nao helpem iumi for givim witness and no fraet, olsem Paul hem duim?

¹⁴ Bae iumi no fraet and no shame for givim witness sapos iumi barava tinghae long “toktok bilong truth” and ‘followim law bilong God evritaem.’ (Psalm 119:43, 44) Wei for evritaem studyim Word bilong God redim iumi for ‘storyim olketa reminder bilong hem front long olketa king.’ (Psalm 119:46) And tu, prea and spirit bilong Jehovah bae helpem iumi talem samting wea fitim and for talem long stretfala wei. (Matthew 10:16-20; Colossians 4:6) Paul hem no fraet for storyim olketa reminder bilong God long olketa ruler long taem bilong hem. Olsem example, hem witness long Roman Governor Felix, wea “lisin taem hem storyim wei for biliv long Christ Jesus.” (Acts 24:24, 25) Paul hem witness tu long Governor Festus and King Agrippa. (Acts 25:22–26:32) Witim help bilong Jehovah, iumi tu savve no fraet for givim witness and no “shame long gud nius.”—Romans 1:16.

Word Bilong God Comfortim Iumi

15. Hao nao Word bilong God savve comfortim iumi taem nara pipol tok spoelem iumi?

¹⁵ Word bilong Jehovah evritaem givim comfort long iumi. (Psalm 119:49-56) Samfala taem iumi barava needim comfort. Nomata iumi no fraet for tok aot olsem olketa Witness bilong Jehovah, samfala taem “olketa wea praod”—wea nating respectim God—‘barava tok spoelem iumi.’ (Psalm 119:51) Bat taem iumi prea, maet iumi rememberim olketa gud samting wea Word bilong God storyim, and datwan mekem iumi ‘kasem comfort.’ (Psalm 119:52) Taem iumi prea strong long Jehovah maet iumi rememberim wanfala Bible law or principle wea givim iumi comfort and strong wea iumi needim taem iumi kasem hevi.

16. Nomata olketa servant bilong God kasem persecution, olketa no duim wanem?

¹⁶ Olketa praod pipol hia wea tok spoelem man wea raetem datfala psalm hem olketa Israelite wea dedicate long God. Datwan barava nogud tumas! Bat iumi laek for difren from olketa and disaed strong for nating lusim law bilong God. (Psalm 119:51) Taem olketa servant bilong God kasem persecution from olketa Nazi and olketa nara sekson, plande thousand bilong olketa nating willing for lusim olketa law and principle wea stap insaed Word bilong God. (John 15:18-21) And hem no wanfala hevi for obeyim Jehovah, from olketa law bilong hem olsem olketa song wea comfortim iumi.—Psalm 119:54; 1 John 5:3.

Thankiu for Toktok Bilong Jehovah

17. Wei for tinghae long toktok bilong God muvim iumi for duim wanem?

¹⁷ Iumi showimaot thankiu for toktok bilong God taem iumi live followim datwan. (Psalm 119:57-64) Man wea raetem datfala psalm hem ‘promis for followim toktok bilong Jehovah,’ and nomata ‘long midolnaet, hem getap for talem thankiu long God for olketa judicial disison bilong Hem wea raeteous.’ Sapos iumi wekap long naet, hem barava nambawan taem for talem thankiu long God long prea! (Psalm 119:57, 62) Wei wea iumi tinghae long toktok bilong God muvim iumi for luk aotem teaching bilong hem and mekem iumi hapi for ‘fren witim olketa wea fraet long Jehovah’—olketa wea garem bigfala respect for God. (Psalm 119:63, 64) No eni fren long disfala earth hem moabeta!

18. Hao nao Jehovah ansarem olketa prea bilong iumi taem ‘olketa rope bilong olketa wea wicked stap raonem iumi’?

¹⁸ Taem iumi prea from heart and long hambol wei askem Jehovah for teachim iumi, iumi ‘mekem feis bilong hem soft’ from iumi laekem God appruvim iumi. Iumi barava need for prea taem ‘olketa rope bilong olketa wea wicked stap raonem iumi.’ (Psalm 119:58, 61) Jehovah savve katem rope bilong olketa enemy mekem iumi free for gohed long waka bilong iumi for preachim Kingdom and mek disaepol. (Matthew 24:14; 28:19, 20) Iumi lukim hao diswan hem tru long staka kantri wea gavman tambuim waka bilong iumi.   

Garem Faith Long Toktok Bilong God

19, 20. Hao nao hem savve gud samting for safa?

¹⁹ Faith long God and toktok bilong hem helpem iumi for stand strong thru long hard taem and for gohed duim will bilong hem. (Psalm 119:65-72) Nomata olketa wea praod ‘tok spoelem hem witim olketa laea story,’ man wea raetem psalm hem sei: “Hem gud samting for mi safa.” (Psalm 119:66, 69, 71) Hao nao hem savve gud samting for wanfala servant bilong Jehovah for safa?

²⁰ Taem iumi safa, iumi barava prea strong long Jehovah, and datwan mekem iumi fren gud go moa witim hem. Maet iumi iusim moa taem for studyim Word bilong God and trae moa hard for followim datwan. Diswan savve mekem laef bilong iumi moa hapi. Bat waswe sapos taem iumi safa, datwan showimaot iumi garem samfala nogud fasin olsem fasin for praod or no patient? Thru long strongfala prea and help from Word bilong God and spirit bilong hem, iumi savve winim kaen fasin olsem and win for ‘werem datfala niu fasin’ long wei wea moa big. (Colossians 3:9-14) And tu, taem iumi stand strong nomata iumi safa, datwan strongim faith bilong iumi. (1 Peter 1:6, 7) Paul kasem gud samting from olketa hard taem wea hem kasem bikos datwan mekem hem depend moa long Jehovah. (2 Corinthians 1:8-10) Waswe, iumi letem wei wea iumi safa teachim iumi gudfala samting?

Trust Long Jehovah Evritaem

21. Wanem nao happen taem God mekem olketa wea praod kasem shame?

²¹ Toktok bilong God givim iumi gudfala reason for trust long Jehovah. (Psalm 119:73-80) Sapos iumi barava trustim Creator bilong iumi, no eni reason for iumi feel shame. Bat samting wea nara pipol duim nao mekem iumi needim comfort and maet mekem iumi laek prea olsem: “Olketa wea praod mas kasem shame.” (Psalm 119:76-78) Taem Jehovah mekem olketa man olsem kasem shame, diswan showimaot klia olketa wicked samting olketa duim and hem mekhae long holy nem bilong God. Iumi savve sure hao olketa wea persecutim pipol bilong God no kasem eni samting. Olsem example, no enitaem bifor, and long future tu, olketa savve finisim Olketa Jehovah’s Witness, wea trust long God witim full heart bilong olketa.—Proverbs 3:5, 6.

22. Hao nao man wea raetem datfala psalm hem “olsem wanfala botol wea olketa wakem from skin bilong animal bat wea stap insaed smoke”?

²² Toktok bilong God hem strongim wei wea iumi trust long hem taem iumi kasem persecution. (Psalm 119:81-88) From olketa wea praod persecutim man wea raetem datfala psalm, hem feel olsem “botol wea olketa wakem from skin bilong animal bat wea stap insaed smoke.” (Psalm 119:83, 86) Long taem bilong Bible, pipol iusim botol wea olketa wakem from skin bilong animal for keepim wata, wine, and olketa nara samting insaed. Taem olketa no iusim, olketa botol hia savve kamap drae and strong sapos hem hange klosap long fire or insaed rum wea fulap witim smoke. Waswe, enitaem hard taem or persecution mekem iu feel olsem wanfala botol wea stap insaed smoke? Sapos olsem, trust long Jehovah and prea olsem: “From loving-kaeness bilong iu mekem mi stap laef, mekem mi savve followim olketa reminder from mouth bilong iu.”—Psalm 119:88.

23. Wanem nao iumi laenem taem iumi reviewim Psalm 119:1-88, and wanem nao maet iumi askem iumiseleva taem iumi luk forward for studyim Psalm 119:89-176?

²³ Iumi lukim from fasfala haf bilong Psalm 119 hao Jehovah hem showimaot loving-kaeness long olketa servant bilong hem bikos olketa trustim toktok bilong hem and lovem olketa law, reminder, and komandment bilong hem. (Psalm 119:16, 47, 64, 70, 77, 88) Hem hapi hao olketa wea lovem hem gohed for luk aot followim toktok bilong hem. (Psalm 119:9, 17, 41, 42) Taem iu luk forward for studyim nara haf bilong disfala psalm wea barava naes, maet iu askem iuseleva, ‘Waswe, mi really letem toktok bilong Jehovah torchim road bilong mi?’

Hao Nao Bae Iu Ansa?

• Trufala hapi hem depend long wanem samting?

• Hao nao toktok bilong Jehovah hem keepim iumi klin long spiritual wei?

• Hao nao toktok bilong God savve comfortim and strongim iumi?

• Why nao iumi shud garem faith long Jehovah and toktok bilong hem?

[Olketa Piksa long page 11]

Ruth, Rahab, and olketa young Hebrew wea stap olsem prisoner long Babylon ‘gohed for luk aot followim toktok bilong God’

[Piksa long page 12]

Paul no fraet for ‘storyim olketa reminder bilong God front long olketa king’