“Mi Barava Lovem Law Bilong Iu!”

“Mi barava lovem law bilong iu! Long full day mi ting long hem.”—PSALM 119:97.

1, 2. (a) Man wea raetem Psalm 119 hem feisim wanem samting? (b) Wanem nao hem duim, and why nao olsem?

MAN wea raetem Psalm 119 hem feisim wanfala hardfala test. Olketa enemy wea praod and lusim law bilong God tok spoelem hem and talem staka laea samting againstim hem. Olketa prince planim nogud samting and persecutim hem. Wicked pipol hipap raonem hem and talem bae olketa killim hem dae. Evri samting hia mekem hem ‘no sleep from hem sorre tumas.’ (Psalm 119:9, 23, 28, 51, 61, 69, 85, 87, 161) Nomata hem feisim disfala test, man wea raetem psalm hem sing olsem: “Mi barava lovem law bilong iu! Long full day mi ting long hem.”—Psalm 119:97.

² Hao nao law bilong God savve kamap samting wea comfortim man wea raetem psalm? From hem sure Jehovah interest long hem, datwan strongim hem. Wei wea hem savve long olketa gudfala samting wea kamaot from wei for followim olketa law wea God givim, datwan mekem hem hapi, nomata hem kasem hard taem from olketa wea againstim hem. Hem luksavve hao Jehovah showimaot kaenfala fasin long hem. And tu, taem hem followim law bilong God, datwan mekem hem moa wise winim olketa enemy bilong hem and datwan sevem hem tu. Wei for obeyim law hem mekem hem garem peace and klinfala conscience.—Psalm 119:1, 9, 65, 93, 98, 165.

3. Why nao hem hard for olketa Christian distaem garem living wea followim olketa standard bilong God?

³ Samfala servant bilong God distaem gohed feisim olketa hardfala test saed long faith bilong olketa. Maet iumi no feisim sem samting wea putim laef bilong iumi long danger olsem man wea raetem psalm, bat iumi stap long “olketa nogud taem wea hard for deal witim.” Evriday iumi stap witim pipol wea no savve long tingting bilong God abaotem wanem nao gud and wanem nao nogud. Goal bilong olketa hem for aftarem samting for olketa seleva and material samting, tingting bilong olketa hem bighed and no showimaot respect. (2 Timothy 3:1-5) Olketa young wan mas evritaem deal witim olketa samting wea testim faithful fasin bilong olketa. From diswan, hem hard for iumi gohed keepim wei for lovem Jehovah and wei for lovem samting wea stret. Hao nao iumi savve protectim iumi seleva?

4. Hao nao man wea raetem psalm showimaot hem tinghae long olketa law bilong God, and why nao olketa Christian shud duim sem samting tu?

⁴ Samting wea helpem man wea raetem psalm for stand strong againstim olketa hard samting hem from hem iusim taem for duim deep study and ting raonem olketa law bilong God. Datwan nao mekem hem lovem law bilong God. Tru tumas, klosap evri verse bilong Psalm 119 hem storyim samfala difren part bilong law bilong Jehovah.a Olketa Christian distaem no stap anda long datfala Law bilong Moses wea God givim for nation bilong Israel bifor. (Colossians 2:14) Nomata olsem, olketa principle insaed long datfala Law hem fitim distaem tu. Long sem wei wea olketa principle hia givim comfort long man wea raetem disfala psalm, olketa savve givim comfort tu long olketa servant bilong God wea stragol for deal witim olketa hard samting wea kamap long living distaem.

5. Wanem nao olketa part long Law bilong Moses wea iumi bae story raonem?

⁵ Bae iumi lukim encouragement wea iumi savve kasem from thrifala part long Law bilong Moses: arrangement bilong Sabbath, wei for kolektem leftova samting, and komandment wea stopem fasin for kavet. Long thrifala samting hia, bae iumi lukim hao wei for minim olketa principle wea insaed long olketa law hia barava important, and diswan bae helpem iumi for deal witim olketa hard samting and hevi wea iumi kasem distaem.

Satisfaem Spiritual Need Bilong Iumi

6. Wanem nao olketa barava important need wea each wan long iumi garem?

⁶ Jehovah creatim iumi olketa man for needim samfala important samting. Olsem example, for garem gudfala health man needim kaikai, wata, and ples for stap. Nomata olsem, olketa man garem “spiritual need” tu, and hem mas satisfaem datfala need. Sapos hem no duim datwan, hard for hem really hapi. (Matthew 5:3) From Jehovah savve hem barava important for olketa man satisfaem disfala need, hem komandim pipol bilong hem for no duim waka wea olketa duim evritaem and iusim wanfala day evri week for satisfaem datfala spiritual need.

7, 8. (a) Hao nao God markem Sabbath day hem difren from olketa nara day? (b) Wanem nao goal bilong Sabbath arrangement?

⁷ Sabbath arrangement hem mekhae long wei wea olketa spiritual samting hem important tumas. Firstaem wea datfala word “sabbath” stap insaed Bible, hem taem Jehovah provaedem manna insaed long wilderness. Jehovah hem talem olketa Israelite for mas kolektem datfala bread wea hem provaedem long mirakol wei for sixfala day. Long mek-six day, olketa mas kolektem “bred for tufala day,” bikos long mek-seven day, hem bae no provaedem eni manna. Mek-seven day bae hem “wanfala holy sabbath for Jehovah,” wea each wan mas stap long haos bilong hemseleva. (Exodus 16:13-30) Wanfala long Tenfala Komandment hem for olketa mas no duim eni waka long Sabbath. Datfala day hem mas holy. Eniwan wea no keepim diswan, hem mas dae.—Exodus 20:8-11; Numbers 15:32-36.

⁸ Law bilong Sabbath hem showimaot wei wea Jehovah lukaftarem physical and spiritual saed bilong pipol bilong hem. Jesus hem sei: “God putim Sabbath for helpem olketa man.” (Mark 2:27) Hem givim chance long olketa Israelite for rest, and tu, hem givim chance long olketa for fren gud witim hem and showimaot love for Creator bilong olketa. (Deuteronomy 5:12) Hem wanfala day for duim olketa spiritual samting nomoa, olsem wei wea famili duim worship, prea, and ting raonem Law bilong God. Datfala arrangement hem for protectim olketa Israelite from wei for iusim full taem and strong bilong olketa for aftarem olketa material samting. Sabbath hem remindim olketa hao wei for fren witim Jehovah nao hem main important samting long laef bilong olketa. Jesus talem moa disfala principle wea no savve change taem hem sei: “Olketa raetem finis, ‘Man mas laef, no from bred nomoa, bat from evri toktok wea kamaot from mouth bilong Jehovah.’”—Matthew 4:4.

9. Wanem nao olketa Christian lanem from Sabbath arrangement?

⁹ Nomata pipol bilong God distaem no anda long datfala Law for keepim sabbath for 24-hour day, datfala Sabbath arrangement hem no interesting samting bilong history nomoa. (Colossians 2:16) Sabbath arrangement hem remindim iumi hao iumi mas putim olketa spiritual samting long first ples long laef bilong iumi. Wei for busy tumas long olketa material samting or hapitaem mas no start for kamap moa important winim olketa spiritual samting. (Hebrews 4:9, 10) So hem gud sapos iumi askem iumiseleva: “Wanem nao main samting long laef bilong mi? Waswe, mi putim study, prea, wei for attendim olketa Christian meeting, and for join insaed waka for preachim gud nius bilong Kingdom olsem first samting long laef bilong mi? Or waswe, mi busy long olketa nara samting and mi no garem taem for duim olketa spiritual samting hia?” Sapos iumi putim olketa spiritual samting firstaem long laef bilong iumi, Jehovah promisim iumi bae iumi no short long olketa samting wea iumi needim long laef.—Matthew 6:24-33.

10. Wanem gudfala samting nao iumi savve kasem from wei for markem taem for duim olketa spiritual samting?

¹⁰ Wei for iusim taem for studyim Bible and olketa Bible pablikeson, and tu, for tingting strong long wanem iumi lanem savve helpem iumi for fren witim Jehovah long bigfala wei moa. (James 4:8) Susan, wea markem taem for studyim Bible evritaem for samting olsem 40 year finis hem talem hao long start mi no mas interest long hem and hem no isi. Bat, taem hem readim moa samting, hem start for barava enjoyim. Distaem hem savve sorre sapos eni samting happen and hem no savve duim study bilong hemseleva. Hem sei: “Wei for study hem helpem mi for savve long Jehovah and ting long hem olsem wanfala Dadi. Mi savve trustim hem, depend long hem, and feel free for story witim hem insaed long prea. Hem nambawan samting for lukim wei wea Jehovah barava lovem olketa servant bilong hem, wei wea hem lukaftarem mi, and wei wea hem helpem mi.” Tru tumas, iumi savve kasem bigfala hapi sapos iumi evritaem satisfaem olketa spiritual need bilong iumi!

Law Bilong God for Kolektem Olketa Leftova Samting

11. Wanem nao arrangement for kolektem leftova samting?

¹¹ Mek-tu part long Law bilong Moses wea showimaot God hem kea for pipol bilong hem nao right wea olketa garem for kolektem olketa leftova samting. Jehovah givim komand for taem eni farmer long Israel hem harvestim garden bilong hem, olketa shud letem poor pipol kolektem kaikai wea olketa wakman leavim long garden. Olketa farmer mas no harvestim full garden, and olketa mas no kolektem tu eni leftova grape and olive. Sapos olketa forgetim eni parcel grain, olketa mas no go bak for tekem. Disfala nambawan arrangement hem for poor pipol, olketa stranger, pikinini wea no garem dadi and mami, and olketa widow woman. Hem tru olketa hia mas waka hard for kolektem leftova samting, bat from disfala arrangement olketa no need for go begim narawan.—Leviticus 19:9, 10; Deuteronomy 24:19-22; Psalm 37:25.

12. Datfala arrangement for kolektem leftova samting hem mekem olketa farmer garem wanem chance?

¹² Law for kolektem leftova samting no talem haomas kaikai nao olketa farmer mas leavim for poor pipol. Olketa farmer nao mas disaedem sapos grain wea olketa leavim bihaen hem lelebet or staka. Taem God mekem disfala arrangement, diswan teachim olketa for showimaot willing fasin for give. Hem mekem olketa farmer garem chance for showimaot olketa tinghae long Man wea provaedem harvest, bikos “man wea kaen long poor wan hem givim glory long [Man wea wakem hem].” (Proverbs 14:31) Boaz hem wanfala man wea duim datwan. Hem mek sure, Ruth, wanfala widow wea kolektem leftova samting long garden bilong hem kasem inaf grain from garden bilong hem. Jehovah givim bigfala reward long Boaz from hem showimaot willing fasin for give.—Ruth 2:15, 16; 4:21, 22; Proverbs 19:17.

13. Datfala law from bifor saed long wei for kolektem leftova samting hem teachim iumi wanem samting?

¹³ Datfala principle insaed long law abaotem wei for kolektem leftova samting hem no change. Jehovah expectim olketa servant bilong hem for showimaot willing fasin for give, especially long olketa wea poor. Taem iumi give long bigfala wei, bae iumi kasem blessing wea moa big. Jesus hem sei: “Gohed for give, and pipol bae give long iufala. Olketa bae givim plande gudfala samting, wea olketa pressim daon, seksekem and putim samfala moa, gogo hem kapsaet. From wei wea iufala give long olketa, olketa bae duim sem samting long iufala tu.”—Luke 6:38.

14, 15. Hao nao iumi savve showimaot willing fasin for give, and wanem gudfala samting nao iumi and olketa wea iumi helpem savve kasem?

¹⁴ Aposol Paul hem encouragem iumi for “duim gud samting long evriwan, bat main wan nao long olketa wea garem sem faith olsem iumi.” (Galatians 6:10) So, iumi givim spiritual help long olketa Christian brata taem faith bilong olketa kasem test. Bat maet olketa needim narafala help tu, olsem example, for tekem olketa long Kingdom Hall or go long market for olketa. Waswe, samfala long kongregeson bilong iu olo, sik, or no savve lusim haos, wea bae hapi tumas for iu go visitim olketa or helpem olketa? Sapos iumi traem best for luksavve long olketa need olsem, then Jehovah savve iusim iumi for ansarem olketa prea bilong samwan wea garem need. Wei for lukaftarem narawan hem wanfala Christian responsibility, and man wea givim help hem kasem gudfala samting tu. Wei for showimaot trufala love for narafala brata or sista hem mekem iumi kasem bigfala hapi and barava satisfae, and hem bae mekem Jehovah appruvim iumi.—Proverbs 15:29.

¹⁵ Narafala important wei wea olketa Christian savve showimaot wei for no selfish hem for iusim taem and strong bilong olketa for story abaotem olketa plan bilong God. (Matthew 28:19, 20) Man wea kasem hapi from hem helpem samwan for dedicatem laef bilong hem long Jehovah, hem barava savve gud long disfala samting wea Jesus talem: “Moa hapi kamaot from wei for givim samting winim wei for kasem samting.”—Acts 20:35.

Keakea Long Fasin for Kavet

16, 17. Mek-ten kommandment hem tambuim wanem samting, and why nao olsem?

¹⁶ Mek-thri part long Law bilong God for Israel wea iumi bae storyim hem mek-ten komandment, wea tambuim fasin for kavet. Law hem sei: “Iu mas no kavetem haos bilong neiba bilong iu. Iu mas no kavetem waef bilong neiba bilong iu, or slave man or slave gele or buluka or donkey or eni samting bilong neiba bilong iu.” (Exodus 20:17) No eni man savve mek sure pipol obeyim kaen komandment olsem bikos no eni man savve readim heart bilong narawan. Nomata olsem, datfala komandment hem mekem datfala Law bilong God hem winim eni law bilong olketa man. Datfala komand mekem each Israelite luksavve hem mas givim ansa long Jehovah wea savve long olketa feeling insaed long heart. (1 Samuel 16:7) And tu, disfala komandment hem showimaot wanem nao savve muvim man for duim olketa barava nogud samting.—James 1:14.

¹⁷ Law wea tambuim fasin for kavet hem encouragem pipol bilong God for stap klia long wei for lovem tumas material samting, greedy fasin, and wei for komplen abaotem living bilong olketa. Diswan protectim olketa tu from feeling for laek steal or duim dirty fasin. Samfala pipol garem olketa material samting wea iumi laekem or winim iumi long samfala wei. Bat, sapos iumi no kontrolem tingting bilong iumi long diswan, bae iumi no hapi and feel jealous long narawan. Bible hem sei hao fasin for kavet hem showimaot man “followim krangge tingting.” Hem moabeta for iumi no kavet.—Romans 1:28-30.

18. Wanem kaen tingting nao big tumas long world distaem, and wanem nogud samting nao savve kamaot from datwan?

¹⁸ Main tingting wea staka pipol garem long world distaem hem wei for lovem tumas material samting and for laek winim narawan. Olketa bisnis iusim wei for advertise for mekem pipol laekem olketa niu samting, and tu, olketa mekem pipol tingse olketa hapi sapos olketa kasem olketa niu samting hia. Kaen tingting olsem nao Law bilong Jehovah hem strong for againstim. Narakaen tingting wea klosap semsem hem for duim eni samting for win nomata wanem kamaot from datwan, and for hipimap staka riches. Aposol Paul talem disfala warning: “Olketa wea laekem tumas for kamap rich bae foldaon insaed test and trap and wei for barava wantem olketa samting wea krangge and kosim pain, wea gogo barava spoelem man. From fasin for lovem selen hem start bilong plande nogud samting, and taem samfala barava aftarem datfala love, olketa lusim faith and mekem olketa seleva for kasem staka trabol.”—1 Timothy 6:9, 10.

19, 20. (a) Olketa wea lovem law bilong Jehovah barava tinghae long olketa wanem samting? (b) Wanem samting nao bae iumi storyim long nextfala article?

¹⁹ Olketa wea lovem law bilong God luksavve long olketa danger and kasem protection from feeling for laekem tumas material samting. Olsem example, man wea raetem psalm hem prea olsem long Jehovah: “Mekem heart bilong mi for laekem olketa reminder bilong iu, no for laek kasem samting for seleva. Law bilong mouth bilong iu hem gudfala samting for mi, winim plande thousand pis gold and silver.” (Psalm 119:36, 72) Taem iumi barava bilivim olketa toktok hia, datwan bae helpem iumi for garem balance wea iumi needim and stap klia long olketa trap olsem wei for lovem tumas material samting, greedy fasin, and for no satisfae long living bilong iumi. Key for kasem nambawan samting hem for garem “fasin for lovem God,” no wei for hipimap staka material samting.—1 Timothy 6:6.

²⁰ Olsem olketa principle insaed long datfala Law wea Jehovah givim long Moses for nation bilong Israel hem barava helpem olketa, iumi wea stap long olketa hardfala taem distaem kasem barava gud samting from olketa principle hia tu. Taem iumi gohed for followim long wei wea moa big olketa principle long laef bilong iumi, datwan mekem iumi barava minim olketa, lovem olketa, and kamap moa hapi. Iumi savve lanem staka gudfala samting from datfala Law wea stap kam kasem taem bilong iumi, and iumi lukim diswan from living and experience bilong pipol wea Bible story abaotem. Iumi bae storyim samfala long next article.

[Footnotes]

Hao Nao Bae Iu Ansa?

• Why nao man wea raetem Psalm 119 hem lovem law bilong Jehovah?

• Wanem nao olketa Christian savve lanem from arrangement bilong Sabbath?

• Wanem gudfala samting from law bilong God for kolektem leftova samting nao hem helpem iumi kam kasem distaem?

• Hao nao komand wea tambuim fasin for kavet hem protectim iumi?

[Piksa long page 8]

Law bilong Sabbath hem mekhae long wanem?

[Piksa long page 10]

Wanem nao iumi lanem from law for kolektem leftova samting?