Tru Nao, Iu Savve Hapi

HEM no isi for kasem trufala hapi wea no savve finis. Main reason hem bikos pipol evritaem lukaotem hapi bat olketa depend long olketa samting wea no savve mekem man hapi. Bae hem gud tumas sapos olketa garem wanfala fren wea fit and wea olketa savve trustim for helpem olketa luksavve long barava samting wea bae mekem man hapi!

Bible nao savve givim iumi datfala help wea iumi needim. Tingim wanfala buk long Bible—Psalms. Disfala buk garem 150 holy song for Jehovah God, wea King David from Israel bifor raetem samting olsem 75 long olketa. Bat samting wea moa important winim wei for savve hu nao olketa wea raetem diswan, hem for savve hao best Fren bilong olketa man, Jehovah, hem nao wan wea muvim olketa man for raetem disfala buk. Dastawe, iumi savve sure datfala buk garem direction from Jehovah wea savve helpem iumi and wea showim iumi hao for hapi.

Olketa man wea raetem Psalms bilivim hao hapi hem kam from wei wea man hem fren gud witim God. Wanfala long olketa hem raet: “Hapi nao man wea fraet long Jehovah.” (Psalm 112:1) No eni wei for fren midolwan olketa man, no eni material samting, and no eni samting wea man seleva duim savve mekem hem kasem datfala hapi wea man savve kasem from wei wea hem stap midolwan “pipol wea God bilong olketa hem Jehovah.” (Psalm 144:15) Laef bilong plande servant bilong God distaem pruvim hao diswan hem tru.

Wanfala example hem Susanne, wea hem winim 40 year.a Hem sei: “Distaem, plande pipol joinim olketa grup wea laek kasem sem goal or for share tugeta long samting wea olketa interest long hem. Bat, plande taem, olketa nating ting long evriwan insaed long datfala grup olsem fren bilong olketa. Pipol bilong Jehovah no olsem. Wei wea iumi lovem Jehovah mekem iumi lovem each other. Iumi hapi for stap witim pipol bilong God, nomata iumi long eni ples long world. Disfala wei for wan mind hem barava mekem laef bilong iumi interesting. Iumi nomoa garem olketa fren from olketa difren community and living and plande difren kantri. From heart bilong mi, mi savve talem hao wei for stap midolwan long pipol bilong Jehovah nao mekem man hapi.”

Maree, wea born long Scotland, hem lanem hao for man savve hapi, hem barava important for fren gud witim Jehovah. Hem sei: “Bifor mi lanem truth from Bible mi laekem tumas for lukluk long kaen movie wea mekem man fraet. Bat long naet mi no savve sleep sapos mi no holem wanfala cross from mi tingse datwan bae protectim mi from olketa ghost, wea hem nao plande movie hia hem abaotem. Bat taem mi lanem truth and no lukluk moa long olketa movie olsem, wei wea mi fren witim Jehovah mekem mi no savve fraet taem mi sleep, from mi hapi for servem wanfala God wea hem garem moa paoa winim olketa demon or olketa ghost wea man tingse hem stap.”

Wei for Trust Long Jehovah Mekem Man Hapi

Iumi no garem eni reason for daotem hao Creator bilong iumi hem olmaeti and wisdom bilong hem no garem spialaen. From David savve hem barava fit for trustim Jehovah evribit and depend long Hem for protection, hem raet olsem: “Hapi nao man wea putim trust bilong hem long Jehovah.”—Psalm 40:4.

Maria hem sei: “Mi lanem long Spain and long olketa nara ples, hao taem iumi duim olketa samting followim wei wea Jehovah laekem, nomata iumi feel olsem iumi laek duim difren samting, best samting nao kamaot from datwan. Diswan mekem iumi hapi bikos wei bilong Jehovah hem evritaem best wei.”

From samting wea hem experiencem, Andreas, wea hem wanfala Christian elder wea hem serve long samfala difren kantri long Europe, savve tu hao iumi fit for trustim Jehovah. Hem sei: “Big brata bilong mi wea no garem sem biliv, hem barava affectim mi taem mi young and encouragem mi for aftarem waka wea garem big pei. Hem sorre fogud taem mi join insaed long full-taem ministry and mi no depend long kaen waka wea gogo bae mekem man kasem selen taem hem retire. Taem mi duim full-taem service, mi evritaem garem samting wea mi needim, and mi kasem olketa blessing wea olketa narawan laekem tumas for kasem.”

Long 1993, Felix kasem invitation for help buildim branch office bilong Olketa Jehovah’s Witness long Selters, Germany. Taem datfala waka hem finis, hem kasem invitation for kamap member bilong datfala Bethel famili. Hao nao hem feel? Hem sei: “Nomata mi no barava feel sure, mi acceptim datfala invitation. Bat distaem mi stap long hia for klosap tenfala year, and mi barava feel sure Jehovah hem ansarem olketa prea bilong mi. Hem savve wanem nao best samting for mi. Taem mi trustim hem evribit and letem hem leadim mi, mi givim hem chance for showim mi wanem nao hem laekem mi for duim.”

Susanne, wea iumi storyim finis, laek for serve olsem wanfala pioneer, wea hem nao full-taem minister, bat hem no isi for hem kasem part-taem waka. Bihaen hem trae for faendem waka for wanfala year, hem duim samting wea showimaot hem barava trustim Jehovah. Hem sei: “Mi givim application bilong mi for duim regular pioneer waka. Mi garem inaf selen for mi gohed for wanfala month. And staka samting hem happen long datfala month! Ministry bilong mi mekem mi barava hapi, bat nomata staka boss interviewim mi for waka, mi no kasem eni waka. Bat, olsem Jehovah hem promisim finis, hem no lusim mi. Long last day bilong datfala month, mi kasem waka. Long datfala taem nao mi savve hao mi barava fit for trustim Jehovah! Disfala samting wea happen taem mi just start long full-taem service mekem mi garem hapi laef wea mekem mi satisfae.”

Wei for Acceptim Kaonsel From God Mekem Man Hapi

King David duim samfala serious mistek. Samfala taem, hem needim wise kaonsel. Waswe, iumi willing olsem David for acceptim kaonsel and instruction?

Wanfala taem, Aida, from France, luksavve hem duim wanfala serious mistek. Hem sei olsem abaotem datfala taem: “First samting wea mi tingim hem for mekem mi fren bak moa witim Jehovah.” Hem askem olketa Christian elder for helpem hem. From hem duim full-taem ministry for winim 14 year, distaem hem sei: “Hem barava mekem mi hapi for savve Jehovah forgivim mistek bilong mi!”

Wei wea iumi willing for acceptim kaonsel from God savve stopem iumi bifor iumi duim wanfala mistek. Judith explainim diswan olsem: “Taem mi 20 year, mi laekem tumas wanfala German man wea mitufala waka tugeta. Datfala man traem best bilong hem for switim mi. Pipol respectim hem, hem garem nambawan waka, and hem marit finis! Mi luksavve mi mas mekem disison. Bae mi obeyim olketa law bilong Jehovah, or bae mi barava rejectim Hem. Mi storyim diswan long dadi and mami bilong mi. Dadi bilong mi hem barava tok stret and remindim mi wanem nao Jehovah expectim mi for duim. Hem no hol bak—and datwan nao samting wea mi barava need for herem! Nomata olsem, heart bilong mi lukaotem excuse for no followim olketa principle bilong God. For plande week mami bilong mi storyim long mi evri naet hao olketa law bilong God barava important and savve sevem laef bilong iumi. Mi barava hapi hao gogo, mi lovem Jehovah moa witim full heart bilong mi. Wei wea Jehovah disciplinem and teachim mi mekem mi barava hapi. Mi duim staka year long full-taem service finis wea mekem mi feel satisfae and mi maritim wanfala gud Christian hasband wea lovem mi and lovem Jehovah witim full heart bilong hem.”

Hem klia tumas, olketa experience olsem strongim hao disfala toktok bilong David hem important and tru: “Hapi nao man wea kasem forgiveness for sin bilong hem. Hapi nao man wea Jehovah no tingim sin bilong hem.”—Psalm 32:1, 2.

Wei for Tingim Narawan Mekem Man Hapi

David hem raet: ‘Hapi nao man wea tingim olketa man nating; long taem bilong bigfala trabol Jehovah bae sevem hem. Jehovah seleva bae protectim hem and keepim hem laef. Bae hem hapi.’ (Psalm 41:1, 2) Wanfala example wea showimaot stretfala wei for ting long olketa man nating, hem loving kea wea David showim long Mephibosheth, datfala cripple son bilong fren bilong David, Jonathan.—2 Samuel 9:1-13.

Marlies, wea hem missionary for 47 year finis, garem spesol chance for preach long pipol wea ranawe from olketa ples wea hem danger long Africa, Asia, and Eastern Europe. Hem sei: “Olketa pipol hia garem plande difren kaen problem and plande taem olketa feel olsem pipol lukdaonem and no acceptim olketa. For helpem pipol olsem hem evritaem mekem man hapi.”

Marina, wea winim 40 year, hem raet: “From mi singol, hem comfortim mi for savve olketa fren stap for helpem mi. Diswan muvim mi for encouragem nara pipol long wei for ringim olketa long telephone or raetem leta. Plande long olketa talem mi hao olketa tinghae long diswan. For helpem olketa narawan mekem mi hapi.”

Dimitar, wea hem samting olsem 25 year, hem sei: “Mami nomoa stap taem mi growap kam. Taem mi smol, mi hapi for garem wanfala Kongregeson Buk Study overseer wea tekem mi long ministry evri week for trainim mi. Kam kasem distaem, mi barava thankiu for wei wea hem no givap. Mi savve hao hem no isi evritaem for muvim mi for duim samting.” From hem tinghae long datfala help wea hem kasem bifor, distaem Dimitar helpem olketa narawan. Hem sei: “Wantaem evri month, or winim, mi trae for tekem wanfala young wan, and tu, wanfala olo witim mi long field ministry.”

Buk bilong Psalms storyim olketa nara samting tu wea savve mekem man hapi. Wanfala samting hem wei wea hem important for iumi depend long strong bilong Jehovah and no strong bilong iumiseleva. Hem sei: “Hapi nao olketa man wea kasem strong from [Jehovah].”—Psalm 84:5.

Corinna luksavve hao diswan hem tru. Hem muv go long wanfala kantri wea garem bigfala need long ministry. “Mi mas deal witim wanfala difren languis, kastom, and wei for tingting. Mi feel olsem mi stap long difren planet. Mi barava fraet for preach long disfala ples wea difren tumas long mi. Mi askem Jehovah for helpem mi, and from strong bilong hem nao mi fit for preach for full day long farawe territory. Gogo, for duim diswan hem olsem normal samting nomoa long mi. Mi startim plande Bible study, and mi gohed kasem gud samting from disfala experience. Mi lanem hao sapos iumi depend long Jehovah, iumi savve winim olketa samting wea luk olsem hem hard tumas.”

Tru nao, plande difren samting savve mekem iumi hapi, olsem wei for fren witim God and pipol bilong hem, wei for barava trustim Jehovah, acceptim kaonsel from hem, and wei for tingim olketa narawan. Taem iumi wakabaot followim olketa wei bilong Jehovah and obeyim olketa law bilong hem, iumi savve hapi from iumi kasem blessing bilong hem.—Psalm 89:15; 106:3; 112:1; 128:1, 2.

[Footnotes]

[Piksa long page 3]

Maria

[Piksa long page 4]

Maree

[Piksa long page 4]

Susanne and Andreas

[Piksa long page 6]

Corinna

[Piksa long page 6]

Dimitar